ግዕዝ
Home Formaciones Libros Biblioteca Ge'ez Contacto
Sinaxario · Nehase

9 de Nehase

አመ፡፱፡ለነሐሴ
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፤ አመ፡፱፡ለነሐሴ፡በዛቲ፡ዕለት፡ኮነ፡ሰማዕተ፡ቅዱስ፡አባ፡ኦሪ፡ወዝንቱ፡ቅዱስ፡እምውስተ፡ሀገረ፡ሰንጡፍ፡ወውእቱ፡ብዙኅ፡ምሕረት፡ወሣህል፡ወንጹሕ፡በሥጋሁ፡ወበነፍሱ፡ወብዙኀ፡ጊዜያተ፡ይሬኢ፡ራእየ፡መለኮታዊተ።
2ወአስተርእዮ፡ሎቱ፡እግዚእነ፡ኢየሱስ፡ክርስቶስ፡ሎቱ፡ስብሐት፤ ዲበ፡ምሥዋዕ፡ወከሠተ፡ሎቱ፡ምሥጢራተ፡ዘይፈቅድ።
3ወተሰምዐ፡ዜናሁ፡ለቅዱስ፡አባ፡ኦሪ፡ኀበ፡መኰንን፡ዓላዊ፡ዘሀገረ፡ነቅዩስ፡ወአብጽሖ፡ኀቤሁ፡ወይቤሎ፡ውግር፡ዕጣነ፡ለአማልክት፤ ወኢተኣዘዘ፡ሎቱ፡ወኢፈርሆ፡እምቍጥዓሁ፤ ወተቈጥዐ፡መኰንን፡ላዕሌሁ፡ወኰነኖ፡ኵነኔ፡ዓቢየ፡ወእምዝ፡ፈነዎ፡ኀበ፡ሀገረ፡እስክንድርያ፡ወበህየኒ፡ኰነንዎ፡ዓቢየ፡ኵነኔ፡ወገደፍዎ፡ውስተ፡ቤተ፡ሞቅሕ፡ወኮነ፡ይገብር፡ተአምራተ፡ወመንክራተ፡ዓበይተ፡ወፈውሰ፡ለድውያን፡ለእለ፡መጽኡ፡ኀቤሁ፡በአሚን፤ ወእምዝ፡ከለልዎ፡በሰይፍ፡ክሣዶ፡ክብርተ፡ወነሥአ፡አክሊለ፡ስምዕ፤ በረከቱ፡ትኩን፡ምስሌነ፡ለዓለመ፡ዓለም፡አሜን።
4ወበዛቲ፡ዕለት፡ተዝካሩ፡ለጲላጦስ፡ሊቀ፡ጳጳሳት፤ በረከቱ፡ትኩን፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡አዘኪርየ፡አእላፈ። እምእለ፡ተጸምዱከ፡ዘልፈ። ለለአነብብ፡ተወከፍ፡ዘንዴትየ፡መጽሐፈ። እንተ፡ረሰይከ፡እግዚኦ፡ጸሪቀ፡መበለት፡ውኩፈ። እምእለ፡አብኡ፡ብዑላን፡ዘተርፈ።

ነቢያት፡ቅዱሳን፡ወሐዋርያት፡ሰባኪያን። ሰማዕት፡ወጻድቃን፡ወመላእክት፡ትጉሃን። ደናግል፡ዓዲ፡ወመነኰሳት፡ኄራን። ባርኩ፡ባርኮ፡ጉባኤ፡ዛቲ፡መካን። እስከ፡አረጋዊ፡ልሒቅ፡ወንኡስ፡ሕፃን።

ለዘጸሐፎ፡በክርታስ፡ወለዘአጽሐፎ፡እንዘ፡ይደርስ። ለዘአንበቦ፡ወለዘተርጐሞ፡በልሳን፡ሐዲስ። ወለዘሰምዐ፡ቃሎ፡በዕዝነ፡መንፈስ። በጸሎተ፡እሙ፡ማርያም፡ዐራቂተ፡ኵሉ፡እምባእስ። ኅቡረ፡ይምሐረነ፡ኢየሱስ፡ክርስቶስ።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ።