Sinaxario · Nehase
7 de Nehase
አመ፡፯፡ለነሐሴ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፯፡ለነሐሴ፡በዛቲ፡ዕለት፡ፈነወ፡እግዚአብሔር፡መልአኮ፡ገብርኤልሃ፡ወዜነዎ፡ለኢያቄም፡ጻድቅ፡ወይቤሎ፡ናሁ፡ብእሲትከ፡ሐና፡ትጸንስ፡ወትወልድ፡ለከ፡ወለተ፡ወይከውን፡ባቲ፡ፍሥሐ፡ወመድኃኒተ፡ለኵሉ፡ዓለም፤ ውእቱኬ፡በእንተ፡እግዝእትነ፡ማርያም፡ወላዲተ፡አምላክ፡በሥጋ።
2እስመ፡ዝንቱ፡ጻድቅ፡ኢያቄም፡ወብእሲቱ፡ቅድስት፡ሐና፡ልኅቁ፡በመዋዕሊሆሙ፡ወኢወለዱ፡ውሉደ፡እስመ፡ሐና፡ቅድስት፡ነበረት፡መካነ።
3ወበእንተዝ፡የኀዝኑ፡ፈድፋደ፡እስመ፡ደቂቀ፡፳ኤል፡ኮኑ፡ያሰትትዎ፡ለዘኢወለደ፡ውሉደ፡በእንተ፡ርስተ፡ምድር፡ዘታስተርኢ።
4ወይብሉ፡እስመ፡ዕፅ፡ዘኢትፈሪ፡ኅጥእተ፡በረከት፡ይእቲ፡ሎሙኒ፡ሰመይዎሙ፡ኅጡአነ፡በረከት፡በእንተዝ፡ኀዘኑ፡ጥቀ፡ወኮኑ፡ወትረ፡ይጸውሙ፡ወይጼልዩ፡ወያስተበቍዑ፡ኀበ፡እግዚአብሔር፡መዓልተ፡ወሌሊተ። ወእምዝ፡በፅዑ፡ብፅዓተ፡ለእግዚአብሔር፡እስመ፡ለወልድ፡ዘይትወለድ፡ከመ፡ይረስይዎ፡ላእከ፡ውስተ፡ቤተ፡እግዚአብሔር።
5ወእምዝ፡እንዘ፡ሀሎ፡ኢያቄም፡ውስተ፡ደብር፡በስኢል፡ወአስተብቍዖ፡ናሁ፡መጽኦ፡ድቃስ፡ወኖመ፡ወአስተርአዮ፡መልአከ፡እግዚአብሔር፡ገብርኤል፡ወዜነዎ፡ከመ፡ሐና፡ብእሲቱ፡ትጸንስ፡ወትወልድ፡ወለተ፡ወይትፌሣሕ፡ባቲ፡ውእቱ፡ወኵሉ፡ዓለም፡ይድኀን፡ባቲ።
6ወሶበ፡ነቅሐ፡እምንዋሙ፡መጽእ፡ኀበ፡ቤቱ፡ወነገራ፡ለሐና፡ብእሲቱ፡ዘከመ፡ርእየ፡ወአምንዋ፡ለይእቲ፡ራእይ፡ወጸንሰት፡ሐና፡ወወለደታ፡ለእግዝእትነ፡ማርያም፡ትም፡ሀገር፡ክሕተ፡ኵሉ፡ዓለም፤ ጸሎታ፡ወበረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለጽንሰትኪ፡ጽንስ፡መንፈሳዊ፤ ዘኢይትኀበሮ፡ስዑብ፡ወኢይትሐወሎ፡ዘማዊ፤ ለውዳሴኪ፡ማርያም፡እንተ፡ጊዜ፡እፃሙ፡ሐረሳዊ፤ ገራህተ፡ልብየ፡ዝናመ፡ጽድቅኪ፡ያርዊ፤ ወኅጠተ፡ቃልየ፡ካዕበ፡ኂሩትኪ፡ያስዊ።
7ወበዛቲ፡ዕለት፡አዕረፈ፡አሮን፡ካህን፡አበ፡አልዓዛር፤ በረከተ፡አምላኩ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለአሮን፡አበ፡አልዓዛር፡በኵሩ፤ወእኅወ፡ሙሴ፡ነቢይ፡ዘቡሩክ፡ዝክሩ፤ለዝ፡ካህን፡በእንተ፡ዕበዩ፡ወክብሩ፤ልብሰ፡ጸናጽል፡ጠበብተ፡እስራኤል፡ገብሩ፤በቃለ፡ፀዓዕ፡እስከ፡ይደምፅ፡እግሩበናብሊስ፡ወበከበሮ፡ዘገብሩ፡አሰሩ።
8ወበዛቲ፡ዕለት፡ኮነ፡በዓለ፡ሐዋርያ፡ክቡር፡ጴጥሮስ፡ርእሰ፡ሐዋርያት፡እስመ፡በዛቲ፡ዕለት፡በማእከለ፡አርድእት፡ተአመነ፡ከመ፡እግዚእነ፡ውእቱ፡ክርስቶስ፡ወልደ፡እግዚአብሔር፡ሕያው።
9በከመ፡ጽሑፍ፡ውስተ፡ወንጌል፡ቅዱስ፡ዘይብል፡ወተሰአሎሙ፡በፍኖተ፡ቂሣርያ፡ከመ፡መኑ፡ውእቱ፡ይብልዎ፡ሰብእ፡እንዘ፡ውእቱ፡የአምር፡አልባበ፡ኵሉ፡ሰብእ፡ባሕቱ፡አውፅኦሙ፡አፍአ፡ሀገር፡ባሕቲቶሙ፡ከመ፡ይትከሀሎሙ፡ይትናገሩ፡ዘሀሎ፡ውስተ፡ልቦሙ፡በእንቲአሁ፡እስመ፡ሐዋርያት፡ኮኑ፡ንፉቃነ፡በበይናቲሆሙ፤ ወቦ፡እምኔሆሙ፡እለ፡ይብሉ፡ከመ፡ውእቱ፡ኤልያስ፤ ወቦ፡እለ፡ይብሉ፡፩፡እምነቢያት፡ቀደምት፤ ወጴጥሮስኒ፡ተምዐ፡ላዕሌሆሙ፡ወይቤ፡አንተ፡ውእቱ፡ክርስቶስ፡ወልደ፡እግዚአብሔር፡ሕያው።
10ወበእንተዝ፡አስተብፅዖ፡እግዚእነ፡ለጴጥሮስ፡ወመጠዎ፡ሎቱ፡መራኁተ፡ዘመ፡ንግሥተ፡ሰማያት፡ከመ፡ይእስር፡ወይፍታሕ።
11ወእምይእቲ፡ዕለት፡ኮነ፡ርእሰ፡ላዕለ፡ኵሎሙ፡ሐዋርያት፡ወኮነ፡ህየንቴሁ፡ለእግዚእነ፡ውስተ፡ኵሉ፡ዓለም፡ወሎቱ፡ሢመት፡ላዕለ፡ኵሎሙ፡ሊቃነ፡ዓለም፡ሊቃነ፡ጳጳሳት፤ ወኤጲስቆጶሳት፤ ቀሳውስት፡ወዲያቆናት፤ ወላዕለ፡ኵሉ፡ሢመታተ፡ክህነት፤ ወስብሐት፡ለእግዚአብሔር፡ወላዕሌነ፡ይኩን፡ሣህል፡ወምሕረት፡ለዓለመ፡ዓለም፡አሜን።
ሰላም፡እብል፡ለጴጥሮስ፡ሥዩም፤ላዕለ፡ሐዋርያት፡ኄራን፡ወካህናተ፡ኵሉ፡ዓለም፤ ሶበ፡ለክርስቶስ፡አምነ፡ከመ፡ወልደ፡አምላክ፡ዮም፤ኢከሠተ፡ለከ፡ይቤሎ፡ዘሥጋ፡ወደም፤እንበለ፡አቡየ፡ሰማያዊ፡ዘሀሎ፡እምቅ፡ድም።
12ወበዛቲ፡ዕለት፡አዕረፈ፡አባ፡ጢሞቴዎስ፡ሊቀ፡ጳጳሳት፡ዘሀገረ፡እስክንድርያ፤ ወውእቱ፡እምኍልቆሙ፡ለአበው፡ሊቃነ፡ጳጳሳት፡፳ወ፮።
13ወለዝንቱ፡ቅዱስ፡ኀረዮ፡እግዚእነ፡ከመ፡ይኩን፡ሊቀ፡ጳጳሳት፡ላዕለ፡ሀገረ፡እስክንድርያ፡እምድኅረ፡አዕረፈ፡አብ፡መስተጋድል፡አባ፡ዲዮስቆሮስ፡ሊቀ፡ጳጳሳት፡ውስተ፡ደሴተ፡ጋግራ፡ወበጽሖ፡ለዝንቱ፡አብ፡ምንዳቤ፡ወስደት፡ወተሰደ፡ኀበ፡ሰደድዎ፡ለዲዮ፡ስቆሮስ፡እምቅድሜሁ።
14ወአመ፡መዋዕለ፡መንግሥቱ፡ለመርቅያን፡ተሠይመ፡ላዕለ፡እስክንድርያ፡ሊቀ፡ጳጳሳት፡ዘይብልዎ፡ጢሞቴዎስ፡ወሰደዶ፡ለዝንቱ፡አብ፡አባ፡ጢሞቴዎስ፡ኀበ፡ደሴተ፡ጋግራ፡ወነበረ፡ህየ፡፲፡ዓመተ።
15ወእምድኅረ፡ሞተ፡መርቅያን፡ተንሥኡ፡ሰብአ፡እስክንድርያ፡ላዕለ፡ሊቀ፡ጳጳሳት፡ዘሤሞ፡መርቅያን፡ወሰደድዎ፡ወሜጥዎ፡ለአብ፡ጢሞቴዎስ።
16ወሶበ፡ነግሠ፡ልዮን፡ወልደ፡መርቅያን፡አሜሃኒ፡ሰደዶ፡ዳግመ፡ለዝንቱ፡አብ፡ጢሞቴዎስ፡ወሤሞ፡ለጢሞቴዎስ፡ዓላዊ፡እስከ፡አመ፡ሞተ፡ልዮን፡ወነግሠ፡ዘይኑን።
17ወሶቤሃ፡ጐየ፡ጢሞቴዎስ፡ዓላዊ፡ወገብኣ፡ዝንቱ፡አብ፡አባ፡ጢሞቴዎስ፡በትእዛዘ፡ንጉሥ፡በክብር፡ብዙኅ፡ወኮነ፡ወትረ፡ይጌሥፆሙ፡ወይሜህሮሙ፡ለሕዝብ፡ወያፀንዖሙ፡ውስተ፡ሃይማኖት፡ርትዕት፡ወነበረ፡ዲበ፡መንበረ፡ማርቆስ፡ወንጌላዊ፡፳ወ፪ተ፡ዓመተ፡ወአሥመሮ፡ለእግዚአብሔር፤ በረከቱ፡ተሀሉ፡ምስሌነ፡ለዓለመ፡ዓለም፡ኣሜን።
ሰላም፡ለጢሞቴዎስ፡እንተ፡ረሰየ፡ምርዋዖ፤ለምሂር፡ወለገሥዖ፤በመሠረተ፡ወርቅ፡ወብሩር፡ነፍሳተ፡ብዙኀን፡ሐኒዖ፤በእንተ፡ዘኮነ፡በስደት፡ቢጾ፤እምስደተ፡ዲዮስቆሮስ፡አብ፡ዕሤቱ፡ኢሐዖ።
18ወበዛቲ፡ዕለት፡ዮሴፍ፡ወልደ፡ራሄል፡ተወልደ፤ በረከተ፡አምላኩ፡የሀሉ፡ምስሌነ፡ለዓለመ፡ዓለም፡አሜን።
19ወበዛቲ፡ዕለት፡ዕረፍቱ፡ለመፍቀሬ፡እግዚአብሔር፡ናዖድ፡ንጉሠ፡ኢትዮጵያ፡ርቱዐ፡ሃይማኖት፤ በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለስፍሕት፡የማኑ፤ከመ፡ትሡቅ፡ኵሎ፡እለ፡ተንተኑ፤ናዖድ፡ላእክኪ፡ኀበ፡ቆሙ፡መዘምራኑ፤ማርያም፡ስብሐተኪ፡ከመ፡ይንግር፡ወይዜኑ፤በጽድቀ፡ዚአኪ፡ይትፌሣሕ፡ልሳኑ።
ዘአቅረብኩ፡ማኅሌተ፡አዘኪርየ፡አእላፈ። እምእለ፡ተጸምዱከ፡ዘልፈ። ለለአነብብ፡ተወከፍ፡ዘንዴትየ፡መጽሐፈ። እንተ፡ረሰይከ፡እግዚኦ፡ጸሪቀ፡መበለት፡ውኩፈ። እምእለ፡አብኡ፡ብዑላን፡ዘተርፈ።
ነቢያት፡ቅዱሳን፡ወሐዋርያት፡ሰባኪያን። ሰማዕት፡ወጻድቃን፡ወመላእክት፡ትጉሃን። ደናግል፡ዓዲ፡ወመነኰሳት፡ኄራን። ባርኩ፡ባርኮ፡ጉባኤ፡ዛቲ፡መካን። እስከ፡አረጋዊ፡ልሒቅ፡ወንኡስ፡ሕፃን።
ለዘጸሐፎ፡በክርታስ፡ወለዘአጽሐፎ፡እንዘ፡ይደርስ። ለዘአንበቦ፡ወለዘተርጐሞ፡በልሳን፡ሐዲስ። ወለዘሰምዐ፡ቃሎ፡በዕዝነ፡መንፈስ። በጸሎተ፡እሙ፡ማርያም፡ዐራቂተ፡ኵሉ፡እምባእስ። ኅቡረ፡ይምሐረነ፡ኢየሱስ፡ክርስቶስ።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ።