ግዕዝ
Home Formaciones Libros Biblioteca Ge'ez Contacto
Sinaxario · Miyazia

13 de Miyazia

አመ፡፲ወ፫፡ለሚያዝያ
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፫፡ለሚያዝያ፡በዛቲ፡ዕለት፡ኮኑ፡ሰማዕተ፡፪ቱ፡መነኮሳት፡ቅዱሳን፡አባ፡ኢያሱ፡ወአባ፡ዮሴፍ፡አርድእቱ፡ለአብ፡ቅዱስ፡አባ፡ሜልዮስ፡ዘኮነ፡ሰማዕተ፡በደብረ፡ኮራሳን።
2ወናሁ፡ጽሑፍ፡ገድለ፡ስምዖሙ፡አመ፡፳ወ፰፡ለዝ፡ወርኅ፡በይእቲ፡ዕለት፡ኮነ፡ባቲ፡አቡሆሙ፡መንፈሳዊ፡ሰማዕተ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለክሙ፡ኢያሱ፡ወዮሴፍ፡ኅሩያን፤አርድእተ፡ሜልዮስ፡ጻድቅ፡ዘደብረ፡ኮራሳን፤ሶበ፡ኢየሱስ፡ትብሉ፡ፈጣሬ፡ብርሃን፤ዘቀተሉክሙ፡ውሉደ፡ንጉሥ፡ዓብዳን፤በውስተ፡ልቦሙ፡ዘቦአ፡ሰይጣን።
3ወበዛቲ፡ዕለት፡ተዝካራ፡ለዲዮኒስ፡ሰማዕት፡ወዲያቆናዊት፡ዘእምሐዋርያት። በረከታ፡የሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለዲያቆናዊት፡ዲዮኒስእለ፡ሤምዋ፡አርድእተ፡ክርስቶስ፤በስእለተ፡ዛቲ፡ቅድስት፡በሥጋ፡ወነፍስ፤ወበትንባሌሁ፡ለሰማዕት፡መናድሌዎስ፤መንገለ፡የማኑ፡ያቁመነ፡መሐሪ፡ንጉሥ።
4ወበዛቲ፡ዕለት፡ተዝካሩ፡ለቅዱስ፡መናድሌዎስ፡ሰማዕት፡ወተዝካረ፡አቡነ፡አኮሊሳቲሞስ፡ወ፬ቱ፡መነኮሳት። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።