ግዕዝ
Home Formaciones Libros Biblioteca Ge'ez Contacto
Sinaxario · Meskerem

30 de Meskerem

አመ፡፴ሁ፡ለመስከረም
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፴ሁ፡ለመስከረም፡በዛቲ፡ዕለት፡በዓለ፡ተዝካር፡ዘገብረ፡እግዚእነ፡ሎቱ፡ስብሐት። ላዕለ፡ቅዱስ፡ወክቡር፡አባ፡አትናቴዎስ፡ሊቀ፡ጳጳሳት፡ዘሀገረ፡እስክንድርያ።
2ወውእቱኬ፡እምኍልቆሙ፡ለ፫፻፲ወ፰፡ርቱዓነ፡ሃይማኖት፡እለ፡በኒቅያ። ውእቱኬ፡እስመ፡ንጉሥ፡ቈስጠንጢኖስ፡ዘይንእስ፡ወልደ፡ቈስጠንጢኖስ፡ዘየዓቢ፡ሶበ፡ክሕዶ፡ለወልድ፡ዋሕድ፡ወፈለጦ፡እመለኮተ፡አቡሁ፡ወአምነ፡በሃይማኖቱ፡ለአርዮስ፡ርጉም፡ወርኩስ፡ወኣጽንዐ፡ግዕዞ።
3ወእምዝ፡ፈነዎ፡ንጉሥ፡ለ፩ዱ፡ብእሲ፡ዘስሙ፡ገርግዮስ፡ከመ፡ይሑር፡ኀበ፡ብሔረ፡ግብፅ፡ወምስሌሁ፡፭፻፡ሰብአ፡አፍራስ።
4ወጸሐፈ፡ሎቱ፡መልእክተ፡ምስሌሁ፡ከመ፡ይኩን፡ሊቀ፡ጳጳሳት፡ላዕለ፡ሀገረ፡እስክንድርያ፡ወላዕለ፡ኵሉ፡ብሔረ፡ግብፅ፡ወላዕለ፡ኵሎሙ፡ጳጳሳት፡ወኤጲስ፡ቆጶሳት፡ወአዘዞ፡ከመ፡ያፅንዕ፡ሃይማኖቶ፡ለአርዮስ፡ርኩስ፡ወይቅትሎሙ፡ለኵሎሙ፡እለ፡የአምኑ፡በክርስቶስ።
5ወሶበ፡ውእቱ፡ገርግዮስ፡በጽሐ፡ሀገረ፡እስክንድርያ፡ወሰበከ፡በውስቴታ፡ክሕደቶ፡ወኢተወክፉ፡ቃሎ፡ወትምህርቶ፡ርኵስተ፡ዘእንበለ፡ኀዳጣን፡ሰብእ።
6ወበእንተዝ፡ቀተሎሙ፡ለብዙኃን፡መሃይምናን፡ዘአልቦሙ፡ኍልቍ። ወቅዱስሰ፡አባ፡አትናቴዎስ፡ጐየ፡ወተኀብአ፡መጠነ፡፯ቱ፡ዓመት።
7ወእምድኅረዝ፡ወፅአ፡ወሖረ፡ኀበ፡ሀገረ፡ቍስጥንጥንያ፡ኀበ፡ንጉሥ፡ቈስጠንጢኖስ፡ዘይንእስ፡ዘክሕዶ፡ለወልደ፡እግዚአብሔር፡ወይቤሎ፡እመኒ፡ትመይጠኒ፡ኀበ፡ሢመትየ፡ሚጠኒ፡ወእመኒ፡ትቀትለኒ፡ቅትለኒ፡ከመ፡እንሣእ፡አክሊለ፡ስምዕ።
8ወሰሚዖ፡ንጉሥ፡ዘንተ፡ነገረ፡እምኔሁ፡አዘዘ፡ከመ፡ያንብርዎ፡ውስተ፡ሐመር፡ንኡስ፡ዘእንበለ፡ኅብስት፡ወማይ፡ወኢ፡ሊቀ፡ሐመር፡ኀዳፊ፡ወወደይዎ፡ውስቴታ፡እስመ፡ሐለየ፡ንጉሥ፡ከመ፡ይመውት፡ቅዱስ፡አትናቴዎስ፡በረኃብ፡ወፅምፅ፡አው፡በተሠጥሞ። ወገብሩ፡በከመ፡አዘዘ፡ንጉሥ።
9ወለእመ፡ከልኦ፡ንጉሥ፡ኀብስተ፡ወማየ፡ወናሁ፡ወሀቦ፡እግዚአብሔር፡ኅብስተ፡ወማየ፡ሕይወት፡እምሰማይ፡ወለእመ፡ኢሀሎ፡ምስሌሁ፡መጋቢ፡በውስተ፡ሐመር፡ሀሎ፡ምስሌሁ፡ዘይሜግቦሙ፡ለሰማይ፡ወምድር፡ወሖረት፡ሐመር፡በኀድአት፡ወበሰላም፡እንዘ፡ይፀውርዋ፡መላእክት፡ወበሣልስት፡ዕለት፡በጽሐ፡መርሶ፡ሀገረ፡እስክንድርያ።
10ወሶበ፡ሰምዑ፡ሕዝብ፡ከመ፡በጽሐ፡ኖላዊሆሙ፡ኄር፡ተፈሥሑ፡ፈድፋደ፡ወወፅኡ፡ኀቤሁ፡ወተቀበልዎ፡በማኀትው፡ወበማኅሌት፡ወበዝማሬ፡እንዘ፡ይሴብሕዎ፡ለእግዚአብሔር፡ወአብእዎ፡ውስተ፡ማኅደሩ።
11ወወፅአ፡ገርግዮስ፡ዕልው፡ምስለ፡እሊአሁ።
12ወበይእቲ፡ዕለት፡ገብረ፡በዓለ፡ዓቢየ፡ቅዱስ፡አትናቴዎስ፡ለእግዚአብሔር፡ወኮኑ፡መሃይምናን፡ይገብሩ፡ዘንተ፡በዓለ፡በከመ፡ዛቲ፡ዕለት፡እስከ፡ዮም።
13ወስብሐት፡ለእግዚአብሔር፡ዘያከብሮሙ፡ለኀሩያኒሁ። ዘሎቱ፡ክብር፡ወስብሐት፡ለዓለመ፡ዓለም፡ኣሜን።
እግዚአብሔር፡ሠርዐ፡ወዓቀመ፡ተዝካሮ፤በዕለት፡ዛቲ፡ለአትናቴዎስ፡ዘያፈቅሮ፤አመ፡አብእዎ፡ውስተ፡ባሕር፡ለሕማም፡ወለተፅዕሮ፤እንዘ፡ይኤዝዝ፡መላእክቲሁ፡ከመ፡ይፁሩ፡ሐመሮ፤እስከ፡የዓድውዎ፡ለበጺሕ፡ሀገሮ።
14ወበዛቲ፡ዕለት፡ኮነ፡ተዝካሩ፡ለቅዱስ፡ጎርጎርዮስ፡ሊቀ፡ጳጳሳት፡ዘሀገረ፡አርማንያ፡ወጽዋዔሆሙ፡ለያዕቆብ፡ወለዮሐንስ፡ደቂቀ፡ዘብዴዎስ፡ወአባ፡ቡላ፡ወማርዩ፡ወብትሩስ፡ወአስተሬስ፡ሰማዕት። ትንብልናሆሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለክሙ፡ጽጌ፡ምዑዝ፡ረዳ፤ዘረከበክሙ፡ክርስቶስ፡ለባሕረ፡ገሊላ፡በዓውዳ፤አመ፡ሰዓተ፡ደይን፡ያዕቆብ፡ወዮሐንስ፡በዕለተ፡ፍዳ፤በሉኒ፡ሊተ፡ዘዚአነ፡ወለትምህርትነ፡ወልዳ፤እንዘ፡ኢትእኀዙ፡ለነፍስየ፡ዕዳ።ሰላም፡ለክሙመምህራነ፡ዕበይ፡ወተድላ፤ዘደብረ፡ማርያም፡አብሳዲ፡ወአሮን፡ዘገሊላ፤ትትኖለዉኒ፡ሥመሩ፡መንገለ፡ወፈርኩ፡ኵላ፤ኢይንዓዉኒ፡ፀርየ፡ከመ፡ይንዑ፡ገደላ፤አምሳለ፡ርኁብ፡አንበሳ፡ወጽሙዕ፡ተኵላ።
15ወበዛቲ፡ዕለት፡አዕረፈ፡አባ፡ሣሉሲ፡ወዝንቱ፡ቅዱስ፡መስተጋድል፡እስመ፡ውእቱ፡ረሰየ፡ርእሶ፡ዓብደ።
16ወኮነ፡ጸሙ፡ወጸሎቱ፡በኅቡዕ፡ወበቅድመ፡ሰብእሰ፡ኢይጸውም፡ወኢይጼሊ፡ለለ፡ኵሉ፡ጽባሕ፡ይሴሰይ፡ንስቲተ፡ማዕረ፡ገዳም፡ወበጊዜ፡ሠርክኒ፡ኢይበልዕ፡ምስለ፡አኀው።
17ወኮነ፡አባ፡ይስሐቅ፡አበ፡ምኔት፡ወኵሎሙ፡መነኮሳት፡ያነክሩ፡እምኔሁ፡ወባሕቱ፡ኢይፈቅዱ፡ይዝልፍዎ፡ከመ፡ኢያሕምምዎ፡ልቦ።
18ወበአሐቲ፡ዕለት፡ኮነ፡በዓል፡ዘውእቱ፡ደብር፡ወይቤሎሙ፡አባ፡ይስሐቅ፡ለመነኮሳት፡ዮምሰ፡ዕቀብዎ፡ከመ፡ኢይብላዕ፡እምቅድመ፡ይትመጠው፡ቍርባነ።
19ወሶበ፡በጽሐ፡ጊዜ፡መብልዑ፡ፈቀደ፡ይትፈለጥ፡እምኔሆሙ። ወከልእዎ፡መነኮሳት፡ወጸርሐ፡ሎሙ፡እንዘ፡ይብል፡ኀድጉኒ፡ከመ፡ኢይሙት፡በረኃብ፡ወኢይኩን፡አበሳየ፡ዲበ፡አርእስቲክሙ።
20ወሶበ፡ኢተመይጡ፡ኀበ፡ክላሑ፡አውጽአ፡ቆብዖ፡እምርእሱ፡ወዘበጠ፡ባቲ፡አረፍተ፡ቤተ፡ክርስቲያን፡እንዘ፡ይብል፡ኦ፡እግዝእትየ፡ማርያም፡አድኅንኒ፡እም፡እሉ፡መነኮሳት፡ወተሠጥቀ፡ሎቱ፡አረፍት፡ወወፅአ፡እምኔሃ፡ወተመይጠ፡አረፍት፡ከመ፡ቀዳሚ።
21ወሶበ፡ርእዩ፡ጉቡአን፡ዘንተ፡መንክረ፡ጸርሑ፡እንዘ፡ይብሉ፡ኪርያላይሶን፡፫ተ፻ተ፡ጊዜያተ፡ወለይእቲ፡ቆብዕ፡ረከብዋ፡ግድፍተ፡ወአንበርዋ፡ውስተ፡ቤተ፡ክርስቲያን፡በዓቢይ፡ክብር፡ወነበረት፡እንዘ፡ትገብር፡መንክረ፡ወትፌውስ፡ድውያነ።
22ወሶበ፡ሰምዐ፡ሊቀ፡ጳጳሳት፡ፈቀደ፡ይንሥኣ፡ለይእቲ፡ቆብዕ፡ኀቤሁ፡ከመ፡ይትባረክ፡እምኔሃ፡ወሶበ፡ይወስዳ፡ትትመየጥ፡ውስተ፡ደብር፡ወከመዝ፡ኮነ፡፫ተ፡ጊዜ፡ወኀደግዋ።
23ወዝኩኒ፡መነኮስ፡እምድኅረ፡ብዙኀ፡መዋዕል፡አዕረፈ፡በውስተ፡ገዳም፡በዛቲ፡ዕለት። እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለአባ፡ሣሉሲ፡ጥበቦ፡ዘሠወረ፤መሲሖ፡በነግህ፡እንዘ፡ይጸውም፡ድራረ፤አኀድጎተ፡ዝንቱ፡ልማዱ፡ሶበ፡አበምኔት፡መከረ፤ዘቢጦ፡በቆብዕ፡አረፍተ፡መቅደስ፡ሰቈረ፤ወእንተ፡ውስቴቱ፡ወፂኦ፡እምዓለም፡ሖረ።ሰላም፡ለማርታ፡ለአልዓዛር፡እኅቱ፤እንተ፡አንሥኦ፡ክርስቶስ፡እምነ፡መቅበርቱ፤ባህለ፡ብካያ፡ሰሚዖ፡አመ፡ተቀበለቶ፡ሎቱ፤ሶበሰ፡እግዚእየ፡ሀሎከ፡በዝንቱ፤እምኢተበውሐ፡ለእኁየ፡ሞቱ፤ተፈጸመ፡ምንባብ፡ዘወርኀ፡መስከረም። ወስብሐት፡ለእግዚአብሔር፡ወላዕሌነ፡ይኩን፡ሣህሉ፡ወምሕረቱ፡በጸሎታ፡ወበአስተብቍዖታ፡ለእግዝእትነ፡ማርያም፡ወላዲተ፡አምላክ፡መዝገበ፡ምሕረት፡ወሣህል። ወበጸሎተ፡ኵሎሙ፡ቅዱሳን፡መላእክት፡ጻድቃን፡ወሰማዕት፡ለዓለመ፡ዓለም፡አሜን።ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።