Sinaxario · Meskerem
27 de Meskerem
አመ፡፳ወ፯፡ለመስከረም1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፳ወ፯፡ለመስከረም፡በዛቲ፡ዕለት፡ኮነ፡ቅዱስ፡ኤዎስጣቴዎስ፡ሰማዕተ፡ወ፪ቱ፡ደቂቁ። ወዝንቱ፡ቅዱስ፡ኮነ፡እምሊቃናተ፡ሐራ፡ዘመንግሥተ፡ሮም። ወኢየአምሮ፡ለእግዚአብሔር፡ቀዲሙ፡ወስሙ፡ቂዶስ፡ለውእቱ። ወባሕቱ፡ይሁብ፡ምጽዋተ፡ብዙኅ፡ለነዳያን፡ወለምስኪናን።
2ወፈቀደ፡እግዚአብሔር፡ከመ፡ኢይኩን፡ፃማሁ፡ከንቶ። ወኮነ፡ኤዎስጣቴዎስ፡ይጸንሕ፡ውስተ፡ገዳም፡ወይንዑ፡አራዊተ።
3ወአሐተ፡ዕለተ፡አስተርአዮ፡አምሳለ፡መስቀል፡ማእከለ፡አቅርንቲሁ፡ለኀየል፡ወመስቀልሰ፡ይበጽሕ፡እስከ፡ደመና፡ወሰደዶ፡ውስተ፡አድባር፡ከመ፡ይቅትሎ፡ወይንዓዎ።
4ወተናገሮ፡እግዚአብሔር፡እማእከለ፡አቅርንቲሁ፡ለኀየል፡ወአጠየቆ፡ስሞ፡ወአዘዞ፡ከመ፡ይሑር፡ውእቱ፡ወብእሲቱ፡ወውሉዱ፡ኀበ፡ኤጲስ፡ቆጶስ፡ዘይእቲ፡ሀገር፡ወይጠመቁ፡ጥምቀተ፡ክርስትና፤ ወአጠየቆ፡እግዚእነ፡ከመ፡ይመጽኦ፡ንዴት፡ወመከራ፡ፍጡነ።
5ወሶበ፡ሰምዐ፡ዘንተ፡ነገረ፡ኤዎስጣቴዎስ፡ወረደ፡እምደብር፡ፍጡነ፡ወሖረ፡ኀበ፡ኤጲስ፡ቆጶስ፡ወተጠምቁ፡ጥምቀተ፡ክርስትና፡ምስለ፡ብእሲቱ፡ወውሉዱ፡ወወለጠ፡ስሞ፡ዘቀዳሚ፡ወሰመዮ፡ኤዎስጣቴዎስሃ።
6ወእምዝ፡ኀልቀ፡ኵሎ፡ንዋዮ፡ወአግብርቲሁ፡ወአእማቲሁ፡ወእንስሳሁኒ፡ወነሥኦሙ፡ለብእሲቱ፡ወለውሉዱ፡ወወፅአ፡እምሀገረ፡ሮሜ፡ወተፅዕነ፡ውስተ፡ሐመር፡ወኢነ፡ሥአ፡ምስሌሁ፡ዓስበ፡ሐመር፡ወኢምንተኒ፡ዘይሁብ፡ለበዓለ፡ሐመር፡ወሶበ፡በጽሐ፡ኀበ፡መርሶ፡ነሥእዋ፡ለብእሲቱ፡ህየንተ፡ዓስበ፡ሐመር።።
7ወነሥአ፡፪ተ፡ውሉዶ፡ወሖረ፡ወበጽሐ፡ኀበ፡ፈለግ፡ካልእ፡ወነሥኦ፡ለ፩ዱ፡ወልዱ፡ወአዕደዎ፡ወተመይጠ፡ኀበ፡ካልኡ፡ከመ፡ያዕድዎ፡ወኢረከቦ፡እስመ፡ነሥኦ፡ተኵላ። ወለዘዓደወኒ፡ቀዳሚ፡መሥጦ፡አንበሳ፡ወኀዘነ፡ኤዎስጣቴዎስ፡ዓቢየ፡ኀዘነ፡በእንተ፡ጥፍኣቶሙ፡ለብእሲቱ፡ወለውሉዱ።
8ወእግዚአብሔርሰ፡ዓቢየ፡ምክር፡ዘቦቱ፡ሥልጣን፡ላዕለ፡ኵሉ፡ግብር፡ዓቀቦሙ፡ዘእንበለ፡ሙስና።
9ወእምዝ፡ሖረ፡ኤዎስጣቴዎስ፡ኀበ፡አሐቲ፡ሀገር፡ወኮነ፡ዓቃቤ፡አዕዋድ፡ብዙኅ፡ወነበረ፡ብዙኀ፡መዋዕለ።
10ወእምድኅረ፡እማንቱ፡መዋዕል፡ሞተ፡ንጉሠ፡ሮም፡ወነግሡ፡ህየንቴሁ፡ካልእ፡ንጉሥ፡ዘያፈቅሮ፡ወኀሠሦ፡ለኤዎስጣቴዎስ፡ወኢረከቦ፡ወፈነወ፡ላእካነ፡ውስተ፡ኵሉ፡ምድር፡ከመ፡ይኅሥሥዎ። ወበጽሐ፡፩ዱ፡እምላእካን፡ኀበ፡ሀሎ፡ኤዎስጣቴዎስ፡ኀበ፡አዕዋድ፡ዘይነብር፡ውስቴቱ፡ወርእዮ፡አእ፡መሮ፡ወተአምኁ፡በበይናቲሆሙ፡ወወሰዶ፡ኀበ፡ንጉሥ።
11ወሶበ፡በጽሐ፡ኀበ፡ንጉሥ፡አክበሮ፡ፈድፋደ፡ወሤሞ፡ኀበ፡ዘቀዳሚ፡ሢመቱ።
12ወእምዝ፡አዘዘ፡ንጉሥ፡ከመ፡ያምጽኡ፡ሰብአ፡ወያስተጋብኡ፡በበ፪ቱ፡ዕደው፡እምውስተ፡ኵሉ፡አህጉር፡በእንተ፡ፀብዕ። ወኮኑ፡ክልኤቱ፡ደቂቁ፡ለኤዎስጣቴዎስ፡ተሐጽኑ፡ውስተ፡አሐቲ፡ሀገር፡ወኢየአምሮ፡፩ዱ፡ለካልኡ፤ ወበፈቃደ፡እግዚእነ፡ተጋብኡ፡አሐተኔ። ወእንዘ፡ይትናገሩ፡በበይ፡ናቲሆሙ፡ወተጠየቁ፡እሙንቱ፡ከመ፡አኀው፡እሱ፤ ወእምዝ፡ወሰድዎሙ፡ሀገረ፡ወረሰይዎሙ፡ውስተ፡መዛግብተ፡አቡሆሙ፡በጥበበ፡እግዚአብሔር፡ወኢያእመሮሙ፡አቡሆሙ።
13ወለእሞሙሰ፡ሶበ፡ነሥኣ፡ውእቱ፡አረማዊ፡ሊቀ፡ሐመር፡ዓቀባ፡እግዚአብሔር፡ወአድኃና፡እምኵሉ፡ርኵስ። ወኮነት፡ይእቲ፡ዓቃቢተ፡ገነታት፡ዘሀገረ፡ሮሜ።
14ወበጽሑ፡እሉ፡፪ቱ፡ውሉድ፡ኀበ፡አዕዋድ፡ዘሀለወት፡ቦቱ፡እሞሙ፡ወእንዘ፡ይትናገሩ፡በበይናቲሆሙ፡ነገረ፡ናእሶሙ፡አእመረቶሙ፡እሞሙ፡ከመ፡እሙንቱ፡ውሉዳ፡ወተአምኀቶሙ፡ወተፈሥሑ፡ኅቡረ፡ፈድፋደ፡ወአእኰትዎ፡ለእግዚእነ።
15ወተጋቢኦሙ፡ሠለስቲሆሙ፡ሖሩ፡ኀበ፡ኤዎስጣቴዎስ፡ወነገርዎ፡ኵሎ፡ዘኮነ፡እምኔሆሙ፡ወአእመረ፡ከመ፡ይእቲ፡ብእሲቱ፡ወእሙንቱ፡ደቂቁ፡ወተአምኁ፡በበይናቲሆሙ፡ወተፈሥሑ፡ዓቢየ፡ፍሥሐ፡ወሰብሕዎ፡ለእግዚኣብሔር፡ስቡሕ።
16ወተጋብኡ፡ኵሎሙ፡ውስተ፡፩ዱ፡መካን፡በከመ፡ተካየዶሙ፡እግዚአብሔር፡ወነበሩ፡ኅቡረ፡እንዘ፡ይባርክዎ፡ወይሴብሕዎ፡ለእግዚእነ፡በእንተ፡ኵሉ፡ዘገብረ፡ላዕሌሆሙ፡እምሠናያት።
17ወእምድኅረዝ፡ሞተ፡ውእቱ፡ንጉሥ፡ዘያፈቅሮ፡ለኤዎስጣቴዎስ፡ወነግሠ፡ህየንቴሁ፡ካልእ፡ንጉሥ፡ዘያመልክ፡ጣዖተ፡ወጸውዖሙ፡ለኤዎስጣቴዎስ፡ወለብእሲቱ፡ወለውሉዱ፡ወአብጽሖሙ፡ኀቤሁ፡ወይቤሎሙ፡ውግሩ፡ዕጣነ፡ለአማልክት፡ወእሙንቱሰ፡ይቤልዎ፡ንሕነሰ፡ኢናመልክ፡ጣዖታተ፡ወኢንሰግድ፡ሎሙ፡አላ፡ንሰግድ፡ለእግዚእነ፡ኢየሱስ፡ክርስቶስ፡ወልደ፡እግዚአብሔር፡ሕያው።
18ወሶቤሃ፡ተምዐ፡ላዕሌሆሙ፡ወአዘዘ፡ከመ፡ይኰንንዎሙ፡ኵነኔ፡ዓቢየ፡ወእግዚእነ፡ያነሥኦሙ፡ጥዑያነ፡ዘእንበለ፡ሙስና።
19ወእምዝ፡አዘዘ፡ንጉሥ፡ከመ፡ይደይዎሙ፡ውስተ፡ጤገን፡ዘብርት፡ወገብሩ፡ላዕሌሆሙ፡በከመ፡አዘዘ፡ንጉሥ፡ወአንደዱ፡እሳተ፡ላዕሌሆሙ፡ወመጠዉ፡ነፍሶሙ፡ውስተ፡እዴሁ፡ለእግዚአብሔር፡ወነሥኡ፡አክሊለ፡ስምዕ፡በመንግሥተ፡ሰማያት፡እምኀበ፡እግዚእነ፡ኢየሱስ፡ክርስቶስ፡ዘሎቱ፡ዕበይ፡ወክብር፡ወስብሐት፡ወስግደት። ወበረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለሥቃይከ፡ለለ፩ዱ፡፩ዱ፤እምሴተ፡ኃሙስ፡ዘኮነ፡እስከ፡ምሴተ፡ዓርብ፡የዓዱ፤ኢየሱስ፡ክርስቶስ፡ተስፋ፡ኤዎስጣቴዎስ፡ወውሉዱ፤ዘበእንቲአከ፡ሶበ፡ውስቴቱ፡ወረዱ፤ለእሳተ፡ጤገን፡ዘብርት፡አብሰሎሙ፡ነዱ።
20ወበዛቲ፡ዕለት፡አዕረፈት፡ቅድስት፡ጤቅላ። ዘኮነት፡ሰማዕተ፡ዘእንበለ፡ክዕወተ፡ደም።
21ወለዛቲ፡ቅድስት፡ኮኑ፡አበዊሃ፡ክቡራነ፡ወብዑላነ፡እምሰብአ፡መቄዶንያ፡ወዓቢያን፡ወሐፀንዋ፡በተግሣፅ፡ከመ፡ሕገ፡ብሔሮሙ፡እስመ፡እሙንቱ፡ያመልኩ፡ጣዖተ።
22ወሶበ፡በጽሐ፡ቅዱስ፡ጳውሎስ፡ውስተ፡ይእቲ፡ሀገር፡ወአኀዘ፡ይስብክ፡በስመ፡እግዚእነ፡ኢየሱስ፡ክርስቶስ፡እንዘ፡ይብል፡ብፁዓን፡እለ፡ያነድዩ፡ርእሶሙ፡በእንተ፡ጽድቅ፡እስመ፡ሎሙ፡ይእቲ፡መንግሥተ፡ሰማያት።
23ብፁዓን፡እለ፡ይላህዉ፡ይእዜ፡እስመ፡እሙንቱ፡ይትፌሥሑ፡ብፁዓን፡እለ፡ይሰደዱ፡በእንተ፡ጽድቅ፡እስመ፡ሎሙ፡ይእቲ፡መንግሥተ፡ሰማያት፤ ብፁዓን፡እለ፡ቦሙ፡ብእሲት፡ወይከውኑ፡ከመ፡ዘአልቦሙ፡ብእሲት፡እስመ፡እሙንቱ፡ይወርሱ፡ሕይወተ፡ዘለዓለም፡ወዘይመስሎ፡መሀረ፡ብዙኀ።
24ወሶበ፡ሰምዐት፡ቅድስት፡ጤቅላ፡ዘንተ። ነበረት፡፫ተ፡ዕለተ፡እንዘ፡ኢትወርድ፡እምተሥላሰ፡ቤታ፡ወእንዘ፡ኢትበልዕ፡ወኢትሰቲ።
25ወትቤላ፡እማ፡ለምንት፡ኢትወርዲ፡እምተሥላሰ፡ቤትኪ፡ወኢትበልዒ፡እክለ፡ወወረደት፡ሶቤሃ፡እምተሥላሰ፡ቤታ፡ወሖረት፡በጽሚት፡ኀበ፡ቅዱስ፡ጳውሎስ፡ከበሎሃ፡ዘወርቅ፡ውሂባ፡ለዓፃዌ፡ኆኅት፡ከመ፡ኢይንግር፡ባቲ፤ ወሶበ፡በጽሐት፡ኀበ፡ቅዱስ፡ጳውሎስ፡ተመጠዋ፡በትፍሥሕት፡ወመሀራ፡ሃይማኖተ፡ክርስቶስ፡ሎቱ፡ስብሐት።
26ወበሳኒታ፡ሶበ፡በጽሐት፡እማ፡ኀበ፡ቅዱስ፡ጳውሎስ፡ሐዋርያ፡ረከበታ፡ምስሌሁ፡ወበጊዜሃ፡ሖረት፡ኀበ፡መኰንን፡ወአስተዋደየታ፡ከመ፡ክርስቲያናዊት፡ይእቲ።
27ወአዘዘ፡ያምጽእዋ፡ምስለ፡ቅዱስ፡ጳውሎስ፤ ወሶበ፡ኣብጽሕዋ፡ኀበ፡ጳውሎስ፡ተምዐ፡ላዕለ፡ጳውሎስ፡ወአዘዘ፡ይውርውዎ፡ለጳውሎስ፡ውስተ፡እሳት። ወለጤቅላኒ፡አጽንሓ፡እስከ፡አስተጋብአ፡ኣዋልደ፡ሀገር፡ከመ፡ይርአያ፡ኵነኔሃ፤ ወእምዝ፡አዘዘ፡ይውርውዋ። ወዘእንበለ፡ያገብርዋ፡ኀተመት፡ርእሳ፡በማኅተመ፡ክርስቶስ፡ወወረወት፡ርእሳ፡ውስተ፡እሳት፡ወኢለከፋ፡እሳት፡ወወፅአት፡እምእሳት፡እንዘ፡አልቦ፡ዘይሬእያ፡ወሖረት፡ኀበ፡ቅዱስ፡ጳውሎስ፡ወቀረፀት፡ሥዕርታ፡ወተለወቶ።
28ወሶበ፡ሰምዐ፡ካልእ፡መኰንን፡አኀዛ፡ወአገበራ፡ከመ፡ትኅድግ፡ሃይማኖታ፡ወሶበ፡ኣበየቶ፡አዘዘ፡ከመ፡ይደይዋ፡ውስተ፡ቤተ፡አናብስት፡ወድብ። ወእሙንቱ፡ሰገዱ፡ላቲ፡ወለሐሱ፡ፀበለ፡እገሪሃ፡ወሶበ፡ርእይዋ፡ረከብዋ፡ሕያውታ፡ወአምኑ፡በእደዊሃ፡መኰንን፡ወእሊአሁ፡ወተጠምቁ፡በስመ፡ሥሉስ፡ቅዱስ።
29ወይእቲሰ፡ነበረት፡እንዘ፡ትተልዎ፡ለቅዱስ፡ጳውሎስ፡ሐዋርያ፡ወትሰብክ፡በስመ፡እግዚእነ፡ኢየሱስ፡ክርስቶስ፡ሎቱ፡ስብሐት፡ወእምዝ፡አዕረፈት፡በሰላም፡እምድኅረ፡ገብረት፡ብዙኀ፡ተአምራተ። እግዚአብሔር፡ይምሐረነ፡በጸሎታ፡ለዓለመ፡ዓለም፡አሜን።
ሰላም፡ለጤቅላ፡ዓውደ፡አልባቢሃ፡ዘኢቀርቡ፤ሐልዮ፡መርዓ፡በጣሊ፡ወዘየኃልፍ፡ከብካቡ፤በውስተ፡ዕዝና፡ዋሕድ፡ወበውስተ፡ልባ፡ካዕቡ፤እስመ፡ሮፀ፡ለሐዋርያ፡ዘይቤ፡ንባቡ፤ከመ፡ዘኢያውሰቡ፡ይከውኑ፡እለኒ፡አውሰቡ።
30ወበዛቲ፡ዕለት፡አዕረፈ፡ቅዱስ፡አንጢላርዮስ፡ሊቀ፡መጸብሐን፡ዘነበረ።
31ወዝንቱ። ቅዱስ፡አልቦቱ፡ምሕረት፡ቀዳሚ።
32ወአሐተ፡ዕለተ፡ነበሩ፡ነዳያን፡ውስተ፡መርኀብ፡ወአኀዙ፡ይዝክሩ፡መሐርያነ፡ወቂቁያነ፡ወዘከርዎ፡ለአንጢላርዮስ፡ከመ፡ኢይምሕር፡ነዳያነ፡ምንተኒ፡ወአንከሩ።
33ወይቤ፡፩ዱ፡እምነ፡ነዳያን፡ምንተ፡ትሁቡኒ፡ለእመ፡አመጽእ፡እምኀቤሁ፡ምጽዋተ፡ወአሰፈውዎ፡ከመ፡የሀብዎ፡ዘፈቀደ።
34ወሶቤሃ፡ሖረ፡ኀቤሁ፡ወሰአለ፡ምጽዋተ፡ወሶበ፡ሰምዐ፡ቃሎ፡ለነዳይ፡ፈቀደ፡ይውግሮ፡በእብን፡ወኃጢኦ፡እብነ፡ወገረ፡ውስተ፡ፍጽሙ፡ጳኵሲማ፡ኅብስት፡በቍጥዓ፡ወፈቅዖ፡ወነዳይኒ፡ነሢኦ፡ኀበ፡አብያጺሁ፡ሖረ፡ወአርአዮሙ፡ውእተ፡ኅብስተ፡ዘነሥአ፡እምኔሁ።
35ወበይእቲ፡ሌሊት፡ርእየ፡በሕልሙ፡አንጢላርዮስ፡እንዘ፡ውእቱ፡ይቀውም፡ውስተ፡ኵነኔ፡ወእንዘ፡ይትዋቀሥዎ፡እለ፡ይመስሉ፡ሰብአ፡ጸሊማነ፡ወካልአን፡ብሩሃን፡እንዘ፡ይቈጽሩ፡ገጾሙ፡ወይብሉ፡ኢይትረከብ፡እምግባረ፡ሠናይ፡ዘእንበለ፡አሐቲ፡ኅብስት፡ይብስት፡በኀቤሁ፡ወሶበ፡ደለውዋ፡ተዓረየት፡ምስለ፡ኵሉ፡ኃጣውኢሁ።
36ወሶበ፡ነቅሐ፡እምንዋሙ፡ዘረወ፡ኵሎ፡ንዋዮ፡ለነዳያን፡ወሖረ፡ኢየሩሳሌም፡ወጌጠ፡ርእሶ፡ለ፴፡ዲናር፡ወመጽወተ፡ሤጦ፡ወነበረ፡እንዘ፡ይትቀነይ፡ከመ፡ገብር፡ወሶበ፡ያኀዝንዎ፡አግብርተ፡እግዚኡ፡ያስተርኢ፡ሎቱ፡ብእሲ፡ብርሃናዊ፡ወይቤሎ፡ኢትኀዝን፡እስመ፡አነ፡ነሣእኩ፡ሤጠከ፡ወነዋ፡ውስተ፡እዴየ።
37ወእምዝ፡ሶበ፡ከሠቱ፡ግብሮ፡ዕደው፡እለ፡መጽኡ፡እምሀገሩ፡ጐየ፡በኅቡእ፡ወበጽሐ፡ኀበ፡አንቀጸ፡ሀገር፡ወኮነ፡ዓጻዌ፡ኆኅት፡በሀመ፡ወጽሙመ፡ወሶበ፡ይቤሎ፡አንጢላርዮስ፡አርኁ፡ሊተ፡አንቀጸ፡ወፅአ፡እምአፉሁ፡ለቅዱስ፡በአምሳለ፡እሳት፡ወተፈትሐ፡ዕዘኒሁ፡ወልሳኑ፡ወአርኀወ፡ሎቱ፡ወወፅአ፡ወሖረ፡ገዳመ፡ወበህየ፡አዕረፈ።
38ወሶበ፡ኃጥእዎ፡ሰብእ፡ነገሮሙ፡ዓፃዊ፡ኵሎ፡ዘኮነ፡ወአንከሩ፡እምቅድስናሁ፡ወእመንክራቲሁ። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
39ወበዛቲ፡ዕለት፡አዕረፈ፡አባ፡ዮሐንስ፡ዘደብረ፡ጽጌ፡ለዝንቱ፡ቅዱስ፡እምብዝኃ፡ጾሙ፡ወጸሎቱ፡ወትጋሁ፡መጽለወ፡ሥጋሁ፡ወኮነ፡ከመ፡ምድር፡ይቡስ፤
40ወአሐተ፡ዕለተ፡ሶበ፡ከዐዉ፡ላዕሌሁ፡ማየ፡ምልአ፡ኮሬ፡ኢነጥበ፡ዘእንበለ፡ንስቲት፡እምብዝኃ፡ይብሰተ፡ሥጋሁ፤ በረከቱ፡ትኩን፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።