ግዕዝ
Home Formaciones Libros Biblioteca Ge'ez Contacto
Sinaxario · Meskerem

15 de Meskerem

አመ፡፲ወ፭፡ለመስከረም
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፲ወ፭፡ለመስከረም፡በዛቲ፡ዕለት፡ኮነ፡ፍልሰተ፡ሥጋሁ፡ለቅዱስ፡እስጢፋኖስ፡ሊቀ፡ዲያቆናት፡ወቀዳሜ፡ሰማዕት።
2ወዘከመ፡እፎ፡ኮነ፡ፍልሰቱ፡ውእቱኬ፡ሶበ፡ኃለፉ፡ዓመታት፡ብዙኃት፡እምድኅረ፡ዕረፍቱ፡መጠነ፡፫፻፡ዓመት፡እምድኅረ፡ነግሠ፡ቈስጠንጢኖስ፡ጻድቅ። ወረትዓት፡ሃይማኖት፡ርትዕት፡ወአምልኮ፡እግዚአብሔር፡ሠናይ።
3ወሀሎ፡አሐዱ፡ብእሲ፡ውስተ፡ይእቲ፡ዓፀድ፡ዘኮነ፡ሥጋሁ፡ለቅዱስ፡እስጢፋኖስ፡ቅሩበ፡ውስቴታ፡እንተ፡ትሰመይ፡ዓፀዶ፡ለገማልኤል፡ወቅሩብ፡እምኢየሩሳሌም። ወስሙ፡ለውእቱ፡ብእሲ፡ሉክያኖስ፡ወአስተርኣዮ፡ሎቱ፡መስተጋድል፡ቅዱስ፡እስጢፋኖስ፡በንዋሙ፡ወይቤሎ፡አነ፡ውእቱ፡እስጢፋኖስ፡ወአጠየቆ፡ከመ፡በውእቱ፡መካን፡ሥጋሁ፡ቅቡር። ወመጺኦ፡ውእቱ፡ብእሲ፡ኀበ፡ኤጲስ፡ቆጶስ፡ወነገሮ።
4ወሶበ፡ሰምዐ፡ኤጲስ፡ቆጶስ፡ዘኢየሩሳሌም፡ተፈሥሐ፡ፈድፋደ፡ወተንሥአ፡ሶቤሃ፡ወነሥአ፡ምስሌሁ፡፪ተ፡ኤጲስ፡ቆጶሳተ፡ወበጽሑ፡ኀበ፡ሀሎ፡ሥጋሁ፡ለቅዱስ፡ወከረይዎ፡ለውእቱ፡መካን፡ወኮነ፡ድልቅልቅ፡ዓቢይ፡ወተከሥተ፡ሣፁን፡ዘውስቴቱ፡ሥጋሁ፡ለቅዱስ፡እስጢፋኖስ፡ወፄነወ፡እምኔሁ፡ዕፍረት፡ምዑዝ፡ፈድፋደ፡ወሰምዑ፡ቃለ፡መላእክት፡እንዘ፡ይሴብሑ፡ወይብሉ፡ስብሐት፡ለእግዚአብሔር፡በሰማያት፡ወሰላም፡በምድር፡ሥምረቱ፡ለሰብእ።
5ወሰሚዖሙ፡ሰገዱ፡ወኮኑ፡ይሴብሑ፡ወይዜምሩ፡ኤጲስ፡ቆጶሳት፡ወካህናት፡ቅድመ፡ሠፁነ፡ሥጋሁ፡ለቅዱስ፡ወፆርዎ፡በዝማሬ፡ወበማኅሌት፡ወበመኀትው፡እስከ፡አብእዎ፡ውስተ፡ጽርሐ፡ጽዮን።
6ወእምድኅረዝ፡ኮነ፡አሐዱ፡ብእሲ፡ዘስሙ፡እለእስክንድሮስ፡እምሰብአ፡ሀገረ፡ቍስጥንጥንያ፡ወውእቱ፡ይነብር፡ውስተ፡ኢየሩሳሌም። ሐነፀ፡ሎቱ፡ለቅዱስ፡እስጢፋኖስ፡ቤተ፡ክርስቲያን፡ሠናይተ፡ወአፍለሰ፡ሥጋሁ፡ኀበ፡ይእቲ፡ቤተ፡ክርስቲያን።
7ወውእቱኒ፡አዕረፈ፡በ፭፡ዓመት፡ወቀበረቶ፡ብእሲቱ፡ለእለእስክንድሮስ፡በኀበ፡ገቦሁ፡ለሣፁን፡ዘቅዱስ፡እስጢፋኖስ።
8ወእምድኅረዝ፡በ፰ቱ፡ዓመት፡ሐለየት፡ብእሲቱ፡ለእለእስክንድሮስ፡ከመ፡ትሑር፡ቍስጥንጥንያ፡ወትሰድ፡ምስሌሃ፡ሥጋሁ፡ለምታ፡ወበጽሐት፡ኀበ፡መካን፡ዘቀበረቶ፡ኀበ፡ዝቦ፡ሣፁኑ፡ለሥጋ፡ቅዱስ፡እስጢፋኖስ፡ከመ፡ትቅብሮ፡ለምታ፡አፍሊሳ፡ውስተ፡ቤተ፡ክርስቲያን፡ዘሐነፀ፡ምታ፡በቍስጥንጥንያ።
9ወሣፁንሰ፡ዘምታ፡አምሳለ፡ሣፁን፡ዘሥጋ፡ቅዱስ፡እስጢፋኖስ፡ይመስል። ወበፈቃደ፡እግዚአብሔር፡እንዘ፡ኢተአምር፡ነሥአት፡ሣፁነ፡ሥጋሁ፡ለቅዱስ፡እስጢፋኖስ፡ኀበ፡ሀገረ፡እስቅላን፡ፆረቶ፡ወእምህየ፡ተፅዕነት፡ሐመረ፡ከመ፡ትሑር፡ሀገረ፡ቍስጥንጥንያ።
10ወእንዘ፡ተሐውር፡በሐመር፡ውስተ፡ባሕር፡ትሰምዕ፡ስብሐተ፡ዝማሬ፡እምውስተ፡ግፁን፡ዘሀሎ፡ውስቴቱ፡ሥጋሁ፡ለቅዱስ፡እስጢፋኖስ፡ሰማዕት፡ወአንከረት፡ወተንሥአት፡ከመ፡ትርአዮ፡ለውእቱ፡ሣፁን፡ወጠየቀት፡ከመ፡ውእቱ፡ሣፁን፡ዘውስቴቱ፡ሥጋሁ፡ለቅዱስ፡እስጢፋኖስ፡ወአእመረት፡ከመ፡ውእቱ፡ኮነ፡በፈቃደ፡እግዚአብሔር፡ወኢተከህላ፡ከመ፡ትትመየጥ፡ኀበ፡ኢየሩሳሌም፡አላ፡ኣእኰተቶ፡ለእግዚአብሔር፡ሎቱ፡ስብሐት፡በእንተ፡ዘገብረ፡ላቲ፡ዘንተ፡ዓቢየ፡ጸጋ።
11ወሶበ፡በጽሐት፡ኀበ፡ሀገረ፡ቍስጥንጥንያ፡ሖረት፡ይእቲ፡ብእሲት፡ኀበ፡ንጉሥ፡ወኣይድዓቶ፡ዜናሁ፡ለቅዱስ፡እስጢፋኖስ፡ወዘከመ፡ኮኑ፡ተአምራት፡እምኔሁ፡ወዘከመ፡በጽሐ፡መርሶ፡ሀገረ፡ቍስጥንጥንያ።
12ወሰሚዖ፡ንጉሥ፡ተንሥአ፡ወምስሌሁ፡ሊቀ፡ጳጳሳት፡ወካህናት፡ወብዙኃን፡እምሰብአ፡ሀገር፡ወበጽሑ፡ኀበ፡ሥጋሁ፡ለቅዱስ፡ወፆርዎ፡ዲበ፡አርእስቲሆሙ፡በዝማሬ፡ወበማኅሌት፡ብዙኅ፡በፍሥሐ፡ወበኃሤት፡እስከ፡ኣብጽሕዎ፡ኀበ፡ጽርሐ፡ንጉሥ።
13ወከሠተ፡እግዚእነ፡ተአምራተ፡ወመንክራተ፡በውስተ፡ሐመር፡ወበውስተ፡ጽርሐ፡ንጉሥ። ወእምኔሆሙ፡ሶበ፡ጸዓኑ፡ሥጋሁ፡ለቅዱስ፡ዲበ፡ሠረገላ፡በክልኤ፡አብቅልት፡ወበጽሑ፡ኀበ፡መካን፡ዘስሙ፡ቍስጥንጥንያ፡ዘፈቀደ፡ቅዱስ፡ከመ፡ያንብሩ፡ህየ፡ሥጋሁ፡በጺሖሙ፡አብቅልት፡ቆሙ፡በህየ፡ወኢያንሰሐስሑ።
14ወሶበ፡ዘበጥዎሙ፡ለአብቅልት፡ሰምዑ፡ቃለ፡እምነ፡፩ዱ፡በቅል፡ዘይብል፡ዝየ፡ይደሉ፡ከመ፡ያንብሩ፡ሥጋሁ፡ለቅዱስ፡እስጢፋኖስ።
15ወአንከሩ፡ኵሎሙ፡እለ፡ርእዩ፡ወሰምዑ፡ዘንተ፡ወሰብሕዎ፡ለእግዚአብሔር፡ወአእመሩ፡ከመ፡ዘአንበባ፡ለእድግተ፡በለዓም፡ውእቱ፡ዘአንበቦ፡ለበቅል፡ዘፆረ፡ሥጋሁ፡ለቅዱስ።
16ወአዘዘ፡ንጉሥ፡ከመ፡ትትሐነፅ፡ሎቱ፡ቤተ፡ክርስቲያን፡ሠናይት፡ወሐነፁ፡በከመ፡አዘዘ፡ንጉሥ።
17ወአንበሩ፡ውስቴታ፡ዕንቈ፡ባሕርይ፡ክቡረ፡ወንጹሐ፡ዘውእቱ፡ሥጋሁ፡ለቅዱስ፡ወቡሩክ፡እስጢፋኖስ፡ሐዋርያዊ፡ሊቀ፡ዲያቆናት፡ወቀዳሜ፡ሰማዕት። ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለእስጢፋኖስ፡አፍልሶ፡ሥጋሁ፡ዘተሀበሉ።በዲበ፡አብቅልት፡፪ቱ፡እንዘ፡ያሌዕሉ።አመ፡ነድእዎሙ፡ሶቤ፡ለአርእዮ፡ዐቢይ፡ኃይሉ።ነበበ፡በቅል፡እንዘ፡ይብል፡አሐዱ፡እምእሉ።መካነ፡ሥጋሁ፡ለቅዱስ፡በዝየ፡ይደሉ።
18ወበዛቲ፡ዕለት፡ኮነ፡ተዝካሩ፡ለአብ፡ቅዱስ፡ኣባ፡ጴጥሮስ፡ዘእምሀገረ፡ጠራው፤ ወዝንቱ፡ቅዱስ፡ኮነ፡ብፅዓተ፡ለእግዚአብሔር፡እምከርሠ፡እሙ።
19ወሶበ፡ልኅቀ፡ወኮነ፡ፍጹመ፡ልብ፡ተጋደለ፡ተጋድሎ፡ዓቢየ፡ወተፀምደ፡ለእግዚእነ፡በጾም፡ወበጸሎት፡መዓልተ፡ወሌሊተ፡ወትረ፡ወኢኮነ፡ዘይበልዕ፡እመባልዕተ፡ሰብእ፡ምንተኒ፡አላ፡ይሴሰይ፡ዘረከበ፡በገዳም፡ወተመሰለ፡ከመ፡መላእክት፡እስመ፡ሲሳዩሰ፡ኮነ፡ዝክረ፡ስሙ፡ለእግዚአብሔር፡በመዓልት፡ወበሌሊት፡ዘእንበለ፡ጽርዓት።
20ወደለዎ፡ከመ፡ያንሶሱ፡በእገሪሁ፡ውስተ፡ማየ፡ፈለግ፡ዘይሰመይ፡ዕሎን፡ወኢርሕሳ፡እገሪሁ። ወሥጋሁኒ፡ኮነ፡ይቡሰ፡ፈድፋደ፡እምብዝኀ፡ምንዳቤ።
21ወክበደ፡ሐፂን፡ይለብስ፡በኵሉ፡መዋዕለ፡ሕይወቱ፡እስከ፡ኮነ፡ከመ፡ምትሐት፡ወአኮ፡ከመ፡ሰብእ። ወአሥመሮ፡ለእግዚአብሔር፡በገድሉ፡ሠናይ፡ወፈለሰ፡ኀቤሁ፡ጸሎቱ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለጴጥሮስ፡ብሕትው።ኮከበ፡ጠራው።ወውስተ፡ዓለም፡ኅሩም፡እምበሊዐ፡ኅብስት፡ወጼው።እስከ፡አስተርአየ፡በአምሳለ፡ምትሐት፡ሕስው።ተሴስዮ፡ሣዕር፡አብደረ፡በበድው።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።