Sinaxario · Megabit
6 de Megabit
አመ፡፮፡ለመጋቢት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፮፡ለመጋቢት፡በዛቲ፡ዕለት፡ኮነ፡ሰማዕተ፡ዲዮስቆሮስ፡በመዋዕለ፡መንግሥቶሙ፡ለተንባላት።
2ወዝንቱ፡ቅዱስ፡እምሀገረ፡እስክንድርያ፡ቀዳሚ፡አገበርዎ፡ተንባላት፡ወአብእዎ፡ውስተ፡ሃይማኖቶሙ፡ወነበረ፡ኅዳጠ፡መዋዕለ።
3ወሀለወቶ፡አሐቲ፡እኅት፡በሀገረ፡ፍዩም፡እንተ፡ተወስበት፡ለ፩፡ብእሲ፡መሃይምን፡ወሶበ፡ሰምዐት፡ከመ፡እኍሃ፡ኀደገ፡ሃይማኖተ፡እግዚእነ፡ኢየሱስ፡ክርስቶስ፡ዘሎቱ፡ስብሐት፡ኀዘነት፡ዐቢየ፡ኀዘነ።
4ወእምዝ፡ፈነወት፡ኀቤሁ፡መልእክተ፡እንዘ፡ትብል፡ኮንኩ፡አነ፡እፈቱ፡ከመ፡ይም፡ጻእ፡ኀቤየ፡ዜናከ፡ከመ፡አንተ፡ሞትከ፡በክር፡ስትናከ፡እምተፈሣሕኩ፡ወኢይምጻእ፡ዜና፡ሞትከ፡እንዘ፡ሀሎከ፡በክሕደትከ፡ክርስቶስሃ፡ዘሎቱ፡ስብሐት።
5ወናሁ፡ትቤሎ፡እምውስተ፡መጻሕፍት፡እንዘ፡ታዜክሮ፡ኅልፈተ፡ዓለም፡ወበተፍጻሜተ፡መልእክታ፡አእምር፡ከመ፡ዛቲ፡መልእክት፡ተፍጻሜተ፡ፍቅር፡ዘማእከሌየ፡ወማእከሌከ፡እመ፡ኢተመየጥከ፡ኀበ፡ሃይማኖትከ፡ርትዕት፡ዘክርስቶስ።
6ወሶበ፡አንበበ፡መጽሐፈ፡መልእክታ፡ለእኅቱ፡ኀዘነ፡ወበከየ፡ብካየ፡መሪረ፡ወጸፍዐ፡ገጾ፡ወመልሐ፡ጽሕሞ፡ተንሥአ፡ወቀነተ፡ሐቌሁ፡ወጸለየ፡ጸሎተ፡ነዋኀ፡ወአስተብቍዐ፡ብዙኀ፡ወዓተበ፡ርእሶ፡በትእምርተ፡መስቀል፡ማኅየዊ፡ወወፅአ፡እምቤቱ፡ወአንሶሰወ፡ውስተ፡ሀገረ፡እስክንድርያ።
7ወሶበ፡ርእይዎ፡ተንባላት፡አኀዝዎ፡ወአቅረብዎ፡ኀበ፡መኰንን፡ወተስእሎ፡በእንተ፡ዘኮነ፡እምኔሁ፡አውሥኦ፡ለመኰንን፡ወይቤሎ፡አነ፡ክርስቲያናዊ፡ወኢየአምር፡ምንተኒ፡ዘእንበለ፡ዝንቱ።
8ወይቤሎ፡መኰንን፡አኮኑ፡ኀደገ፡ሃይማኖተከ፡ወቦእከ፡ውስተ፡ሃይማኖተ፡ዚአነ፡አውሥኦ፡ዲዮስቆሮስ፡ወይቤሎ፡ጽሑፍ፡ውስተ፡ወንጌል፡ቅዱስ፡ዘኢየአምን፡በወልድ፡ኢይሬኢ፡ሕይወተ፡አላ፡ይወርድ፡ላዕሌሁ፡መቅሠፍተ፡እግዚአብሔር፡ወበእንተዝ፡አነ፡አአምን፡በእግዚእነ፡ኢየሱስ፡ክርስቶስ፡ወልደ፡እግዚአብሔር፡ሕያው፡ሎቱ፡ስብሐት። ወሊተ፡ልደትየ፡እምክርስቲያን፡ወእመውት፡በክርስትናየ።
9ወተምዐ፡መኰንን፡ላዕሌሁ፡ወይቤሎ፡ለእመ፡ኢተመየጥከ፡እምዝንቱ፡ምክርከ፡አነ፡እኴንነከ፡ኵነኔ፡ዐቢየ፡ኢፈርሃ፡ውእቱኒ፡እምኵነኔሁ፡ወኢተመይጠ፡እምክሩ፡ሠናይ፡ወቀሠፎ፡መቅሠፍተ፡ዐቢየ፡ወእምዝ፡ሞቅሖ፡ወነበረ፡ኅዳጠ፡መዋዕለ።
10ወእምድኅረዝ፡አውፅኦ፡እምቤተ፡ሞቅሕ፡ወተካየዶ፡ኪዳናተ፡ብዙኃተ፡ከመ፡የሃቦ፡ንዋያተ፡ብዙኃተ፡እመ፡ይትመየጥ፡ወእመ፡አኮ፡ያውዕይዎ፡በእሳት፡ወይቤሎ፡አንሰ፡ኢይመውት፡ዘእንበለ፡በሃይማኖተ፡ክርስቲያን፡ማኅየዊት።
11ወእምዝ፡አዘዘ፡ይክርዩ፡ሎቱ፡ዓዘቅተ፡በአፍአ፡ሀገር፡ወይምልእዎ፡ዕፀወ፡ወያን፡ድዱ፡እሳተ፡ወገብሩ፡በከመ፡አዘዞሙ፡ወተለ፡ዓለ፡ነበልባሉ፡ፈድፋደ።
12ወውእተ፡ጊዜ፡ቀሠፍዎ፡ኵሎሙ፡ሰብአ፡ሀገር፡መቅሠፍተ፡ዐቢየ፡ወሠጠቁ፡ሥጋሁ፡በመጥባሕት፡ወእምድኅረዝ፡ወገርዎ፡ውስተ፡እሳት፡ወመጠወ፡ነፍሶ፡ውስተ፡እዴሁ፡ለእግዚአብሔር፡ወነሥአ፡አክሊለ፡ስምዕ፡በመንግሥተ፡ሰማያት። በረከተ፡አምላኩ፡ተሀሉ፡ምስሌነ፡ለዓለመ፡ዓላም፡ኣሜን።
ሰላም፡ለዲዮስቆሮስ፡መንገለ፡አሚን፡ዘተስሕበ፤መልእክተ፡እኅቱ፡ጽሑፈ፡በጊዜ፡አንበበ፤ንትፈተ፡ሥጋሁ፡በሐፂን፡ኢያስተዓፀበ፤ወአስተቃለለ፡አመ፡ይወድይዎ፡ካዕበ፤ዘዓዘቅተ፡እሳት፡ዕሙቅ፡ወዘነድ፡ሳህበ።
13ወበዛቲ፡ዕለት፡ኮነ፡ተዝካረ፡ዕረፍቱ፡ለቅዱስ፡ቴዎዶስዮስ፡ኤጲስቆጶስ፡ዘሀገረ፡ቆሮንቶስ፡ዘእምደሴተ፡ቆጵሮስ።
14ለዝንቱ፡ቅዱስ፡ሰምዐ፡ዜናሁ፡ዮልዮስ፡መኰንን፡ዘቆጵሮስ፡ዘሥዩም፡እምዲዮቅልጥያኖስ፡ወአብጽሖ፡ኀቤሁ፡ወኀሠሠ፡እምኔሁ፡ከመ፡ይክሐዶ፡ለክርስቶስ፡ሎቱ፡ስብሐት፡ወይገር፡ዕጣነ፡ለጣዖታቲሁ፡ርኩሳን።
15አውሥኦ፡ቅዱስ፡ቴዎዶስዮስ፡ወይቤሎ፡አንሰ፡አአምን፡በእግዚእየ፡ኢየሱስ፡ክርስቶስ፡ወልደ፡እግዚአብሔር፡ሕያው፡ፈጣሬ፡ኵሉ፡ዓለም፡ወሎቱ፡እሰግድ።
16ወሶበ፡ኢሰምዐ፡ቅዱስ፡ቴዎዶስዮስ፡ትእዛዞ፡ቀሠፎ፡መቅሠፍተ፡ዐቢየ፡በጥብጣቤ፡አነዳ፡ላሕም፡ወሰቀሎ፡ወሠጠቀ፡ኵሎ፡ሥጋሁ፡ወአውረዶ፡ወአስከቦ፡ዲበ፡ዓራተ፡ሐፂን፡ዘአርሰንዎ፡በእሳት፡ወኢለከፎ፡ምንትኒ፡እምዝንቱ፡ኵነኔ።
17ወእምዝ፡ቀነውዎ፡እደዊሁ፡ወእገሪሁ፡በቅንዋት፡ነዋኀት፡ወሰሐብዎ፡እስከ፡ቤተ፡ሞቅሕ፡ወገርዎ፡ውስቴቱ፡ወነበረ፡ህየ፡እስከ፡አመ፡አጥፍኦ፡እግዚእነ፡ለዲዮቅልጥያኖስ፡ከሐዲ፡ወነግሠ፡ህየንቴሁ፡ቈስጠንጢኖስ፡ጻድቅ።
18አሜሃ፡አዘዘ፡ቈስጠንጢኖስ፡ንጉሥ፡ይፍትሕዎሙ፡ለኵሎሙ፡ክርስቲያን፡ሙቁሐን።
19ወሶበ፡ፈትሕዎ፡ተመይጠ፡ዝንቱ፡አብ፡ወነበረ፡ዲበ፡መንበረ፡ሢመቱ፡ወዓቀበ፡መርዔቶ፡በሠናይ፡ወአዕረፈ፡በሰላም። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለቴዎዶስዮስ፡በእንተ፡ስምዐ፡ጽድቅ፡ዘተዘብጠ፤ብዙኀ፡ዓመታተ፡ተሞቂሖ፡ወአኮ፡ኅዳጠ፤ለዲዮቅልጥያኖስ፡ዕልው፡እምድኅረ፡መንግሥቱ፡ተሠጠ፤ኀበ፡ዘትካት፡መንበሩ፡በትእዛዘ፡አምላክ፡ተመይጠ፤እስከ፡መዋዕሉ፡በኀድአት፡ወበዛኀን፡ተሠልጠ።
20ወበዛቲ፡ዕለት፡አዕረፉ፡ገዳማውያን፡እንጦንስ፡ወአርከሌድስ፡ወዘሩፋኤል፡ጻድቅ። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ሰላም፡እብል፡ሕሊናከ፡ጽሩየ፤ዘኢረስሐ፡ምንተኒ፡ወዘኢተጸብለየ፤ዘሩፋኤል፡ኀቤከ፡እስመ፡ትጸርሕ፡ነፍስየ፤መንኖ፡ዘበምድር፡ይበቍዐከ፡አቡየ፤ዘበሰማያት፡ኢትኅድግ፡ኪያየ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።