Sinaxario · Megabit
30 de Megabit
አመ፡፴ሁ፡ለመጋቢት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፴ሁ፡ለመጋቢት፡በዛቲ፡ዕለት፡ይደልወነ፡ከመ፡ንግበር፡በዓለ፡ለመልአክ፡ክቡር፡ገብርኤል፡በዕበየ፡ክብሩ፡ዘአምኀ፡እግዚአብሔር፡ዘደለዎ፡ከመ፡ይፁር፡ዜና፡ወልዱ፡ኀበ፡ማርያም፡ድንግል፡ወበእንተዝ፡ተሣሃለ፡ላዕሌነ፡በዛቲ፡ጸጋ፡ዓባይ፡ወክብርት፡በእዴሁ፡ለዝንቱ፡መልአክ፡ክቡር፡ወይደልወነ፡ከመ፡ናክብሮ፡ወንወድሶ።
2ወውእቱ፡ቀዳሚ፡ዘዜነዎ፡ለዳንኤል፡በእንተ፡ክርስቶስ፡ሶበ፡ኮነ፡ይጼሊ፡ወይስእል፡በእንተ፡ተመይጦቶሙ፡ለሕዝብ፡እምነ፡ፄዋዌ፡ወበእንተ፡ምጽአቱ፡ለመድኃኒነ፡ክርስቶስ፡አስተርአዮ፡ሎቱ፡ወወሰነ፡ሱባዔያተ፡ወከሠተ፡ሎቱ፡ከመ፡በተፍጻሜቶሙ፡ይመጽእ፡ክርስቶስ፡ሎቱ፡ስብሐት። ንጽሖሙ፡ለንጹሐን፡ወይቀትልዎ፡ወይከውና፡ለኢየሩሳሌም፡መድኅነ፡ወእምድኅሬሁ፡ይሰዓሩ፡መሥዋዕታት፡ወቍርባናት፡ዘደቂቀ፡እስራኤል።
3ወበእንተዝ፡ረሰዮ፡እግዚአብሔር፡ከመ፡ይዜንዋ፡ለእግዝእትነ፡ማርያም፡በእንተ፡መድኀኒተ፡ኵሉ፡ዓለም፡ከመ፡ይትወለድ፡እምኔሃ።
4ወንሕነኒ፡ይደልወነ፡ከመ፡ንግበር፡በዓለ፡ተዝካሩ፡ወንስአሎ፡ከመ፡ይተንብል፡በእንቲአነ፡ከመ፡ይባልኀነ፡እግዚአብሔር፡እምእዴሁ፡ለሰይጣን፡ጸላኢነ፡ወይርድአነ፡በኵሉ፡ምግባራቲነ። ትንብልናሁ፡ያድኅነነ፡እምኵሉ፡ምንዳቤነ፡ለዓለመ፡ዓለም፡አሜን።
ሰላም፡ለገብርኤል፡ዘተፈነወ፡እምልዑል፤እንዘ፡ዜና፡ዋሕድ፡ወልዱ፡ይፀውር፡ኀበ፡ማርያም፡ድንግል፤ለዝንቱ፡ዜናዊ፡መልአከ፡ኃይል፤በዛቲ፡ዕለት፡ከመ፡ይትገበር፡በዓል፤መምህራን፡አዘዙ፡ወሠርዑ፡በቃል።
5ወበዛቲ፡ዕለት፡ተዝካሩ፡ለሶምሶን፡፩፡እመሣፍንተ፡እስራኤል፡ለዝንቱ፡ጻድቅ፡ኮነ፡ስመ፡አቡሁ፡ማኑሄ፡እምነገደ፡ዳን፡ወኮነት፡እሙ፡መካነ።
6ወመጽአ፡ኀቤሃ፡መልአከ፡እግዚአብሔር፡ወዜነዋ፡ልደቶ፡ወአዘዛ፡ከመ፡ትርኅቅ፡እምኵሉ፡ርኵስ፡ወእምበሊዐ፡ሥጋ፡ወሰትየ፡ወይን፡ዘያሰክር፡እንዘ፡ሀለወት፡ጽንስተ፡እስከ፡አመ፡ትወልድ፡ወኢትላፂ፡ሥዕርተ፡ርእሱ፡እስመ፡ውእቱ፡ቅዱሰ፡ይሰመይ፡ለእግዚአብሔር፡ወበእደዊሁ፡ይከውን፡መድኀኒቶሙ፡ለደቂቀ፡እስራኤል፡እምሰብአ፡ፍልስጥኤም።
7ወነገረቶ፡ለምታ፡ዘከመ፡ዜነዋ፡መልአነ፡ውእቱኒ፡ሰአለ፡ኀበ፡እግዚአብሔር፡ከመ፡ያርእዮ፡ውእተ፡መልአከ፡ወሰምዖ፡እግዚእ፡ወአስተርአዮ፡ውእቱ፡መልአክ፡ወይቤሎ፡አዝዛ፡ለብእሲትከ፡ከመ፡ትዕቀብ፡ዘአዘዝክዋ።
8ወእምዝ፡ጸንሰቶ፡ወወለደቶ፡ለዝንቱ፡ጻድቅ፡ወባረኮ፡እግዚአብሔር፡ወወረደ፡ዲቤሁ፡መንፈሰ፡እግዚአብሔር፡ወተወልደ፡ምስለ፡ኃይል።
9ወአሐተ፡ዕለተ፡ተንሥአ፡አንበሳ፡ላዕሌሁ፡ውእቱኒ፡አኀዞ፡ለአንበሳ፡ወሠጠቆ፡እማእከሉ።
10ወበካልእ፡ጊዜ፡ቀተለ፡እምሰብአ፡ፍልስጥኤም፡ብዙኃነ፡ሰብአ፡ወአውዓየ፡ሀገሮሙ፡ምስለ፡ሰብሎሙ።
11ወበእንተዝ፡ተንሥኡ፡ሰብአ፡ፍልስጥኤም፡ላዕለ፡ደቂቀ፡እስራኤል፡ከመ፡ይፅብዕዎሙ፡በእንቲአሁ፡ወእመ፡አኮ፡ይመጥውዎ፡ለሶምሶን፡ወነገርዎ፡ለሶምሶን፡ዘከመ፡ይቤልዎሙ፡ሰብአ፡ፍልስጥኤም።
12ወይቤሎሙ፡ሶምሶን፡ለደቂቀ፡ይሁዳ፡መሐሉ፡ሊተ፡አንትሙ፡ከመ፡ኢትቅትሉኒ፡ወሶበ፡መሐሉ፡ሎቱ፡መጠወ፡ሎሙ፡ርእሶ፡ወአሰርዎ፡በ፪፡ሐብል፡ሐዲስ፡ወመጠውዎሙ፡ለሰብአ፡ፍልስጥኤም፡ወተንሥኡ፡ላዕሌሁ፡ከመ፡ይቅትልዎ፡ወወረደ፡ላዕሌሁ፡መንፈሰ፡ኀይል፡ወበተከ፡እሎንተ፡ማእሰራተ፡ወወድቃ፡እምእደዊሁ፡ወረከበ፡መንሰከ፡አድግ፡ወቀተለ፡ቦቱ፡፲፻፡ዕደወ፡እምሰብአ፡ፍልስጥኤም።
13ወእምድኅረዝ፡ጸምአ፡ወቀርበ፡ለመዊት፡ወሰአለ፡ኀበ፡እግዚአብሔር፡ወአውኀዘ፡ሎቱ፡እምውእቱ፡መንሰከ፡አድግ፡ማየ፡ጥዑመ፡ወሰትየ፡ወፀንዐ።
14ወሶበ፡ጸንሕዎ፡ሰብአ፡ጋዛ፡ከመ፡ይቅትልዎ፡ተንሥአ፡በሌሊት፡ወፆረ፡ማዕፆ፡አንቀጸ፡ጋዛ፡ወአዕረጎ፡መልዕልተ፡ደብር፡ወወረዎ፡ኀበ፡እግረ፡ደብር።
15ወሶበ፡ተመውዑ፡ሖሩ፡ኀበ፡ብእሲቱ፡ወተካየድዋ፡ከመ፡የሀብዋ፡ንዋየ፡ብዙኀ፡ወይቤልዋ፡ጠይቂ፡እምትኪ፡ሶምሶን፡ከመ፡በምንት፡ይትኄየል፡ወይእቲኒ፡ተሰአለቶ፡ወሐተተቶ፡ወነገራ፡ከመ፡ኀይሉ፡ውስተ፡ሥዕርቱ፡ወጸንሕዎ፡ውስተ፡መካን፡ኅቡዕ፡እስከ፡ይነውም፡ወሶበ፡ኖመ፡ላፀየቶ፡ወደክመ፡ኀይሉ፡አሜሃ፡ቦኡ፡ኀቤሁ፡ጸላእቱ፡ወአሰርዎ፡ወወሰድዎ፡ውስተ፡ብሔሮሙ፡በትፍሥሕት፡ወአፆሩ፡አዕይንቲሁ።
16ወእምድኅረዝ፡በቈለ፡ሥዕርተ፡ርእሱ፡ወተመይጠ፡ሎቱ፡ኃይሉ፡ወእሙንቱ፡አብእዎ፡ውስተ፡በዓለ፡ቤተ፡ጣዖቶሙ፡እንዘ፡ይመርሕዎ፡ወቆመ፡ሶምሶን፡ወአኀዘ፡፪ተ፡አዕማደ፡አሐደ፡በየማኑ፡ወአሐደ፡በጸጋሙ፡ወመልሖሙ፡ወወድቀት፡ይእቲ፡ቤት፡ወሞቱ፡ኵሎሙ፡እለ፡ሀለዉ፡ውስተ፡ቤተ፡ጣዖት፡ወእለ፡ሞቱሂ፡በይእቲ፡ቅትለት፡ይበዝኁ፡እምአለ፡ቀተሎሙ፡በኵሉ፡መዋዕለ፡ሕይወቱ፡ውእቱኒ፡ሞተ፡ምስሌሆሙ፡እስመ፡ውእቱ፡ሐለየ፡ከመ፡በሞቱ፡ይመውቱ፡ብዙኃን፡እምጸላእቱ፡ለእግዚአብሔር።
17ወኵሉ፡መዋዕል፡ዘኰነኖሙ፡ሶምሶን፡ለእስራኤል፡፳፡ዓመት፡ወእምዝ፡አዕረፈ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለሶምሶን፡ናዝራዌ፡ዘተሰምየ፤ኢተቀርፀ፡ሥዕርተ፡ርእሱ፡ወኢተላጸየ፤መፍቅደ፡ሥጋሁ፡ረከበ፡በጊዜ፡ሐለየ፤እምአፈ፡አንበሳ፡ፀቃውዐ፡መዓር፡ሲሳየ፤ወእመንሰከ፡አድግ፡ካዕበ፡ዘይሰቲ፡ማየ።
18ወበዛቲ፡ዕለት፡ፍልሰተ፡ሥጋሁ፡ለያዕቆብ፡ግሙድ፡ወሰማዕት፡ወናሁ፡ጸሐፍነ፡ገድሎ፡አመ፡፳ወ፯፡ለወርኀ፡ኅዳር። በረከቱ፡ትኩን፡ምስሌነ፡ለዓለመ፡ዓለም፡አሜን
ሰላም፡ለፍልሰተ፡ሥጋከ፡እምድኅረ፡ተመትረ፡ርእሳ፤ እምብሔረ፡ፋርስ፡ሀገረ፡ብሕንሳ፤ ያዕቆብ፡ግሙድ፡ለኀበ፡፪ኤ፡፴ሳ፤ አሥግረኒ፡በጸሎትከ፡ለባሕረ፡ዓለም፡እምከርሣ፤ ከመ፡ያሠግሩ፡ኖትያት፡ዓሣ።ሰላም፡ለዮሐንስ፡ዘአፃመወ፡ሥጋሁ፤ እንዘ፡ይበልዕ፡ኅብስተ፡መጠነ፡እራኁ፤ ለዝ፡መምህር፡በእንተ፡ጽድቁ፡ወኄርውናሁ፤ ሰላም፡ለደቂቁ፡ወለእሊአሁ፤ ከመ፡ፍሬ፡በቀልት፡ወዘግባ፡ፈድፈዱ፡ወበዝኁ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።