ግዕዝ
Home Formaciones Libros Biblioteca Ge'ez Contacto
Sinaxario · Megabit

27 de Megabit

አመ፡፳ወ፯፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፯፡ለመጋቢት፡በዛቲ፡ዕለት፡አዕረፈ፡አብ፡ቅዱስ፡ወብፁዕ፡ማኅቶተ፡ገድል፡ወገዳም፡ወአበ፡ኵሎሙ፡መነኮሳት፡ዘገዳመ፡አስቄጥስ፡አባ፡መቃርስ፡ዘየዓቢ።
2ወዝንቱ፡ቅዱስ፡እምሀገረ፡ሳሱይር፡እም፡ደወለ፡መኑፍ፡እምደቡበ፡ግብፅ፡ወኮኑ፡አበዊሁ፡ጻድቃነ፡ወኄራነ፡ወስሙ፡ለአቡሁ፡አብርሃም፡ወስማ፡ለእሙ፡ሣራ፡ወይእቲ፡ከመ፡ኤልሳቤጥ፡ወሣራ፡ዘተሐውር፡በትእዛዘ፡እግዚአብሔር፡ወበትሕትና።
3ወኮነ፡አቡሁ፡ካህነ፡ክቡረ፡ወይትለአክ፡ውስተ፡ቤተ፡እግዚአብሔር፡በቅድስና፡ወበንጽሕ፡ወበፈሪሃ፡እግዚአብሔር፡ወባረከ፡እግዚአብሔር፡ላዕሌሆሙ፡ወአልዓሎሙ፡በኵሉ፡ምግባሮሙ።
4ወኮኑ፡ዘይሁቡ፡ምጽዋተ፡ለነዳያን፡ወለምስኪናን፡ወይምህርዎሙ፡ለኵሎሙ፡ሕዝብ፡ወይትጋደሉ፡ወትረ፡በጾም፡ወበጸሎት።
5ወባሕቱ፡ኢኮነ፡ሎሙ፡ወልድ፡ወአስተርአዮ፡ለአብርሃም፡ወልድ፡እምኀበ፡እግዚአብሔር፡ወአጠየቆ፡ከመ፡እግዚእነ፡ሀለዎ፡የሀቦ፡ወልደ፡ቡሩከ፡ዘይከውን፡ዝክሩ፡ውስተ፡ኵሉ፡ዓለም፡ወይወልድ፡ውሉደ፡መንፈሳውያነ።
6ወእምዝ፡ወሀቦ፡እግዚአብሔር፡ዘንተ፡ቅዱሰ፡መቃርዮስሃ፡ዘበትርጓሜሁ፡ብፁዕ፡ወኮነ፡ጸጋ፡እግዚአብሔር፡ላዕሌሁ፡እምንእሱ፡ወይትኤዘዝ፡ለአበዊሁ።
7ወሶበ፡ልኀቀ፡ሐጸዩ፡ሎቱ፡ብእሲተ፡ያስተዋስብዎ፡ወኢኮነ፡ዘይፈቅድ፡ዘንተ፡ግብረ፡ወስሕቱ፡አገበርዎ፡ይግበር፡ፈቃዶሙ፡ዘእንበለ፡ፈቃዱ፡ወበዊኦ፡ውስተ፡ጽርሐ፡መርዓሁ፡ረሰየ፡ርእሶ፡ከመ፡ዘደወየ፡ወነበረ፡ብዙኃ፡መዋዕለ።
8ወእምድኅረዝ፡ይቤሎ፡ለአቡሁ፡ኅድገኒ፡እሑር፡ኀበ፡ገዳም፡ከመ፡እጥዓይ፡ንስቲተ፡እምዝንቱ፡ደዌ፡ወኀደጎ፡ወሖረ፡ውስተ፡ገዳመ፡አስቄጥስ፡ወኵሎ፡አሚረ፡ይስእሎ፡ለእግዚአብሔር፡ከመ፡ይምርሖ፡ውስተ፡ገቢረ፡ሥምረቱ፡ወእምዝ፡ርእየ፡ራእየ፡ዘከመ፡ኪሩብ፡ዘ፮ቱ፡ክነፊሁ፡አኀዞ፡እደዊሁ፡ወአዕረጎ፡መልዕልተ፡ደብር፡ወአርአዮ፡ኵሎ፡ገዳመ፡ምሥራቃ፡ወምዕራባ፡ኑኃ፡ወግድማ፡ወይቤሎ፡ናሁ፡ወሀበከ፡እግዚአብሔር፡ዘንተ፡ገዳመ፡ርስተ፡ለከ፡ወለውሉድከ።
9ወሶበ፡ተመይጠ፡እምውእቱ፡ገዳም፡ረከባ፡ለይእቲ፡ወለት፡እንዘ፡ትደዊ፡ወእምዝ፡አዕረፈት፡በድንግልናሃ፡ወአእኰቶ፡ለእግዚእነ፡ወእምድኅረ፡ኅዳጥ፡መዋዕል፡አዕረፉ፡አቡሁ፡ወእሙ፡ወወሀበ፡ኵሎ፡ንዋየ፡ለነዳያን፡ወለምስኪናን፡ዘቤተ፡አቡሁ።
10ወሰብአ፡ሳሱይርሰ፡ሶበ፡ርእዩ፡ጽድቆ፡ወንጽሕናሁ፡ሤምዎ፡ቀሲሰ፡ወሐነፁ፡ሎቱ፡መካነ፡በአፍአ፡ሀገር፡ወየሐውሩ፡ኀቤሁ፡ወይትሜጠዉ፡ምሥጢራተ፡ቅድሳት።
11ወሀለወት፡አሐቲ፡ወለት፡ድንግልት፡በይእቲ፡ሀገር፡ወዘመወት፡ምስለ፡፩፡ወሬዛ፡ወፀንሰት፡ወይቤላ፡ውእቱ፡ወሬዛ፡ሶበ፡ተስእለኪ፡አቡኪ፡ወይቤለኪ፡መኑ፡አማሰነ፡ድንግልናኪ፡በሊዮ፡እስመ፡ውእቱ፡ቀሲስ፡ባሕታዊ፡አማሰነ፡ድንግልናየ፡ወሶበ፡አእመረ፡አቡሃ፡ከመ፡ጸንሰት፡ተስእላ፡ወይቤላ፡መኑ፡ዘገብረ፡ብኪ፡ዘንተ፡ኀፍረተ፡አውሥአቶ፡ወትቤሎ፡አሐተ፡ዕለተ፡ሖርኩ፡ኀበ፡ውእቱ፡ባሕታዊ፡ቀሲስ፡ዘስሙ፡መቃርስ፡ነሥአኒ፡በኀይል፡ወሰከበ፡ምስሌየ፡ወጸነስኩ፡እምኔሁ።
12ወሶበ፡ሰምዑ፡አበዊሃ፡ዘንተ፡ነገረ፡ተምዑ፡ፈድፋደ፡ወሖሩ፡ኀቤሁ፡ምስለ፡ብዙኃን፡ሰብእ፡አኀዝዎ፡ወአውፅእዎ፡እምበዓቱ፡ወዘበጥዎ፡ዝብጠተ፡ዐቢየ፡እስከ፡ቀርበ፡ለመዊት፡ወቅዱስሰ፡ይሴአሎሙ፡እንዘ፡ይብል፡ምንት፡ኀጢአትየ፧ እስመ፡አንትሙ፡ትዘብጡኒ፡እንበለ፡ምሕረት።
13ወእምዝ፡አሰሩ፡ውስተ፡ክሣዱ፡ሐብለ፡ወዲቤሁ፡ሰቀሉ፡ገልዓተ፡ዘአጽለምዎ፡በፍሕም፡ወኮኑ፡ይስሕብዎ፡ለፌ፡ወለፌ፡ወከልሑ፡ላዕሌሁ፡ከመ፡ዓብድ፡እንዘ፡ይብሉ፡ዝንቱ፡ውእቱ፡ዘአማሰነ፡ድንግልናሃ፡ለወለ፡ትነ።
14ወውእተ፡ጊዜ፡አስተርአዩ፡መላእክት፡በአምሳለ፡ሰብእ፡ወይቤልዎሙ፡ለእሉ፡እኩያን፡ምንተ፡እኩየ፡ገብረ፡ዝንቱ፡መስተጋድል፡ወነገርዎሙ፡ዘመሰሎሙ፡ዘገብረ፡ላዕለ፡ይእቲ፡ወለት፡ወይቤልዎሙ፡እሙንቱ፡መላእክት፡ዝንቱ፡ነገር፡ሐሰት፡ውእቱ፡እስመ፡ንሕነ፡ነአምሮ፡ለዝንቱ፡ብእሲ፡እምንእሱ፡እስከ፡ዛቲ፡ዕለት፡ወውእቱ፡ኅሩይ፡ወጻድቅ።
15ወቀርቡ፡ኀቤሁ፡ወፈትሕዎ፡እማእሰሩ፡ወገደፉ፡እምላዕሌሁ፡እሎንተ፡ገልዓተ፡እሙንቱሰ፡እኩያን፡ይቤሉ፡እስከ፡ይሁበነ፡ዘይትሐበዮ፡ኢነኀድጎ፡ይሑር፡ወመጽአ፡፩፡ብእሲ፡ዓርኩ፡ዘኮነ፡ይሣየጥ፡ሎቱ፡ግብረ፡እደዊሁ፡ወተሀበዮ፡ከመ፡የሀባ፡ሲሳያ፡ለይእቲ፡ወለት፡ወኀደግዎ፡ወሖረ፡ኀበ፡በዓቱ።
16ወኮነ፡ይጌሥፃ፡ለነፍሱ፡ወይብል፡ኦ፡መቃርስ፡ናሁ፡ኮነ፡ለከ፡ብእሲት፡ወደቂቅ፡ይደልወከ፡ከመ፡ትትገበር፡መዓልተ፡ወሌሊተ፡ወኮነ፡ወትረ፡ይገብር፡ከመዝ፡ወይገብር፡አስፈሬዳተ፡ወይሁቦ፡ለውእቱ፡ብእሲ፡እኍ፡ውእቱኒ፡ይሠይጥ፡ሎቱ፡ወይሁባ፡ለይእቲ፡ወለት፡ሐሳዊት።
17ወሶበ፡ቀርበ፡ዕለተ፡ወሊዶታ፡ዓፀባ፡ፈድፋደ፡ወነበረት፡ውስተ፡ዐቢይ፡ሕማም፡፬ተ፡መዋዕለ፡ወአልፀቀት፡ለመዊት፡ወትቤላ፡እማ፡ምንት፡ውእቱ፡ዘኮነ፡እምኔኪ፡ወአውሥአታ፡ወትቤላ፡እወ፡ሊተ፡ይደልወኒ፡መዊት፡እስመ፡አነ፡ዘመውኩ፡ምስለ፡እገሌ፡ወሬዛ፡ወሐሰውኩ፡ላዕለ፡ገብረ፡እግዚአብሔር፡ቅዱስ፡አባ፡መቃርስ።
18ወሶበ፡ሰምዑ፡ዘንተ፡ኀዘኑ፡ፈድፋደ፡ወተጋብኡ፡ኵሎሙ፡ሰብአ፡ሀገር፡ወሖሩ፡ኀበ፡ቅዱስ፡ወሰአልዎ፡ይሥረይ፡ሎሙ፡አበ፡ሳሆሙ፡ዘገብሩ፡ላዕሌሁ፡ወሶቤሃ፡ተዘከረ፡ዛ፡ራእየ፡ዘርእየ፡በገዳም፡ወሠረየ፡ሎሙ፡ወቀ፡ደሰ፡ቍርባነ፡ወመጠዎሙ፡ምሥጢራተ፡ቅድ፡ሳት።
19ወእምድኅረዝ፡አስተርአዮ፡ሎቱ፡ውእቱ፡ኪሩብ፡ዘ፮ቱ፡ክነፊሁ፡ወአኀዞ፡በእዴሁ፡ወመርሖ፡እስከ፡አብጽሖ፡ገዳመ፡አስቄጥስ፡ዘበትርጓሜሁ፡መዳልወ፡አልባብ፡ወይቤሎ፡ቅዱስ፡አባ፡መቃርስ፡ኦ፡እግዚእየ፡ወስን፡ሊተ፡መካነ፡ዘአኀድር፡ውስቴቱ፡ወአውሥኦ፡ውእቱ፡ኪሩብ፡ወይቤሎ፡ኢይዌስን፡ለከ፡ወኢትትዓደው፡ትእዛዝ፡እግዚአብሔር፡ወናሁ፡ውእቱ፡ገዳም፡ኵለንታሁ፡ለከ፡ወኀበ፡ፈቀድከ፡ሑር፡ወንበር፡ቦቱ።
20ወኀደረ፡ቅዱስ፡ውሣጤ፡ገዳም፡መካነ፡ደብሮሙ፡ለቅዱሳን፡ሮማውያን፡መክሲሞስ፡ወዱማቴዎስ፡ወሶበ፡በጽሑ፡ኀቤሁ፡ኀደሩ፡ቅሩበ፡እምኔሁ፡ወእምድኅረ፡ዕረፍቶሙ፡አዘዞ፡መልአከ፡እግዚአብሔር፡ከመ፡ይኀድር፡ሐዊሮ፡ውስተ፡ውእቱ፡መካን፡ዘውእቱ፡ደብረ፡ዚአሁ፡ይእዜ።
21ወይቤሎ፡መልአክ፡እስመ፡ዝንቱ፡መካን፡ይሰመይ፡በስሞሙ፡ለውሉድከ፡መክሲሞስ፡ወዱማቴዎስ፡ወበእንተዝ፡ተሰምየ፡ደብረ፡ብርስም፡ዘበትርጓሜሁ፡ደብረ፡ሮም፡ወቅዱስሰ፡ገብረ፡በዓተ፡ወነበረ፡ውስቴታ፡ወተጋደለ፡ተጋድሎ፡ዐቢየ፡በጾም፡ወበጸሎት፡በሰጊድ፡ወበትጋህ፡ዘእንበለ፡ጽርዓት።
22ወኮኑ፡ያስተርእዩ፡ሎቱ፡ሰይጣናት፡ገሀደ፡ወይፀብዕዎ፡በመዓልት፡ወበሌሊት፡ወእ፡ምድኅረ፡ኅዳጥ፡መዋዕል፡እንዘ፡ይትጋደል፡አመንደብዎ፡ብዙኀ፡ወኢረከቡ፡ዕረፍተ፡ሐለየ፡በልቡ፡ወይቤ፡እንዘ፡ሀሎኩ፡ውስተ፡ዓለም፡ሰማዕኩ፡ዜናሁ፡ለቅዱስ፡አባ፡እንጦንስ፡እትነሣእ፡ይእዜ፡ወአሐውር፡ኀቤሁ፡ከመ፡ይምሀረኒ፡ወይምርሐኒ፡ፍኖተ፡ምንኵስና፡ወየሀበኒ፡አእምሮ፡ወልቡና፡በላዕለ፡ምክሮሙ፡ለሰይጣናት፡ርኩሳን።
23ተንሥአ፡ሶቤሃ፡ወጸለየ፡ወሖረ፡መንገለ፡ምሥራቅ፡እስከ፡በጽሐ፡ኀበ፡አረጋዊ፡አባ፡እንጦንስ፡ወሶበ፡ርእዮ፡እምርኁቅ፡አባ፡እንጦ፡ንዮስ፡ይቤ፡ዝንቱ፡እስራኤላዊ፡ዘአልቦ፡ጽልሑት፡ወተወክፎ፡ወተአምኆ፡በዐቢይ፡ፍሥሐ፡ወከሠተ፡ሎቱ፡ሕሊናሁ፡ከመ፡አብ፡ለወልዱ፡ወተአምኀ፡ርእሶ፡ለቅዱስ፡መቃርስ፡ወይቤሎ፡ኦወልድየ፡መቃርስ፡አንተ፡ትሰመይ፡ብፁዐ፡በከመ፡ትርጓሜ፡ስምከ፡በልሳነ፡ዮናናውያን፡እስመ፡እግዚአብሔር፡አምላኪየ፡ከሠተ፡ሊተ፡ግብረከ፡ወምጽአተከ፡ኀቤየ፡ወበእንተዝ፡ኮንኩ፡ዘእጸንሕ፡ምጽአተከ።
24ወእምዝ፡መሀሮ፡ኵሎ፡ፍኖተ፡ምንኵስና፡ቅድስተ፡ወአፅንዖ፡በነገር፡ብዙኅ፡ዘይደሉ፡ገቢሮቶ።
25ወከሠተ፡ሎቱ፡ፀቢፆቶሙ፡ለሰይጣናት፡ወይቤሎ፡ሀለዎሙ፡ካዕበ፡ይፅብዑከ፡በኅቡዕ፡ሕሊና፡ከንቱ፡ወበምግባራት፡ሕሡማት፡ገሀደ፡ከመ፡አንተ፡ትኩን፡ፍጹመ፡ወትትዓገሥ፡እስከ፡ለሞት፡ወይቤሎ፡ይእዜኒ፡ሑር፡ኀበ፡መካን፡ዘወሰነ፡ለከ፡እግዚአብሔር፡ወተዓገሥ፡ውስቴቱ።
26ወነቢሮ፡ኀቤሁ፡ኅዳጠ፡መዋዕለ፡እንዘ፡ይትሜሀር፡ሥርዓተ፡ምንኵስና፡ተመይጠ፡ኀበ፡መካኑ፡እንዘ፡ይትፌሣሕ፡ወይትኀሠይ፡በሥርዓታት፡ወበትምህርታት፡ማሕየውያት፡ዘተምህረ፡እምነ፡አብ፡ቅዱስ፡አባ፡እንጦንስ፡ምስለ፡አባ፡ሰራብዮን፡ቡሩክ፡ኤጲስቆጶስ፡ወይቤ፡መዋዕለ፡ዘነበርኩ፡ኀበ፡አቡየ፡አባ፡እንጦንዮስ፡ኢርኢክዎ፡እንዘ፡ይነውም፡ግሙራ።
27ወነበረ፡ቅዱስ፡አባ፡መቃርስ፡ውስተ፡መካኑ፡ብዙኀ፡መዋዕለ፡እንዘ፡ይትጋደል፡ወይፀመድ፡ውስተ፡ፍኖተ፡ምንኵስና፡ወኪሩብሰ፡ወትረ፡ይሔውጾ፡ገሀደ።
28ወበአሐቲ፡ዕለት፡ሰምዐ፡ቃለ፡እምሰማይ፡ዘይቤሎ፡በእንተ፡ዘሰማዕከ፡ቃልየ፡ወመጻእከ፡ወኀደርከ፡ውስተ፡ውእቱ፡መካን፡ናሁ፡አስተጋብእ፡አሕዛበ፡ዘኢይትኌለቍ፡እምኵሉ፡ትዝምድ፡ወእምኵሉ፡በሐውርት፡ወእምኵሉ፡ልሳናት፡ይትለአኩኒ፡ወይባርኩ፡ስምየ፡በሠናይ፡ምግባሮሙ፡ወአንተ፡ተወከፎሙ፡ወምርሖሙ፡ፍኖተ፡ጽድቅ።
29ወሰሚዖ፡ዘንተ፡ቅዱስ፡መቃርስ፡ፀንዐ፡ወተኀየለ፡በልቡ።
30ወእንዘ፡ይቀውም፡ለጸሎት፡ሌሊተ፡ከሠተ፡ሎቱ፡እግዚእነ፡ዕዝኖ፡ወሰምዖሙ፡ለሰይጣናት፡እንዘ፡ይትማከሩ፡ወይብሉ፡ለእመ፡ኀደግናሁ፡ለዝንቱ፡ብእሲ፡ይኀድር፡ውስተ፡ዝንቱ፡ገዳም፡ይመርሖሙ፡ለብዙኃን፡አሕዛብ፡ወየኀድሩ፡ውስተ፡ዝንቱ፡ገዳም፡ወይሬስይዎ፡ሀገረ፡ሰማያውያን፡እስመ፡እሙንቱ፡ይትዌከሉ፡በሕይወት፡ዘይሄሉ፡ለዓለም፡ወይሰድዱነ፡በሕማመ፡ኵነኔ፡ጸሎታቲሆሙ፡ንዑ፡ንትጋባእ፡ላዕሌሁ፡ይእዜ፡ዮጊ፡እመ፡ንክል፡ንስድዶ፡እምዝንቱ፡መካን።
31ወሶበ፡ሰምዐ፡ምክሮሙ፡አባ፡መቃርስ፡ፀንዐ፡ልቡ፡ወተኀየለ፡ላዕለ፡ሰይጣናት፡ወባረኮ፡ለእግዚአብሔር፡ዘከሠተ፡ዕዝኖ፡እስከ፡ሰምዐ፡ምክሮሙ፡ለሰይጣናት፡ወአእመረ፡ድካሞሙ።
32ወእምድኅረዝ፡ተጋብኡ፡ሰይጣናት፡ወፀብዕዎ፡ፀብዐ፡ዐቢየ፡ወአንደዱ፡እሳተ፡ኀበ፡ኆኅተ፡በዐቱ፡ወይነሥኡ፡እምውእቱ፡እሳት፡ወይወድዩ፡ውስተ፡በዓቱ፡ወእሳትሰ፡ትጠፍእ፡በጸሎቱ።
33ወእምዝ፡ወደዩ፡ሕሊና፡ነኪረ፡ውስተ፡ልቡ፡ዝሙተ፡ወትካዘ፡ልብ፡ወሕማመ፡ወትዕቢተ፡ወፍቅረ፡ክብረ፡ዝንቱ፡ዓለም፡ወፍርሃተ፡ወትምክሕተ፡ወሀኬተ፡ወፅርፈተ፡ወኀጢአ፡ሃይማኖት፡ወቀቢፀ፡ተስፋ፡እምእግዚአብሔር፡ወዘይፈደፍድ፡እምዝንቱ፡ኵሉ፡ፀብዕዎ፡ሎቱ፡በከመ፡ነገሮ፡አባ፡እንጦንዮስ።
34ወድኅረ፡ነበረ፡ነዋኀ፡መዋዕለ፡እንዘ፡ሰይጣናት፡ይፀብዕዎ፡በእሉ፡ምግባራት፡ሕሡማት፡ተንሥአ፡ካዕበ፡ወሖረ፡ኀበ፡አባ፡እንጦንስ፡ወእንዘ፡ሀሎ፡እምርኁቅ፡ነገሮሙ፡ለአርዳኢሁ፡አባ፡እንጦኒ፡ወይቤሎሙ፡ዝንቱ፡እስራኤላዊ፡ዘአልቦ፡ጽልሑት፡ውስተ፡ልቡ፡ትሬእይዎኑ፡ኦ፡ውሉድየ፡ለዝንቱ፡ብፁዕ፡ሀለዎ፡ይኩን፡በትረ፡ጽድቅ፡ርቱዐ፡ወነዊኀ፡ለአሕዛብ፡ወይከውን፡ፍሬያት፡ጥዑማተ፡እም፡እግዚአብሔር፡ፀባዖት።
35ወሶበ፡ቀርበ፡ኀቤሁ፡ለቅዱስ፡እንጦንስ፡ሰገደ፡ሎቱ፡ወአንሥኦ፡ፍጡነ፡ወተአምኆ፡ወሰዓሞ፡እስመ፡ውእቱ፡ርእየ፡ገጾ፡ውሉጠ፡ከመ፡ገጹ፡ዘይደዊ፡በእንተ፡ብዝኀ፡ፀብዕ፡ዘሰይጣናት።
36ወእምዝ፡ጸለዩ፡ኅቡረ፡ወነበሩ፡ወይቤሎ፡ኣባ፡እንጦንስ፡በፍሥሐ፡ዳኅንኑ፡ሀሎከ፡ኦ፡ወልድየ፡አውሥኦ፡አባ፡መቃርስ፡ወይቤሎ፡ናሁ፡በደረ፡እግዚአብሔር፡ወከሠተ፡ለከ፡ኵሎ፡ዘኮነ፡እምኔየ፡ወሶቤሃ፡መሀሮ፡ወአፅንዖ፡ወይቤሎ፡ፅናዕ፡ወኢትፍራህ፡እስመ፡ከመዝ፡መፍትው፡ለነ፡ከመ፡ንትዓገሥ፡ዘንተ፡ኵሎ፡መከራ፡ዘይመጽኡ፡ላዕሌነ፡እምጸላእትነ።
37ወበእንተዝ፡ይደልወነ፡ከመ፡ንኩን፡መምህራነ፡ለአሕዛብ፡ብዙኃን፡እለ፡ይፈቅዱ፡ጥበበ፡መንፈሳዌ፡እንተ፡ምንኵስና። ወይቤሎ፡ካዕበ፡ኦ፡ወልድየ፡መቃርስ፡ተዘከር፡ውእተ፡ቃለ፡ዘነገረከ፡እግዚአብሔር፡እንዘ፡ተሐውር፡ትቅዳሕ፡ማየ፡ወሰሚዖ፡አባ፡መቃርስ፡አንከረ፡ፈድፋደ፡ወአእመረ፡ከመ፡ምግባራቲሁ፡ወኅቡዓቲሁ፡ክሡታት፡ሎቱ፡ለቅዱስ፡እንጦንስ።
38ወነበረ፡ኀቤሁ፡እንዘ፡ይትሜሀር፡ትእዛዛቲሁ፡ወኀሠሠ፡እምኔሁ፡ያልብሶ፡አስኬማ፡ቅድስተ፡ወጸለየ፡ላዕሌሁ፡ወአልበሶ፡ኪያሃ፡ወበእንተዝ፡ተሰምየ፡አባ፡እንጦንስ፡አበ።
39ወይቤሎ፡ኢትትሀከይ፡መጺአ፡ኀቤየ፡ዝየ፡ወእምድኅረ፡ኅዳጥ፡መዋዕል፡አሐውር፡ኀበ፡እግዚአብሔር፡ወሶበ፡ሰምዐ፡አባ፡መቃርዮስ፡ዘንተ፡ነገረ፡ተንሥአ፡ወሰገደ፡ሎቱ፡ወሰአሎ፡ከመ፡ይንበር፡ኀቤሁ፡ወይረስዮ፡ድልወ፡ከመ፡ይንሣእ፡በረከቶ፡መንፈሳዊተ፡ወይቤሎ፡ኦሆ፡ንበር፡ኀቤየ።
40ወካዕበ፡ይቤሎ፡እምድኅረ፡ኅዳጥ፡መዋዕል፡ያዓርፈከ፡እግዚአብሔር፡እምዝንቱ፡ሕሊና፡እኩይ፡ወናሁሰ፡ይፀብዑከ፡ሰይጣናት፡ገሀደ፡በከመ፡ገብሩ፡ላዕሌየ፡ፅናዕ፡ወተዓገሥ፡ወኢታኅዝኖ፡ለዝንቱ፡ዘረሰዮ፡እግዚአብሔር፡ምስሌከ፡ለረድኤትከ፡በከመ፡የሀሉ፡ምስሌከ፡እስከ፡ተፍጻሜተ፡መዋዕሊከ፡ወየዓቅበከ፡በከመ፡አዘዞ፡እግዚአብሔር፡አምላክከ።
41ወዘንተ፡ብሂሎ፡ወሀቦ፡በትረ፡ዚአሁ፡ወተአምኆ፡በአምኃ፡መንፈሳዊ፡ወአዕረፈ፡ወቀበረ፡ሥጋሁ፡ውስተ፡መካን፡ኅቡዕ፡ዘኢየአምሮ፡መኑሂ።
42ወተመይጠ፡አባ፡መቃርስ፡ውስተ፡ገዳመ፡ዚአሁ፡አስቄጥስ፡ወነበረ፡ውስተ፡መካኑ፡ወተሰምዐ፡ዜናሁ፡ውስተ፡ኵሉ፡አጽናፈ፡ምድር፡ወገብረ፡እግዚአብሔር፡ዲበ፡እደዊሁ፡ተአምራተ፡ወመንክራተ፡ዐበይተ።
43ወእምኔሆሙ፡ንጉሡ፡አንጾኪያ፡ፈነዋ፡ለወለቱ፡ኀቤሁ፡እስመ፡ተጽዕና፡መንፈስ፡ርኩስ፡ወበጽሐት፡በአምሳለ፡ወሬዛ፡ወአእመረ፡ወፈወሳ፡ወፈነዋ፡ኀበ፡አቡሃ፡ወእማ፡ወሶበ፡ወሀብዎ፡ወርቀ፡ወብሩረ፡ኢነሥአ፡ምንተኒ።
44ወሀሎ፡፩፡መነኮስ፡ውስተ፡ሀገረ፡አው፡ሲም፡ስሕተ፡ወይቤ፡አልቦ፡ትንሣኤ፡ሙታን፡ወአስሐቶሙ፡ለብዙኃን፡ሰብእ፡ወሖረ፡ኤጲስቆጶስ፡ዘሀገረ፡አውሲም፡ኀበ፡አባ፡መቃርስ፡ወነገሮ፡ከመ፡አስሐቶሙ፡ውእቱ፡መነኮስ፡ለሕዝበ፡ዚአሁ። ወሰአሎ፡ስእለተ፡ብዙኅ፡ከመ፡ይትራድኦ፡ወተንሥአ፡አባ፡መቃርስ፡ወሖረ፡ምስሌሁ፡ሀገረ፡አውሲም፡ወረከቦ፡ለውእቱ፡ባሕታዊ፡ዘውስቴቱ፡ሀሎ፡መንፈስ፡ርኩስ፡ወሶበ፡ተናገረ፡ምስሌሁ፡በእንተ፡ትንሣኤ፡ሙታን፡አውሥአ፡ውእቱ፡ባሕታዊ፡ወይቤሎ፡አንሰ፡ኢየአምን፡ለእመ፡ኢያንሣእከ፡ሊተ፡ብእሴ፡እመቃብር። ወሰሚዖ፡ጸለየ፡አባ፡መቃርስ፡ኀበ፡እግዚእነ፡ወተንሥአ፡ሶቤሃ፡አሐዱ፡ብእሲ፡እምነ፡ሙታን፡ወኮነ፡ብእሲሁ፡እምከ፡ሐድያን፡ቀደምት።
45ወአምነ፡ውእቱ፡ባሕታዊ፡ወተመይጠ፡እምስሕተቱ፡ወከማሁ፡ኵሎሙ፡እለ፡ስሕቱ፡ምስሌሁ።
46ወሰአሎ፡ውእቱ፡ዘተንሥአ፡እሙታን፡ከመ፡ያጥምቆ፡ጥምቀተ፡ክርስትና፡አጥመቆ፡ወአልበሶ፡አልባሰ፡ምንኵስና፡ወነቢሮ፡፯፡ዓመተ፡አዕረፈ።
47ወእምድኅረዝ፡ተንሥአ፡ቅዱስ፡አባ፡መቃርስ፡ወቦአ፡ውስተ፡ውሣጤ፡ገዳም፡ከመ፡ያእምር፡ለእመ፡ሀሎ፡ውስተ፡ውእቱ፡ገዳም፡ሰብእ፡እምቅድሜሁ፡ወርእየ፡፪ተ፡ዕደወ፡ዕሩቃነ፡ፈርሀ፡እስመ፡መሰሎ፡ከመ፡እሙንቱ፡ሰይጣናት፡ወጸለየ፡በቅድሜሆሙ፡እንዘ፡ይብል፡“እልቦት፡በረቦን፡ዘውእቱ፡“አቡነ፡ዘበሰማያት”፡ወእሉሰ፡ጸውዕዎ፡በስሙ፡ወይቤልዎ፡ኦ፡መቃሪ፡ኢትፍራህ፡ወአእመረ፡ከመ፡እሙንቱ፡ቅዱሳን፡ገዳማውያን፡ወተስእልዎ፡በእንተ፡ሰብአ፡ዓለም፡ወምግባሮሙ። አውሥኦሙ፡ወይቤሎሙ፡ሀሎ፡እግዚአብሔር፡በምሕረቱ፡ዲበ፡ኵሎሙ።
48ወእምዝ፡ተስእሎሙ፡እመ፡ኮነ፡ያቈርሮሙ፡ቍረ፡ክረምት፡ወያልህቦሙ፡ላህበ፡ሐጋይ፡አውሥእዎ፡ወይቤልዎ፡እስመ፡እግዚአብሔር፡መገበነ፡መጠነ፡፵፡ዓመት፡ውስተ፡ዝንቱ፡ገዳም፡ኢያቈርረነ፡ቍረ፡ክረምት፡ወኢያልህበነ፡ላህበ፡ሐጋይ፡ወይቤሎሙ፡ቅዱስ፡መቃርስ፡እፎ፡እከውን፡ከማክሙ፡ወይቤልዎ፡ንበር፡ውስተ፡በዓትከ፡ወብኪ፡ላዕለ፡ኃጢአትከ፡ወአንተ፡ትከውን፡ከማነ፡ወተባረከ፡እምኔሆሙ፡ወተመይጠ፡ውስተ፡መካኑ።
49ወሶበ፡በዝኁ፡መነኮሳት፡ከረዩ፡ሎቱ፡ዓዘቅተ፡ወሐነፁ፡ምሕጻበ፡ወሶበ፡ወረደ፡ይትሐጸብ፡አንሃልዎ፡ሰይጣናት፡ላዕሌሁ፡ይቅትልዎ፡ወመጽኡ፡መነኮሳት፡አውፅእዎ።
50ወሶበ፡ፈቀደ፡እግዚአብሔር፡ፈነወ፡ሎቱ፡ኪሩብሃ፡ዘኮነ፡ይሔውጾ፡ኵለሄ፡ወይቤሎ፡ተደለው፡እስመ፡አነ፡እመጽእ፡ኀቤከ፡ወእነሥአከ። ወእምድኅረዝ፡ርእዮሙ፡ለአባ፡እንጦንስ፡ወለአባ፡ጳኵሚስ፡ወለኵሎሙ፡ማኅበረ፡ቅዱሳን፡ወለኀይላተ፡ሰማይ፡እስከ፡መጠወ፡ነፍሶ፡ወአዕረፈ፡በሰላም።
51ወኮነ፡ኵሉ፡መዋዕለ፡ሕይወቱ፡ወ፯ቱ፡ዓመት።
52ወኮነ፡ስምዐ፡አባ፡በብኑዳ፡በእንቲአሁ፡ከመ፡ውእቱ፡ርእየ፡ነፍሶ፡ለቅዱስ፡አብ፡መቃርስ፡እንዘ፡ተዓርግ፡ሰማየ፡ወሰምዖሙ፡ለሰይጣናት፡እንዘ፡ይኬልሑ፡ወይብሉ፡ሞዕከነ፡ሞዕከነ፡ኦ፡መቃሪ፡ወይቤሎሙ፡ዓዲየ፡እስከ፡ይእዜ፡ኢየአምን፡ወሶበ፡ቦአ፡ውስተ፡ገነት፡ከልሑ፡በቃል፡ልዑል፡እንዘ፡ይብሉ፡ሞዕከነ፡ሞዕከነ፡ኦ፡መቃሪ፡ወይቤሎሙ፡ይትባረክ፡አምላኪየ፡ኢየሱስ፡ክርስቶስ፡ዘሎቱ፡ስብሐት፡ወይትባረክ፡ስሙ፡ዘአድኀነኒ፡እምእዴክሙ።
53ወአመ፡ሕያው፡ውእቱ፡ኣዘዞሙ፡ለውሉዱ፡ከመ፡ኢይኀብፁ፡ሥጋሁ፡ወመጽኡ፡ሰብአ፡ሀገሩ፡ሳስዩር፡ወወሀቡ፡ንዋየ፡ለረድኡ፡ዘስሙ፡ዮሐንስ፡ዘኮነ፡ይጌሥፆ፡ወትረ፡በእንተ፡አፍቅሮ፡ንዋይ፡ወመርሖሙ፡ወአርአዮሙ፡ሥጋሁ፡ለቅዱስ፡አባ፡መቃርስ፡ወነሥእዎ፡ወወሰድዎ፡ኀበ፡ሀገሮሙ፡ወነበረ፡በህየ፡፻ወ፰፡ዓመተ፡እስከ፡መዋዕለ፡መንግሥተ፡ዓረብ፡ወረድኡሰ፡ዮሐንስ፡ኮነ፡ዝልጉሰ፡በእንተ፡አፍቅሮቱ፡ንዋየ።
54ወእምድኅረዝ፡ሖሩ፡ውሉዱ፡መነኮሳት፡ኀበ፡ሀገሩ፡ሳስዩር፡ወፈቀዱ፡ከመ፡ይንሥኡ፡ሥጋሁ፡ለአብ፡ክቡር፡አባ፡መቃርስ፡ወተንሥኡ፡ላዕሌሆሙ፡ሰብአ፡ሀገር፡ምስለ፡መኰንን፡ወከልእዎሙ።
55ወበይእቲ፡ሌሊት፡አስተርአዮ፡ቅዱስ፡መቃሪ፡ለመኰንን፡ወይቤሎ፡ኅድገኒ፡እሑር፡ምስለ፡ውሉድየ፡ወጸውዖሙ፡መኰንን፡ለመነ፡ኮሳት፡ወአብሖሙ፡ይንሥኡ፡ሥጋሁ፡ለአቡሆሙ፡ወዖርዎ፡ሶቤሃ፡ወወሰድዎ፡ወአንበርዎ፡ውስተ፡ቤተ፡ክርስቲያን፡በክብር፡ብዙኅ፡በዝማሬ፡ወበማኅሌት፡አመ፡፲ወ፱፡ለነሐሴ፡ወኮኑ፡እምኔሁ፡ተአምራት፡ወመንክራት፡ዓበይት። ትንብልናሁ፡ይዕቀበነ፡ወበረከቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለመቃርዮስ፡ዘዐቢይ፡ክብሩ፤እስመ፡ዓቀበ፡መርዔቱ፡ለእንጦንዮስ፡በበትሩ፤እምነ፡፩ዱ፡፩ዱ፡እንበለ፡ይሕፅሩ፤ሶበ፡ዕሩየ፡ደቂቁ፡ምግባራተ፡ጽድቅ፡ገብሩ፤መዳልወ፡አልባብ፡ተሰምየት፡እስከ፡ዮም፡ደብሩ።
56ወበዛቲ፡ዕለት፡ተሰቅለ፡እግዚእነ፡ኢየሱስ፡ክርስቶስ፡በሥጋ፡በእንተ፡መድኃኒተ፡ዓለም።
57አሜሃ፡ጸልመት፡ፀሐይ፡ሶበ፡ርእየት፡ፈጣሪሃ፡ስቁለ፡ወአንጦልዐ፡ውስተ፡ሥጋ፡ዘያስተርኢ፡ወኮነ፡መጠነ፡ጽልመታ፡እምኔሁ፡እምጊዜ፡፮፡ሰዓት፡እስከ፡፱፡ሰዓት፡ወበ፡ውእቱ፡ጊዜ፡አጽነነ፡ርእሶ፡እግዚእነ፡በፈቃዱ፡ወመጠወ፡ነፍሶ፡ለባዊተ፡ወነባቢተ፡ዘነሥአ፡እምእግዝእትነ፡ቅድስት፡ድንግል፡ማርያም።
58ወተፈልጠት፡ይእቲ፡ነፍስ፡እምሥጋሃ፡ወሖረት፡ውስተ፡ሲኦል፡እንበለ፡ፍልጠት፡እመለኮት፡በከመ፡ይቤ፡ሐዋርያ፡እስመ፡ውእቱ፡ምውት፡በሥጋ፡ወሕያው፡በመንፈስ።
59ወውእተ፡ጊዜ፡ሀሎ፡ስቁለ፡ዲበ፡ዕፀ፡መስቀል፡በሥጋ፡እንበለ፡ፍልጠት፡እመለኮት፡ወከማሁ፡ነፍስ፡ወረደት፡ውስተ፡ሲኦል፡ትፍትሖሙ፡ለሙቁሐን፡ወይእቲ፡አሐደ፡ከዊና፡ምስለ፡መለኮት፡እንበለ፡ፍልጠት፡ወውእቱ፡ህልው፡ምስለ፡አብ፡ወወልድ፡ወመንፈስ፡ቅዱስ፡ሎቱ፡ስብሐት። ወክሂል። ለዘቤዘወነ፡በርእሱ፡ወአርኃወ፡ለነ፡ኆኀተ፡መንግሥቱ። በረከተ፡መስቀሉ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለሕማማቲከ፡በተጸፍዖ፡መል፡ታሕት፡ከመ፡ዕቡስ፤በተቀሥፎ፡ዘባን፡ዓዲ፡ወተኰርዖ፡ርእስ፤እንዘ፡መላኪሆሙ፡አንተ፡እግዚአብሔር፡ንጉሥ፤ኢያፍርሁኒ፡ቀታል፡ያኒሃ፡ለነፍስ፤እስመ፡ማኅተምየ፡ደምከ፡ቅዱስ።ሰላም፡ለስቅለትከ፡መልዕልተ፡ቅዱስ፡ፀልቦ፤ለቅንዋቲከ፡ካዕበ፡ወለርግዘትከ፡ገቦ፤ኢየሱስ፡ክርስቶስ፡መቅለሌ፡ነገር፡ለዘዓፀቦ፤ከመ፡እባእ፡በአርእዮቱ፡ገነተ፡ኅሩያን፡ኀበ፡ቦ፤ለመዝራዕትከ፡ሀበኒ፡ማዕተቦ።ሰላም፡ለፀአተ፡ነፍስከ፡እምነ፡ሥጋ፡ፍሉጠ፤ወለግንዘትከ፡በዕፍረት፡ዘእደ፡ዮሴፍ፡ጽዓጠ፤አመ፡ወረድከ፡እግዚኦ፡ቈላተ፡ደይን፡ውሥጠ፤ኀይለ፡ስብሐቲከ፡ፅንዓ፡መንሥጉ፡ቀጥቀጠ፤ወገሀነም፡ቄዐ፡ነፍሳተ፡ዘውኅጠ።
60ወበዛቲ፡ዕለት፡ኮነ፡ሰማዕተ፡ቅዱስ፡ገላውዴዎስ፡ንጉሠ፡ኢትዮጵያ፡ወልዱ፡ለርቱዐ፡ሃይማኖት፡ልብነ፡ድንግል፡ንጉሥ።
61ወእምድኅረ፡አዕረፈ፡አቡሁ፡አንገሦ፡እግዚአብሔር፡እንዘ፡ሀሎ፡ተንባላታዊ፡ዘስሙ፡ግራኝ፡ዘሰመየ፡ርእሶ፡ንጉሠ፡ዘኢድልወቱ፡ወአእመነ፡ብዙኃነ፡እምሰብአ፡ኢትዮጵያ፡በኃይሉ፡ወአስተሳተፎሙ፡ሃይማኖቶ፡ወለእለ፡ተርፉ፡በክርስትና፡ረሰዮሙ፡ገባረ፡ሎቱ፡ወነሠተ፡አብያተ፡ክርስቲያን፡ወፄወወ፡መብዝኅታ፡ለኢትዮጵያ፡ወአፍለሶሙ፡ኀበ፡ፈቀደ፡ወይቤ፡በልቡ፡እምይእዜሰ፡አልቦ፡ዘይትቃወመኒ፡ወቀነይክዎን፡ለኵሎን፡አህጉር።
62ወእምዝ፡አንሥኦ፡እግዚእነ፡ለቅዱስ፡ገላውዴዎስ፡ወአኀዘ፡ይትቃተል፡ምስለ፡ዐበይት፡መኳንንቲሁ፡ለግራኝ፡ወሞዖሙ፡ወሶበ፡ሰምዐ፡ግራኝ፡ተቈጥዐ፡ወመጽአ፡ኀቤሁ፡ምስለ፡አእላፍ፡ሠራዊተ፡ቱርኩ፡ወተፃብዐ፡ወቀተሎ፡እግዚእነ፡በእዴሁ፡ለገላውዴዎስ፡ወአጥፍኦ።
63ወተመይጡ፡ሂውዋን፡ወተሐንፃ፡አብያተ፡ክርስቲያናት፡ዘተመዝበራ፡ወረትዓት፡ሃይማኖት፡ዘክርስቶስ፡ሎቱ፡ስብሐት።
64ወእምድኅረዝ፡መጽአ፡፩፡እምተንባላት፡ምስለ፡ብዙኅ፡ሰብአ፡ፀብዕ፡እንዘ፡ሀሎ፡ገላውዴዎስ፡ምስለ፡ውሑዳን፡ሰብእ፡ወይቤልዎ፡ንትገኀሥ፡እስከ፡ይትጋብኡ፡መኳንንተ፡ፀብዕ፡ወይቤ፡ኢይሬኢ፡እንከሰ፡ተፄውዎተ፡ክርስቲያን፡ወሙስናሆሙ፡ለአብያተ፡ክርስቲያናት፡ወእንዘ፡ይብል፡ከመዝ፡ቦአ፡ማእከለ፡ፀብዕ፡ወፀንዐ፡ቀትል፡ወድኅረሰ፡ዓገትዎ፡ተንባላት፡ወረገዝዎ፡በአርማኅ፡ወዘበጥዎ፡በአስይፍት፡ወአውደቅዎ፡እምላዕለ፡ፈረሱ፡ወመተሩ፡ክሣዶ፡ክብርተ፡ወወሰድዋ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዝክረ፡ስምከ፡ከመ፡ዝክረ፡ነቢያት፡ትሩፍ፤ ዘተጽሕፈ፡ቅድመ፡በርእሰ፡አሐቲ፡መጽሐፍ፤ ገላውዴዎስ፡ክቡር፡ሊቀ፡ሰማዕታት፡አእላፍ፡በኃምስ፡ዓም፡እምድኅረ፡ሞትከ፡በሰይፍ፤ እምገጽከ፡ውኅዘ፡ወተክዕወ፡ሃፍ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።