ግዕዝ
Home Formaciones Libros Biblioteca Ge'ez Contacto
Sinaxario · Megabit

25 de Megabit

አመ፡፳ወ፭፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፭፡ለመጋቢት፡በዛቲ፡ዕለት፡አዕረፈ፡ቅዱስ፡አንሲፎስ፡ሐዋርያ፡ዐቢይ፡፩ዱ፡እም፸ወ፪ቱ፡አርድእት።
2ወዝንቱ፡ቅዱስ፡ኮነ፡እምደቂቀ፡እስራኤል፡እምነገደ፡ብንያም፡ወኮኑ፡አበዊሁ፡ዓቃብያነ፡ሕገ፡ኦሪት፡ወተለዎ፡ለእግዚእነ፡ከመ፡ይነፅር፡ምግባራቲሁ፡ወዕበየ፡ተአምራቲሁ፡ወይስማዕ፡ትምህርታቲሁ።
3ወሶበ፡ነበረ፡ከመዝ፡ኅዳጠ፡መዋዕለ፡እንዘ፡ይኔፅር፡ኵሎ፡ጊዜ፡ተአምራተ፡ብዙኀተ፡ወውሉጣተ፡ሶበ፡አንሥኦ፡እግዚእነ፡ለወልደ፡መበለት፡በሀገረ፡ናይን፡ሀሎ፡ምስለ፡ሕዝብ፡እለ፡ሀለዉ፡ህየ።
4ወሶበ፡ርእየ፡ዘንተ፡መንክረ፡ኢኀሠሠ፡ካልአ፡ተአምረ፡ወኢጐንደየ፡አላ፡ኀደገ፡በጊዜሃ፡ተባርሆ፡በማኅቶተ፡ሕገ፡አይሁድ፡ወቀርበ፡ኀበ፡ብርሃነ፡ፀሐየ፡ጽድቅ፡ወአምነ፡ቦቱ፡በኵሉ፡ልቡ፡በእግዚእነ፡ኢየሱስ፡ክርስቶስ።
5ወሶበ፡ነሥአ፡ጸጋ፡መንፈስ፡ቅዱስ፡ጰራቅሊጦስ፡በጽርሐ፡ጽዮን፡ምስለ፡ሐዋርያት፡ወተለዎሙ፡ለሐዋርያት፡ወሰበከ፡ውስተ፡አህጉር፡ብዙኃት፡ወሤምዎ፡ሐዋርያት፡ኤጲስቆጶሰ፡ላዕለ፡ሀገረ፡አቴና፡ወሰበከ፡ውስቴታ፡ወአብርሃ፡ነፍሳቲሆሙ፡በትምህርቱ፡ወበተግሣፁ፡ወኮነ፡ይፌውስ፡ነፍሳቲሆሙ፡ወሥጋቲሆሙ።
6ወሶበ፡ፈጸመ፡ተጋድሎቶ፡አዕረፈ፡በሰላም፡ወነሥአ፡አክሊለ፡ክብር፡ወመዊዕ።
7ወኮነ፡ኵሉ፡መዋዕሊሁ፡፸፡ዓመት፡ወነበረ፡፳ወ፱ተ፡ዓመተ፡በሕገ፡አይሁድ፡፵ወ፩ደ፡ዓመተ፡በሕገ፡ክርስትና።
8ወናሁ፡ዘከሮ፡ጳውሎስ፡ሐዋርያ፡በውስተ፡መልእክቱ፡ለፊልሞና፡ወበካልአን፡መልእክታት፡ወተአምኆ። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለአንሲፎስ፡እግዚአብሔር፡ዘጸውዖ፤ምስለ፡ሐዋርያት፡በጽዮን፡መንፈሰ፡ቅዳሴ፡ይቅብፆ፤ለወልደ፡መበለት፡ምውት፡በሀገረ፡ናይን፡ጊዜ፡አንሥኦ፤መንክሮ፡ነፂሮ፡ወትምህርተ፡ቃሉ፡ሰሚዖ፤ለወልደ፡ማርያም፡አብደረ፡ከመ፡ይኩን፡ረድኦ።።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።