ግዕዝ
Home Formaciones Libros Biblioteca Ge'ez Contacto
Sinaxario · Megabit

23 de Megabit

አመ፡፳ወ፫፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፫፡ለመጋቢት፡በዛቲ፡ዕለት፡አዕረፈ፡ዐቢይ፡ነቢይ፡ዳንኤል።
2ወዝንቱ፡ቅዱስ፡ኮነ፡ወልደ፡ወለተ፡ዮናኪር።
3ወሶበ፡ፄወዋ፡ናቡከደነፆር፡ለኢየሩሳሌም፡አመ፡፲ወ፮፡ዓመተ፡መንግሥቱ፡ነሥኦሙ፡ዮናኪር፡ለ፫ቱ፡ደቂቅ፡ወለዳንኤል፡ወልደ፡ወለቱ፡ወተፄወዉ፡ምስሌሆሙ፡ደቂቀ፡እስራኤል።
4ውእቱሰ፡ዮናኪር፡ወልደ፡ኢዮአቄም፡ውእቱ፡ወነሥአ፡ኵሎ፡ንዋየ፡ዘቤተ፡ንጉሥ፡ወዘውስተ፡ቤተ፡እግዚአብሔር፡በከመ፡ተነበየ፡ኢሳይያስ፡ለሕዝቅያስ፡ንጉሥ።
5ወኮነ፡ዝንቱ፡ነቢይ፡ዳንኤል፡ንኡሰ፡መዋዕል፡ወተጋደለ፡ተጋድሎ፡ዐቢየ፡ወፍጹመ፡ወወረደ፡ላዕሌሁ፡መንፈስ፡ቅዱስ፡ወተነበየ፡በሀገረ፡ባቢሎን።
6ወበራብዕ፡ዓመተ፡መንግሥቱ፡እምፄዋዌ፡ርእየ፡ናቡከደነፆር፡ራእየ፡ግርምተ፡በአርአያሃ፡ወበትርጓሜሃ፡ወደንገፀ፡ፈድፋደ።
7ወሶበ፡ነቅሐ፡እምንዋሙ፡ረስዓ፡ለሕልሙ፡ወአስተጋብኦሙ፡ለኵሎሙ፡ጠቢባነ፡ባቢሎን፡ወኀሠሠ፡እምኔሆሙ፡ከመ፡ይንግርዎ፡ይእተ፡ራእየ፡ወትርጓሜሃ፡ወኢያእመርዋ፡ለራእይ፡ወለትርጓሜሃ፡ወአዘዘ፡ይቅትልዎሙ፡ለኵሎሙ፡ጠቢባነ፡ባቢሎን።
8ወሶበ፡ሰምዐ፡ዳንኤል፡ከመ፡ወዕአ፡ዝንቱ፡ትእዛዝ፡መደንግፅ፡እምኀበ፡ንጉሥ፡ከመ፡ይቅትልዎሙ፡ለኵሎሙ፡ጠቢባነ፡ባቢሎን፡ሎቱኒ፡ወለአብያጺሁኒ፡፫ቱ፡ደቂቅ፡ኢየኀ፡ድግዎሙ፡ወሐተቶ፡ዳንኤል፡ለሊቀ፡ሐራሁ፡ለንጉሥ፡ወይቤሎ፡በእንተ፡ሕልም፡ዘርእየ፡ንጉሥ፡እስመ፡ኢተክህሎሙ፡ለኵሎሙ፡ጠቢባነ፡ባቢሎን፡ወግብፅ፡ይንግርዎ፡ወይፈክሩ፡ሎቱ፡ኪያሃ።
9ወይቤሎ፡ዳንኤል፡ለሊቀ፡መገብት፡ንግሮ፡ለንጉሥ፡በእንቲአየ፡እስመ፡አነ፡እነግሮ፡ወእፈክር፡ሎቱ፡ውእተ፡ራእየ።
10ወእምዝ፡ጸለየ፡ዳንኤል፡ኀበ፡እግዚአብሔር፡ወ፫ቱ፡ደቂቅ፡ምስሌሁ፡ወአስተብቍዐ፡ከመ፡ይከሥት፡ሎቱ፡ራእዮ፡ለንጉሥ፡ወትርጓሜሃ።
11ወከሠተ፡ሎሙ፡እግዚአብሔር፡ወቦአ፡ዳንኤል፡ኀበ፡ንጉሥ፡ወነገሮ፡ሕልሞ፡ወትርጓሜሁ፡ወከሠተ፡ሎቱ፡በእንተ፡ነገሥት፡እለ፡ይነግሡ፡ድኅሬሁ፡ዘይከውንሂ፡እምነ፡ኵሉ፡ለለ፩፩፡እምኔሆሙ። ወአደሞ፡ለናቡከደነፆር፡ቃሉ፡ለዳንኤል፡ወሰገደ፡በቅድሜሁ፡ወወሀቦ፡አምኃ፡ብዙኀ፡ወጸገዎ፡ጸጋ፡ዐቢየ፡ወሤሞ፡ላዕለ፡ኵሎሙ፡ጠቢባነ፡ባቢሎን፡ርእሰ።
12ወእምዝ፡ርእየ፡ናቡከደነፆር፡ካልአ፡ሕልመ፡ወተርጐመ፡ሎቱ፡ወአጠየቆ፡ወይቤሎ፡እስመ፡እግዚአብሔር፡በእንተ፡ትዕቢትከ፡ሀለዎ፡ያውፅእከ፡እማእከለ፡ዘመደ፡ዕጓለ፡እመሕያው፡ወያኀድረከ፡ምስለ፡አራዊት፡ውስተ፡ገዳም፡ሰብዓተ፡ዓመተ፡ወትበልዕ፡ሣዕረ፡ከመ፡እንስሳ፡ወእምድኅረዝ፡ይመይጠከ፡ውስተ፡መንግሥትከ፡ወተፈጸመ፡በከመ፡ይቤሎ።
13ወእምድኅረ፡ሞቱ፡ለናቡከደነፆር፡ተርጐመ፡ለብልጣሶር፡ወልዱ፡ዘጸሐፈ፡ሎቱ፡መልአክ፡ዲበ፡አረፍት፡ሶበ፡ሰትየ፡በንዋየ፡ቅድሳት፡ዘቤተ፡እግዚአብሔር፡ወአጠየቆ፡ከመ፡ውእቱ፡ጽሑፍ፡ዘይብል፡“ማኔ፡ቴቄል፡ፋሬስ”፡ወትርጓሜሁ፡ኍሉቅ፡ወድልው፡ወክፉል፡እስመ፡እግዚአብሔር፡ደለወከ፡ወረከበከ፡ሕፁፀ፡ወመጠወ፡መንግሥተከ፡ለካልእ፡ወይፈልስ፡ኀበ፡ፋርስ፡ወሜዶን፡ወተፈጸመ፡በከመ፡ቃሉ።
14ወአርአዮ፡እግዚአብሔር፡በራእይ፡ኵሎ፡ነገሥተ፡እለ፡ይነግሡ፡እስከ፡ተፍጻሜተ፡ዓለም፡ወአስተርእዮቶ፡ለሐሳዊ፡መሢሕ።
15ወእምዝ፡ርእየ፡ስብሐቲሁ፡ለእግዚአብሔር፡ዕበዮ፡ወክብሮ፡ወመለኮቶ፡ወሥጋ፡ዌሁ፡ወተነበየ፡በእንተ፡ምጽአቱ፡ለክርስቶስ፡ሎቱ፡ስብሐት፡ወወሰነ፡ዓመታተ፡ሱባኤ፡ዕዉቃት።
16ወሶበ፡ተፈጸማ፡እላንቱ፡መጽአ፡እግዚእነ፡በከመ፡ተነበየ፡ወይቤ፡እስመ፡ክርስቶስኒ፡ይመጽእ፡ወይቀትልዎ፡ወይከውና፡ለኢየሩሳሌም፡መድኅነ፡ወእምድኅሬሁ፡እስመ፡ኢየሩሳሌም፡ወቤተ፡መቅደስ፡ይትመዘበሩ፡ወይሠዓሩ፡ቍርባናት፡ወመሥዋዕታት፡ወተፈጸመ፡በከመ፡ትንቢቱ።
17ወሀሎ፡በሀገረ፡ባቢሎን፡ጣዖት፡ዘስሙ፡ቤል፡ወኮኑ፡ይሁብዎ፡ኵሎ፡አሚረ፡፲ወ፪ተ፡መሥፈርተ፡ሥንዳሌ፡ወ፵፡በግዐ፡ወ፯፡መሳብክተ፡ወይን፡ወኮነ፡ቂሮስ፡ንጉሠ፡ፋርስ፡ይሰግድ፡ኵሎ፡አሚረ፡ወውእቱ፡ይሔሊ፡ከመ፡ቤል፡ጣዖት፡ይበልዕ፡ወይሰቲ፡ዘይሁብዎ፡እምቤተ፡ንጉሥ።
18ወገሠፆ፡ዳንኤል፡ለንጉሥ፡ወአጠየቆ፡ከመ፡ዝንቱ፡ጣዖት፡ኢይበልዕ፡ወኢይሰቲ፡ወተምዐ፡ንጉሥ፡ወተስእሎሙ፡ለገነውተ፡ጣዖት፡ወይቤሎሙ፡አማንኑ፡ኢይበልዕ፡ወኢይሰቲ፡ቤል፡ጣዖት፧ ወይቤልዎ፡በአማን፡ይበ፡ልዕ፡ወይሰቲ፡ዘንሁቦ፡ኵሎ፡አሚረ።
19ወእምዝ፡ኣንበሩ፡ቅድመ፡ውእቱ፡ጣዖት፡ኵሎ፡መብልዐ፡ወመስቴ፡እንዘ፡ይኔፅር፡ንጉሥ፡በጊዜ፡ምሴት፡ወወፅኡ፡ገነውት።
20ወእምድኅረ፡ወፅኡ፡ኣዘዘ፡ዳንኤል፡ያምጽኡ፡ሐመደ፡ወዘረወ፡ውስተ፡ቤተ፡ጣዖት፡እንዘ፡ይኔፅር፡ንጉሥ፡ወእምዝ፡ሐተሞ፡ንጉሥ፡ምስለ፡ዳንኤል፡ኅቡረ፡ወተመይጡ፡ኀበ፡ማኅደሪሆሙ።
21ወለገነውትሰ፡ቦሙ፡ስቍረት፡እምታሕተ፡ምድር፡ወቦኡ፡በህየ፡ወነሥኡ፡መባልዕተ፡ወመስቴ።
22ወበሣኒታ፡አርኀወ፡ንጉሥ፡ቤተ፡ጣዖት፡ወኢረከበ፡እሎንተ፡መባልዕተ፡ወመስቴ፡ዘአንበሩ፡አሜሃ፡ጸርሐ፡ንጉሥ፡እንዘ፡ይብል፡ኦ፡ዐቢይ፡አንተ፡ቤል፡ዘአስተኀፈርኮ፡ለዳንኤል፡ወሰሐቀ፡ዳንኤል፡ላዕሌሁ፡ወአርአዮ፡ለንጉሥ፡አሰረ፡እገሪሆሙ፡ለዕደው፡ወለአንስት፡ወለወራዙት፡ዲበ፡ሐመድ።
23ወእምቅድመ፡ዝኒ፡ይቤሎ፡ንጉሥ፡ለዳንኤል፡ለምንት፡ኢትሰግድ፡ለአምላኪየ፡ቤል፡ወይቤሎ፡ዳንኤል፡ለንጉሥ፡አንሰ፡ኢይሰግድ፡ለጣዖት፡አላ፡እሰግድ፡ለእግዚአብሔር፡ሕያው፡ዘገብረ፡ሰማየ፡ወምድረ።
24ወበእንተዝ፡ከሠተ፡ሎቱ፡ለንጉሥ፡ከመ፡ቤል፡ጣዖት፡ኢይበልዕ፡ወኢይሰቲ። ወርእዮ፡ንጉሥ፡ተምዐ፡ላዕለ፡ገነውተ፡ጣዖት፡ወቀተሎሙ፡ምስለ፡አንስቲያሆሙ፡ወውሉዶሙ፡ወወሀቦ፡ለዳንኤል፡ቤልሃ፡ጣዖተ፡ሰበሮ፡ወአንሃለ፡ምኵራበ።
25ወካዕበ፡ሀሎ፡ከይሲ፡ዐቢይ፡ዘኮኑ፡ይሰግዱ፡ሎቱ፡ሰብአ፡ባቢሎን፡ወፋርስ፡ወይቤሎ፡ንጉሥ፡ለዳንኤል፡ይእዜኬ፡ኢትክል፡ትበል፡ከመ፡ዝንቱ፡ከይሲ፡ኢኮነ፡አምላከ፡አላ፡ስግድ፡ሎቱ፡እስመ፡ዝንቱ፡አምላክ፡ሕያው፡ወይቤሎ፡ዳንኤል፡ለንጉሥ፡አንሰ፡ኢይሰግድ፡ዘእንበለ፡ለእግዚአብሔር፡አላ፡ሀበኒ፡ሥልጣነ፡ከመ፡እቅትሎ፡ለከይሲ፡ዘእንበለ፡ሰይፍ፡ወበትር፡ወወሃቦ፡ሥልጣነ፡ወእምዝ፡ነሥአ፡ዳንኤል፡አዕባነ፡በአምጣነ፡ሉል፡ወአርሰኖን፡ውስተ፡እሳት፡ወጠብለሎን፡በሥብሕ፡ወአፍ፡አሞ፡ለከይሲ፡ወሶበ፡ውኅጦን፡ሞተ፡ውእቱ፡ከይሲ።
26ወይቤሎሙ፡ዳንኤል፡ርእዩ፡አምላከ፡ክሙ፡ኦ፡ሰብአ፡ባቢሎን።
27ወሶበ፡ርእዩ፡ዘንተ፡ተጋብኡ፡ኀበ፡ንጉሥ፡ወይቤልዎ፡ኮነኑ፡ንጉሠ፡አይሁዳዊ፡ዳንኤል፡እስመ፡ናሁ፡ሰበሮ፡ለቤል፡ወቀተሎሙ፡ለገነ፡ውት፡ወለከይሲ፡ቀተሎ፡ለእመ፡ኢወሀብከነ፡ዳንኤልሃ፡ከመ፡ንቅትሎ፡ንቀትለከ፡ኪያከ፡ወሰብአ፡ቤትከ፡ወኀዘነ፡ንጉሥ፡በእንተ፡ዳንኤል፡ወመጠዎሙ፡ኪያሁ፡አኀዝዎ፡ለዳንኤል፡ወገደፍዎ፡ውስተ፡ግበ፡አናብስት፡ወነበረ፡ህየ፡፯ተ፡ዕለተ፡ከመ፡ይብልዕዎ፡አናብስት፡ወበእላንቱ፡መዋዕል፡ኢወሀብዎሙ፡ምንተኒ፡ዘይሁብዎሙ፡ቀዳሚ።
28ወፈነወ፡እግዚአብሔር፡መልአኮ፡ወፆሮ፡ለዕንባቆም፡እምኢየሩሳሌም፡እንዘ፡ይፀውር፡ሲሳዮሙ፡ለእለ፡የዓጽዱ፡ማእረሮ፡ወአብኦ፡ውስተ፡ግበ፡ባቢሎን፡ኀበ፡ሀሎ፡ዳንኤል፡ወበልዐ፡ወተናዘዘ፡በቃሉ፡ለዕንባቆም፡ወበይእቲ፡ሰዓት፡ሜጦ፡መልአከ፡እግዚአብሔር፡ለዕንባቆም፡ኀበ፡ኢየሩሳሌም።
29ወአመ፡ሳብዕት፡ዕለት፡መጽአ፡ንጉሥ፡ኀበ፡ግበ፡አናብስት፡እንዘ፡የኀዝን፡በእንተ፡ዳንኤል፡እስመ፡መሰሎ፡ከመ፡ውእቱ፡ሞተ፡ወነፀረ፡ውስተ፡ግበ፡አናብስት፡ወርእዮ፡ለዳንኤል፡ሕያዎ፡ወአናብስት፡ታሕተ፡እገሪሁ፡ከመ፡ድመታት፡ወጸርሐ፡ንጉሥ፡በቃል፡ዐቢይ፡ወይቤ፡ዐቢይ፡ውእቱ፡አምላኩ፡ለዳንኤል፡ዘአግረረ፡ሎቱ፡አናብስተ፡ከመ፡ድመ፡ታት፡እስከ፡ይልሕሱ፡ጸበለ፡እገሪሁ።
30ወሶቤሃ፡አዘዘ፡ንጉሥ፡ያዕርግዎ፡ለዳንኤል፡እምግብ፡ወየአኀዝዎሙ፡ለእለ፡አስተ፡ዋደይዎ፡ወይግድፍዎሙ፡ውስተ፡ግብ፡ወበጊዜሃ፡በልዕዎሙ፡አናብስት፡በቅድመ፡ንጉሥ።
31ወነበረ፡ዳንኤል፡ውስተ፡ሀገረ፡ባቢሎን፡እስከ፡አመ፡ተመይጡ፡ደቂቀ፡እስራኤል፡እምፄዋዌ፡ኀበ፡ኢየሩሳሌም፡ወይእቲ፡፸፡ዓመት፡ወአዕረፈ፡በሰላም። በረከተ፡አምላኩ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለዳንኤል፡እንተ፡ፈከረ፡በቃሉ፤ሕልመ፡ንጉሥ፡ሥዉረ፡እንዘ፡ትርጓሜሁ፡ያተሉ፤ተዘኪሮሙ፡ረድኤተ፡ዘተውህበቶ፡እምላዕሉ፤ሶበ፡በጸሎት፡አምላከ፡ዳንኤል፡ይብሉ፤እምአፈ፡አናብስት፡ድኅኑ፡ሰማዕታት፡ኵሉ።
32ወበዛቲ፡ዕለት፡ተጋብኡ፡ማኅበራነ፡አይሁድ፡ውስተ፡ቤተ፡ቀያፋ፡ከመ፡ይትማከሩ፡ላዕለ፡እግዚእነ፡ከመ፡ይቅትልዎ። ሣህሉ፡ወምሕረቱ፡የሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።