Sinaxario · Megabit
16 de Megabit
አመ፡፲ወ፮፡ለመጋቢት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፮፡ለመጋቢት፡በዛቲ፡ዕለት፡አዕረፈ፡አብ፡ቅዱስ፡ወክቡር፡አባ፡ሚካኤል፡ሊቀ፡ጳጳሳት፡ዘእስክንድርያ፡ወውእቱ፡እምኍልቆሙ፡ለአበው፡ሊቃነ፡ጳጳሳት፡፵ወ፯ቱ።
2ወዝንቱ፡አብ፡መንኰሰ፡በገዳመ፡አባ፡መቃርስ፡ዘአስቄጥስ፡ወኮነ፡መስተጋድለ፡ወፅሙደ።
3ወሶበ፡አዕረፈ፡ኣብ፡ቅዱስ፡አባ፡ቴዎድሮስ፡ዘኮነ፡ሥዩመ፡እምቅድሜሁ፡ወነበሩ፡ኤጲስቆጶሳት፡ጉቡአነ፡በምክር፡ብዙኅ፡ዕለተ፡እንዘ፡የሐትቱ፡በእንተ፡ዘይኄይስ፡ለዛቲ፡ሢመት፡እስከ፡አመ፡አጠየቆሙ፡ብእሲ፡ኣረጋዊ፡ጻድቅ፡ዘሀሎ፡ላዕሌሁ፡መንፈሰ፡ትንቢት፡ወይቤሎሙ፡እስመ፡አነ፡እንዘ፡ሀሎኩ፡በደብረ፡አባ፡መቃርስ፡ወእንዘ፡እጼሊ፡ሰማዕኩ፡እምሰማይ፡ዘይብል፡ለሚካኤል፡ትደልዎ፡ዛቲ፡ሢመት፡ወተናገሩ፡ትሩፋቲሁ፡በበይናቲሆሙ፡ወተሰነዓዉ፡ከመ፡ይሢምዎ።
4ወነሥኡ፡እምኀበ፡መኰንነ፡ምስር፡መጽሐፈ፡መልእክት፡ከመ፡ያብጽሕዎ፡እም፡ደብሩ፡ወእንዘ፡የሐውሩ፡በፍኖት፡ረከብዎ፡ምስለ፡አረጋውያን፡እንዘ፡ይወፅእ፡በእንተ፡መፍቅደ፡ደብር፡ወአኀዝዎ፡ወወሰድዎ፡ምስሌሆሙ፡ወሤምዎ፡ሊቀ፡ጳጳሳት፡አመ፡፲ወ፯፡ለመስከረም፡በ፲ወ፬፡ዓመት፡እምዲዮቅልጥያኖስ፡ወይእቲ፡ዕለት፡በዓሉ፡ለመስቀል፡ክቡር፡በመዋዕለ፡አልሲድ፡ወልደ፡ሐሚድ፡ወበመዋዕሊሁ፡ነግሠ፡መርዋን፡አልጋዲን፡ወነበሩ፡ሰብአ፡ሀገረ፡እስክንድርያ፡ብዙኃ፡ዓመታተ፡እንዘ፡ኢይዘንም፡ዝናም፡ብዙኅ፡ዘእ፡ንበለ፡ንስቲት።
5ወበይእቲ፡ዕለት፡እንተ፡ባቲ፡ተሠይመ፡ዝንቱ፡አብ፡ዘንመ፡ዝናም፡ብዙኅ፡በዳግማይ፡ወበሣልሳይ።
6ወበመዋዕሊሁ፡ለዝንቱ፡አብ፡በጽሐ፡ላዕለ፡ክርስቲያን፡ምንዳቤ፡ዐቢይ፡ወጐዩ፡ብዙኃን፡እምነ፡መሃይምናን፡እምብሔረ፡ግብፅ፡ወኍልቆሙ፡ለእለ፡ክሕድዎ፡ለክርስቶስ፡ሎቱ፡ስብሐት። ፪እልፍ፡ወ፵፻፡ሰብእ፡ወበእንተዝ፡ኮነ፡ዝንቱ፡አብ፡ውስተ፡ኀዘን፡ዐቢይ።
7ወበመዋዕሊሁ፡ተሠይመ፡ላዕለ፡መለካውያን፡ሊቀ፡ጳጳሳት፡ቆዝሞስ፡ወተዋሥአ፡ምስለ፡ዝንቱ፡አብ፡አባ፡ሚካኤል፡በእንተ፡ተዋሕዶተ፡ጠባይዓቱ፡ለክርስቶስ፡ሎቱ፡ስብሐት። ወአምነ፡ቆዝሞስ፡ዘከመ፡ይቤሎ፡አባ፡ሚካኤል፡ወጸሐፈ፡በእዴሁ፡እንዘ፡ይብል፡እስመ፡ክርስቶስ፡ሎቱ፡ስብሐት። እምድኅረ፡ተዋሕዶቱ፡አሐቲ፡ጠባይዕ፡ዘመለኮቱ፡ወትስብ፡እቱ፡በከመ፡ይቤ፡ቄርሎስ፡ሊቀ፡ጳጳሳት፡ወኤ፡ጲስቆጶሳቲሁኒ፡ጸሐፉ፡እንዘ፡ይብሉ፡ኢመፍትው፡ከመ፡ይበሉ፡በእንተ፡ክርስቶስ፡እምድኅረ፡ተዋሕዶቱ፡ክልኤተ፡ጠባይዓተ፡ወይረስይዎን፡ፍሉጣተ፡ወ፪ተ፡ገጻተ።
8ወተሰነዓዉ፡ከመ፡ይረስይዎ፡፩ደ፡ጠባይዐ፡ፍጹመ፡ወቆዝሞስኒ፡ሠምረ፡ከመ፡ይኩን፡ኤጲስቆጶሰ፡ላዕለ፡ሀገረ፡ምስር፡ታሕተ፡እዴሁ፡ለአባ፡ሚካኤል፡ወተሰነዓዉ፡ኵሎሙ፡በዝንቱ፡ምክር።
9ወአማሰነ፡ላዕሌሆሙ፡ብእሲ፡መለካዊ፡ዘስሙ፡እንስጣስዮስ፡እምሰብአ፡እስክንድርያ፡እስመ፡ውእቱ፡ኀሠሠ፡ይሢምዎ፡ኤጲስ፡ቆጶሰ፡ወኢሤምዎ።
10ወለዝንቱሰ፡አብ፡አባ፡ሚካኤል፡በጽሖ፡ምንዳቤ፡ዐቢይ፡እምነገሥት፡ዐማፅያን፡ወኰነንዎ፡ኵነኔ፡ዐቢየ፡ወቀሠፍዎ፡ወአሠርዎ፡በሐፂን፡ብዙኀ፡መዋዕለ፡ወአቅረብዎ፡ቅድመ፡መኰንን፡ከመ፡ይምትሩ፡ርእሶ፡በሰይፍ፡ወእግዚአብሔር፡ያድኅኖ፡በእንተ፡ዓቂበ፡መርዔቱ።
11ወተኰነነ፡ኵነኔ፡ዐቢየ፡በመዋዕለ፡መንግሥቱ፡ለመርዋን፡እልጋዲ፡በውስተ፡ምኵናኑ፡ለገብረ፡ንጉሥ፡ወልደ፡ሙሴ፡ወሞቅሖ፡ለዝንቱ፡አብ፡እንዘ፡የኀሥሥ፡ንዋየ፡እምኔሁ፡ወእምዝ፡ተሀበይዎ፡ወአውፅእዎ፡ወሖረ፡ኀበ፡ላዕላይ፡ግብፅ፡ከመ፡ይስአል፡ምጽዋተ፡ወያምጽእ፡ለመኰንን፡ንዋየ፡ብዙኀ።
12ወሶበ፡በጽሐ፡ኀበ፡ላዕላይ፡ግብፅ፡ገብረ፡በህየ፡ተአምራተ፡ብዙኃተ፡ወሜጠሙ፡ለብዙኃን፡መሃይምናን፡እለ፡ክሕድዎ፡ለክርስቶስ፡ሎቱ፡ስብሐት፡ወአብኦሙ፡ውስተ፡ሃይማኖት፡ርትዕት።
13ወሶበ፡ሰምዐ፡ንጉሠ፡ኢትዮጵያ፡ዜናሁ፡ለዝንቱ፡አብ፡ዘከመ፡ኰነንዎ፡መኳንንተ፡ተንባላት፡ቀንአ፡ቅንአተ፡መንፈሳዊተ፡ወወረደ፡ውስተ፡ብሔረ፡ግብፅ፡ወበጽሐ፡ኀበ፡ላዕላይ፡ግብፅ፡ወአመዝበረ፡አህጉራተ፡ብዙኃተ፡ወማ፡ኅረኮሙ፡ወምስሌሁ፡፲ቱ፡እልፍ፡አፍራስ። ፲፡እልፍ፡አብቅልት። ፲ቱ፡እልፍ፡አግማል።
14ወሶበ፡አእመረ፡ንጉሥ፡ግብፅ፡ከመ፡ዝንቱ፡ኵሉ፡ዘኮነ፡በእንተ፡ሊቀ፡ጳጳሳት፡ፈትሖ፡እመዋቅሕቲሁ፡ወአክበሮ። ክብረ፡ዐቢየ፡ወከማሁ፡ለኵሎሙ፡ሕዝበ፡ክርስቲያን፡አክበሮሙ፡ፈድፋደ።
15ወእምዝ፡ሰአሎ፡ንጉሡ፡ግብፅ፡ለሊቀ፡ጳጳሳት፡ከመ፡ይፈኑ፡መልእክተ፡ኀበ፡ንጉሠ፡ኢትዮጵያ፡ወየአዝዞ፡ከመ፡ይትመየጥ፡ብሔሮ፡ወፈነወ፡ዝንቱ፡አብ፡መልእክተ፡ኀበ፡ንጉሠ፡ኢትዮጵያ፡እንዘ፡ይባርክ፡ላዕሌሁ፡ወላዕለ፡መኳንንቲሁ፡ወመሳፍንቲሁ፡ወላዕለ፡ኵሉ፡ሠራዊቱ፡ወይብል፡ናሁ፡አድኅነነ፡እግዚአብሔር፡እመዋቅሕት፡በእንቲአከ፡ወይእዜኒ፡ተመየጥአ፡ኀበ፡ብሔርከ፡ወእግዚአብሔር፡ይዕሢከ፡በመንግሥተ፡ሰማያት፡ህየንተ፡ዘፃመውከ፡በእንቲአየ።
16ወሶበ፡አንበበ፡መጽሐፈ፡መልእክቱ፡ለዝንቱ፡አብ፡አባ፡ሚካኤል፡ተንሥአ፡ፍጡነ፡ወገብአ፡ኀበ፡ብሔሩ፡በሰላም።
17ወሶበ፡ፈጸመ፡ዝንቱ፡አብ፡ተጋድሎቶ፡ሠናየ፡ፈለሰ፡ኀበ፡እግዚአብሔር፡ዘአፍቀሮ። ትንብልናሁ፡ወበረከተ፡ጸሎቱ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለሚካኤል፡እንተ፡ነበረ፡ገዳመእንዘ፡ይትጋደል፡ፍጹመ፤ሊቀ፡ጳጳሳት፡ዝንቱ፡በዕለተ፡ተሠይመ፤መልዕልተ፡ምድር፡ገብረ፡ሰላመ፤ሰማይኒ፡ወሀበ፡ዝናመ።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።