ግዕዝ
Home Formaciones Libros Biblioteca Ge'ez Contacto
Sinaxario · Megabit

13 de Megabit

አመ፡፲ወ፫፡ለመጋቢት
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፫፡ለመጋቢት፡በዛቲ፡ዕለት፡ሰማዕተ፡ኮኑ፡፵፡ሐራ፡ሰማይ፡በሀገረ፡ስብስጥያ፡በመዋዕሊሁ፡ለአልፊያኖስ፡ንጉሥ።
2እስመ፡ውእቱ፡ኮነ፡እመኳንንቲሁ፡ለቈስጠንጢኖስ፡ንጉሠ፡ነገሥት፡ወሤሞ፡ንጉሠ፡ላዕለ፡፩፡ብሔር፡እምአህጉረ፡ይሁዳ፡ወአዘዞ፡ከመ፡ይዕቀቦሙ፡ለክርስቲያን፡ወያክብሮሙ።
3ወሶበ፡በጽሐ፡ኀበ፡ውእቱ፡ብሔር፡አምለከ፡ጣዖተ፡ወአገበሮሙ፡ለኵሎሙ፡ሰብእ፡ያምልኩ፡ጣዖተ፡ወረገምዎ፡ኪያሁ፡ወጣዖታቲሁ።
4ወበይእቲ፡ሌሊት፡ተሰነዓዉ፡፵፡ዕደው፡ሐራ፡በበይናቲሆሙ፡ከመ፡ይብጽሑ፡ኀበ፡ውእቱ፡መኰንን፡ወይንሥኡ፡አክሊለ፡ስምዕ።
5ወሶበ፡ኖሙ፡አስተርአዮሙ፡መልአከ፡እግዚአብሔር፡በራእይ፡ወወሀቦሙ፡ኀይለ፡ወጽንዐ፡ለነፍሶሙ፡ወበጽባሕ፡ተንሥኡ፡ወቆሙ፡ቅድመ፡መኰንን፡ሊቀ፡ሐራሁ፡አግሪጎላዎስ፡ወተአመኑ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወተምዐ፡ላዕሌሆሙ፡ወአፍርሆሙ፡ወኢፈርሁ፡ምንተኒ፡ወአዘዘ፡ይውግርዎሙ፡በአእባን፡ወኮኑ፡ኣእ፡ባንሰ፡ይትመየጡ፡ላዕለ፡ሰብእ፡ዘይወግርዎው።
6ወሀለወት፡ዐዘቅተ፡ማይ፡ቅሩብ፡ኀቤሆሙ፡ወርግዕት፡እምአስሐትያ፡ወቅሩብ፡እምኔሃ፡ቤተ፡ብለኔ፡ወአዘዘ፡መኰንን፡ይግድፍዎሙ፡ውስቴታ፡ወተበትከ፡መለያልያቲሆሙ፡እምብዝኀ፡ቍር። ወፈርሃ፡፩፡እምኔሆሙ፡ወወፅአ፡እምዓዘቅት፡ወቦአ፡ቤተ፡ብለኔ፡ወሞተ፡ፍጡነ፡ወአጥፍአ፡ዕሤቶ፡ወኢረከበ፡ዘፈተወ።
7ወርእዮ፡፩፡እምነ፡ሠገራት፡፵፡አክሊላተ፡እንዘ፡ይወርዱ፡እምሰማይ፡ወነበሩ፡ወ፱ቱ፡አክሊላት፡ዲበ፡አርእስቲሆሙ፡ለጫወ፡፱ቱ፡ሰማዕታት፡ቅዱሳን፡ወተርፈ፡፩፡አክሊል፡ስቁለ፡ውስተ፡እደ፡መልአክ፡ወተንሥአ፡ሶቤሃ፡ወአውፅአ፡አልባሲሁ፡ወወረደ፡ውስተ፡ዓዘቅት፡በሃይማኖት፡ወነሥአ፡ውእተ፡አክሊለ፡ምስለ፡ቅዱሳን፡ዘኮነ፡ስቁለ፡ውስተ፡እደ፡መልአክ።
8ወኮና፡እማቲሆሙ፡ያጸንዓሆሙ፡ወያስተዔግሣሆሙ፡ወነበሩ፡ውስተ፡ይእቲ፡ዓዘ፡ቅት፡ብዙኀ፡ጊዜያተ፡ወኢሞቱ፡ወፈቀዱ፡ዓላውያን፡ይስብሩ፡አቍያሚሆሙ፡ወነሥአ፡እግዚአብሔር፡ነፍሳቲሆሙ፡ወኢተክህሎሙ፡ይስብሩ፡አቍያሚሆሙ።
9ወእምድኅረዝ፡አዘዘ፡መኰንን፡ያውዕዩ፡ሥጋሆሙ፡በእሳት፡ወይፁርዎሙ፡በመንኰራኵር፡ወይግድፍዎሙ፡ውስተ፡ባሕር።
10ወእንዘ፡ይፀውርዎሙ፡በመንኰራኵራት፡ተረክበ፡አሐዱ፡ሕፃን፡ሕያወ፡ኀደግዎ፡ወኢፆርዎ፡ወፆረቶ፡እሙ፡ወሮፀት፡ትግድፎ፡ውስተ፡መንኰራኵራት፡ወከልእዋ፡ሠገራት፡በእንተ፡ዘኮነ፡ሕያወ፡አሜሃ፡ሞተ፡ውስተ፡ክሣዳ፡ወገደፈቶ፡ውስተ፡መንኰራኵር፡ምስለ፡ሥጋሆሙ፡ለቅዱሳን።
11ወአጽዓንዎሙ፡ኀበ፡ሀገረ፡ስብሰጥያ፡ወአውዓይዎሙ፡በእሳት፡ወወገርዎሙ፡ውስተ፡ባሕር።
12ወበሣልስት፡ዕለት፡አስተርአይዎ፡ቅዱሳን፡ለኤጲስቆጶስ፡ዘሀገረ፡ስብሰጥያ፡ወይቤልዎ፡ሑር፡ኀበ፡ሐይቀ፡ፈለግ፡ወትረክብ፡ሥጋነ፡ወእምህየ፡ንሥኦ፡ወፁሮ፡ኀቤከ።
13ወተንሥአ፡ኤጲስቆጶስ፡ምስለ፡ካህናት፡ሌሊተ፡ወሖሩ፡ኀበ፡ፈለግ፡ወረከቡ፡ሥጋሆሙ፡ለቅዱሳን፡ጉቡአነ፡እንዘ፡ያበርሁ፡ከመ፡ከዋክብት፡በውስተ፡ቀላይ፡ወኢጠፍአ፡፩ዱ፡እምኔሆሙ፡ወኢምንትኒ።
14ወፆርዎሙ፡በክብር፡ወበስብሐት፡ወአንበርዎሙ፡ውስተ፡መካን፡ሠናይ፡ወኮኑ፡እምኔሆሙ፡ተአምራት፡ወመንክራት፡ወተሰምዐ፡ዜናሆሙ፡ወተሐንፃ፡ሎሙ፡አብያተ፡ክርስቲያናት፡ውስተ፡ኵሉ፡አጽናፈ፡ዓለም፡ወተገብረ፡ሎሙ፡ተዝካሮሙ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለአባልክሙ፡በአስሐትያ፡ዘነቅዐ፤ወለደምክሙ፡ዓዲ፡በከርሠ፡ቀላያት፡ዘረግአ፤ሐራ፡ኢየሱስ፡ክርስቶስ፡ሰማዕታት፡አርብዓ፤እመ፡ኮነ፡ብእሲ፡እምኍልቍክሙ፡ውፁአ፤ሥምረተ፡አምላክ፡ጸውዐ፡አሐደ፡እምአፍአ።
15ወበዛቲ፡ዕለት፡ካዕበ፡ያብዕሉ፡ሰብእ፡ኦርቶዶክሳውያን፡ተዝካረ፡ስደቶሙ፡ለአብ፡ክቡር፡መቃርስ፡ዘየዓቢ፡ወለመቃርዮስ፡እስክንድራዊ።
16ወሶበ፡ነግሠ፡ወዓሊጢኖስ፡በመንግሥተ፡ሮም፡እምድኅረ፡ዋልጥስ፡እኍሁ፡አምጽአ፡ምንዳቤ፡ወስደተ፡ላዕለ፡ምእመናን፡ኦርቶዶክሳውያን፡እስመ፡ውእቱ፡ዘይትአመን፡በሃይማኖተ፡ማኒ፡ርኩስ፡ወበሃይማኖተ፡አርዮስ፡ዓላዊ፡ወሤመ፡ሊቀ፡ጳጳሳት፡ሉክዮስሃ፡አርዮሳዊ፡ወሰደዶ፡ለአትናቴዎስ፡ሐዋርያዊ።
17ወዝንቱሰ፡ሉክዮስ፡ዓላዊ፡ኀሠሦሙ፡ለአብ፡መቃሪ፡ዘየዓቢ፡ወለአብ፡መቃርዮስ፡እስክንድራዊ፡በትእዛዘ፡ወዓሊጦኖስ፡ንጉሥ፡ወአብጽሕዎሙ፡እምገዳም፡ወሶበ፡በጽሑ፡ኀቤሁ፡ሌለዮሙ፡ለለባሕቲቶሙ፡ወኄጠሙ፡በነገር። ልምሉም፡እንዘ፡ያጌብሮሙ፡ከመ፡ይባኡ፡ውስተ፡ሃይማኖተ፡አርዮስ፡ወኢተወክፍዎ፡ወኢፈርህዎ፡አላ፡ገሠፅዎ፡ወተዋሥእዎ፡ወአበየኑ፡ሎቱ፡እመጻሕፍት፡ቅዱሳት፡ወሙስናሁ፡ለሃይማኖተ፡አርዮስ፡ወእከየ፡ባህሉ።
18ወሶቤሃ፡ሰደዶሙ፡ኀበ፡ደሴት፡ዘርኀቅት፡እማእከለ፡ቍስጥንጥንያ፡ወአስተዳለዉ፡ሐመረ፡እምእስክንድርያ፡ወሐራሂ፡ዘየዓቅብዎሙ፡ሙቁሐኒሆሙ፡በሐፂን፡ወበኵሉ፡ግብር፡ጥውቅ፡ዘየኣኪ።
19ወሶበ፡በጽሑ፡ኀበ፡ደሴት፡አቀምዎ፡ኀበ፡ንጉሠ፡ደሴት፡ወውእቱ፡ብእሲ፡እኩይ፡ወመምለኬ፡ጣዖት፡ሰይጣን፡ወአስሐተ፡ብዙኃነ፡ሰብአ፡በሥራይ፡እስከ፡አምለክዎ፡ወረሰይዎ፡አምላከ፡ወሰገዱ፡ሎቱ፡እሉሰ፡ቅዱሳን፡ሰአልዎ፡ከመ፡ይትመየጥ፡እምስሕተቱ፡ወኢተመይጠ፡ባሕቱ፡ዘግሆሙ፡ወሞቅሖሙ፡ምስለ፡ሥቃያት፡ብዙኀት፡ወዕፁባት፡ወአመንደቦሙ፡ምንዳቤ፡ዐቢየ።
20ወእግዚእነሰ፡ያስተርኢ፡ሎሙ፡ወያጸንዖሙ፡ወያስተዔግሦሙ።
21ወሶበ፡ፈቀደ፡እግዚእነ፡ከመ፡ይትከሠት፡ትሩፋቲሆሙ፡ወገድሎሙ፡አኀዛ፡ሰይጣን፡ለወለተ፡ንጉሥ፡ወሣቀያ፡ብዙኀ፡እስከ፡ኮኑ፡አቡሃ፡ወእማ፡ውስተ፡ዐቢይ፡ኀዘን፡ወውስተ፡ሀገርኒ፡ኮኑ፡ሰይጣናት፡ያስተርእዩ፡ገሀደ፡ይጸርፉ፡ወይብሉ፡ምንት፡ብነ፡ወምንት፡ብክሙ፡ኦመቃርስ፡ወቢጹ፡ዘሰደድክሙነ፡እምሃገርክሙ፡ወሰይጣንኒ፡ዘሀሎ፡ላዕለ፡ወለተ፡ንጉሥ፡ጸርሐ፡እንዘ፡ይብል፡ለአመ፡ኢበጽሑ፡መቃርስ፡ወቢጹ፡ኢይወፅእ፡እምወለትከ፡ኦ፡ንጉሥ።
22ወሰሚዖሙ፡ንጉሥ፡ወመኳንንቲሁ፡ወእለ፡ሀለዉ፡ህየ፡አንከሩ፡ወአብጽሕዎሙ፡ለመቃርስ፡ወለቢጹ፡ኀበ፡ንጉሥ፡ወሶበ፡በጽሑ፡ሰኣለ፡መንፈስ፡ርኩስ፡ዘኅዱር፡ላዕለ፡ወለተ፡ንጉሥ፡ከመ፡ኢይሣቅይዎ፡ወእሊአሁሰ፡ለንጉሥ፡አስተብቍዕዎሙ፡በእንተ፡ወለተ፡ንጉሥ፡ከመ፡ይፈውስዋ፡ወገሠፅዎ፡ለንጉሥ፡ወይቤልዎ፡እንዘ፡ሰብእ፡አንተ፡ለምንት፡ትሬሲ፡ርእሰከ፡አምላከ፡እመሰ፡አምላክ፡አንተ፡ይደልወከ፡ከመ፡ታድኅን፡ርእሰከ፡ወወለተከኒ።
23ወእምዝ፡ጸለዩ፡ኀበ፡እግዚእነ፡ኢየሱስ፡ክርስቶስ፡ወወፅአ፡ውእቱ፡ጋኔን፡እምወለተ፡ንጉሥ፡ከልሐ፡ወተዛለፎ፡ለንጉሥ፡ወለሰብአ፡ይእቲ፡ደሴት፡በእንተ፡ምግባሮሙ፡እኪት።
24ወሶበ፡ርእዩ፡ዘንተ፡መንክረ፡ንጉሥኒ፡ወጉቡአን፡ጸርሑ፡ወይቤሉ፡ነአምን፡በአምላከ፡እሉ፡ቅዱሳን፡እስመ፡ጠየቅነ፡ከመ፡አልቦ፡አምላክ፡በሰማይ፡ወበምድር፡ዘእንበለ፡አምላኮሙ፡ለእሉ፡ቅዱሳን።
25ወአበዊነሂ፡መሀርዎሙ፡ሃይማኖተ፡ዘእግዚእነ፡ኢየሱስ፡ክርስቶስ፡ሎቱ፡ስብሐት። ወአስተጋብእዎሙ፡ለሕሙማን፡ወለድውያን፡ውስተ፡፩፡መካን፡ወጸለዩ፡ዲበ፡ዘይት፡ወዓተቡ፡ላዕሌሆሙ፡በትእምርተ፡መስቀል፡ወአሕየውዎሙ፡ወለብዙኀን፡ሰብእ፡እለ፡እም፡አጋንንት፡አሕየዉ፡ወነበሩ፡እንዘ፡ይገብሩ፡ከመዝ።
26ወእምድኅረዝ፡ነሠቱ፡ምኵራበ፡ሀገር፡ወአስተናጽሑ፡ወሐነፁ፡ቤተ፡ክርስቲያን፡እስመ፡ሠናይ፡መካኑ፡ወርኂብ፡ጥቀ፡ወአዘዘ፡ንጉሥ፡ያምጽኡ፡ወርቀ፡ወብሩረ፡ዘአልቦ፡ኍልቍ፡ወከማሁ፡አልባሳተ፡ዘሐሪር፡ወኵሎ፡ንዋያተ፡ዘይትፈቀድ፡ለዝንቱ፡ግብር።
27ወኣዘዝዎሙ፡አበዊነ፡ለነሐብት፡ከመ፡ይግበሩ፡፲ወ፪ተ፡እጽሕልተ፡ዘመድሎቱ፡ለለ፩፡ሀቱ፡ልጥረ፡ወርቅ፡ከመ፡ይሥዓሉ፡ውስቴቱ፡ሥዕለ፡እግዚእነ፡ኢየሱስ፡ወሥዕለ፡እግዝእትነ፡ማርያም፡ድንግል፡ወክልኤቱ፡ሊቃነ፡መላእክት፡ሚካኤል፡ወገብርኤል፡ወይግበሩ፡፲ወ፪ተ፡መናብርተ፡ወዘይትፈቀድ፡ለምሥዋዕ፡፲ወ፪ተ፡ጽዋዓተ፡፲ወ፪ተ፡መንካተ፡፳ወ፬ተ፡መስቀላተ፡ወጽንሐሓተ፡ወለለ፩፡መስቀል፡በበ፫፡ልጥራት፡ወዓዲ፡ኣዘዘ፡ከመ፡ይሥዓሉ፡ቤተ፡መቅደስ፡ሠለስተ።
28ወተፈጸመ፡ኵሉ፡ሕንፃ፡መርጡል፡ወኵሉ፡ሥርዓታ፡ወዘተርፈ፡ንዋየ፡ዘረወ፡ለኅጡአን፡ወለፅኑሳን።
29ወሶበ፡ኮነ፡አመ፡፲ወ፩፡ለጥር፡ዘተጠምቀ፡ባቲ፡መድኃኒነ፡አዘዝዎሙ፡ለሰብአ፡ሀገር፡ይረዱ፡ውስተ፡ሐይቀ፡ባሕር፡ወህየ፡ይትጋብኡ፡ወአምጽኡ፡ሜሮነ፡ቅዱሰ፡ዘተማልኡ፡ምስሌሆሙ፡በጊዜ፡ስደቶሙ፡እምእስክንድርያ፡ዘኮነ፡ዕቁበ፡እመዋዕለ፡አትናቴዎስ፡ሐዋርያዊ፡ወሉክዮስሰ፡ኢረከቦ፡ወበእንተዝ፡ዓቀቦ፡እግዚእነ፡በኵሉ፡መዋዕል፡ወኢረከቦ፡ሙስና፡ወዝንቱ፡ኵሉ፡ዘኮነ፡በትእዛዘ፡መንፈስ፡ቅዱስ።
30አሜሃ፡ዓተበ፡ኣብ፡መቃርዮስ፡በሜሮን፡ቅዱስ፡ላዕለ፡ማይ፡ወኮነ፡ባሕር፡ከመ፡ማይ፡ዘይፈልሕ፡እምዋዕየ፡እሳት፡ዘውስተ፡መቅፁት፡ወጸለለ፡ዘይት፡ወሜሮን፡ዲበ፡ገጸ፡ማይ፡ወኮነ፡ከመ፡ከዋክብት፡ብሩሃን፡ወአስተርአየ፡እምኔሁ፡ብርሃን፡ከመ፡ብርሃነ፡ፀሐይ፡ወርእዮሙ፡ንጉሥ፡ወኵሉ፡ጉባኤ፡ፈርሁ፡ጥቀ።
31ወአስተርአየ፡እግዚእነ፡ኢየሱስ፡ክርስቶስ፡ወዮሐንስ፡መጥምቅ፡ምስሌሁ፡ወመላእክቲሁ፡ቅዱሳን፡ውስተ፡ቅዳሴ፡ማይ፡ወተጠ፡ምቁ፡ኵሉ፡ሕዝብ፡በስመ፡አብ፡ወወልድ፡ወመንፈስ፡ቅዱስ፡ወፄነወ፡ፄና፡ሠናየ፡ዘይሰልብ፡አልባበ፡ወርእዮሙ፡ቅዱሳን፡አበዊነ፡ዘንተ፡ወድቁ፡ዲበ፡ምድር፡ወጐንደዩ፡ስጉዳኒሆሙ፡ወናዘዞሙ፡እግዚእነ፡ወአንሥኦሙ።
32ወሰአሎ፡አባ፡መቃርዮስ፡ለእግዚእነ፡እንዘ፡ይብል፡እስእለከ፡እግዚእየ፡ከመ፡ትርከበኒ፡ምሕረትከ፡ወይኩን፡ቅዳሴ፡ዛቲ፡ታቦት፡ወንዋያቲሃ፡በእዴከ፡አምላካዊት፡ወይቤሎ፡ኦሆ፡ወነሥአ፡እግዚእነ፡ሜሮነ፡እምእዴሁ፡ለአብ፡መቃርዮስ፡ወቀደሰ፡ታቦተ፡ወኵሉ፡ንዋያቲሃ።
33ወይቤሎ፡እግዚእነ፡ለአብ፡መቃርስ፡አነ፡እኤዝዘከ፡ከመ፡ትቀድስ፡ሠላሰ፡ሕዋራተ፡ወአነ፡ምስሌከ፡ወቢጽከኒ፡ይትለአክ፡ምስሌከ፡ዘንተ፡መልእክተ፡ንጹሐ፡ወውጥን፡ሕዋረ፡ማእከላዌ፡በስመ፡ማርያም፡ድንግል፡ወላዲተ፡አምላክ፡ወዘኒ፡ሕዋረ፡ዘየማን፡በስመ፡መስቀል፡ቅዱስ፡ወዘኒ፡ዘጸጋም፡በስምከ፡እስመ፡ከዐውከ፡ደመከ፡በእንተ፡ስምየ፡በእደ፡ሉክዮስ፡ዓላዊ።
34ወሶበ፡ወጠኑ፡እሉ፡ቡሩካን፡ዘንተ፡ግብረ፡በከመ፡አዘዘ፡እግዚእነ፡ወወጠነ፡ዳዊት፡ይዘምር፡ወመላእክትኒ፡አኀዙ፡ይቀድሱ፡በነገሮሙ፡ቃላተ፡ሠናያተ፡አንከሩ፡ሕዝብ፡ወሰብሕዎ፡ለእግዚአብሔር።
35ወካዕበ፡እግዚእነ፡አዘዞ፡ለአብ፡መቃርስ፡ከመ፡ይፁር፡ቍርባነ፡ዲበ፡ታቦት፡ወይቀድስ፡ወይቤሎ፡መቃርስ፡ኦ፡እግዚኦ፡አዝዞ፡ለጴጥሮስ፡ርእሰ፡ሐዋርያት፡ከመ፡ይቀድስ፡ዮም፡እስመ፡ዛቲ፡ዕለት፡ቀዳሚት፡ዘተፀውረ፡ባቲ፡ቍርባን፡ውስተ፡ዛቲ፡ሀገር፡በስምከ፡ቅዱስ፡ወይቤሎ፡እግዚእነ፡ለከ፡ይደልወከ፡እስመ፡አንተ፡ዘራእከ፡ውስተ፡ዛቲ፡ደሴት፡ወአነ፡አልሐቁ።
36ኢሰማዕከኑ፡ዘእቤ፡በአፈ፡ጳውሎስ፡ረድእየ፡ዘይዘርእሰ፡ወይፃሙ፡ይብላዕ፡ፍሬሁ፡ቅድመ።
37ወሶበ፡ወጠነ፡አባ፡መቃርዮስ፡ከመ፡ይቀድስ፡ቆሙ፡ምስሌሁ፡አበዊነ፡ንጹሐን፡ጴጥሮስ፡በየማኑ። ወማርቆስ፡በጸጋሙ። ወኵሎሙ፡ሐዋርያት፡ዓውዶ፡ከመ፡ይትራድእዎ፡ምስለ፡መቃርዮስ፡እስክንድራዊ።
38ወአንበበ፡ጳውሎስ፡መጽሐፎ፡ወዮሐንስ፡ኣንበበ፡መልእክቶ። ወሉቃስ፡አንበበ፡ግብረ፡ሐዋርያት። ወዳዊት፡አንበበ፡መዝሙረ፡ወእግዚእነሰ፡ወአምላክነ፡ለዘክሮቱ፡ስብሐት፡አንበበ፡ወንጌለ። ወወረደ፡መንፈስ፡ቅዱስ፡በአምሳለ፡ርግብ፡ፀዓዳ፡ላዕለ፡ኅብስት፡ወወይን፡ወረሰዮሙ፡ሥጋ፡ወደመ፡ዘእግዚእነ፡ኢየሱስ፡ክርስቶስ።
39ወሶበ፡ወደየ፡ውስተ፡ጽዋዕ፡አፃብዒሁ፡ተሤረየ፡በደም፡ወኵሎሙ፡ሠራዊተ፡ሰማይ፡ሰፍሑ፡ክነፊሆሙ፡ዲበ፡ታቦት፡ወመጽኡ፡ሚካኤል፡ወገብርኤል፡ወኵሎሙ፡መላእክት፡ከመ፡ይትራድእዎ፡ለአብ፡መቃርዮስ፡ወተመሰሉ፡በአምሳሉ፡ወመጠወ፡ምሥጢራተ፡ቅድሳት፡ለሕዝብ።
40ወእምድኅረ፡ፍጻሜ፡ቍርባን፡ነበረ፡እግዚእነ፡አምሳለ፡መቃርዮስ፡ዲበ፡አትሮንስ፡ወገጹ፡ይበርህ፡ከመ፡ፀሐይ፡ወወሀበ፡ለሕዝብ፡ቡራኬ፡ወተመይጠ፡ውስተ፡ታቦት፡ወአርድእትኒ፡ምስሌሁ።
41ወካዕበ፡እምድኅረ፡ሰቡዕ፡መዋዕል፡ጸለየ፡ኣቡነ፡መቃርዮስ፡ኀበ፡እግዚእነ፡እንዘ፡ይዜከር፡በእንተ፡ሢመተ፡መዓርጊሃ፡ለቤተ፡ክርስቲያን፡ወአስተርአዮ፡እግዚእነ፡ወይ፡ቤሎ፡አንተ፡ድልው፡በኀቤየ፡ለዝንቱ፡ስብሐት፡ዐቢይ፡ወሰሚዖ፡አረጋዊ፡ሰገደ፡ቅድመ፡እግዚአብሔር፡ወበከየ፡ብካየ፡መሪረ፡እንዘ፡ይብል፡ተዘከር፡እግዚኦ፡ዘትቤለኒ፡አመ፡እመይጠከ፡ኀበ፡ውሉድከ፡መነኮሳት፡እለ፡ደብረ፡ሲሐት፡ትሬእዮሙ፡እምቅድመ፡ትፃእ፡እምዝንቱ፡ሥጋ፡ወእመነኮሰ፡ይብሉ፡እስመ፡መቃራ፡ኀደገ፡ግብረ፡ምንኵስና፡ወኮነ፡በትረ፡ያርከ።
42ወይቤሎ፡እግዚእነ፡ኦኅሩይየ፡አነ፡እፌጽም፡ኵሎ፡ፍትወተ፡ልብከ፡ወናሁ፡አቅርብ፡አሐደ፡እምነ፡ውሉድከ፡ዘኀረይከ፡ከመ፡ይኩን፡በትረያርከ፡ወይቤሎ፡ቅዱስ፡አንተ፡እግዚኦ፡ማእምረ፡ልብ፡አንሰ፡ርኢኩ፡ኀበ፡ብእሲ፡ልኂቅ፡ነሀቢ፡እስመ፡ጽኑዕ፡ውእቱ፡ውስተ፡ሃይማኖት፡ርትዕት፡ወኢያእመረ፡ትድምርተ፡አንስት፡ወይቤሎ፡እግዚእነ፡በአማን፡ኄር፡ውእቱ፡በከመ፡ትቤ።
43ወጸውዖ፡ቅዱስ፡ወአቅረቦ፡ኀበ፡ታቦት፡ለውእቱ፡ነሀቢ፡ወመጽአ፡ማርቆስ፡ሐዋርያ፡ወንጌላዊ፡ወአንበረ፡እዴሁ፡ላዕለ፡ነሀቢ፡ወሤሞ፡ዲያቆነ፡ወካዕበ፡ሤሞ፡ቀሲሰ፡ወእምድኅረ፡ዝንቱ፡መዐርግ፡ሤሞ፡እስከ፡መዓርገ፡ሊቀ፡ጵጵስና፡ወሰመየ፡ስሞ፡ዮሐንስሃ፡ወጸርሑ፡ኵሎሙ፡ሠራዊተ፡ሰማያት፡፫ተ፡ጊዜያተ፡እንዘ፡ይብሉ፡“ይደልዎ። ይደልዎ። ይደልዎ። ለዮሐንስ፡ሊቀ፡ጵጵስና፡ወልደ፡መቃርዮስ፡ተክል፡ሐዲስ”።
44ወሀለዉ፡ሕዝብ፡ይሰምዑ፡እሎንተ፡ቃላተ፡ወከሠተ፡እግዚእነ፡አዕይንተ፡ልቡ፡ለዮሐንስ፡ወርእዮ፡ለእግዚእነ፡በአምጣነ፡ተክህሎ፡ወነበበ፡ብዙኀ፡ቃላተ፡ወርእየ፡ቤተ፡መቅደስ፡ምሉአ፡እምኀይላት፡ሰማያውያን፡ወነቢያት፡ወሐዋርያት፡ቅዱሳን።
45ወጸውዖሙ፡እግዚእነ፡ለአባ፡መቃርዮስ፡ዘየዓቢ፡ወለአባ፡መቃራ፡እስክንድራዊ፡ወይቤሎሙ፡ብፁዓን፡አንትሙ፡ወብፁዓን፡እለ፡ይዜከሩክሙ፡በዲበ፡ምድር፡ይወርሱ፡ሕይወተ፡ዘለዓለም፡እምሕል፡በርእስየ፡ከመ፡ኵሉ፡ዘያስተሐምም፡ፃማክሙ፡ዘፆርክምዎ፡በእንተ፡ስምየ፡በውስተ፡ዝንቱ፡ደሴት፡ወይጽሕፎ፡ወያነብቦ፡ውስተ፡ቤተ፡ክርስቲያን፡ከመ፡ይሰብሐኒ፡ኵሉ፡ዘሰምዐ፡እሁቦ፡ኵሎ፡ሠናያተ፡ወኢያኀጥኦ፡ወኢምንተኒ፡ወአድኅኖ፡እምኵሉ፡ምንዳቤ፡ወእሠሪ፡ሎቱ፡ኵሎ፡ኃጢአቶ፡ወበጊዜ፡ፍልሰቱ፡እፌኑ፡መላእክተ፡ምሕረት፡ይንሥኡ፡ነፍሶ፡ኀበ፡ትፍሥሕት፡ዘለዓለም።
46ወኵሉ፡ምኔት፡አው፡ሀገር፡አው፡ቤተ፡ክርስቲያን፡ዘይትነበብ፡ውስቴቱ፡ዝንቱ፡ዜናክሙ፡አነ፡አኀድር፡ህየ፡ወእሬሲ፡ውስቴቱ፡በረከትየ፡ወሰላምየ፡እስከ፡ለዓለም።
47ወኵሉ፡ዘይከውን፡መስተቃርነ፡ለዜና፡ዝንቱ፡ስደት፡እምኀየሶ፡ሶበ፡ኢተወልደ፡አማን፡እብለክሙ፡በከመ፡አመንክሙኒ፡በቅድመ፡ሰብእ፡አነ፡አአምነክሙ፡በቅድመ፡አቡየ፡ዘበሰማያት፡ወመላእክቲሁ፡ቅዱሳን።
48ወካዕበ፡ይቤሎሙ፡በጽሐ፡ጊዜሁ፡ከመ፡ትትመየጡ፡ውስተ፡ሀገርክሙ፡ወዘንተ፡ብሂሎ፡ወሀቦሙ፡ሰላመ፡ወዐርገ፡ውስተ፡ሰማያት።
49ወሶቤሃ፡አስተጋብእዎሙ፡ለኵሉ፡ሕዝብ፡ወለንጉሥኒ፡ምስለ፡መኳንንቲሁ፡ወአይድዕዎሙ፡ዘከመ፡ይትመየጡ፡ውስተ፡ሀገሮሙ፡ወአዘዝዎሙ፡ከመ፡ይዕቀቡ፡ኵሎ፡ሕገ፡ዘክርስቶስ፡ወከመ፡ያክብርዎ፡ለሊቀ፡ጳጳሳት፡ዮሐንስ፡ወአማኅፀንዎሙ፡ብዙኀ፡ከመ፡ኢይትገኀሡ፡ኢለየማን፡ወኢለጸጋም፡እምሃይማኖት፡ርትዕት።
50ወሰሚዖሙ፡ሕዝብ፡ደንገፁ፡ጥቀ፡ወበከዩ፡ብካየ፡መሪረ፡ወቅዱሳንኒ፡በከዩ፡ምስሌሆሙ፡ኅቡረ፡ወተሰነዓልዎሙ፡በሰላም፡ወባረክዎሙ፡ለለ፡፩ዱ።
51ወሶቤሃ፡መጽአ፡መልአክ፡ኪሩባዊ፡ወፆሮሙ፡በክነፊሁ፡ወአብጽሖሙ፡ሀገረ፡እስክንድርያ፡ወአውረዶሙ፡ቅድመ፡አንቀጸ፡ሊቀ፡ጳጳሳት፡አባ፡ጢሞቴዎስ፡ጽባሐ፡ዕለተ፡እሑድ።
52ወሶበ፡ሰምዐ፡ሊቀ፡ጳጳሳት፡ተፈሥሐ፡ዐቢየ፡ፍሥሐ፡ወሶበ፡ርእዮሙ፡በከየ፡ወሰገደ፡ሎሙ፡ወእሉኒ፡ሰገዱ፡ሎቱ፡ወተአምኁ፡በበይናቲሆሙ፡ወነገርዎ፡ኵሎ፡ዘበጽሐ፡ላዕሌሆሙ፡ወበእንተ፡ተመይጦቶሙ፡ለአሕዛብ፡ነኪራን፡ኀበ፡እግዚአብሔር፡ወመንክራተ፡ዘተገብረ፡ሎሙ፡አንከረ፡ሊቀ፡ጳጳሳት፡ወኵሉ፡ሕዝብ፡እለ፡ሀለዉ፡ወሰብሕዎ፡ለእግዚአብሔር፡ወነበሩ፡ህየ፡ሰሙነ፡መዋዕለ።
53ወአስተርአዮሙ፡ካዕበ፡ውእቱ፡መልአክ፡ወፆሮሙ፡በክነፊሁ፡ወአብጽሖሙ፡ውስተ፡ደብረ፡ሲሐት፡ወጸርሐ፡፩፡ኪሩብ፡በመል፡ዕልተ፡አየር፡እንዘ፡ይብል፡ኦ፡ውሉደ፡አብ፡መቃርስ፡ናሁ፡በጽሐ፡አቡክሙ፡እምስደት፡ፀዊሮ፡ፍሬያተ፡ዘመንፈስ፡ቅዱስ፡ወሰሚዖሙ፡ወፅኡ፡ኵሎሙ፡እምንኡሶሙ፡እስከ፡ዐቢዮሙ፡ወኮነ፡ኍልቆሙ፡፶፡እልፍ፡መነኮሳት፡ወእምኔሆሙ፡አባ፡ዮሐንስ፡ሐፂር፡ወአባ፡ብሶይ፡ወአምኁ፡እደዊሁ፡ወእገሪሁ፡ወበከዩ፡መሪረ፡ሶበ፡ዜነዎሙ፡ዘበጽሐ፡ላዕሌሁ፡ምስለ፡ቢጹ።
54ወካዕበ፡ተፈሥሑ፡በእንተ፡ዘርእዩ፡ገጾ፡ወውእቱኒ፡ባረኮሙ፡በስሙ፡ለእግዚእነ፡ኢየሱስ፡ክርስቶስ።
55ወበእንተዝ፡ይደልወነ፡ንግበር፡በዓለ፡ተዝካረ፡ፃማ፡ገድሎሙ፡ለእሉ፡አበው፡መስተጋድላን፡ከመ፡ጴጥሮስ፡ወጳውሎስ፡ወከዐዉ፡ደሞሙ፡በእንተ፡ስሙ፡ለክርስቶስ፡በዛቲ፡ዕለት፡አመ፡፲ወ፫፡ለመጋቢት፡ዘሰደዶሙ፡ባቲ፡ሉክዮስ፡ዓላዊ፡እምሀገረ፡እስክንድርያ፡ኀበ፡ደሴት፡ዘቀደምነ፡ዘክሮታ፡ወበዛቲ፡ዕለት፡ኮነ፡ግብአቶሙ፡ውስተ፡እስክንድርያ፡ጸሎቶሙ፡ወበረከቶሙ፡ለእሉ፡አርእስተ፡አበው፡ክቡራን። ይኅድር፡ላዕለ፡ኵልነ፡ሕዝበ፡ክርስቲያን፡ለዓለመ፡ዓለም፡አሜን።
ሰላም፡ለስደቶሙ፡ኀበ፡መዋቅሕት፡ይትዘግሑ፤መቃርስ፡ዘየዓቢ፡ወመቃርዮስ፡እኍሁ፤ሜሮን፡ወዘይት፡ለአንጽሖት፡ዘነዝኁ፤ከመ፡ከዋክብት፡ውስተ፡ገጸ፡ማይ፡አብርሁ፤ወከመ፡ፀሐይ፡በሰማይ፡ዘሣልስ፡ወርኁ።
56ወበዛቲ፡ዕለት፡አዕረፈ፡አብ፡ቅዱስ፡ዲዮናስዮስ፡ሊቀ፡ጳጳሳት፡ዘሀገረ፡እስክንድርያ፡ወውእቱ፡እምኍልቆሙ፡ለአበው፡ሊቃነ፡ጳጳሳት፡፲ወ፬ቱ።
57ወለዝንቱ፡ቅዱስ፡ኮኑ፡አበዊሁ፡አረማውያነ፡ወከሐድያነ፡ወውእቱ፡ተምህረ፡ትምህርተ፡ሃይማኖት፡ብዙኃተ፡እስመ፡አቡሁ፡ክቡረ፡ዘመድ፡ወባዕል፡ወሐለየ፡ሎቱ፡እምን፡እሱ፡ከመ፡ይምሀሮ፡ኵሎ፡ጥበበ፡እስከ፡ኮነ፡መምህረ፡ጠቢባን።
58ወእንዘ፡ውእቱ፡ይነብር፡በአሐቲ፡መካን፡አሐተ፡ዕለተ፡ናሁ፡ኀለፈት፡አሐቲ፡ብእሲት፡አረጋዊት፡ክርስቲያናዊት፡ምስሌሃ፡፩፡ጥራዝ፡እመጽሐፈ፡መልእክተ፡ጳውሎስ፡ሐዋርያ፡ወተመጠዋ፡ወአንቢቦ፡ረከበ፡በውስቴቱ፡ቃለ፡ነኪረ፡ወአእምሮ፡መድምመ፡ወይቤላ፡በሚመጠን፡ትሠይጢ፧ ወትቤሎ፡በ፩፡ድርኀመ፡ወርቅ፡ወይቤላ፡ሑሪ፡ሕትቲ፡እመ፡ትረክቢ፡ዘተርፈ፡እምዝንቱ፡መጽሐፍ፡ወሖረት፡ወኀሠሠት፡ወረከበት፡፫ተ፡ጥራዛተ፡አምጽአት፡ሎቱ፡ወወሀባ፡፬፡ድርኀመ፡ወርቅ፡ወሶበ፡አንበቦሙ፡ረከቦ፡ለመጽሐፍ፡ሕፁፀ።
59ወይቤላ፡ኀሥሢ፡እመ፡ትረክቢ፡ዘተርፈ፡ወትቤሎ፡አንሰ፡ረከብኩ፡እሎንተ፡በውስተ፡መጻሕፍተ፡አበውየ፡ወለእመ፡ኀሠሥከ፡መጽሐፈ፡ጳውሎስ፡ሐዋርያ፡ፍጹመ፡ተሰአል፡እምቤተ፡ክርስቲያን፡ወይቤላ፡ይሁበኒኑ፧ ወትቤሎ፡እወ።
60ወሖረ፡ኀበ፡ቤተ፡ክርስቲያን፡ወኀሠሠ፡ወረከበ፡ወአንበቦ፡ወአጽንዖ፡በልቡ፡ወኮነ፡ዘያነብቦ፡ገሀደ፡ዘእንበለ፡መጽሐፍ፡ወአምነ፡በእግዚእነ፡ኢየሱስ፡ክርስቶስ፡ሎቱ፡ስብሐት።
61ወእምዝ፡ሖረ፡ኀበ፡ሊቀ፡ጳጳሳት፡ድሜጥሮስ፡ወሰአሎ፡ከመ፡ያጥምቆ፡ወመሀሮ፡ኵሎ፡ሕገ፡ክርስትና፡ወአጥመቆ፡ወረሰዮ፡አባ፡ድሜጥሮስ፡መምህረ፡ለውሉደ፡ቤተ፡ክርስቲያን።
62ወሶበ፡ተሠይመ፡አባ፡ያሮክላረሰዮ፡ለድዮናስዮስ፡ህየንቴሁ፡ከመ፡ይግበር፡ፍትሐ፡ማእከለ፡መሃይምናን፡ወመሃይምናት፡ውስተ፡ሀገረ፡እስክንድርያ፡ወአብሖ፡በውስተ፡ኵሉ፡ግብረ፡ሊቀ፡ጵጵስና።
63ወሶበ፡አዕረፈ፡አባ፡ያሮክሳ፡ተሰነዓዉ፡ሕዝብ፡ወሤምዎ፡ሊቀ፡ጳጳሳት፡ላዕለ፡ሀገረ፡እስክንድርያ፡ወዐቀበ፡መርዔቶ፡በሠናይ፡ተዓቅቦ።
64ወበጽሖ፡ለዝንቱ፡አብ፡ምንዳቤ፡ወኀዘን፡ብዙኅ፡እመዋዕለ፡ሢመቱ፡ለፊልጶስ፡ወኮነ፡ፊልጶስ፡ዘያፈቅሮሙ፡ለክርስቲያን፡ወሶበ፡ተንሥአ፡ላዕሌሁ፡ዳኬዎስ፡ከሐዲ፡ወተፃብዖ፡ወሞዖ፡ለፊልጶስ፡ወቀተሎ፡ወነግሠ፡ህየንቴሁ፡ወአኀዘ፡ያመንድቦሙ፡ፈድፋደ፡ለመሃይምናን፡ወቀተለ፡ብዙኀነ፡ሰማዕታተ፡እምሊቃነ፡ጳጳሳት፡ወካልአን፡ጐዩ፡እምኔሁ፡በእንተ፡ፍርሃት፡ወድንጋፄ፡ወቦኡ፡ውስተ፡ገዳም፡ወቦ፡እለ፡ሞቱ፡በስደት።
65ወአኀዝዎ፡ለዝንቱ፡አብ፡ወሞቅሕዎ፡ብዙኀ፡መዋዕለ።
66ወእምዝ፡ጠፍአ፡ውእቱ፡ከሐዲ፡ወነግሠ፡ህየንቴሁ፡ግርላዎስ፡ወኀድአ፡ምንዳበ፡እምውሉደ፡ጥምቀት፡በመዋዕሊሁ፡ለዝንቱ፡ንጉሥ።
67ወሶበ፡ሞተ፡ነግሠ፡ህየንቴሁ፡ዋርልዮስ፡ወአንሥአ፡ካዕበ፡ምንዳቤ፡ላዕለ፡ቤተ፡ክርስቲያን፡አኀዝዎ፡መኳንንቲሁ፡ለዝንቱ፡አብ፡ወሞቅሕዎ፡ወኰነንዎ፡ኵነኔ፡ዕፁበ፡ፈድፋደ፡ወእምዝ፡ኀሠሠ፡እምኔሁ፡ከመ፡ይስግድ፡ለጣዖት፡አውሥኦ፡ቅዱስ፡ወይቤሎ፡ንሕነሰ፡ንሰግድ፡ለእግዚአብሔር፡አብ፡ወለወልዱ፡ኢየሱስ፡ክርስቶስ፡ወለመንፈስ፡ቅዱስ፡ሎቱ፡ስብሐት። ወተምዐ፡ንጉሥ፡ፈድፋደ፡ወቀተለ፡በቅድሜሁ፡ብዙኀነ፡ሰብአ፡ከመ፡ያፍርሆ፡ወቅዱስሰ፡ኢፈርሀ፡እምኔሁ።
68ወሰደዶ፡ወነበረ፡በውስተ፡ስደት፡ብዙኀ፡መዋዕለ፡ወእምዝ፡ሜጦ፡እምስደት፡ወይቤሎ፡ሰማዕኩ፡በእንቲኣከ፡ከመ፡አንተ፡ትዌድስ፡በኅቡዕ፡ባሕቲትከ፡ወአውሥኦ፡ቅዱስ፡ወይቤሎ፡ንሕነሰ፡ኢነኃድግ፡ጸሎታቲነ፡ወግናያቲነ፡ወቅዳሴያቲነ፡ኢበመዓልት፡ወኢበ፡ሌሊት፡ወተመይጦ፡ኀበ፡ሕዝብ፡እለ፡ምስሌሁ፡ይቤሎሙ፡ሑሩ፡ቀድሱ፡ለእመ፡ኮንኩ፡ርኁቀ፡በሥጋ፡እምኔክሙ፡አንሰ፡ምስሌክሙ፡በመንፈስ፡ወተምዐ፡ንጉሥ፡ወሜጦ፡ውስተ፡ስደት።
69ወአንሥአ፡እግዚእነ፡ላዕለ፡ዝንቱ፡ከሐዲ፡ትዕይንተ፡እምሰብአ፡በርበር፡ወርዕደ፡እምኔሆሙ፡ወቀተልዎ፡ወመጠዉ፡መንግሥቶ፡ለወልዱ፡ጠቢብ፡ወማእምር፡ወፈትሖሙ፡ለእለ፡ዓሰሮሙ፡አቡሁ፡ወሜጠሙ፡እምተሰዶ።
70ወጸሐፈ፡መልእክተ፡ኀበ፡ሊቀ፡ጳጳሳት፡ወኀበ፡ኵሎሙ፡ኤጲስቆጶሳት፡ወይቤሎሙ፡ኢትፍርሁአ፡ወኢትደንግፁአ፡አርኅዉአ፡አብያተ፡ክርስቲያናትአ፡ወአኅትዉአ፡መኃትዊክሙአ፡ወኢይበጽሕ፡ላዕሌክሙ፡እምእኩይ፡ምንተኒ፡ወሐይወ፡ዝንቱ፡ተረፈ፡መዋዕሊሁ፡በሰላም፡ወበኅድአት።
71ወባሕቱ፡በመዋዕሊሁ፡ለዝንቱ፡አብ፡አስተርአዩ፡ስሑታን፡ሰብእ፡ብዙኃን፡እለ፡ይብሉ፡እስመ፡ነፍስ፡ትመውት፡ምስለ፡ሥጋ፡ወበዕለተ፡ትንሣኤ፡ትትነሣእ፡ምስለ፡ሥጋ።
72ወአስተጋብአ፡ላዕሌሆሙ፡ማኅበረ፡አውገዞሙ፡ወመተሮሙ፡ወካልአነሂ፡እለ፡ኮኑ፡በግዕዘ፡አርዮስ፡ወሰባልዮስ።
73ወሶበ፡ልኅቀ፡ዝንቱ፡አብ፡አስተርአየ፡ጴጥሮስ፡ሳምሳጢ፡ዘክሕዶ፡ለወልድ፡ሎቱ፡ስብሐት። ወበእንተዝ፡ተጋብኡ፡ማኅበረ፡ኤጲስቆጶሳት፡በሀገረ፡አንጾኪያ፡ወኢበጽሐ፡ምስሌሆሙ፡ዝንቱ፡አብ፡በእንተ፡ርሥዕናሁ፡ወፈነወ፡መልእክተ፡እንተ፡ምልእት፡እም፡ኵሉ፡ጥበብ፡አምላካዊ፡ወከሠተ፡ውስቴታ፡ሃይማኖተ፡ርትዕተ፡ወምክረ፡ኄረ።
74ወእምድኅረዝ፡ፈለሰ፡በርሥዕ፡ሠናይ፡ኀበ፡እግዚአብሔር፡ዘአፍቀሮ፡ወነበረ፡ዲበ፡መንበረ፡ማርቆስ፡ወንጌላዊ፡፲ወ፪፡ዓመተ፡በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዲዮናስዮስ፡መምህረ፡ጠቢባን፡ኵሉ፤እምስሕተት፡ዘሜጦ፡ለጳውሎስ፡መልእክተ፡ቃሉ፤ድኅረ፡ረከቦ፡ምንዳቤ፡ወስደት፡በመዋዕሉ፤ፈለሰ፡ዮም፡ሀገሪተ፡ብርሃን፡ዘላዕሉ፤ምስለ፡ቅዱሳን፡ጳጳሳት፡ኅቡረ፡የሀሉ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።