Sinaxario · Hidar
8 de Hidar
አመ፡፰፡ለኅዳር1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፰፡ለኅዳር፡በዛቲ፡ዕለት፡ኮነ፡በዓሎሙ፡ለ፬፡እንስሳ፡እለ፡አልቦሙ፡ሥጋ፡ወእሉ፡እሙንቱ፡ሠረገላሁ፡ለእግዚአብሔር፡ፀዋርያነ፡መንበሩ፡ለአምላክ።
2በከመ፡ስምዐ፡ኮነ፡በእንቲአሆሙ፡ዮሐንስ፡ወንጌላዊ፡በራእዩ፡እንዘ፡ይብል፡እስመ፡አነ፡ርኢኩ፡መንበረ፡ውስተ፡ሰማይ፡ወዘይ፡ነብር፡ዲቤሁ፡ዘይበርህ፡እምፀሐይ፡ወእመብረቅ፡ወርኢኩ፡በማእከለ፡፬ቱ፡እንስሳ፡ምሉአነ፡አዕይንት፡፩፡አምሳለ፡ገጸ፡አንበሳ። ወካልኡ፡አምሳለ፡ገጸ፡ላሕም። ወሣልሱ፡አምሳለ፡ገጸ፡ሰብእ። ወራብዑ፡አምሳለ፡ገጸ፡ንስር።
3ወለለ፡፩፡፩፡እምኔሆሙ፡በበ፡፯፡ክነፊሆሙ፡ወእሙንቱ፡ይጸርሑ፡መዓልተ፡ወሌሊተ፡እንዘ፡ይብሉ፡ቅዱስ፡ቅዱስ፡ቅዱስ፡እግዚአብሔር፡ፀባዖት፡ፍጹም፡ምሉእ፡ሰማያተ፡ወምድረ፡ቅድሳተ፡ስብሐቲከ።
4ኢሳይያስኒ፡ይቤ፡እስመ፡አነ፡ርኢክዎ፡ለእግዚአብሔር፡ፀባዖት፡እንዘ፡ይነብር፡ዲበ፡መንበሩ፡ነዋኅ፡ወልዑል፡ወምሉእ፡ቤተ፡ስብሐቲሁ፡ሱራፌል፡ወኪሩቤል፡የዐውድዎ፡ወውእቱ፡መፍርህ፡ፈድፋደ።
5ወለለ፡፩፡እምኔሆሙ፡፮፡ክነፊሆሙ፡በ፪ኤ፡ክንፍ፡ይከድኑ፡ገጾሙ። ወበክልኤ፡ክንፍ፡ይከድኑ፡እግሮሙ። ወበክልኤ፡ክንፍ፡ይሠሩ፡እምጽንፍ፡ወእስከ፡አጽናፈ፡ዓለም፡ወይብሉ፡ቅዱስ፡ቅዱስ፡ቅዱስ፡እግዚአብሔር፡ፀባዖት፡ፍጹም፡ምሉእ፡ሰማያተ፡ወምድረ፡ቅድሳተ፡ስብሐቲከ።
6ወዳዊትኒ፡ይቤ፡ተፅዕነ፡ላዕለ፡ኪሩቤል፡ወሠረረ።
7ወካዕበ፡ይቤ፡ዘይነብር፡ላዕለ፡ኪሩቤል፡አድለቅለቃ፡ለምድር።
8ሕዝቅኤልኒ፡ይቤ፡በእንተ፡ዝንቱ፡ሠረገላ፡እስመ፡አነ፡ርኢኩ፡መንፈስ፡ይነፍሕ፡እምሰማይ፡ወውስቴቱ፡ደመና፡እንተ፡የዓውዶ፡እሳት፡ወመንበር፡ዘብርሃን፡ወይዘውርዎ፡፬፡እንስሳ፡ወለለ፡፩፡፩፡እምኔሆሙ፡በበ፡፬፡ገጽ፡፮፡ክነፊሆሙ፡እሙንቱ።
9ወኀበ፡አንፀረ፡ቀዳማዊ፡የሐውሩ፡ወኢ፡ያፀርዑ፡ስብሐታተ፡እምአፉሆሙ፡መዓልተ፡ወሌሊተ፡ይጸርሑ፡ወይብሉ፡ቅዱስ፡ቅዱስ፡ቅዱስ፡እግዚአብሔር፡ፀባዖት፡ፍጹም፡ምሉእ፡ሰማያተ፡ወምድረ፡ቅድሳተ፡ስብሐቲከ።
10ወይቤ፡ዮሐንስ፡ወንጌላዊ፡ሰማዕኩ፡ቃለ፡ዘይብል፡ሃሌ፡ሉያ፡መድኀኒት፡ወኀይል፡ወበረከት፡ለአምላክነ፡ወሰገዱ፡፬ቱ፡እንስሳ፡ወ፳ወ፬፡ካህናተ፡ሰማይ፡እንዘ፡ይብሉ፡ነግሠ፡እግዚአብሔር፡አኃዜ፡ኵሉ።
11ወእምድኅረዝ፡ሰማዕኩ፡ቃለ፡ዘይብል፡ሰብሕዎ፡ለአምላክነ፡በመሰንቆ፡ወበመዝሙር።
12ወሰማዕኩ፡ካዕበ፡ቃለ፡ከመ፡ነጐድጓድ፡ቃለ፡ብዙኃን፡አሕዛብ፡ዘይብል፡ነግሠ፡እግዚአብሔር፡አኀዜ፡ኵሉ።
13ወበዙኃን፡እመጻሕፍተ፡ብሊት፡ወሐዲስ፡ኮኑ፡ስምዐ፡በእንተ፡ክብሮሙ፡ለእሉ፡፬ቱ፡እንስሳ፡ወእግዚአብሔር፡ረሠዮሙ፡ቅሩባነ፡ኀቤሁ፡ከመ፡ይስአልዎ፡በእንተ፡ኵሉ፡ፍጥረት። ገጸ፡ሰብእ፡ይስእል፡በእንተ፡ፍጥረተ፡ዕጓለ፡እመሕያው። ገጸ፡አንበሳ፡ይስእል፡በእንተ፡አራዊት፡ወገጸ፡ላሕም፡ይስእል፡በእንተ፡እንስሳ። ወገጸ፡ንስር፡ይስእል፡በእንተ፡አዕዋፍ።
14እስመ፡እሙንቱ፡ቅሩባን፡ኀበ፡እግዚአብሔር፡እምኵሎሙ፡ኀይላተ፡ሰማይ።
15ወበእንተዝ፡አፅንዑ፡ትእዛዘ፡መምህራነ፡ቤተ፡ክርስቲያን፡ከመ፡ንግበር፡ተዝካሮሙ፡ወይትሐነፅ፡ሎሙ፡አብያተ፡ክርስቲያን፡ውስተ፡ኵሉ፡ዓለም፡እስመ፡እሙንቱ፡ይስእልዎ፡ለእግዚአብሔር፡በእንቲአነ፡ወበእንተ፡ኵሉ፡ፍጥረት። ትንብልናሆሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለክሙ፡ኪሩባውያን፡አፍራሱ፤ለመሃይምን፡ጻድቅ፡እንተ፡ወርቅ፡አክሊለ፡ርእሱ፤ኀበ፡ዝ፡ኣምላክ፡እንዘ፡ትፀውርዎ፡በአትሮንሱ፤ለእለ፡ጌገዩ፡ሰብእ፡ወለእለሂ፡አበሱ፤ሰአሉ፡መድኃኒተ፡ወሕይወተ፡ኀሡ።መንገለ፡ፈለሱ፡ወሖሩ፡አበዊሃ፡ዘቀዲሙ፤ለእግዚእ፡ክብራ፡ዘመጽአት፡በበዓልክሙ፤ኪሩባውያን፡አርባዕ፡ንስእለክሙ፤ነፅርዋ፡ከመ፡ትሬኢ፡ኀበ፡መፍቅደ፡ወልድ፡ወእሙ፤እስመ፡ብዙኃን፡አዕይንት፡ብክሙ።
16ወበዛቲ፡ዕለት፡ኮነ፡በዓሉ፡ለአፍኒን፡ሊቀ፡መላእክት፡፩፡እም፬ቱ፡ሊቃናት፡ዝውእቱ፡ዘየዓቅብ፡መንበረ፡ስብሐት፡ምስለ፡ሱራፌል፡ዘበእንቲአሁ፡ይቤ፡ኄኖክ፡ወየዓውድዎ፡ለውእቱ፡ቤት፡ዐውዶ፡ሱራፌል፡ወኪሩቤል፡ወአፍኒን፡ወእሉ፡እለ፡ኢይነውሙ፡ወየዓቅቡ፡መንበረ፡ስብሐቲሁ፡ለልዑል። ትንብልናሁ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለከ፡ዘትቄድስ፡ትሥልስቶ፤ወታፀንዕ፡ዘልፈ፡ለመንበረ፡ስብሐት፡ዓቂቦቶ፤አፍኒን፡መልአክ፡እንዘ፡ለኂሩትከ፡አአኵቶ፤ለጌጋይየ፡አመ፡ትሤሩ፡ጽሕፈቶ፤መጽሐፈ፡ዕዳየ፡ኢትኅድግ፡ባሕቲቶ።
17ወበዛቲ፡ዕለት፡ተዝካሩ፡ለዮሐንስ፡ሊቀ፡ካህናት፡ወአስተርእዮተ፡መስቀል፡ለቈስጠንጢኖስ፡ንጉሥ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለቈስጠንጢኖስ፡መንፈሰ፡ልቡና፡ዘአጥበቦ፤ዘበአሚነ፡ክርስቶስ፡ይሥራዕ፡ወይገሥዕ፡ሕዝቦ፤በዛቲ፡ዕለት፡አምሳለ፡ከዋክብት፡በአማዕትቦ፤በዲበ፡ዓራቱ፡እንዘ፡ሀለወ፡ሰኪቦ፤በፈለገ፡ቂሶን፡ርእየ፡ወነፀረ፡ጸልቦ።
18ወበዛቲ፡ዕለት፡አዕረፈ፡አባ፡ቅፍርያ፡ወዝንቱ፡ቅዱስ፡ኮነ፡ቀዳሚ፡አረማዌ፡ወልደ፡መኰንነ፡አረሚ።
19ወበአሐቲ፡እመዋዕል፡በጽሐ፡ውስተ፡ሀገሩ፡መነኮስ፡ዘእምኔተ፡አባ፡ጳኵሚስ፡ዘስሙ፡መርቆሬዎስ፡ወተነበየ፡ሎቱ፡ከመ፡ይከውን፡ክርስቲያናዌ።
20ወእምድኅረ፡ኅዳጥ፡መዋዕል፡አስተጋብአ፡ሠራዊቶ፡ወሖረ፡ምድረ፡ግብኔ፡ከመ፡ይፄውው፡ሰብአ፡ወያጥፍእ፡አድባራተ።
21ወሶበ፡በጽሐ፡ኀበ፡ምኔተ፡አባ፡ጳኵ፡ሚስ፡ወፅአ፡ኀቤሁ፡አበ፡ምኔት፡ወይቤሎ፡ምንተ፡ትፈቅድ። ወሜጠ፡ሕሊናሁ፡ወይቤ፡እፈቅዶ፡ለአበ፡ምኔት፡ወይቤሎ፡ኣነ፡ውእቱ። ወሶበ፡ሰምዐ፡ቅፍርያ። አግኀሦ፡ለባሕቲቱ፡ወሰአሎ፡ከመ፡ያልብሶ፡አልባሰ፡ምንኵስና፡ወይቤሎ፡ኦሆ።
22ወእምዝ፡ሜጠ፡ሠራዊቶ፡ውስተ፡ሀገሮሙ፡ወአጥመቆ፡ወአልበሶ፡አልባሰ፡ምንኵስና፡ውእቱ፡አበ፡ምኔት፡ወተፀምደ፡በጾም፡ወበጸሎት፡ወሰይጣንሰ፡ቀንአ፡ላዕሌሁ፡ወአንሥአ፡ቦቱ፡ብእሴ፡መስተዋድየ፡ወአስተናሥአ፡ላዕሌሁ፡መኳንንተ፡ወዓገትዋ፡ለደብር፡እንዘ፡ይብሉ፡ሀሎ፡ዝ፡ወልድ፡ዘነጋሢ፡ዘአማሰነ፡ሀገረነ፡ወበረድኤተ፡እግዚአብሔር፡ሶበ፡ኀጥእዎ፡ቀተልዎ፡ለመስተዋድይ።
23ወዝንቱሰ፡ቅዱስ፡ነበረ፡እንዘ፡ይጸውም፡በበሱባኤ፡ወኢይጥዕም፡ዘእንበለ፡ተርሙስ።
24ወበውእቱ፡መዋዕል፡አማሰነ፡አርዌ፡ገዳም፡ውእተ፡ደብረ፡እንዘ፡ይቀትል፡እንስሳሆሙ። ወመጽአ፡ኀቤሁ፡አባ፡ቅፍርያ፡ወአኀዞ፡ዕዝኖ፡ከመ፡በግዕ፡ወአሠሮ፡በሐብል፡ወነበረ፡፲ወ፪ተ፡ዓመተ፡ወሞተ።
25ወቅዱስሰ፡አባ፡ቅፍርያ፡ሖረ፡ኢየሩሳሌም፡እንዘ፡ይመርሖ፡መልአከ፡እግዚአብሔር፡ወበአሐቲ፡ዕለት፡ርእየ፡በህየ፡ምሥጢራተ፡ዐበይተ፡ወተባረከ፡እመካናት፡ቅዱሳት፡ወተመይጠ፡ውስተ፡ማኅደሩ። ወአዕረፈ፡በሰላም። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአባ፡ቅፍርያ፡እንተ፡ኮነ፡ክርስቲያናዌ፤ኀዲጎ፡አቡሁ፡መኰንነ፡አረማዌ፤እስከ፡መነኮሳት፡ነበሩ፡በኅድአት፡ወበፅማዌ፤አሠረ፡ከመ፡በግዕ፡ዘአልቦ፡ምንሳዌ፤መራዕየ፡ደብር፡ዘይቀትል፡አርዌ፤
26ወበዛቲ፡ዕለት፡ኮኑ፡ስምዐ፡አርባዕቱ፡ምእት፡ወሰማንያ፡ወአርባዕቱ፡ነፍስ፡ማኅበራነ፡ኤስድሮስ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።