ግዕዝ
Home Formaciones Libros Biblioteca Ge'ez Contacto
Sinaxario · Hidar

5 de Hidar

አመ፡፭፡ለኅዳር
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፭፡ለኅዳር፡በዛቲ፡ዕለት፡አስተርእዮተ፡ርእሱ፡ለቅዱስ፡ለንጊኖስ፡ሰማዕት፡በዓለ፡ኲናት፡ዘረገዞ፡ለእግዚእነ፡ገቦሁ፡እንዘ፡ስቁል፡ዲበ፡ዕፀ፡መስቀል።
2ውእቱኬ፡እስመ፡ፈነዎ፡ንጉሥ፡ጢባርዮስ፡ኀበ፡ሀገረ፡ቀጶዶቅያ፡ወመተሩ፡ርእሶ፡ለቅዱስ፡ለንጊኖስ፡አመ፡፳ወ፫፡ለወርኀ፡ሐምሌ፡ወኮኑ፡ሥጋሁ፡ወርእሱ፡ግዱፋነ፡ውስተ፡ምድር።
3ወውእቱ፡ሐራ፡ዘመጽአ፡እምኀበ፡ንጉሥ፡ወዘመተረ፡ርእሶ፡ለቅዱስ፡ለንጊኖስ፡ወወሰዳ፡ምስሌሁ፡ኀበ፡ኢየሩሳሌም፡ለርእሰ፡ቅዱስ፡ለንጊኖስ፡ወመጠዎ፡ለጲላጦስ፡ወጲላጦስኒ፡አርአዮሙ፡ለአይሁድ፡ወእሙንቱ፡ተፈሥሑ፡በሞቱ።
4ወእምዝ፡አዘዘ፡ይቅብርዋ፡ውስተ፡አሐቲ፡ወግር፡ዘአፍአ፡ኢየሩሳሌም፡ወቀበርዋ፡በህየ።
5ወእምድኅረ፡ብዙኅ፡መዋዕል፡ኮነት፡አሐቲ፡ብእሲት፡ዘአምነት፡በእዴሁ፡ለቅዱስ፡ለንጊኖስ፡እምሀገረ፡ቀጰዶቅያ። ወሶበ፡መተሩ፡ርእሶ፡በሰይፍ፡ሀለወት፡በህየ፡ወትኔፅር፡ወትበኪ፡ላዕሌሁ፡ወፆራ፡አዕይንቲሃ፡ለይእቲ፡ብእሲት፡ወነሥአት፡ወልዳ፡ወሖረት፡ኢየ፡ሩሳሌም፡ከመ፡ትትባረክ፡ወትስግድ፡ኀበ፡መቃብረ፡እግዚእነ፡ወኀበ፡መካናት፡ቅዱሳት፡የጊ፡እመ፡ይትከሠታ፡አዕይንቲሃ፡እለ፡ዖራ።
6ወሶበ፡በጽሐት፡ኢየሩሳሌም፡በህየ፡ሞተ፡ወልዳ፡ወተወሰከ፡ኀዘና፡ምስለ፡ዑረተ፡አዕይንቲሃ። ወኀጥአት፡ዘያበጽሐ፡ብሔራ፡ወበከየት፡ብካየ፡ዓቢየ፡ወኖመት፡እምብዝኀ፡ኀዘና፡ወርእየቶ፡ለቅዱስ፡ለንጊኖስ፡በንዋማ፡ወምስሌሁ፡ወልዳ፡ዘሞተ።
7ወይቤላ፡ሑሪ፡ኀበ፡መካነ፡እገሌ፡ወንሥኢ፡ርእስየ፡እምህየ፡ወነቂሓ፡እምንዋማ፡ተሰአለት፡በእንተ፡ውእቱ፡መካን፡ወአብጽሕዋ፡ኀቤሁ፡ወሶበ፡ከረየት፡ውእተ፡መካነ፡ወፅአ፡ላቲ፡እምኔሁ፡ዕፍረት፡ምዑዝ፡ፈድፋደ። ወሶበ፡በጽሐት፡ኀበ፡ርእሱ፡ተከሥተ፡ላቲ፡ብር፡ሃን፡ዐቢይ፡ወሶቤሃ፡ተከሥታ፡አዕይንቲሃ፡ወርእየት፡ወሰብሐቶ፡ለእግዚአብሔር።
8ወአፍለሰት፡ርእሶ፡ለቅዱስ፡ለንጊኖስ፡ወአንበረቶ፡ምስለ፡ሥጋ፡ወልዳ፡ወረሰየት፡ዲቤሁ፡ዕፍረተ። ወሖረት፡ውስተ፡ብሔራ፡እንዘ፡ትሴብሖ፡ለእግዚአብሔር። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለለንጊኖስ፡ዘተከለለ፡በሮም፤ወተቀብረ፡በወግር፡ዘኢየሩሳሌም፤እንዘ፡ምስሌሁ፡ኅቡረ፡ወልዳ፡ንውም፤ከመ፡ተናገራ፡ለብእሲት፡በሕልም፤ምስለ፡ፄና፡ዕፍረት፡ርእሱ፡አስተርአየት፡ዮም።
9ወበዛቲ፡ዕለት፡ተዝካሩ፡ለቅዱስ፡ጢሞቴዎስ፡ሰማዕት፡ወፍልሰተ፡ሥጋሁ፡ለቅዱስ፡ቴዎድሮስ፡ሰማዕት፡ሊቀ፡ሠራዊት፡ውስተ፡ሀገረ፡ስጥብ፡ዘደወለ፡አስዩጥ፡ዘላዕላይ፡ግብፅ። ወቅዳሴ፡ቤተ፡ክርስቲያኑ፡ወኮኑ፡እምነ፡ሥጋሁ፡ተአምራት፡ወመንክራት፡ዐበይት። በረከቶሙ፡ትኩን፡ምስሌነ፡ለዓለመ፡ዓለም፡ኣሜን።
ሰላም፡ለከ፡ጢሞቴዎስ፡ቡሩክ።ሰማዕተ፡አምላክ።ብእሲ፡ሰማያዊ፡ወምድራዊ፡መልአክ።ኅብአኒ፡በክነፊከ፡በዕለተ፡ምንዳቤ፡ወሀውክ።እምነ፡ልሳን፡ምዑክ፡ወእምዐይን፡ድሩክ።ሰላም፡ለፍልስተ፡ሥጋከ፡ቴዎድሮስ፡ማር።አመ፡ኃሙሱ፡ለወርኀ፡ኅዳር።ሶበ፡በማዕበላ፡ፈቀደት፡አጥፍኦታ፡ለምድር።ሰሚዓ፡ትእዛዘከ፡ፈለሰት፡ባሕር።ቃለ፡እግዚኡ፡ከመ፡ይሰምዕ፡ገብር።ሰላም፡እብል፡ለዘኮነ፡ሱቱፈ።ምስለ፡እለ፡ገብሩ፡ሰብእ፡ብሔረ፡ሕያዋን፡ምዕራፈ።እምሥርዓተ፡መላእክት፡ዮሐኒ፡ምንተኒ፡ኢያትረፈ።ከመ፡ሕይወቶሙ፡ሕይወተ፡ተጸገወ፡ዘልፈ።ወከመ፡ክንፎሙ፡አብቈለ፡አከናፈ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።