ግዕዝ
Home Formaciones Libros Biblioteca Ge'ez Contacto
Sinaxario · Hidar

29 de Hidar

አመ፡፳ወ፱፡ለኅዳር
1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፱፡ለኅዳር፡በዛቲ፡ዕለት፡ኮነ፡ተዝካረ፡ልደቱ፡ለእግዚእነ፡ኢየሱስ፡ክርስቶስ፡ሎቱ፡ስብሐት። በሥጋ፡እምእግዝእትነ፡ቅድስት፡ድንግል፡በ፪፡ማርያም፡ወላዲተ፡አምላክ። ሣህሉ፡ወምሕረቱ፡የሀሉ፡ምስሌነ፡ለዓለመ፡ዓለም፡ኣሜን።
ሰላም፡ለልደቱ፡ከመ፡ውእቱ፡ኀረየ፤ልደተ፡ሊሉየ፤ኪያሁ፡ፈጣሬ፡እመ፡ፍጡረ፡ሰመየ፤እኂዞ፡ሥጠተ፡ገርዜኑ፡ለጴጥሮስ፡ተርእየ፤እንዘ፡ይብል፡አርዮስ፡ሠጠጠ፡ልብስየ።እግዚአብሔር፡አምላክ፡ዘተወለድከ፡ለቤዛ፤በልማደ፡ኂሩትከ፡ሥመር፡ወለምሕረትከ፡በከመ፡ግዕዛ፤ሐልዮ፡ምግባሩ፡ለነፍሱ፡ሶበ፡ያቴክዛ፤በማየ፡አንብዕ፡ዘአዕይንቲሁ፡አውኀዛ፤ገብርከ፡ተሐፂቦ፡ይፃዓዱ፡እምራዛ።
2ወበዛቲ፡ዕለት፡ኮነ፡ሰማዕተ፡ቅዱስ፡ጴጥሮስ፡ሊቀ፡ጳጳሳት፡ዘእስክንድርያ፡እምኍልቆሙ፡ለአበው፡ሊቃነ፡ጳጳሳት፡፲ወ፯፡ወውእቱ፡ተፍጻሜተ፡ሰማዕት።
3ወለዝንቱ፡ቅዱስ፡ኮነ፡አቡሁ፡ሊቀ፡ካህናት፡በሀገረ፡እስክንድርያ፡ወስሙ፡ቴዎድሮስ፡ወስማ፡ለእሙ፡ሶፍያ፡ወኮኑ፡፪ሆሙ፡ፈራህያነ፡እግዚአብሔር፡ፈድፋደ፡እሙንቱ፡ወባሕቱ፡ኢኮነ፡ሎሙ፡ወልድ።
4ወአመ፡፭፡ለወርኀ፡ሐምሌ፡ዘውእቱ፡በዓሎሙ፡ለጴጥሮስ፡ወለጳውሎስ፡ሐዋርያት፡ርእየት፡እሙ፡ለቅዱስ፡ብዙኀነ፡ክርስቲያነ፡ወውሉዶሙ፡ምስሌሆሙ፡ወሥርግዋን፡እሙንቱ፡በአልባስ፡ሠናያን፡እንዘ፡የሐውሩ፡ውስተ፡ቤተ፡ክርስቲያን፡ወኀዘነት፡ፈድፋደ፡ወቦአት፡ውስተ፡ቤተ፡ክርስቲያን፡ወቆመት፡ቅድመ፡ምሥዋዕ፡ቅዱስ፡ወሰአለቶ፡ለእግዚእነ፡ኢየሱስ፡ክርስቶስ፡በብዙኅ፡ብካይ፡ሎቱ፡ስብሐት፡ከመ፡የሀባ፡ወልደ፡ቡሩከ።
5ወበይእቲ፡ሌሊት፡አስተርአይዋ፡ቅዱሳን፡ጴጥሮስ፡ወጳውሎስ፡ወይቤልዋ፡ናሁ፡ተወከፈ፡እግዚአብሔር፡ስእለተኪ፡ወሀለዎ፡ከመ፡የሀብኪ፡ወልደ፡ወትሰምይዮ፡ስሞ፡ጴጥሮስ፡ወአዘዝዋ፡ከመ፡ትሑር፡ኀበ፡ሊቀ፡ጳጳሳት፡አባ፡ቴዎናስ፡ከመ፡ይጸሊ፡ላዕሌሃ፡ወሐዊራ፡ኀቤሁ፡ጸለየ፡ላዕሌሃ።
6ወበውእቱ፡መዋዕል፡ጸንሰቶ፡ወሶበ፡ወለደቶ፡ለዝንቱ፡ቅዱስ፡ወሰመየቶ፡ስሞ፡ጴጥሮስ።
7ወአመ፡ኮኖ፡፯፡ዓመተ፡መጠወቶ፡ለሊቀ፡ጳጳሳት፡በከመ፡ሳሙኤል፡ነቢይ፡ወውእቱ፡ረሰዮ፡ወልደ፡ፍቁረ፡ወሤሞ፡አናጕንስጢሰ። ወእምዝ፡ሤሞ፡ዲያቆነ፡ወእምድኀረዝ፡ሤሞ፡ቀሲሰ። ከመ፡ይትራድኦ፡በግብረ፡አብያተ፡ክርስቲያናት፡በሠናይ፡ምግባሩ።
8ወሶበ፡በጽሐ፡ጊዜ፡ዕረፍቱ፡ለአባ፡ቴዎናስ፡ኣዘዞሙ፡ለኤጲስ፡ቆጶሳት፡ወለካህናት፡ከመ፡ለዝንቱ፡አባ፡ጴጥሮስ፡ይሢምዎ፡ሊቅ፡ጳጳሳት፡እምድኅሬሁ፡ላዕለ፡ሀገረ፡እስክንድርያ፡ወሤምዎ፡በከመ፡አዘዞሙ፡ወሶበ፡ተሠይመ፡ተፈሥሑ፡ቦቱ፡ኵሎሙ፡ሕዝብ።
9ወኮነ፡በመዋዕሊሁ፡ለዲዮቅልጥያኖስ፡ንጉሥ፡ከሐዲ፡ወበውእቱ፡ጊዜ፡ሀሎ፡በሀገረ፡አንጾኪያ፡፩ዱ፡መስፍን፡ተሰነዓወ፡ምስለ፡ንጉሥ፡በአምልኮ፡ጣዖት፡ወሀለውዎ፡፪ቱ፡ውሉድ፡ወብእሲቱኒ፡ጽንዕት፡በክርስትናሃ፡ወባሕቱ፡ኢተክህላ፡ከመ፡ታጥምቆሙ፡ለውሉዳ፡ጥምቀተ፡ክርስትና፡በሀገረ፡አንጾኪያ፡ወበእንተዝ፡ነሥአት፡ውሉዳ፡ወተፅዕነት፡ሐመረ፡ከመ፡ትሑር፡ሀገረ፡እስክንድርያ።
10ወበማእከለ፡ባሕር፡ተንሥአ፡ላዕሌሃ፡ማዕበል፡ፅኑዕ፡እስመ፡ነፋስ፡ዓቢይ፡ሆካ፡ለባሕር፡ፈድፋደ፡ወፈርሃት፡ከመ፡ኢይሙቱ፡ውሉዳ፡ዘእንበለ፡ይንሥኡ፡ጸጋ፡ጥምቀት፡ቅድስት፡ወሶቤሃ፡ሠጠቀት፡አጥባቲሃ፡ወአውፅአት፡ደመ፡ወዓተበት፡ውስተ፡ፍጽሞሙ፡ለውሉዳ፡በትእምርተ፡መስቀል፡ወአጥመቀቶሙ፡ውስተ፡ባሕር፡፫ተ፡ጊዜ፡እንዘ፡ትብል፡በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አሜሃ፡ኮነ፡ዛኅነ፡ዐቢየ፡ወሖረት፡ሐመር፡በሰላም።
11ወበጺሐ፡ሀገረ፡እስክንድርያ፡አቅረበት፡ውሉዳ፡ኀበ፡ጴጥሮስ፡ሊቀ፡ጳጳሳት፡ከመ፡ያጥምቆሙ፡ለውሉዳ፡ምስሌሆሙ፡ለውሉደ፡ሀገረ፡እስክንድርያ፡ወሶበ፡በጽሐ፡ሊቀ፡ጳጳሳት፡ኀበ፡ውሉዳ፡ከመ፡ያጥምቆሙ፡ይረግዕ፡ማይ፡ወይከውን፡ከመ፡ሰምዕ። ወከመዝ፡ገብረ፡፫ተ፡ጊዜያተ። ወአንከረ፡ሊቀ፡ጳጳሳት፡ወተስእላ፡በእንተ፡ዘኮነ፡እምኔሃ፡ወይእቲ፡አይድዓቶ፡ዘከመ፡ተንሥአ፡ላዕሌሃ፡ማዕበለ፡ባሕር፡ወኵሎ፡ዘገብረት፡በውስተ፡ሐመር፡ወእምድኅረ፡ዝንቱ፡ከመ፡አርመመ፡ማዕበል።
12ወሶበ፡ሰምዐ፡ሊቀ፡ጳጳሳት፡ጴጥሮስ፡ዘንተ፡አንከረ፡ጥቀ፡ወሰብሖ፡ለእግዚአብሔር፡ወይቤ፡ከመዝ፡ትቤ፡ቤተ፡ክርስቲያን፡ከመ፡ይእቲ፡አሐቲ፡ቤተ፡ክርስቲያን፡ወአሐቲ፡ጥምቀት።
13ወበመዋዕሊሁ፡ለዝንቱ፡አብ፡ተንሥአ፡አርዮስ፡ዓላዊ፡ወስሕተ፡ወፀረፈ፡ላዕለ፡ወልደ፡እግዚአብሔር፡ወፈለጦ፡እምህላዌሁ፡ወገሠፆ፡ቅዱስ፡ጴጥሮስ፡ብዙኀ፡ጊዜ፡ወኢተመይጠ፡እምክሩ፡እኪት፡ወረገሞ፡ወአውግዞ፡ወሰደዶ፡እምቤተ፡ክርስቲያን።
14ወሶበ፡ሰምዐ፡ዲዮቅልጥያኖስ፡ንጉሥ፡ከሐዲ፡ዜናሁ፡ለቅዱስ፡ጴጥሮስ፡ከመ፡ውእቱ፡ይሜህሮሙ፡ለሕዝብ፡በውስተ፡ኵሉ፡መካን፡ከመ፡ኢያምልኩ፡አማልክቲሁ፡ለአከ፡ኀቤሁ፡ላእካነ፡ከመ፡የአኀዝዎ፡ለቅዱስ፡ጴጥሮስ፡ወይሞቅሕዎ።
15ወሶበ፡አብእዎ፡ውስተ፡ቤተ፡ሞቅሕ፡ወተንሥኡ፡ሰብአ፡ሀገር፡ወነሥኡ፡ንዋየ፡ሐቅሎሙ፡ወበጽሑ፡ኀበ፡ቤተ፡ሞቅሕ፡ከመ፡ይጽብዕዎሙ፡ለላእካነ፡ንጉሥ። ወሶበ፡ርእየ፡ቅዱስ፡ጴጥሮስ፡ከመ፡በእንቲአሁ፡ይከውን፡ሁከት፡ዓቢይ፡ፈቀደ፡ይመጡ፡ነፍሶ፡ለሞት፡በእንተ፡ሕዝብ፡ወፀውዖሙ፡ለኵሎሙ፡ሕዝብ፡ወናዘዞሙ፡ወአዘዞሙ፡ከመ፡ይጽንዑ፡ውስተ፡ሃይማኖት፡ርትዕት፡ወፈነዎሙ፡ውስተ፡አብያቲሆሙ።
16ወሶበ፡አእመረ፡አርዮስ፡ከመ፡የሐውር፡ጴጥሮስ፡ኀበ፡እግዚአብሔር፡ሖረ፡ኀበ፡አኪላስ፡ወእለ፡እስክንድሮስ፡ሊቃነ፡ካህናት፡ወነገሮሙ፡ከመ፡ይስአልዎ፡ለጴጥሮስ፡በእንቲአሁ፡ከመ፡ይፍትሖ፡እምግዘቱ፡ወእሙንቱ፡ሰአልዎ፡ለብፁዕ፡ጴጥሮስ፡በእንተ፡አርዮስ፡ወጴጥሮስኒ፡ወሰከ፡ግዘተ፡ዲቤሁ፡በዲበ፡ግዘት።
17ወይቤሎሙ፡ርኢኩ፡በዛቲ፡ሌሊት፡ናሁ፡እግዚእነ፡ኢየሱስ፡ክርስቶስ፡ይቀውም፡ወልብሱ፡ሥጡጥ፡ወአንሰ፡እብሎ፡ኦ፡እግዚእየ፡መኑ፡ሠጠጠ፡ልብሰከ። ወይቤለኒ፡አርዮስ፡ሠጠጣ፡ለልብስየ፡እስመ፡ፈለጠኒ፡እምአቡየ፡ወእመንፈስ፡ቅዱስ። ወአንትሙኒ፡ተዐቀቡ፡እምኔሁ፡እስመ፡አንትሙ፡ሀለወክሙ፡ትኩኑ፡ሊቃነ፡ጳጳሳት፡እምድኅሬየ፡ወኢትሳተፍዎ፡ለአርዮስ፡በግብረ፡ክህነት፡እስመ፡ውእቱ፡ጸላኢሁ፡ለእግዚእነ፡ኢየሱስ፡ክርስቶስ።
18ወአንተሰ፡አኪላስ፡ሀለወከ፡ትሠየም፡ሊቀ፡ጳጳሳት፡እምድኅሬየ፡እምቅድመ፡እለ፡እስክንድሮስ። ወአንተ፡ትትዌከፎ፡ለአርዮስ፡ወትመውት፡ፍጡነ።
19ወእምድኅረዝ፡ተማከረ፡ቅዱስ፡ጴጥሮስ፡ምስለ፡ላእካነ፡ንጉሥ፡በኅቡእ፡ከመ፡ይምጽኡ፡ኀቤሁ፡በሌሊት፡ውእቱኒ፡ከመ፡ይጐድጕድ፡ሎሙ፡እምውስተ፡ቤተ፡ሞቅሕ፡ወእሉሂ፡ይክርዩ፡ሎቱ፡በአንጻሪሁ፡ወይንሥእዎ፡ወይፈጽሙ፡ትእዛዘ፡ንጉሥ፡ወገብሩ፡ዘይቤሎሙ፡ነሥእዎ፡ወአውፅእዎ፡ኀበ፡አፍአ፡ሀገር፡ዘውስቴቱ፡መቃብሪሁ፡ለቅዱስ፡ማርቆስ፡ወንጌላዊ።
20ወጸለየ፡ቅዱስ፡ጴጥሮስ፡ወእማኅፀነ፡ሕዝቦ፡ኀበ፡እግዚአብሔር፡ወካዕበ፡ጸለየ፡ወይቤ፡ኦ፡እግዚእየ፡ኢየሱስ፡ክርስቶስ፡ለይኩን፡ክዕወተ፡ደምየ፡ተፍጻሜተ፡አምልኮ፡ጣዖታት፡ከመ፡ይብጥሉ፡ወይሠዓሩ፡እምኵሉ፡ዓለም። ወመጽአ፡ኀቤሁ፡ቃል፡እምሰማይ፡ዘይብል፡አሜን፡ለይኩን፡ለከ፡በከመ፡ትቤ፡ወዘንተ፡ቃለ፡ሰምዓት፡አሐቲ፡ወለት፡ድንግል፡ዘኮ፡ነት፡ቅሩበ፡ውስተ፡ውእቱ፡መካን።
21ወይቤሎሙ፡ቅዱስ፡ለሐራ፡ፈጽሙ፡ዘተአዘዝክሙ፡ወሶቤሃ፡መተርዎ፡ርእሶ፡ቅድስተ፡በሰይፍ፡ወሥአ፡አክሊለ፡ስምዕ፡ወቆመ፡በድኑ፡መጠነ፡፪ቱ፡ሰዓት።
22ወበጽባሕ፡ወፅኡ፡ኵሉ፡ሕዝብ፡ወአፍጠኑ፡ሐዊረ፡ኀበ፡ቤተ፡ሞቅሕ፡እስመ፡እሙንቱ፡ኢያእመሩ፡ዘኮነ፡እምኔሁ፡እስከ፡አመ፡ዜነውዎሙ፡ወእምዝ፡ነሥኡ፡ሥጋሁ፡ለኖላዊሆሙ፡ወአምጽእዎ፡ኀበ፡ሀገር፡ኀበ፡ቤተ፡ክርስቲያን፡ወአንበርዎ፡ዲበ፡መንበሩ።
23ወእምቅድመ፡ዝኒ፡ኢርእዮ፡መኑሂ፡እንዘ፡ይነብር፡ዲበ፡መንበሩ፡ወሶበ፡ተሰአልዎ፡ወይቤልዎ፡ለምንት፡አንተ፡ኢትነብር፡ዲበ፡መንበርከ፡አውሥአ፡ወይቤሎሙ፡እስመ፡አነ፡እሬኢ፡ኀይሎ፡ለእግዚአብሔር፡እንዘ፡ይነብር፡ዲበ፡መንበር፡ወበእንተዝ፡ኢይትሐበል፡እንበር፡ዲቤሃ። ወእምዝ፡ፈጸሙ፡ግንዘቶ፡ወአ፡ንበርዎ፡ምስለ፡ሥጋሆሙ፡ለቅዱሳን፡ሊቃነ፡ጳጳሳት፡ወኮኑ፡እምሥጋሁ፡ተአምራት፡ወመ፡ንክራት፡ዓበይት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለከ፡ሰባኬ፡ሃይማኖት፡በጥያቄአምሳለ፡ጳውሎስ፡በተሰሎንቄ፤ዕፀ፡ወይን፡ጴጥሮስ፡ወዕፀ፡ሐዲስ፡ኤሎቄ።አርጋበ፡ዘሞርሞንቄ፤ እንተ፡ጸለልከ፡እምአንቄ፤እፎኑመ፡ጊዜ፡ሠርክ፡አውዓየከ፡መርቄ።
24ወበዛቲ፡ዕለት፡ኮነ፡ተዝካሮሙ፡ለ፵ወ፯፡አእላፋት፡እለ፡ኮኑ፡ሰማዕተ፡በመዋዕለ፡ዲዮቅልጥያኖስ። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ሰላም፡እብል፡በእንተ፡ጽድቅ፡ዘተጋደሉ፤ለዲዮቅልጥያኖስ፡በመዋዕሉ፤እስከ፡ተፍጻሞሙ፡ጴጥሮስ፡ወእስጢፋኖስ፡ቀዳሚ፡እሉ፤ዘበእንቲአነ፡ቅድመ፡አኀዜ፡ኀይል፡ይበሉ፤አድኅን፡ሕዝበከ፡ወርስተከ፡እመንሱት፡ኵሉ፤
25ወበዛቲ፡ዕለት፡ኮነ፡ቅዱስ፡ዓቢይ፡ቀሌምንጦስ፡ሊቀ፡ጳጳሳት፡ዘገረ፡ሮሜ፡ሰማዕተ።
26ወዝንቱ፡ቅዱስ፡ኮነ፡እምዘመደ፡ውሉደ፡መንግሥት፡ወልዱ፡ለቀውስጦስ፡ሊቀ፡ሐራሁ፡ለንጉሥ፡ወመሀርዎ፡አበዊሁ፡ኵሎ፡ትምህርተ፡ኵወሎ፡ጥበበ፡ዮናናውያን።
27ወሶበ፡ሰበከ፡ጴጥሮስ፡ሐዋርያ፡በሀገረ፡ሮሜ፡በስብከተ፡ወንጌል፡ቅዱስ፡አምነ፡ቀውስጦስ፡አቡሁ፡ለዝንቱ፡ቅዱስ፡ቀሌምንጦስ፡ወእሙኒ፡አምነት፡በእግዚእነ፡ኢየሱስ፡ክርስቶስ፡ወወሀቡ፡ኵሎ፡ንዋዮሙ፡ለነዳያን፡ወለምስኪናን።
28ወጸውዖ፡ንጉሥ፡ለቀውስጦስ፡በእንተ፡ግብረ፡መንግሥት፡ወሐዊሮ፡ኀበ፡ንጉሥ፡ነበረ፡ብዙኀ፡መዋዕለ፡ወውእተ፡አሚረ፡ሐለየ፡እኍሁ፡ለቀውስጦስ፡ከመ፡ያውስባ፡ለብእሲቱ፡ወሶበ፡አእመረት፡ነሥአቶሙ፡ለቀሌምንጦስ፡ወለእኍሁ፡ዘይንእስ፡ወተፅዕነት፡ላዕለ፡ሐመር፡ከመ፡ትሑር፡ወትጕየይ፡ውስተ፡ካልእ፡ሀገር፡እስከ፡አመ፡ይትመየጥ፡ብእሲሃ፡እምኀበ፡ንጉሥ።
29ወበማእከለ፡ባሕር፡ተንሥአ፡ነፋሰ፡ዓውሎ፡ወተሰብረ፡ሐመር፡ወተሰቅሉ፡ውሉዳ፡ለለ፩፡ውስተ፡ስባረ፡ዕፀ፡ሐመር፡ወበጽሖ፡ቀሌምንጦስ፡ውስተ፡መርሶ፡ሀገረ፡እስክንድርያ፡እሙኒ፡ወእኍሁ፡ከማሁ፡ለለባሕቲቶሙ፡ኀበ፡ካልኣት፡መካናት።
30ወፀውዖ፡እግዚእነ፡ለቅዱስ፡ጴጥሮስ፡ወአዘዞ፡ወይቤሎ፡ሑር፡ኀበ፡ሀገረ፡እስክንድርያ፡ወትረክብ፡አግብርተ፡ድልዋነ፡ወሶበ፡በጽሐ፡ጴጥሮስ፡ኀበ፡ሀገረ፡እስክንድርያ፡ወሰበከ፡ውስቴታ፡ስብከተ፡ወንጌል፡ቅዱስ፡ወኢአምነ፡፩ሂ፡እምሰብአ፡ሀገረ፡እስክንድርያ፡ዘእንበለ፡ዝንቱ፡ቀሌምንጦስ፡ወአጥመቆ፡ጥምቀተ፡ክርስትና። ወከሠተ፡ሎቱ፡ምሥጢራተ፡መለኮት፡ዘእግዚእነ፡ኢየሱስ፡ክርስቶስ፡ብዕለ፡ወክብረ፡ለእለ፡ያመልክዎ፡ወበስሙ፡ይትግበር፡ተአምራት፡ወመንክራት።
31ወእምይእቲ፡ዕለት፡ተለዎ፡ለቅዱስ፡ጴጥሮሰ፡ሐዋርያ፡ወኮነ፡ረድኦ፡ወጸሐፈ፡ገድሎሙ፡ለሐዋርያት፡ዘይበጽሖሙ፡እምነገሥት፡ዓላውያን።
32ወእምዝ፡ሰበከ፡ውስተ፡አህጉር፡ብዙኅ፡ወመጠውዎ፡ሎቱ፡ሐዋርያት፡መጻሕፍተ፡ቀኖና፡ዘነበቡ፡ባቲ።
33ወእምዝ፡ተሠይመ፡ሊቀ፡ጳጳሳት፡በሀገረ፡ሮሜ፡ወሰበከ፡ውስቴታ፡ወሜጠሙ፡ለብዝኃን፡ውስተ፡አእምሮ፡እግዚአብሔር።
34ወሰምዐ፡በእንቲአሁ፡ጠራብዮስ፡ንጉሥ፡ከሐዲ፡ወፈነወ፡ሐራሁ፡አኀዝዎ፡ወአብጽሕዎ፡ኀቤሁ፡ወይቤሎ፡ስግድ፡ለአማልክት፡ወከሐዶ፡ለክርስቶስ፡ውእቱኒ፡አበዮ። ወሰደዶ፡ውስተ፡አሐቲ፡ሀገር፡ከመ፡ይኰንኖ፡በኀቤሁ፡በህየ፡እስመ፡ውእቱ፡ፈርሀ፡እምሰብአ፡ሀገር፡ከመ፡ይኰንኖ፡በኀቤሁ።
35ወበእንተ፡ዝንቱ፡ፈነዎ፡ኀበ፡መኰንን፡ወአዘዞ፡ከመ፡ይኰንኖ፡በብዙኅ፡መክፈልተ፡ኵነኔ። ወውእቱሰ፡መኰንን፡ሰቀለ፡ውስተ፡ክሣዱ፡ለቅዱስ፡ቀሌምንጦስ፡ክቡደ፡ሐፂነ፡ዘቦቱ፡፬ቱ፡እግር፡ወወደይዎ፡ውስተ፡ባሕር፡ወእምዝ፡መጠወ፡ነፍሶ፡ውስተ፡እዴሁ፡ለእግዚአብሔር፡ወነሥአ፡አክሊለ፡ስምዕ፡በከመ፡ሐዋርያት፡ሰባክያን።
36ወሶበ፡ኮነ፡እምድኅረ፡ዓመት፡ፍጽምት፡ተከሥተት፡ባሕር፡ወአስተርአየ፡ሥጋሁ፡ለቅዱስ፡ቀሌምንጦስ፡እንዘ፡ይሰክብ፡ውስተ፡ዕመቀ፡ባሕር፡ከመ፡ዜሕያው፡ውእቱ፡ወቦኡ፡ሰብእ፡ወተባረኩ፡እምኔሁ፡ወፈቀዱ፡ይንሥኡ፡ሥጋሁ፡እምህየ፡ወአምጽኡ፡ሣፁነ፡ዘእብን፡ክቡር፡ወአንበርዎ፡ውስቴቱ። ወፈቀዱ፡ከመ፡ይንሥእዎ፡ወያውፅእዎ፡እምውስተ፡ባሕር፡ወኢተክህሎሙ፡ይሁክዎ፡እመካኑ፡ወአእመሩ፡ከመ፡ውእቱ፡ኢይፈቅድ፡ወፂኣ፡እምባሕር፡ወኀደግዎ፡ህየ፡ወሖሩ።
37ወኮነት፡ይእቲ፡ባሕር፡ትትከሠት፡ለለዓመት፡በዕለተ፡ተዝካሩ፡ወይበውኡ፡ምእመናን፡ኀቤሁ፡ወይትባረኩ፡እምኔሁ።
38ወዘተጽሕፈት፡እምነ፡ተአምራቲሁ፡አሐቲ፡ከመ፡በአሐቲ፡ዓመት፡ሶበ፡ቦኡ፡ሰብእ፡ይትባረኩ፡እምኔሁ፡ወሶበ፡ይወፅኡ፡ረስዑ፡ሕፃነ፡ንኡሰ፡ድኅረ፡ሣፁኑ፡ለቅዱስ፡ቀሌምንጦስ፡ወዝንቱ፡ኮነ፡በፋቃደ፡እግዚእነ፡ኢየሱስ፡ክርስቶስ፡ከመ፡ይክሥት፡ግብሮሙ፡ለቅዱሳን፡ፍቁራኒሁ፡ወጸጋተ፡ዘይነሥኡ፡በኀቤሁ።
39ወሶበ፡ተጋብኣት፡ላዕሌሁ፡ይእቲ፡ባሕር፡ኀሠሥዎ፡አዝማዲሁ፡ወኢረከብዎ፡ወመሰሎሙ፡ከመ፡ውእቱ፡ሞተ፡በውስተ፡ባሕር፡ወበልዕዎ፡አራዊት፡ዘባሕር፡በከዩ፡ላዕሌሁ።
40ወበዳግም፡ዓመት፡በዕለተ፡ተዝካሩ፡ተከሥተት፡ይእቲ፡ባሕር፡ወቦኡ፡ሰብእ፡በከመ፡ልማዶሙ፡ወረከብዎ፡ለውእቱ፡ሕፃን፡ሕያዎ፡እንዘ፡ይቀውም፡ኀበ፡ሣፁን፡ዘቅዱስ፡ቀሌምንጦስ፡ተሰአልዎ፡ወይቤልዎ፡እፎ፡ኮነ፡ንብረትከ፡ወምንተ፡እንዘ፡ትሴሰይ፡ሀሎከ። ወይቤሎሙ፡ቅዱስ፡ቀሌምንጦስ፡ያበልዓኒ፡ወያሰትየኒ፡ወእግዚአብሔር፡የዓቅበኒ፡እም፡አራዊተ፡ባሕር።
41ወሶበ፡ሰምዑ፡ዘንተ፡አንከሩ፡ፈድፋደ፡ወሰብሕዎ፡ለእግዚአብሔር፡ስቡሕ፡በውስተ፡ቅዱሳን፡እለ፡ተጋደሉ፡በእንተ፡ስሙ፡ቅዱስ፡በረከቱ፡ቅድስት፡ትኩን፡ምስሌነ፡ለዓለመ፡ዓለም፡አሜን።
ሰላም፡ለከ፡ቀሌምንጦስ፡አቡነ፤አበ፡መንፈስነ፤ከመ፡ናፅንዕ፡ዘልፈ፡ዘትምህርትከ፡ኣሚነ፤ጽሒፎሙ፡ሐዋርያት፡ኀደጉ፡ለነ፤ምስለ፡ቀሌምንጦስ፡እንዘ፡ይብሉ፡መልእክተ፡ፈኖነ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።