Sinaxario · Hidar
22 de Hidar
አመ፡፳ወ፪፡ለኅዳር1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፳ወ፪፡ለኅዳር፡በዛቲ፡ዕለት፡ኮኑ፡ሰማዕተ፡ቆዝሞስ፡ወድምያኖስ፡ወአኀዊሆሙ፡አቢሞስ፡ወለውንድዮስ፡ወአብራንዮስ፡ወእሞሙ፡ቴውዳዳ።
2ወእሉ፡ቅዱሳን፡ኮኑ፡እምብሔረ፡ዓረቢያ፡እምነ፡ማኅፈድ፡ዘተሐንፀ፡ላዕለ፡ስሙ፡ለወልደ፡እግዚአብሔር፡ወኮነት፡እሞሙ፡ፈራሂተ፡እግዚአብሔር፡ወመሐሪት፡ወታፈ፡ቅሮሙ፡ለፈላስያን።
3ወእምድኅረ፡አዕረፈ፡አቡሆሙ፡ሐፀነቶሙ፡እንዘ፡ዕቤር፡ይእቲ፡መሠረቶሙ፡ፈሪሃ፡እግዚአብሔር፡ቆዝሞስኒ፡ወድምያኖስ፡ተምህሩ፡ግብረ፡ጥበብ። ወኮኑ፡ይፌውስዎሙ፡ለድውያን፡ዘእንበለ፡ዓስብ፡ወፈድፋደሰ፡ለነዳያን፡ይምሕርዎሙ።
4ወአኀዊሆሙሰ፡፫ቱ፡ሖሩ፡ኀበ፡ገዳም፡ወመንኰሱ።
5ወሶበ፡ክሕደ፡ዲዮቅልጥያኖስ፡በእንተ፡ወልደ፡ንጉሠ፡ቍዝ፡ዘአንበሮ፡ምዕቅብና፡ኀበ፡አባ፡አጋግዮስ፡መነኮስ፡መፍቀሬ፡ንዋይ፡እስመ፡ውእቱ፡አጋግዮስ፡አግብኦ፡ለወልደ፡ንጉሠ፡ቍዝ፡ኀበ፡አቡሁ፡በኅቡዕ፡ነሢኦ፡ብዙኀ፡ንዋየ፡እምኀበ፡ንጉሠ፡ቍዝ። ወመሐለ፡በሐሰት፡ለዲዮቅልጥያኖስ፡ከመ፡ውእቱ፡ሞተ፡ወቀበሮ፡በእዴሁ፡እስመ፡ለውእቱሰ፡ወልደ፡ንጉሡ፡ቍዝ፡ረከቦ፡ዳግመ፡በውስተ፡ፀብዕ፡ወነሥኦ፡ኀቤሁ።
6ወበእንተዝ፡አምለከ፡ዲዮቅልጥያኖስ፡ጣዖታተ፡ርኩሳነ፡ወአዘዞሙ፡ለኵሎሙ፡ሰብእ፡እለ፡ውስተ፡መንግሥቱ፡ከመ፡ያምልኩ፡ጣዖታተ።
7ወእምዝ፡አስተዋደይዎሙ፡ለእሉ፡ቅዱሳን፡ቆዝሞስ፡ወድምያኖስ፡ከመ፡እሙንቱ፡ይሰብኩ፡በእንተ፡ስሙ፡ለኢየሱስ፡ክርስቶስ፡ውስተ፡ኵሉ፡አህጉር፡እንዘ፡ይሥዕሩ፡ጣዖታተ።
8ወአዘዘ፡ዲዮቅልጥያኖስ፡ከመ፡ያብጽሕዎሙ፡ኀቤሁ፡ወሶበ፡በጽሑ፡መጠዎሙ፡ለላስዮስ፡መኰንን፡ከመ፡ይኰንኖሙ። ወውእቱ፡ኰነኖሙ፡ኵነኔ፡ዓቢየ፡በእሳት፡ወበመቅሠፍት፡ብዙኅ፡ወፅኑዕ።
9ወእምዝ፡ተሰአለ፡በእንተ፡አኀዊሆሙ። ወሶበ፡አመርዎ፡መካኖሙ፡ፈነወ፡ወአብጽ፡ሖሙ፡ኀቤሁ፡ሎሙኒ፡ወለእሞሙኒ፡ወአዘዘ፡ይኰንንዎሙ፡ውስተ፡መንኰራኵር፡ብሩ፡ቦሙ፡በከመ፡አዘዘ፡መኰንን።
10ወእምድኅረዝ፡ወገርዎሙ፡ውስተ፡እቶነ፡እሳት፡ወነበሩ፡ውስተ፡እሳት፡፫ተ፡መዋዕለ፡እንበለ፡ሙስና።
11ወካዕበ፡ወደይዎሙ፡ውስተ፡ምንዳደ፡ብለኔ፡ወአውዓይዎሙ፡ዲበ፡ዓራተ፡ሐፂን፡ወበዝንቱ፡ኵሉ፡ኢክህሉ፡መዊዖቶሙ፡እስመ፡እግዚአብሔር፡ያነሥኦሙ፡ጥዑያነ፡ዘእንበለ፡ሙስና።
12ወሶበ፡ደክመ፡መኰንን፡እምኰንኖቶሙ፡መጠዎሙ፡ለንጉሥ። ወንጉሥኒ፡ኰነ፡ኖሙ፡ኵነኔ፡ዐቢየ። ወእንዘ፡ሀለዉ፡ውስተ፡ኵነኔ፡ታፀንዖሙ፡እሞሙ፡ወታስተዔግሃሙ፡ወትናዝዞሙ፡ወረገመቶ፡ለንጉሥ፡ወለጣዖታቲሁ፡ርኩሳን። ወሶቤሃ፡ኣዘዘ፡ንጉሥ፡ይምትሩ፡ርእሳ፡በሰይፍ፡ወነሥአት፡አክሊለ፡ስምዕ፡ወኮነ፡ሥጋሃ፡ግዱፈ፡ውስተ፡ምድር፡ወኢተሐበለ፡መኑሂ፡ይቅብራ።
13ወጸርሐ፡ቅዱስ፡ቆዝሞስ፡ወይቤ፡ኦ፡ሰብአ፡ዛቲ፡ሀገር፡አልቦሁ፡እምውስቴት፡ክሙ፡፩ሂ፡ዘቦ፡ምሕረት፡ውስተ፡ልቡ፡ከመ፡ይሠውር፡ሥጋሃ፡ለዛቲ፡አረጋይት፡ወይቅብራ። ወመጽአ፡ፊቅጦር፡ወልደ፡ኅርማኖስ፡ነሥኣ፡ወቀበራ፡እምቅድመ፡ይኩን፡ሰማዕተ።
14ወለቅዱሳንሰ፡ቆዝሞስ፡ወድምያኖስ፡ወለአኀዊሆሙ፡አዘዘ፡ይምትሩ፡አርእስቲሆሙ፡በሰይፍ፡ወነሥኡ፡አክሊለ፡ስምዕ፡ወሕይወተ፡ዘለዓለም።
15ወእምድኅረ፡ተፍጻሜተ፡መዋዕለ፡ስደት፡ተሐንፀ፡ሎሙ፡ቤተ፡ክርስቲያን፡ወከሠተ፡እግዚእነ፡እምነ፡ሥጋሆሙ፡ተአምራተ፡ወመንክራተ፡ዐበይተ። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ደቂቀ፡ቴውዳዳ፡ዘተንእዱ፤በበአስማቲሆሙ፡ለለአሐዱ፤ዘኮነቶሙ፡ምኅባዓ፡ለእግዚአብሔር፡በፈቃዱ፤እማኅፀነ፡ምድር፡አምሳለ፡ሕፃናት፡ተወልዱለእሳተ፡ኵነኔ፡መፍርህ፡ድኅረ፡ኀልቀ፡ነዱ።
16ወበዛቲ፡ዕለት፡ካዕበ፡ሰማዕተ፡ኮኑ፡፪፻፺ወ፪፡ዕደው፡፵ወ፱፡አንስት፡ማኅበራነ፡ቅዱስ፡ቆዝሞስ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ክልኤ፡አምዓተ፤ተስዓ፡ወክልኤተ፡ዕደወ፡ኃይል፡እሎንተ፤ዓዲ፡አርባዓ፡ወተስዓተ፡አንስተ፤እንዘ፡ይዘልፋ፡ንጉሡ፡ወይፄዕላ፡ጣዖተ፤ምስለ፡እለ፡ቆዝሞስ፡ደርገ፡ዘኮኑ፡ሰማዕተ።
17ወበዛቲ፡ዕለት፡ተዝካሩ፡ለቀሌምንጦስ፡ሰማዕት። በረከቱ፡ትኩን፡ምስሌነ፡ለዓለመ፡ዓለም፡ኣሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።