Sinaxario · Hamle
28 de Hamle
አመ፡፳ወ፰፡ለሐምሌ1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፳ወ፰፡ለሐምሌ፡በዛቲ፡ዕለት፡ኮነ፡ተዝካሮሙ፡ለእንድራኒቆስ፡ወለብእሲቱ፡አትናስያ፡መፍቀርያነ፡እግዚአብሔር።
2ወኮኑ፡እሉ፡እምሀገረ፡አንጾኪያ፡ወብዑላን፡እሙንቱ፡በወርቅ፡ወበብሩር፡ወክልኤተ፡እደ፡ይሁቡ፡እምዘረብኁ፡ለነዳያን፡ወለምስኪናን። ወእምድኅረ፡ኅዳጥ፡መዋዕል፡ወለዱ፡፪ተ፡ውሉደ፡ወልደ፡ወወለተ፡ወሰመይዎሙ፡ዮሐንስሃ፡ወማርያምሃ። ወእምአሜሃ፡ተማከሩ፡ከመ፡ይኀድጉ፡ትድምርተ፡ሰብሳብ፡ወወጠኑ፡ይትለአኩ፡ፈድፋደ፡በንዋዮሙ፡ወበኵሉ፡ኃይ፡ሎሙ፡ለነዳያን፡ወለድውያን። ውእቱ፡እንዘ፡ይትለአክ፡ለእደው። ወይእቲ፡ትትለአክ፡ለአንስት። ወነበሩ፡በዝ፡ግብር፡ዓሠርተ፡ወክልኤተ፡ዓመተ፡ወእምዝ፡ሐሙ፡ደቂቆሙ፡ሕማመ፡ፈጸንት፡ወሞቱ፡በአሐቲ፡ዕለት።
3ወሶቤሃ፡ወድቀ፡እንድራኒቆስ፡ዲበ፡ምድር፡ወገደፈ፡ርእሶ፡ቅድመ፡ሥዕለ፡እግዚእነ፡ኢየሱስ፡ክርስቶስ፡ሎቱ፡ስብሐት። እንዘ፡ይበኪ፡ወይብል፡ዕራቅየ፡ወፃእኩ፡እምከርሠ፡እምየ፡ወዕራቅየ፡እገብእ፡ኀበ፡እግዚእየ፡“እግዚአብሔር፡ወሀበ። ወእግዚአብሔር፡ነሥአ፡ወይኩን፡ቡሩከ፡ስሙ፡ለእግዚአብሔር፡እም፡ይእዜ፡ወእስከ፡ለዓለም”።
4ወእሞሙሰ፡አትናስያ፡እምፅንዐ፡ኀዘና፡ፈቀደት፡ትቅትል፡ርእሳ፡ወቦአት፡ኀበ፡ተቀብሩ፡ውሉዳ፡እንዘ፡ትበኪ፡ወበሌሊት፡ርእየት፡በአምሳለ፡መነኮስ፡እንዘ፡ይብላ፡ኢትብክዪ፡በእንተ፡ሞተ፡ውሉድኪ፡አላ፡ብክዪ፡በእንተ፡ርእስኪ፡እስመ፡እሙንቱ፡ይትፈ፡ሥሑ፡በሰማያት።
5ወሶበ፡ነቅሐት፡እምንዋማ፡ሖረት፡ወነገረቶ፡ለምታ፡ወተማከሩ፡ከመ፡ይኅድጉ፡ዓለመ፡ወዘረዉ፡ንዋዮሙ፡ለነዳያን፡ወወፅኡ፡በሌሊት፡ወበጽሑ፡እስክንድርያ፡ወኀደጋ፡ህየ፡ለአትናስያ፡ወበጽሐ፡ገዳመ፡አስቄጥስ፡ወመንኰሰ፡ኀበ፡አባ፡ዳንኤል፡ወተመይጠ፡ወወሰዳ፡ለአትናስያ፡ኀበ፡ስዒድ፡ውስተ፡ምኔተ፡ደናግል፡ወኀደጋ፡ህየ።
6ወሶበ፡ኮኖ፡፲ወ፪፡ዓመት፡ሰአሎ፡ለአባ፡ዳንኤል፡ከመ፡ይፈንዎ፡ሀገረ፡ኢየሩሳሌም፡ከመ፡ይትባረክ፡እመካናት፡ቅዱሳት። ወእንዘ፡ሀሎ፡በፍኖት፡ነያ፡ብእሲቱ፡ተራከበቶ፡ወይእቲኒ፡ትፈቅድ፡ትትባረክ፡እመካናት፡ቅዱሳት፡ወላቲሰ፡ተወለጠ፡ኅብራ፡እምብዝኀ፡ገድል፡በእንተዝ፡ኢያእመራ፡ወይእቲ፡አእመረቶ፡ወኢከሠተት፡ሎቱ።
7ወበጺሖሙ፡ውስተ፡መካናት፡ቅዱሳት፡ተመይጡ፡መካኖሙ፡ወአእመረ፡አባ፡ዳንኤል፡በመንፈስ፡ወይቤሎ፡ለእንድራኒቆስ፡ንበር፡ምስለ፡ውእቱ፡መነኮስ፡ዘተባየጸከ፡እስመ፡ቅዱስ፡ውእቱ፡ወነበሩ፡ኅቡረ፡፲ወ፪ተ፡ዓመተ፡ካልአ። ወኢያእመራ፡ከመ፡ብእሲቱ፡ይእቲ፡አላ፡ይጼውዓ፡አትናስዮስሃ፡ወኮነ፡አባ፡ዳንኤል፡ይሔውዖሙ፡ወይነግሮሙ፡በእንተ፡ረባኀ፡ነፍሶሙ።
8ወሶበ፡ሐመት፡አትናስያ፡ሖረ፡እንድራኒቆስ፡ኀበ፡አባ፡ዳንኤል፡ወይቤሎ፡እስመ፡ቢጽየ፡አልፀቀ፡ለሞት፡ነዓ፡ከመ፡ተሐውዖ፡ወበጺሖ፡አባ፡ዳንኤል፡ረከባ፡በዓቢይ፡ሕማም። ወትቤሎ፡ኦ፡አባ፡እፈቅድ፡ተሀበኒ፡ቍርባነ፡ወአስተሐመመ፡አባ፡ዳንኤል፡ወመጠዋ፡ቍርባነ።
9ወሶበ፡አዕረፈት፡ውእተ፡ጊዜ፡ፄነወ፡መዓዛ፡ጥዑመ፡ወመልአ፡ቤተ፡ወሶበ፡ገነዝዋ፡ረከብዋ፡ከመ፡ብእሲት፡ይእቲ። ወረከቡ፡ክርታሰ፡ዘተጽሕፈ፡ባቲ፡ዜናሃ፡ምስለ፡ትእምርት፡ወሶበ፡አንበበ፡እንድራኒቆስ፡አእመራ፡ከመ፡ብእሲቱ፡ይእቲ፡አሜሃ፡ተሠወረ፡ልቡ፡ወአኀዘ፡ይጽፋዕ፡ገጾ፡ወያስቆቁ፡ወእምድኅረ፡ኅዳጥ፡መዋዕል፡ሶበ፡ሐመ፡መጽኡ፡አኀው፡ወነሥኡ፡በረከቶ፡ወተመጠወ፡ቊርባነ፡አዕረፈ፡በሰላም፡ወቦአ፡መንግሥተ፡ሰማያት። በረከቶሙ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለእንድራኒቆስ፡ለምኔተ፡አስቄጥስ፡ዘሐወፃ፤እንዘ፡ይዘሩ፡ብዕሎ፡ዘኢኮነ፡ብዕለ፡ዓመፃ፤ወለአትናስያ፡ሰላም፡ለነቢር፡ዘተባየጻ፤ከመ፡ይእቲ፡ብእሲቱ፡እንበለ፡ይጠይቅ፡ገጻ፤እስመ፡አዕፅምቲሃ፡በጾም፡ከመ፡ሣዕር፡ነቅፃ።ሰላም፡ለክሙ፡ምሉአነ፡ሥርዓት፡ወሕግ፤እንበለ፡ነቲግ፤አብርሃም፡ይስሐቅ፡ወእስራኤል፡አዕሩግ፤ሕንባባተ፡ጽድቅ፡ዘትፀውሩ፡አሕሩግ፤ወዘታውኅዙ፡ማያተ፡አፍ፡ላግ።ሰላም፡ለመስቀል፡ክብራ፡መጽሐፈ፡አምሳል፡ዘአእኰታ፤እስከ፡ጠብዓት፡በግብር፡ሐቌሃ፡ቀኒታ፤፩፡ገብርኤል፡እምነ፡ሊቃናት፡ፆታ፤መንገለ፡ቅድስት፡ሀገር፡ሶበ፡ወሰዶ፡ለምታ፤ሚካኤል፡ተኀድገ፡ይዕቀባ፡ለምታ።
10ወበዛቲ፡ዕለት፡ዕረፍቱ፡ለብፁዕ፡መስ፡ተጋድል፡ወገባሬ፡መንክራት፡አባ፡ፊልጶስ፡አበ፡ማኀበር፡ዘሀገር፡ቅድስት፡ደብረ፡ሊባኖስ፡ለዝንቱ፡ቅዱስ፡ተብህለ፡ከመ፡ይገብር፡ተአምረ፡ወመንክረ፡ወበፈቃደ፡እግዚእነ፡እምድረ፡ሙላዱ፡ሖረ፡ውስተ፡ውሣጤ፡ገዳም፡አመ፡መዋዕል፡ዘኮነ፡ቦቱ፡አቡነ፡ተክለ፡ሃይማኖት፡ከመ፡ይረስዮ፡ወልደ። ወተወክፎ፡ውእቱኒ፡በፍሥሐ፡እስመ፡አእመረ፡ውእቱ፡ከመ፡ይከውን፡ንዋየ፡ኅሩየ።
11ወእምድኅረ፡ፈተኖ፡በኵሉ፡አልበሶ፡አልባሰ፡ምንኵስና። ወተጋደለ፡በኵሉ፡ገድል፡ዘይትማሰል፡ኪያሁ። ወሶበ፡አዕረፈ፡አባ፡ተክለ፡ሃይማኖት፡ተሠይመ፡ዲበ፡መንበሩ፡ኤልሳዕ። ወእምድኅረ፡ኅዳጥ፡መዋዕል፡አዕረፈ፡፩፡ወልድ፡እምውስተ፡ደቂቁ፡ለአቡነ። ወሶበ፡ፈቀዱ፡ይግንዝዎ፡አንሰሐስሐ፡ወተናገረ፡ወይቤ፡ከሙዝ፡ይብል፡አቡነ፡ተክለ፡ሃይማኖት፡ኤልሳዕ፡ይምጻእ፡ኀቤየ፡ወፊልጶስ፡ይንበር፡ዲበ፡መንበርየ፡ወዘንተ፡ብሂሎ፡አዕረፈ።
12ወእምዝ፡ሤምዎ፡ለአቡነ፡ፊልጶስ፡ወሖረ፡በኵሉ፡ሑረተ፡ሠናየ፡ከመ፡አቡሁ፡ወተወክፈ፡መቅሠፍታተ፡ወምንዳቤ፡ብዙኀ፡እንዘ፡ይትበአስ፡በእንተ፡ጽድቅ፡ወአዕረፈ፡በስደት፡አመ፡፳ወ፰፡ለወርኀ፡ሐምሌ። በረከቱ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለፊልጶስ፡ለተክለሃይማኖት፡ዕጓሉ፤በአፈ፡ምውት፡ዘደምፀ፡እንበይነ፡ዕበዩ፡ወብዕሉ፤ዝንቱ፡ጻድቅ፡ዘውዱስ፡በኀበ፡ኵሉ፤መስተጋድላነ፡አንቅሐ፡በገድሉ፤ወቍሱላነ፡ፈወሰ፡በቍስሉ።ሰላም፡ለልደቱ፡ወለቅድስት፡መካኑ፤እለ፡ይትበዓላ፡ደርገ፡በሀገረ፡ደምኑ፤ቢፋሞን፡ኢይፍልጥ፡ኪያየ፡እማኅበራኑ፤ኵሉ፡ኵሉ፡እንተ፡ተጽሕፈ፡ኪዳኑ፤ለእለ፡ከማየ፡ተጽሕፈ፡ኣኮኑ።
ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።