ግዕዝ
Home Formaciones Libros Biblioteca Ge'ez Contacto
Sinaxario · Hamle

18 de Hamle

አመ፡፲ወ፰፡ለሐምሌ
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ፡አመ፡፲ወ፰፡ለሐምሌ፡በዛቲ፡ዕለት፡ኮነ፡ሰማዕተ፡ያዕቆብ፡ሐዋርያ፡ኤጲስቆጶስ፡ዘኢየሩሳሌም።
2ወዝንቱ፡ቅዱስ፡ወልዱ፡ለዮሴፍ፡ፀራቢ፡ወውእቱ፡ዘይንእስ፡እምውሉዱ፡ወኮነ፡ድንግለ፡ወንጹሐ፡ወተሰምየ፡እኍሁ፡ለእግዚእነ፡በእንተ፡ዘተሐፅነ፡ምስለ፡እግዚእነ፡አመ፡ሀሎ፡ውስተ፡ቤተ፡ዮሴፍ፡በከመ፡ተሰምየ፡ዮሴፍ፡ኣቡሁ።
3ወሤምዎ፡ሐዋርያት፡ኤጲስቆጶሰ፡ላዕለ፡ሀገረ፡ኢየሩሳሌም፡ወሰበከ፡ወመሀረ፡በስሙ፡ለእግዚእነ፡ኢየሱስ፡ክርስቶስ፡ሎቱ፡ስብሐት።
4ወአብኦሙ፡ለብዙኀን፡ውስተ፡ሃይ፡ማኖት፡ርትዕት፡ወአጥመቆሙ፡ጥምቀተ፡ክርስትና። ወገብረ፡እግዚአብሔር፡ዲበ፡እደዊሁ፡ተአምራተ፡ወመንክራተ፡ዓበይተ፡ወእምኔሆሙ፡ሀሎ፡፩፡ብእሲ፡እምነ፡በሐውርት፡ወተራከቦ፡ሐዋርያ፡ያዕቆብ፡በውስተ፡ፍኖት። ወፈቀደ፡ይባእ፡ቤቶ፡ወካዕበ፡ረከበ፡ብእሴ፡ዘቦቱ፡ጋኔን፡ወሶበ፡ርእዮ፡ሰይጣን፡ለያዕቆብ፡ሐዋርያ፡ጸርሐ፡ዘላዕሌሁ፡ጋኔን፡ወይቤ፡ምንት፡ብየ፡ምስሌከ፡ሐዋርያሁ፡ለክርስቶስ፡ዘመጻእከ፡ዝየ፡ከመ፡ታጥፍአኒ። ወይቤሎ፡ሐዋርያ፡ትትፈጸም፡አፉከ፡ኦ፡መንፈስ፡ርኩስ፡ወፃእ፡እምኔሁ፡ለዝንቱ፡ብእሲ፡ወሶቤሃ፡ወፅእ፡ሰይጣን፡እምውእቱ፡ብእሲ፡በአምሳለ፡እሳት።
5ወሶበ፡ርእየ፡አረጋዊ፡ዘንተ፡መንክረ፡ወድቀ፡ታሕተ፡እገሪሁ፡ለሐዋርያ፡ወይቤሎ፡ኢኮንኩ፡ድልወ፡አነ፡ከመ፡አንተ፡ትባእ፡ቤትየ፡ዳዕሙ፡አንተ፡ንግረኒ፡ከመ፡ምንተ፡እግበር፡ከመ፡እድኀን፡ኣነ፡ወኵሎሙ፡ሰብአ፡ቤትየ። ወበእንተዝ፡ሰብሖ፡ሐዋርያ፡ለእግዚእነ፡እንዘ፡ይብል፡አአኵተከ፡ኦ፡ሊቅየ፡እስመ፡አሠነይከ፡ፍኖትየ።
6ወገብአ፡ኀበ፡አረጋዊ፡ወነገሮ፡ነገረ፡ሕይወት፡ወመሀሮ፡ስመ፡እግዚእነ፡ኢየሱስ፡ክርስቶስ፡ሎቱ፡ስብሐት። ወአብኦ፡አረጋዊ፡ውስተ፡ቤቱ፡ወተጋብኡ፡ኀቤሁ፡ኵሎሙ፡ሰብአ፡ቤቱ፡ወመሀሮሙ፡ሃይማኖተ፡ወአጥመ፡ቆሙ፡በስመ፡አብ፡ወወልድ፡ወመንፈስ፡ቅዱስ፡ወመዋርስተ፡ረሰዮሙ፡በውስተ፡ምሥጢራተ፡ቅድሳት።
7ወሶበ፡ሰምዑ፡ኵሎሙ፡ሰብአ፡ብሔር፡አምጽኡ፡ኵሎ፡ድውያነ፡ወፈወሶሙ፡ለኵሎሙ፡ወሤመ፡ሎሙ፡ቀሳውስተ፡ወዲያቆናተ፡ወለውእቱኒ፡አረጋዊ፡ሤመ፡ሎሙ፡ኤጲስቆጶሰ፡ወወሀቦሙ፡ወንጌሎ፡ለእግዚእነ፡ኢየሱስ፡ክርስቶስ፡ሎቱ፡ስብሐት። ወወፅአ፡እምኀቤሆሙ፡ወሖረ፡ኀበ፡ካልኣት፡በሐውርት፡ከመ፡ይስብክ።
8ወሀለወት፡አሐቲ፡ብእሲት፡መካን፡ወሰአለቶ፡ከመ፡ይስአል፡ላቲ፡ኀበ፡እግዚአብሔር፡ከመ፡የሀባ፡ወልደ። ወጸለየ፡ላዕሌሃ፡ወጸንሰት፡ወወለደት፡ወልደ፡ወሰመየቶ፡ስሞ፡ያዕቆብ።
9ወበአሐቲ፡ዕለት፡ተጋብኡ፡ኀቤሁ፡አይሁድ፡ብዙኀን፡ወተሰአልዎ፡በእንተ፡ኢየሱስ፡ከመ፡መኑ፡ውእቱ። እስመ፡ሎቱ፡ተሠይመ፡እኍሁ፡ወዐርገ፡ቅዱስ፡ያዕቆብ፡መልዕልተ፡መንበር፡ወአኀዘ፡ይክሥት፡ሎሙ፡መለኮቶ፡ለእግዚእነ፡ወነገሮሙ፡ከመ፡ውእቱ፡ዕሩይ፡በመለኮት፡ምስለ፡እግዚአብሔር፡አብ።
10ወሶበ፡ሰምዑ፡ዘንተ፡ተምዑ፡ወአውረድዎ፡እምላዕለ፡መንበር፡ወቀሠፍዎ፡መቅሠፍተ፡ዓቢየ፡ወመጽአ፡፩፡ብእሲ፡እምኔሆሙ፡ወምስሌሁ፡ዕፅ፡ምሕፃበ፡አልባስ፡ወቦቱ፡ዘበጦ፡ለቅዱስ፡ዲበ፡ርእሱ፡ወመጠወ፡ነፍሶ። ወተጽሕፈ፡በእንቲአሁ፡ከመ፡ውእቱ፡ኢሰትየ፡ወይነ፡ግሙራ፡ወኢበልዐ፡እምዘቦ፡ደም፡ወኢዓርገ፡ዲበ፡ርእሱ፡መላፄ፡ወኢተሐፅበ፡ውስተ፡ቤተ፡ብለኔ፡ወኢተዓፅፈ፡አልባሰ፡አላ፡ኮነ፡ይትዓፀፍ፡ዓፅፈ፡ክታን፡ወይቀውም፡ወትረ፡ወይሰግድ፡ወቆመ፡እስከ፡የሐብጡ፡እገሪሁ፡ወብረኪሁ፡ወሶበ፡አዕረፈ፡ቀበርዎ፡በገቦ፡መቅደስ። በረከቱ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡ለያዕቆብ፡በኀበ፡ማርያም፡ዘተሐፅነ፤ዕጓለ፡ማውታ፡እምእሙ፡እስመ፡ውእቱ፡ኮነ፤ዝንቱ፡ጻድቅ፡እኅወ፡እግዚእነ፤ኢያብአ፡ውስተ፡አፉሁ፡ሥጋ፡ወወይነ፤ወኢገብረ፡ሎቱ፡፪፡ክዳነ።
11ወበዛቲ፡ዕለት፡ስምዐ፡ኮነ፡ብፁዕ፡አትናቴዎስ፡ዘብሔረ፡ቍልዝም፡በመዋዕለ፡ዲዮቅልጥያኖስ፡ወመክስምያኖስ፡ዓላውያን።
12ወዝንቱ፡ብፁዕ፡ኣትናቴዎስ፡እምዘመደ፡ነገሥት፡ወፅኑዕ፡ውእቱ፡በሃይማኖተ፡ክርስቶስ።
13ወሶበ፡ኣዘዙ፡እሉ፡ነገሥት፡ዓላውያን፡አምልኮ፡ጣዖታት፡ወሤምዎ፡ለዝንቱ፡ቅዱስ፡መኰንነ፡ላዕለ፡ሀገረ፡ግብፅ፡ወአዘዝዎ፡ከመ፡ይንሥት፡አብያተ፡ክርስቲያናት፡ውእቱሰ፡በጺሖ፡ኀበ፡ሊቀ፡ጳጳሳት፡ጴጥሮስ፡ተፍጻሜተ፡ሰማዕት፡ነሥአ፡በረከተ፡ወአይድዖ፡ከመ፡ክርስቲያናዊ፡ውእቱ፡ወተፈሥሐ፡ቦቱ፡ሊቀ፡ጳጳሳት።
14ወሰሚዖ፡ንጉሥ፡ፈነወ፡መኰንነ፡ካልአ፡ምስለ፡ሐራ፡ከመ፡የአኀዝዎ፡ለአትናቴዎስ፡ወይሕትቱ፡ግብሮ፡ወበጺሖ፡መኰንን፡ይቤሎ፡እፎ፡ኀደገ፡አፍቅሮ፡አማልክት፧ ወይቤሎ፡አትናቴዎስ፡አንሰ፡እምንእስየ፡ለክርስቶስ፡ሎቱ፡ስብሐት። ወኢየኀድግ፡ሃይማኖትየ፡ወይቤሎ፡መኰንን፡እመሰ፡ኢተመየጥከ፡እምዝ፡ሃይማኖትከ፡ኢያእመርከኑ፡ከመ፡ኵሉ፡ዘየዓሉ፡ትእዛዘ፡ንጉሥ፡ይረክብ፡መቅሠፍተ፡ዓቢየ፡ወይኴንንዎ፡ፅኑዐ፡ኵነኔ፧ አውሥኦ፡ቅዱስ፡ወይቤሎ፡ተዓገሥ፡ንስቲተ፡እስከ፡ትሬኢ፡ዘይመጽእ፡ላዕሌከ፡ኵነኔ። እስከ፡ለዓለም፡ወላዕለ፡ንጉሥከኒ፡ወላዕለ፡አቡከ፡ሰይጣን፡ጸላኤ፡እግዚአብሔር።
15ወሰሚዖ፡መኰንን፡ተምዐ፡ጥቀ፡ወአዘዘ፡ይምትሩ፡ርእሶ፡በሰይፍ።
16ወሶቤሃ፡ጸለየ፡ቅዱስ፡አትናቴዎስ፡ኀበ፡እግዚአብሔር፡ከመ፡ያዕርፍ፡ነፍሶ፡ምስለ፡ቅዱሳኒሁ፡ወያእትት፡ምንዳቤ፡ወስደተ፡እም፡ቤተ፡ክርስቲያን፡ወያፅንዕ፡መንግሥተ፡ሮም፡መሢሐዌ፡ወመንግሥተ፡አክሱም።
17ወፈጺሞ፡ጸሎቶ፡ሰገደ፡በብረኪሁ፡ወመተሮ፡ሐራ፡ክሣዶ፡በሰይፍ፡ወተከሥተ፡እምነ፡ሥጋሁ፡ብዙኅ፡ተአምር፡ዘአልቦ፡ኍልቍ። በረከቱ፡ቅድስት፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለአትናቴዎስ፡ኦም፤ዘብሔረ፡ቍልዝም፤ዘአስተርእየ፡ባህየ፡ዘምስለ፡ፍሬ፡ጥዑም፤እንዘ፡ይጼሊ፡ዳኅና፡ለኵሉ፡ዓለም፤በአፈ፡መጥባሕት፡ተከለለ፡ዮም።
18
ወበዛቲ፡ዕለት፡ተዝካሮሙ፡ለእንዱራና፡ወጦብያ፡ወሰማዕታት፡ማኅበራነ፡ኤስድሮስ፡፺፻፡ሐራ፡ዘአንጾኪያ፡ወእንድራኒቆስ፡መኰንን፡ምስለ፡ትዕይንቱ። በረከቶሙ፡ተሀሉ፡ምስሌነ፡ለዓለመ፡ዓለም፡አሜን።

ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።