ግዕዝ
Home Formaciones Libros Biblioteca Ge'ez Contacto
Sinaxario · Hamle

16 de Hamle

አመ፡፲ወ፮፡ለሐምሌ
1በስመ፡አብ፡ወወልድ፡ወመንፈስ፡ቅዱስ፡፩ዱ፡አምላክ። አመ፡፲ወ፮፡ለሐምሌ፡በዛቲ፡ዕለት፡አዕረፈ፡ቅዱስ፡ዮሐንስ፡ወንጌሉ፡ዘወርቅ።
2ወዝንቱ፡ቅዱስ፡ኮነ፡እምሀገረ፡ሮሜ፡ወኮነ፡አቡሁ፡ብእሴ፡ባዕለ፡ወስሙ፡አጥራብዮስ፡ወስማ፡ለእሙ፡ባዱራ፡ወዝንቱ፡ቅዱስ፡ዮሐንስ፡ኮነ፡ይትሜሀር፡መጻሕፍተ፡ቅዱሳተ፡በኀበ፡፩፡መምህር።
3ወሰአሎ፡ለአቡሁ፡ከመ፡ይግበር፡ሎቱ፡ወንጌለ፡ዘወርቅ፡ወገብረ፡ሎቱ፡በከመ፡ፈቀደ፡ወኵሎ፡ጊዜ፡ያነብቦ፡ወአቡሁ፡ይትፌሣሕ፡ቦቱ፡ሶበ፡ያነብብ።
4ወበውእቱ፡መዋዕል፡መጽአ፡ኀቤሆሙ፡፩፡መነኮስ፡ወኀደረ፡ውስተ፡ቤቶሙ፡እንዘ፡ይፈቅድ፡ሐዊረ፡ኀበ፡ኢየሩሳሌም፡ወተናገረ፡ውእቱ፡መነኮስ፡ምስለ፡ቅዱስ፡ዮሐንስ፡ወአዘከረ፡ሎቱ፡አልባሰ፡ምንኵስና፡እስከ፡መነነ፡ዘንተ፡ዓለመ፡ወኮነ፡በቅድሜሁ፡ከመ፡ኢምንት፡ወፈተወ፡ምንኵስና፡ወሖረ፡ውእቱ፡መነኮስ፡ኀበ፡ኢየሩሳሌም፡ወካዕበ፡ተመይጠ፡ወኀደረ፡በከመ፡ልማዱ፡ውስተ፡ቤቶሙ፡ወኀሠሠ፡ቅዱስ፡በኀቤሁ፡ከመ፡ይሰዶ፡ኀበ፡ደብሩ፡ምስሌሁ፡ወይቤሎ፡መነኮስ፡አንሰ፡እፈርህ፡እምነ፡አቡከ፡ወሰአሎ፡ዮሐንስ፡ወአማኅፀኖ፡በስመ፡እግዚእነ፡ከመ፡ይሰዶ፡ምስሌሁ፡ወያ፡ድኅን፡ነፍሶ።
5ወእምዝ፡ነሥኦ፡ወወሰዶ፡ኀበ፡ደብሩ፡ወሶበ፡ርእዮ፡አበ፡ምኔት፡ዘውስተ፡ውእቱ፡ደብር፡አንከረ፡እምነ፡አርአያሁ፡ወእምተና፡ግሮቱ፡ወቅዱስሰ፡ዮሐንስ፡ሰአሎ፡ለአበ፡ምኔት፡ከመ፡ያልብሶ፡አልባሰ፡ምንኵስና፡ወይቤሎ፡አበ፡ምኔት፡ኦ፡ወልድየ፡አእምር፡ከመ፡ፍኖተ፡ምንኵስና፡ዕሀብት፡ፈድፋደ፡ወሰገደ፡ታሕተ፡እገሪሁ፡ለአበ፡ምኔት፡እንዘ፡ይስእሎ፡ከመ፡ያመንኩሶ፡ወሶበ፡አንጠዮ፡ብዙኀ፡ላፀየ፡ርእሶ፡ወአልቦሶ፡አልባሰ፡ምንኵስና።
6ወእምዝ፡አኀዘ፡ይትጋደል፡ገድለ፡ዓቢየ፡ወፅኑዐ፡ወተፀምደ፡ውስተ፡ዓቢይ፡ፃማ፡እስከ፡የብሰ፡ሥጋሁ፡ወአስተርአየ፡ኣዕፅምቲሁ።
7ወእምዝኀ፡ጾም፡ወጸሎት፡ወሰጊድ፡ወትጋህ፡ዘእንበለ፡ዕረፍት፡ወፅርዓት። ወኮነ፡አበ፡ምኔት፡ይናዝዞ፡ወይብሎ፡ኦ፡ወልድየ፡መሀካ፡ለነፍስከ፡ወአውኅድ፡ፃማከ፡ወግበር፡በከመ፡ይገብሩ፡ካልአኒከ።
8ወሶበ፡ኮኖ፡ሎቱ፡፯ቱ፡ዓመት፡እንዘ፡ይትጋደል፡ተጋድሎ፡ዓቢየ፡ርእየ፡በራእይ፡ከመ፡ዘይብሎ፡ሑር፡ኀበ፡አበዊከ፡ከመ፡ትትባረክ፡እምኔሆሙ፡እምቅድመ፡ፍልሰትከ፡ወዘንተ፡ራእየ፡ርእየ፡፫ተ፡ጊዜያተ፡ወአይድዖ፡ለአበ፡ምኔት፡ዘከመ፡ርእየ፡ወይቤሎ፡አበ፡ምኔት፡ዝንቱ፡ራእይ፡እምእግዚአብሔር። ወይደልወከ፡ከመ፡ትሑር።
9ወሶበ፡ወፅአ፡እምደብር፡ረከበ፡፩ደ፡ምስኪነ፡ዘይለብስ፡አፅርቅት፡ወነሥአ፡እምኔሁ፡አፅርቅተ፡ወወሀቦ፡አልባሰ፡ምንኵስና፡ዘዚአሁ። ወበጺሖ፡ቤተ፡አቡሁ፡ነበረ፡በዴዴ፡አቡሁ፡፯ተ፡ዓመተ፡ውስተ፡ማኅደር፡ንኡስ፡እንዘ፡ይሴሰይ፡እምፍርፋራት፡ዘማእደ፡አቡሁ፡ዘይዌግሩ፡አግብርት።
10ወሶበ፡ተኀልፍ፡እሙ፡አንፃሪሁ፡የዓፅባ፡ፄናሁ፡ዘዕዩዕ።
11ወሶበ፡ቀርበ፡ጊዜ፡ዕረፍቱ፡አይድዖ፡መልአክ፡ወይቤሎ፡እምድኅረ፡ሠሉስ፡ዕለት፡ትፈልስ፡እምዝንቱ፡ዓለም፡ወፈነወ፡ቅዱስ፡ዮሐንስ፡ኀበ፡እሙ፡ወፀውዓ፡ወኢነገራ፡ፍጡነ፡ከመ፡ውእቱ፡ወልዳ። ወሶበ፡በጽሐት፡ኀቤሁ፡ከመ፡ትስማዕ፡ስእለቶ፡ወአምሐላ፡ከመ፡ትቅብሮ፡ውስተ፡ይእቲ፡ማኅደር፡ንእስት፡ወኢትወልጥ፡እሎንተ፡አፅርቅተ፡ዘይለብስ።
12ወእምዝ፡ወሀባ፡ውእተ፡ወንጌለ፡ዘወርቅ፡ወይቤላ፡አንብብዎ፡ወትረ፡ወተዘከሩኒ፡ኪያየ፡ወሶበ፡በጽሐ፡አቡሁ፡ኣርኣየቶ፡ውእተ፡ወንጌለ፡ዘወርቅ፡ወአእመረ፡ከመ፡ውእቱ፡ወንጌል፡ዘአግበረ፡ሎቱ፡ለወልዱ፡ዮሐንስ።
13ወተንሥኡ፡፪ሆሙ፡ወበጽሑ፡ኀበ፡ቅዱስ፡ዮሐንስ፡ወተሰአልዎ፡በእንተ፡ውእቱ፡ወንጌል፡ወበእንተ፡ወልዶሙ፡ወይቤሎሙ፡መሐሉ፡ሊተ፡ከመ፡አንትሙ፡ትቅብሩኒ፡ውስተ፡ውእቱ፡ማኅደር፡በዝንቱ፡አፅርቅት፡ዘላዕሌየ፡ወሶበ፡መሐሉ፡ሎቱ፡ከሠተ፡ሎሙ፡ከመ፡ውእቱ፡ወልዶሙ፡ወበከዩ፡ብካየ፡መሪረ፡ወተጋብኡ፡ኵሎሙ፡ልኂቃነ፡ሀገረ፡ሮሜ፡ወበተፍጻሜተ፡፫ቱ፡ዕለት፡አዕረፈ፡ቅዱስ፡ዮሐንስ፡ወአውፅአት፡እሙ፡እሎንተ፡አፅርቅተ፡እምላዕሌሁ፡ወአምፅአት፡አልባሳተ፡ሠናያተ፡ዘአስተዳለወቶ፡ለከብካበ፡ዚአሁ፡ቀዳሚ። እስመ፡ረስዓት፡ዘአምሐላ፡ወይእተ፡ጊዜ፡ደወየት፡ወተዘከረ፡አቡሁ፡መሐላሆሙ። ወአውፅአ፡እምላዕሌሁ፡እሎንተ፡አልባሳተ፡ሠናያነ፡ወአልበሶ፡አፅርቅተ፡ዚአሁ፡ወቀበርዎ፡ውስተ፡ውእቱ፡ማኅደሩ፡ንኡስ፡ወኮነ፡እምሥጋሁ፡ፈውስ፡ዓቢይ፡ለኵሉ፡ዘይደዊ።
14ወእምድኅረዝ፡ሐነፁ፡ሎቱ፡ቤተ፡ክርስቲያን፡ሠናይተ፡በስሙ። ወአንበሩ፡ውስቴታ፡ሥጋሁ፡ወኮና፡እምኔሁ፡ተአምራት፡ወመንክራት፡ብዙኃት። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለዮሐንስ፡ወንጌለ፡ወርቅ፡ንዋዩ፤ዘአግበረ፡ሎቱ፡አቡሁ፡እምነ፡ዕበዩ፤በተጋድሎ፡ማሰነ፡ወተወለጠ፡አያዩ፤እስከነ፡ስእኑ፡ጥያቄ፡ገጹ፡ኪያሁ፡ዘርእዩ፤ወእስከ፡ሰአልዎ፡ያውሕድ፡እምብዝኀ፡ሥቃዩ።ሰላም፡እብል፡ኪያከ፡መርዓዌ፤ልብሰ፡ትሕትና፡ወፍቅር፡እንተ፡ረሰይከ፡ሥርጋዌ፤ሠርፀ፡ሐዋርያት፡አቡነ፡መሴስየ፡ውሉድ፡ኅብስተ፡ልባዌ፤በአይቴ፡እረክብ፡ኪያከ፡ኖላዌ፤የዋሃ፡ርግበ፡ወጠቢበ፡አርዌ።

ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።