Sinaxario · Ginbot
18 de Ginbot
አመ፡፲ወ፰፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፰፡ለግንቦት፡በዛቲ፡ዕለት፡ወረደ፡መንፈስ፡ቅዱስ፡ላዕለ፡ሐዋርያት፡እምድኅረ፡ዕርገቱ፡ለእግዚእነ፡ሎቱ፡ስብሐት። በከመ፡አሰፈዎሙ፡ለሊሁ፡እንዘ፡ይብል፡እፌኑ፡ለክሙ፡ካልእየ፡ጰራቅሊጦስሃ፡ዘይወፅእ፡እም፡ኀበ፡አብ፡አንትሙሰ፡ንበሩ፡ወጽንሑ፡ሀገረ፡ኢየሩሳሌም፡እስከ፡ትለብሱ፡ኀይለ፡እምአርያም።
2ወካዕበ፡ይቤሎሙ፡ወመጺኦ፡ውእቱ፡መንፈሰ፡ጽድቅ፡ይመርሐክሙ፡በሉ፡ጽድቅ።
3ወይቤሎ፡ጴጥሮስ፡ለአርድእት፡ኣሜሃ፡ዘውእቱ፡ርእስ፡አሰፈወነ፡እግዚእነ፡ከመ፡ይፈኑ፡ለነ፡ጰራቅሊጦስሃ፡ዘውእቱ፡መንፈስ፡ቅዱስ፡ያለብወነ፡ኵሎ፡ዘይደልወነ፡ናስምዕ፡ወንግበር።
4ወእንዘ፡ዘንተ፡ይብሎሙ፡ናሁ፡ሰምዑ፡ድምፀ፡ነፋስ፡ወኣውሎ፡ወአፄነዉ፡ፄና፡ጥዑመ፡ዘኢየአምሩ፡ከማሁ፡ውስተ፡ዓለም፡ወአስተርአየ፡ማእከሎሙ፡ከመ፡ልሳናተ፡እሳት፡እንዘ፡ይወርድ፡ለለ፩፩፡ላዕሌሆሙ፡ወአኀዙ፡ይንብቡ፡በሐዲስ፡ልሳን።
5ወጾሙ፡፵፡መዐልተ፡ለአኰቴተ፡ዚአሁ።
6ወካዕበ፡ተብህለ፡በግብረ፡ሐዋርያት፡ወአመ፡ተፈጸመ፡መዋዕለ፡ጰንጠቆስቴ፡እንዘ፡ሀለዉ፡ኅቡረ፡አሐተኔ።
7መጽአ፡ግብተ፡እምሰማይ፡ድምፅ፡ከመ፡ድምፀ፡ነፋሰ፡አውሎ፡ወመልአ፡ኵሎ፡ቤተ፡ኀበ፡ሀለዉ፡ይነብሩ።
8ወአስተርአይዎሙ፡ልሳናት፡ክፉላት፡ከመ፡እሳት፡ዘይትከፈል፡ወነበረ፡ዲበ፡ኵሎሙ።
9ወመልኡ፡ኵሎሙ፡መንፈሰ፡ኀይል፡ወአኀዙ፡ይንብቡ፡ዘዘዚአሆሙ፡በነገረ፡ኵሉ፡በሐውርት፡በከመ፡ወሀቦሙ፡ውእቱ፡መንፈስ፡ቅዱስ፡ይንብቡ።
10ወሀለዉ፡በኢየሩሳሌም፡ሰብእ፡ኄራን፡አይሁድ፡እምኵሉ፡አሕዛብ፡ዘመትሕተ፡ሰማይ።
11ወሰሚፆሙ፡ዘንተ፡ቃለ፡ተጋብኡ፡ኵሎሙ፡ድንጉፃኒሆሙ፡እስመ፡ሰምዕዎሙ፡ይነብቡ፡ኵሎሙ፡በነገረ፡በሐውርቲሆሙ።
12ወደንገፁ፡ወአንከሩ፡ወይቤሉ፡አኮኑ፡ሰብአ፡ገሊላ፡እሉ፡ኵሎሙ።
13እፎኑ፡እንከ፡ንሰምዖሙ፡ይነብቡ፡በነገረ፡ኵሉ፡በሐውርቲነ፡እንዘ፡ፍጥረትነ፡ጳርቴ፡ወሜድ፡ወኢላሜጤ።
14ወእለኒ፡ይነብሩ፡ማእከለ፡አፍላግ፡ዘይሁዳ፡ወቀጰዶቅያ፡ወፍርግያ፡ወጵንፍልያ፡ወግብፅ፡ወደወለ፡ልብያ።
15ወእለሂ፡እምቀርኔን፡ወእለሂ፡መጽኡ፡እምሮሜ፡አይሁድ፡ፈላስያን።
16ወእለ፡እምቀርጤስ፡ወዐረብ፡ወናሁ፡ንሰምዖሙ፡ይነብቡ፡በነገረ፡በሐውርቲነ፡ዕበያቲሁ፡ለእግዚአብሔር።
17ወደንገፁ፡ኵሎሙ፡ወኀጥኡ፡ዘይብሉ፡ወተበሀሉ፡በበይናቲሆሙ፡ምንትኑ፡እንጋ።
18ወመንፈቆሙ፡ይስሕቅዎሙ፡ወመንፈቆሙ፡ይብሉ፡ፃዕፈ፡ፀግቡ፡እሉ።
19ወቆመ፡ጴጥሮስ፡ምስለ፡፲ወ፩ዱ፡ወከልሐ፡በቃሉ፡ወይቤ፡አንትሙ፡ሰብአ፡ይሁዳ፡ወእለሂ፡ትነብሩ፡ኢየሩሳሌም፡ኵልክሙ፡አእምሩ፡ዘንተ፡ወስምዑኒ፡ቃልየ።
20አኮ፡ከመ፡ትትሐዘብዎሙ፡ኣንትሙ፡ስኩራን፡እሙንቱ፡ዘትብሉ፡እስመ፡ነግህ፡ብሔር፡ሶቤሁ፡ሠለስቱ፡ሰዓት፡አላ፡ዝውእቱ፡ዘይቤ፡ኢዩኤል፡ነቢይ።
21ወይከውን፡እምድኅረዝ፡ይቤ፡እግዚአብሔር፡እሠውጥ፡እምነ፡መንፈስየ፡ዲበ፡ኵሉ፡ዘሥጋ።
22ወይትዔበዩ፡ደቂቅክሙ፡ወአዋልዲክሙ፡ወወራዙቲክሙ፡ራእየ፡ይሬእዩ፡ወሊቃውንቲክሙ፡ሕልመ፡የሐልሙ።
23ወላዕለ፡አግብርትየ፡ወአእማትየ፡እሠውጥ፡እምነ፡መንፈስየ፡ይእተ፡አሚረ፡ይትኔበዩ።
24ወእሁብ፡ትእምርተ፡በሰማይ፡በላዕሉ፡ወመንክረ፡በምድር፡በታሕቱ፡ደመ፡ወእሳተ፡ወጢሰ።
25ፀሐይኒ፡ይጸልም፡ወወርኅኒ፡ደመ፡ይከውን፡ዘእንበለ፡ትብጻሕ፡ዕለተ፡እግዚአብሔር፡ዐባይ፡ወግርምት።
26ወኵሉ፡ዘፀውዐ፡ስመ፡እግዚአብሔር፡ይድኅን።
27ወዳዊትኒ፡ይቤ፡ወመንፈሰከ፡ቅዱሰ፡ኢታውፅእ፡እምላዕሌየ፡ዕሥየኒ፡ፍሥሐ፡ወአድኅኖተከ፡ወበመንፈስ፡ዓዚዝ፡አፅንዓኒ፡ከመ፡እምሀሮሙ፡ለኃጥአን፡ፍኖተከ።
28ወካዕበ፡ይቤ፡ትፌኑ፡መንፈሰከ፡ወይትፈጠሩ፡ወትሔድስ፡ገጻ፡ለምድር፡ለይኩን፡ስብሐቲሁ፡ለእግዚአብሔር፡ለዓለም።
29ወካዕበ፡ይቤ፡ወመንፈስከ፡ቅዱስ፡ይምርሐኒ፡በምድረ፡ጽድቅ።
30ወዓዲ፡ይቤ፡ወበቃለ፡እግዚአብሔር፡ፅንዐ፡ሰማያት፡ወእምእስትንፋሰ፡አፉሁ፡ኵሉ፡ኃይሎሙ።
31ኢሳይያስኒ፡ይቤ፡መንፈሰ፡እግዚአብሔር፡ዘላዕሌየ፡ቀብዓኒ፡እዜንዎሙ፡ለነዳያን፡ፈነወኒ፡ወእስብክ፡ሎሙ፡ግዕዛነ፡ለሄዉዋን፡ወእስምዮ፡ለዓመተ፡እግዚአብሔር፡ኅሩየ።
32ወእግዚእነሂ፡ይቤ፡ለአርዳኢሁ፡ዘንተ፡ነገርኩክሙ፡እንዘ፡ሀሎኩ፡ምስሌክሙ፡ወባሕቱ፡ሶበ፡መጽአ፡ጰራቅሊጦስ፡መንፈሰ፡ጽድቅ፡ናዛዚ፡ዘይፌኑ፡አብ፡ለክሙ፡እምሰ፡ማይ፡በስምየ፡ውእቱ፡ይሜህረክሙ፡ወያዜክረክሙ፡ኵሎ፡ዘነገርኩክሙ።
33አነ፡ሰላምየ፡እሁበክሙ፡ወሰላመ፡ዚአየ፡አኀድግ፡ለክሙ፡ወአኮ፡በከመ፡ይሁብ፡ዓለም፡ዘእሁበክሙ፡አነ።
34ኢይደንግፅክሙ፡ልብክሙ፡ኢትፍርሁ፡ናሁ፡ሰማዕክሙ፡ዘእቤለክሙ፡እስመ፡አሐውር፡ኀበ፡ኣብ፡ዘፈነወኒ፡ወእሠወጥ፡ወእመጽእ፡ኀቤክሙ።
35ወካዕበ፡ይቤ፡ወሶበ፡መጽአ፡ጰራቅሊጦስ፡ዘእፌኑ፡ለክሙ፡አነ፡እምኀበ፡ኣብ፡መንፈሰ፡ጽድቅ፡ውእቱ፡ዘይወፅእ፡እምአብ፡ውእቱ፡ሰማዕትየ፡ወአንትሙ፡ሰማዕትየ፡እስመ፡እምትካት፡ሀሎ፡ምስሌክሙ።
36ወዝንቱሂ፡ነገር፡ዘነገርኩክሙ፡አነ፡ከመ፡ኢትስሐቱ፡ወኢትትዓቀፉ፡እስመ፡እምኵራባቲሆሙ፡ያወፅኡክሙ።
37ወባሕቱ፡ይመጽእ፡ሰዓት፡ከመ፡ኵሉ፡ዘይቀትለክሙ፡ይመስሎ፡ከመ፡ዘመሥዋዕተ፡ያበውእ፡ለእግዚአብሔር።
38ወካዕበ፡ይቤ፡አማንየ፡ህልወ፡ነገረ፡ዘእብለክሙ፡ይኄይሰክሙ፡እሑር፡አነ፡ኀበ፡አብ፡ወእመ፡አኮ፡ኢይመጽእ፡ጰራቅሊጦስ፡ኀቤክሙ፡ወእመሰ፡ሖርኩ፡እፈንዎ፡ለክሙ።
39ወመጺኦ፡ውእቱ፡ይዛለፎ፡ለዓለም፡በእንተ፡ጽድቅ፡ወበእንተ፡ኀጢአት፡ወበእንተ፡ኵነኔ።
40በእንተ፡ጽድቅኒ፡እስመ፡አነ፡አሐውር፡ኀበ፡አብ፡ወበእንተ፡ኀጢአትሰ፡እስመ፡ኢአምኑ፡ብየ፡ወበእንተ፡ኵነኔሰ፡እስመ፡ይትኴነን፡መልአኩ፡ለዝንቱ፡ዓለም።
41ወብየ፡ብዙኅ፡ነገር፡ዘእነግረክሙ፡ወባሕቱ፡ኢትክሉ፡ፀዊሮቶ፡ይእዜ።
42ወመጺኦ፡ውእቱ፡መንፈሰ፡ጽድቅ፡ይመርሐክሙ፡ኀበ፡ኵሉ፡ጽድቅ፡እስመ፡ኢይነግር፡ዘእምኀቤሁ፡ወዘሰምዐ፡ዳዕሙ፡ይነግር፡ወዘይመጽእ፡ይነግረክሙ።
43ወኪያየ፡ይሴብሕ፡ውእቱ፡እስመ፡እምዚአየ፡ይነሥእ፡ወይነግረክሙ።
44ኵሉ፡ዘቦ፡ለአቡየ፡ወበእንተ፡ዝንቱ፡እብለክሙ፡እምዚአየ፡ይነሥእ፡ወይነግረክሙ።
45ወፈጺሞ፡ኵሎ፡ሕገ፡ትስብእት፡እምድኅረ፡ትንሣኤሁ፡ይቤሎሙ፡ለአርዳኢሁ፡ሑሩ፡ወመሀሩ፡ውስተ፡ኵሉ፡ምድር፡ወእንዘ፡ታጠምቅዎሙ፡በሉ፡በስመ፡አብ፡ወወልድ፡ወመንፈስ፡ቅዱስ። ዘሎቱ፡ስብሐት፡ለዓለመ፡ዓለም፡አሜን።
ሰላም፡ለርደትከ፡ጰራቅሊጦስ፡አልፋ፤አባግዐ፡ትኅሥሥ፡እምኀበ፡ተገድፋ፤አመ፡የዐርግ፡ወልድ፡ለዓለም፡እምነ፡ጽንፋ፤ከመ፡ይቤሎሙ፡ለእለ፡ስምዖን፡ኬፋ፤እፌኑ፡ለክሙ፡ካልእየ፡ተስፋ።ሰላም፡ለርደትከ፡አምሳለ፡ነፋስ፡ረቂቅ፤ውስተ፡ጽርሕ፡አሐቲ፡ኀበ፡ሀለዉ፡ደቂቅ፤ጰራቅሊጦስ፡ኃይል፡መንፈሰ፡ጸጋ፡ወጽድቅ፤ይሰደድ፡እምላዕሌየ፡ጽልመተ፡ኀጢአት፡ጽፉቅ፤ሶበ፡ያስተርኢ፡ሥንከ፡መብረቅ።ሰላም፡እብል፡ለዘአስተርአዮሙ፡እምነዱ፤ውስተ፡አሐተኔ፡ደቂቅ፡ኀበ፡ተዓለዱ፤ኪያሁ፡መንፈሰ፡ነሢኦሙ፡ለ፩፩ዱ፤ሐዋርያት፡ለሰቢክ፡አህጉራተ፡ዓለም፡ዖዱ።ወሰማዕትኒ፡ለሕማም፡ነገዱ።
46ወበዛቲ፡ዕለት፡አዕረፈ፡ቅዱስ፡አባ፡ገዓርጊ፡ቢጹ፡ለአባ፡አብርሃም።
47ወለዝንቱ፡ቅዱስ፡አበዊሁ፡ጻድቃን፡ወኄራን፡ወሶበ፡ልኅቀ፡ኮነ፡ኖላዌ፡ወየዓቅብ፡እንስሳቲሆሙ፡ወኵሎ፡ጊዜ፡ይሔሊ፡በልቡ፡ይልበስ፡አልባሰ፡ምንኵስና።
48ወሶበ፡ኮኖ፡፲ወ፬፡ዓመተ፡ሆኮ፡ጸጋ፡እግዚአብሔር፡ወኀደገ፡አባግዒሁ፡ወሖረ፡ውስተ፡ገዳመ፡አስቄጥስ፡ወርእየ፡ዓምደ፡ብርሃን፡እምርኁቅ፡ወሖረ፡ኀቤሁ፡እስከ፡በጽሐ፡ኀበ፡ፈለግ፡ወተኀብአ፡እምኔሁ፡ውእቱ፡ዓምደ፡ብርሃን።
49ወሶበ፡ዓደወ፡ውእተ፡ፈለገ፡አስተርአዮ፡ሰይጣን፡በአምሳለ፡አረጋዊ፡ወይቤሎ፡አእምር፡ኦ፡ወልድየ፡እስመ፡አነ፡ርኢክዎ፡ለአቡከ፡እንዘ፡ሥጡጥ፡አልባሲሁ፡ወውእቱ፡ይበኪ፡ወየኀዝን፡ላዕሌከ፡ፈድፋደ፡ይደልወከ፡ከመ፡ትትመየጥ፡ኀበ፡አቡከ፡ወትናዝዝ፡ልቦ፡እስመ፡ሎቱ፡መሰሎ፡ከመ፡አርዌ፡ገዳም፡መሠጠከ።
50ወእምድኅረዝ፡ተመይጠ፡ኀበ፡ገዳም፡ወደንገፀ፡ቅዱስ፡አባ፡ገዓርጊ፡መጠነ፡አሐቲ፡ሰዓት፡ወእምዝ፡ይቤ፡እስመ፡ወንጌል፡ቅዱስ፡ይብል፡ዘያፈቅር፡አባሁ፡ወእሞ፡እምኔየ፡ፈድፋደ፡ኢይደሉ፡ሊተ፡ረድአ፡ይኩን፡ወሶበ፡ይቤ፡ዘንተ፡ኮነ፡ውእቱ፡ሰይጣን፡ከመ፡ጢስ፡ወጐየ፡እምኔሁ፡ወአእመረ፡ቅዱስ፡ከመ፡ሰይጣን፡ውእቱ።
51ወሶቤሃ፡አስተርአዮ፡ውእቱ፡ዓምደ፡ብርሃን፡ወአንሶሰወ፡ምስሌሁ፡መልአከ፡እግዚአብሔር፡በአምሳለ፡መነኮስ፡ወኮነ፡ቅዱስ፡ይተልዎ፡ለመልአክ፡ወአብጽሖ፡ኀበ፡ደብረ፡አባ፡አርዮን።
52ወነበረ፡አባ፡ገዓርጊ፡ውስተ፡ደብር፡ምስለ፡፩፡መነኮስ፡ብእሲ፡ጻድቅ፡፲፡ዓመተ፡ኢጥዕመ፡ጸብሐ፡ወኢሰትየ፡ወይነ፡ወኢበልዐ፡ፍርያተ፡አትክልት፡ወኢኖመ፡መጠነ፡ዝንቱ፡፲፡ዓመት።
53ወሶበ፡ወሰከ፡ተፀምዶተ፡ወተጋድሎተ፡አስተርአዮ፡ሎቱ፡መልአከ፡እግዚአብሔር፡ወይቤሎ፡ይቤለከ፡እግዚእ፡ከመ፡ትፀመድ፡ወትትጋደል፡በገድል፡ማእከላዊ፡ከመ፡ኢይድክም፡ሥጋከ።
54ወሠርዐ፡ሎቱ፡ቀኖና፡ዘይገብር፡ወአዘዘ፡ከመ፡ይጹም፡ኵሎ፡አሚረ፡እስከ፡ምሴት፡ወይብላዕ፡ንስቲተ፡ኅብስት፡ወይኑም፡እምጊዜ፡ንዋም፡እስከ፡መንፈቀ፡ሌሊት፡በእንተ፡ዕረፍተ፡ሥጋሁ፡ወመንፈቀ፡ተረፈ፡ሌሊትኒ፡ይትጋህ፡ወይጸሊ፡እስከ፡ይጸብሕ።
55ወሶበ፡ነበረ፡እንዘ፡ይገብር፡ዘንተ፡ቀኖና፡ብዙኀ፡መዋዕለ፡ፈቀደ፡ይንበር፡ባሕቲቶ፡ውስተ፡ውሣጤ፡ገዳም፡ወነበረ፡፪ተ፡ዓመተ፡እንዘ፡ያንሶሱ፡ውስተ፡ገዳም።
56ወአስተርአዮ፡መልአከ፡እግዚአብሔር፡ወአዘዞ፡ከመ፡ይትመየጥ፡ኀበ፡መካኑ፡ወሶቤሃ፡አብጽሐቶ፡ኃይል፡አምላካዊት፡ኀበ፡ደብረ፡ቅዱሳን፡መክሲሞስ፡ወዱማቴዎስ፡ዘቅሩብ፡እምደብሩ።
57ወሶበ፡ገብአ፡ውስተ፡ደብሩ፡በውእተ፡ጊዜ፡መጽአ፡አብርሃም፡እምዓለም፡ኀበ፡ውእቱ፡ደብር፡ወተራከበ፡ምስለ፡አባ፡ገዐርጊ፡ወተሠነዓዉ፡፪ሆሙ፡ኅቡረ፡ወበጽሑ፡ኀበ፡ደብረ፡አባ፡ዮሐንስ፡አበ፡ምኔት፡ዘገዳመ፡አስቄጥስ፡ወወሀቦሙ፡መካነ፡እምኔሁ፡ወኀደሩ፡ውስቴቱ።
58ወውእቱ፡መካን፡ዕውቅ፡እስከ፡ዛቲ፡ዕለት፡ወይእቲ፡በዓት፡ትሰመይ፡በግቢግ፡ኀበ፡ወረደ፡እግዚእነ፡ኢየሱስ፡ክርስቶስ፡ሎቱ፡ስብሐት። ኀቤሆሙ፡ሠጢቆ፡ተድባበ፡ቤቶሙ፡ወሰገዱ፡ሎቱ፡ወወሀቦሙ፡ሰላመ፡ወናዘዞሙ፡ወዐርገ፡እምኀቤሆሙ።
59ወበይእቲሰ፡መስኮት፡ዘወረደ፡ባቲ፡እግዚእነ፡ይትረአይ፡ብርሃን፡ወሀለወት፡ርኁተ፡እስከ፡ዛቲ፡ዕለት።
60ወእሉ፡ቅዱሳን፡ደረሱ፡ድርሳናተ፡ብዙኃተ፡ወተግሣፃተ፡ለመነኮሳት፡ወወደስዎ፡ለዘይትኤዘዝ፡ወይገርር፡ለአበዊሁ።
61ወአዕረፈ፡አባ፡አብርሃም፡አመ፡፪፡ለጥር፡ወእምድኅሬሁ፡ዝንቱ፡ቅዱስ፡አባ፡ገዓርጊ፡በዛቲ፡ዕለት፡አመ፡፲ወ፰፡ለግንቦት፡ወኮነ፡ኵሉ፡መዋዕሊሁ፡፸ወ፪፡ዓመት፡ወነበረ፡እምኔሃ፡፲ወ፬፡ዓመተ፡ውስተ፡ዓለም፡ወበምንኵስና፡ነበረ፡፶ወ፰፡ዓመተ። በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለአባ፡ገዓርጊ፡በኀዲገ፡መርዔት፡ውስተ፡ተሐግ፤ድኅረ፡ዓምደ፡ብርሃን፡መርሖ፡ፍኖተ፡ፈለግ፤ከመ፡አለበዎ፡መልአክ፡ኵነኔ፡ሥርዓት፡ወሕግ፤ፈጸመ፡ገድሎ፡ምስለ፡አብርሃም፡በደርግ፤ውሣጤ፡በዓት፡ዘስማ፡በግቢግ።
62ወበዛቲ፡ዕለት፡ተዝካሩ፡ለሲኖዳ፡ሰማዕት። በረከቱ፡ትኩን፡ምስሌነ፡ለዓለመ፡ዓለም፡ኣሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።