Sinaxario · Ginbot
16 de Ginbot
አመ፡፲ወ፮፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፮፡ለግንቦት፡በዛቲ፡ዕለት፡አዕረፈ፡ኢያሱ፡ሲራክ፡ወልደ፡አልአዛር፡ዘኢየሩሳሌም፡ዘአንቅዓ፡ለጥበብ።
2ይቤ፡በጥንተ፡ትንቢቱ፡ኆፃ፡ወነጠብጣበ፡ዝናም፡ወመዋዕለ፡ዓለም፡መኑ፡ኈለቈ።
3ወይቤ፡በእንተ፡ተዋሕዶቱ፡ለክርስቶስ፡ምስለ፡አቡሁ፡ሕሊናሃ፡ለጥበብ፡ዘእምፍጥረተ፡ዓለም፡ሥርዋ፡ለጥበብ፡ለመኑ፡ተከሥተ፡ወመኑ፡አእመረ፡ምክራ፡ለጥበብ፡ወፈድፋደ፡ግርምት፡ይእቲ፡ወትነብር፡ላዕለ፡መንበሩ፡ለእግዚአብሔር።
4ወካዕበ፡ይቤ፡አንሰ፡እምአፉሁ፡ለልዑል፡ወፃእኩ፡ወከመ፡ጊሜ፡ከደንክዋ፡ለምድር፡ወአንሰ፡ውስተ፡ሰማያት፡ኀደርኩ፡ወመንበርየኒ፡ውስተ፡ዓምደ፡ደመና፡ወፆድኩ፡ባሕቲትየ፡ውስተ፡አጽናፈ፡ሰማይ፡ወአንሶሰውኩ፡ውስተ፡ዕመቀ፡ቀላይ፡መልዕልተ፡ማየ፡ባሕርኒ፡እንዘ፡አኀሥሥ፡ዕረፍተ።
5ወካዕበ፡ይቤ፡በእንተ፡ርደቱ፡ለክርስቶስ፡ይቤለኒ፡እግዚአብሔር፡ኀበ፡ያዕቆብ፡ኅድሪ፡ወኀበ፡እስራኤል፡ተዋረሲ።
6ወይቤ፡በእንተ፡ሞቱ፡ለክርስቶስ፡ወበእንተ፡ጥፍአቶሙ፡ለአይሁድ፡እለ፡ይትፌሥሑ፡በቅትለቱ፡ለጻድቅ፡ይሠገሩ፡በመሥገርቱ፡ወይሠጠሙ፡ዘእንበለ፡ይብጻሕ፡ሞቶሙ።
7ወይቤ፡በእንተ፡ንስሐ፡ወዝቢዕ፡ውስተ፡ኀጢአት፡ምንት፡ይበቍዕ፡ገሢሥ፡እምድኅረ፡ተሐፅቦ።
8ወይቤ፡በእንተ፡ሕንፀታ፡ለቤተ፡ክርስቲያን፡ወበእንተ፡ሕዝብ፡እለ፡አበሱ፡ተሠሃል፡እግዚኦ፡ሕዝበከ፡እለ፡ተሰምዩ፡በስምከ፡ወለእስራኤልኒ፡እለ፡በበረከት፡አስተባዛኅከ፡ወተሣሃል፡ሀገረ፡ቅድሳቲከ፡ወኢየሩሳሌም፡ሀገረ፡ምዕራፍከ፡ወምልአ፡ለጽዮን፡ወለደቂቃ፡በረከተ፡ቃልከ።
9ወይቤ፡በእንተ፡ሥዩማን፡ወ፯፡መዐርጋት።
10ወይቤ፡ጻድቃን፡ስምዑ፡ውሉደ፡ጻድቃን፡ወሥርፁ፡ከመ፡ይጸጊ፡ጽጌ፡ገዳም፡በጠለ፡ገዳም፡ጽገዩ፡ወከመ፡መዓዛ፡ሊባኖስ፡ከማሁ፡ይጥዐም፡መዓዛክሙ።
11ወይቤ፡እንዘ፡ይዜከር፡ግብሮ፡ለእግዚአብሔር፡ንጽሖ፡ለሰማይ፡ወጽንዖ፡ወርእየት፡ሰማይኒ፡ከመ፡ያርኢ፡ያሠርቆ፡ለፀሐይ፡ወበቀትሩ፡ያየብስ፡ብሔሮ፡መኑ፡ይትቃወሞ፡ለላህቡ፡ከመ፡እቶን፡ዘይነድድ።
12ወመሥልስታ፡ለፀሐይ፡ያውዕዮሙ፡ለአድባር፡ላህበ፡እሳት፡ይነፍሕ፡እምኔሁ፡ወወርኅ፡ትእምርቱ፡ለብሔር፡ወቦቱ፡ይትፈለጥ፡መዋዕል፡ወይትዓወቅ፡ትእምርተ፡በዓላት።
13ወይቤ፡ሠርጎሁ፡ለሰማይ፡ወክብሮሙ፡ለከዋክብት፡ወያበርሁ፡ለብሔር፡በውስተ፡ዓለም፡ከማሁ፡ለእግዚአብሔር፡በቃለ፡ቅድሳቲሁ፡የሐውሩ፡በሥርዓቶሙ፡ኢይስሕቱ፡ወኢይትፋለሱ፡እምዓቅሞሙ።
14ወበእንተ፡ቀስተ፡ደመና፡ይቤ፡ርኢኩ፡ቀስቶኒ፡ወባረከ፡ፈጣሪሁ፡እስመ፡ሠናይ፡ዋካሁ፡ወእዴሁ፡ለልዑል፡ይቄምሮ።
15ወበእንተ፡በረድ፡ወመባርቅት፡ይቤ፡ወበእንተ፡ትእዛዘ፡ዚአሁ፡ይዘንም፡በረድ፡ወይፈጥን፡መብረቅ፡ወበቃሉ፡ደመናትኒ፡ይሠርራ፡ከመ፡አዕዋፍ፡ይቤ፡በፈቃዱ፡ይነፍሕ፡ነፋስ፡ጽባሐዊ፡ወቃለ፡ፀዓዑ፡ያፈርሃ፡ለምድር፡ወአውሎሁ፡ለነፋስ፡ዓረባዊ፡ያጠውያ፡ለነፍስ፡ወአስሐትያኒ፡ዘይገለብቦ፡ለሰማይ፡ከመ፡ልብሰ፡ሐፂን፡ይትፋለጽ፡ከመ፡ስባረ፡ማኅው፡በሊሕ።
16ወበእንተ፡ዝናም፡ይቤ፡እምከመ፡ወረደ፡ዝናም፡ያስተፌሥሓ፡ለምድር፡በምክረ፡ዚአሁ፡ይየብስ፡ቀላይ።
17ወወደሶሙ፡ለአበው፡በመክፈልተ፡ሀብቶሙ፡ለኄኖክ፡ዘከመ፡አሥመሮ፡ለእግዚአብሔር፡ወለኖኅ፡ዘከመ፡ተረክበ፡ጻድቀ፡ወአብርሃም፡ከመ፡ተረክበ፡መሃይምነ፡ወለይስሐቅ፡ዘከመ፡ተውህቦ፡በረከት፡ዘይበቍዕ፡ለኵሉ፡ዕጓለ፡እመሕያው፡ወለያዕቆብ፡ዘከመ፡አስተርአዮ፡በኂሩቱ፡ወዘከመ፡ወለዶሙ፡ለ፲ወ፪፡ሕዝብ፡ወዘከመ፡ተፈቅሩ፡በኀበ፡እግዚአብሔር፡ወሰብእ።
18ወሙሴኒ፡ዘቡሩክ፡ዝክሩ፡ወስብሐተ፡ቅዱሳን፡አምሳሉ፡ወለአሮን፡እኁሁ፡ዘከመ፡ሎቱ፡ተሠርዐ፡ሕግ፡ዘለዓለም፡ወአስተመክሖ፡በልብሰ፡ቅድሳት፡ወቀጸላ፡ወርቅ።
19ወለፊንሐስ፡ወልደ፡አልአዛር፡ዘሣልስ፡ክብሩ።
20ወለኢያሱ፡ወልደ፡ነዌ፡ዘአስተዋረሶሙ፡ለሕዝበ፡እስራኤል፡ምድሮሙ፡ወተሰብሐ፡ሶበ፡አንሥአ፡እዴሁ።
21ለሳሙኤልኒ፡ዘከመ፡ፍቁር፡ውእቱ፡በኀበ፡እግዚአብሔር።
22ወለናታንሂ፡ዘከመ፡ተነበየ፡በመዋዕለ፡ዳዊት፡ወለዳዊትኒ፡ወደሶ፡ዘከመ፡ቀተሎ፡ለያርብሐዊ፡እምንእሱ።
23ወለሰሎሞንኒ፡ወልዱ፡ዘከመ፡ነግሠ፡በመዋዕለ፡ሰላም፡ወኀደረ፡ውስተ፡መርኀባ፡ለኢየሩሳሌም።
24ወለኤልያስኒ፡ዘከመ፡አንሥአ፡ምዉተ፡ወአውረደ፡እሳተ፡እምሰማይ፡ወዘከመ፡ዓርገ፡ለሊሁ፡በነደ፡እሳት፡ወአፍራሰ፡እሳት።
25ወለኤልሳዕኒ፡ዘከመ፡አደንገፆሙ፡ለፀር፡በመዋዕሊሁ፡ወዘከመ፡አንሥአ፡፪ተ፡ሙታነ፡አሐደ፡በሕይወቱ፡ወአሐደ፡እምድኅረ፡ሞቱ።
26ወለሕዝቅያስኒ፡ዘከመ፡አፅንዐ፡ሀገሮ፡ወዘከመ፡ቀተሎሙ፡ለትዕይንተ፡ፋርስ፡ወአስተፍሥሖሙ፡ለእለ፡ይላህውዋ፡ለጽዮን፡ወአእተተ፡ርኵሰ፡ወኃጢአተ።
27ወለኤርምያስኒ፡ዘከመ፡ተቀደሰ፡እምከርሠ፡እሙ።
28ወለሕዝቅኤልኒ፡ዘከመ፡ርእየ፡ስብሐተ፡እግዚአብሔር።
29ለዘሩባቤልኒ፡ከመ፡ማዕተብ፡ውስተ፡እደ፡መዝራዕት፡ዘየማን።
30ወለ፲ወ፪፡ነቢያት፡ዘከመ፡ይሠርፅ፡አዕፅምቲሆሙ፡ውስተ፡መካኖሙ።
31ለሆሤዕኒ፡ወለነህምያ፡ዘከመ፡አንሥኡ፡ውድቅተ፡ዓረፍተ።
32ወለዮሴፍኒ፡ዘከመ፡ኢተወልደ፡ሰብእ፡ዘከማሁ።
33ለሤም፡ወለኖኅ፡ዘከመ፡የዓቢ፡ክብሮሙ፡እምዕጓለ፡እመሕያው።
34ወለአዳምኒ፡ዘከመ፡ንጉሥ፡ውእቱ፡ላዕለ፡ኵሉ፡ፍጥረት።
35ወለስምዖንኒ፡ዘከመ፡ሐነፀ፡በመዋዕሊሁ፡ወዘከመ፡ተሰብሐ፡በሚጠቶሙ፡ለሕዝብ።
36ወይቤ፡በማኀተመ፡መጽሐፉ፡ባርክዎ፡ለአምላከ፡ኵሉ፡ዘይገብር፡ዓቢያተ፡በኵለሄ፡ወዘያነውኅ፡መዋዕሊነ፡እምከርሠ፡እምነ፡ወዘንተ፡ብሂሎ፡አዕረፈ፡በሰላም። እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡እብል፡ለሲራክ፡ፍጹም፤ወልደ፡አልአዛር፡ዘኢየሩሳሌም፤ቈሪር፡ማይ፡ከመ፡ያጠፍኦ፡ለፍሕም፤ያጠፍእ፡ይቤ፡መጽውቶ፡ብእሲ፡ድኩም፤ኃጣውኢሆሙ፡ለሥጋ፡ወደም።
37ወበዛቲ፡ዕለት፡ኮነ፡ተዝካሩ፡ለቅዱስ፡ዮሐንስ፡ወንጌላዊ፡ወስብከቱ፡ውስተ፡ሀገረ፡እስያ፡ወኤፌሶን፡ወኵሎሙ፡አህጉር፡እለ፡የዓውድዋ።
38ወበእንተ፡ዘበጽሖ፡ምንዳቤ፡ወሥጥመተ፡ባሕር፡እምሰብእ፡እኩያን፡እለ፡ያመልኩ፡ጣዖተ፡እስመ፡ለኵሎሙ፡እምስሕተቶሙ፡አብኦሙ፡ውስተ፡አእምሮ፡እግዚአብሔር፡ወባልሖሙ፡እመሥገርቱ፡ለሰይጣን፡በትምህርታቲሁ፡ወበተአምራት፡ዘገብረ፡እግዚእነ፡ዲበ፡እደዊሁ።
39ወሶበ፡ልኅቀ፡ጸሐፈ፡ሎሙ፡ወንጌለ፡ወሆኮ፡መንፈስ፡ቅዱስ፡እስከ፡ጸሐፈ፡ዘአትረፍዎ፡፫ቱ፡ወንጌላውያን፡ወነበበ፡ሀልዎቶ፡ለወልድ፡ዋሐድ፡በትስብእቱ፡ወተአምራቲሁ፡ዘኢይትኌለቍ፡በከመ፡ጽሑፍ፡ውስተ፡ወንጌል።
40ወእምዝ፡ዐርገ፡ሰማያተ፡ወርእየ፡ሠራዊተ፡ሰማያውያነ፡ወሥርዓታቲሆሙ።
41ወጸሐፈ፡መጽሐፈ፡ዘይሰመይ፡አቡቀለምሲስ።
42ወሠርዑ፡ግብፃውያን፡ዘንተ፡በዐለ፡ለተዝካረ፡ስብከቱ፡ወበከመ፡ስብከቱ፡ኮነ፡በዛቲ፡ዕለት፡ቅዳሴ፡ቤተ፡ክርስቲያኑ፡ውስተ፡ሀገረ፡እስክንድርያ። እግዚአብሔር፡ይምሐረነ፡በጸሎቱ፡ለዓለመ፡ዓለም፡አሜን።
ሰላም፡ለቅዳሴ፡ቤትከ፡በእለእስክንድርያ፡ሀገር፤እንተ፡ሐነፅዋ፡ኬነውት፡ወጠበብተ፡ምክር፤እንዘ፡ትበውእ፡ዮሐንስ፡ውስተ፡መቃብር፤ተኀባዕከ፡ወተሠወርከ፡በኃይል፡ወሥልጣን፡መንክር፤ባሕቱ፡ልብስከ፡ዘተርፈ፡ለዝክር።ሰላም፡ለከ፡ሶበ፡ሰማዕከ፡ዓዋዴ፤እምቃለ፡ወንጌል፡ዘወርቅ፡እንበለ፡ተምያን፡መፍዴ፤ዮሐንስ፡ዘኮንከ፡በእንተ፡ጽድቅ፡ነጋዴ፤መኒነከ፡እመ፡ወላዲተ፡ወኣበ፡ወላዴ፤ምስለ፡ነዳያን፡ነበርከ፡በዴዴ።አመ፡ውስተ፡እሳት፡ይወድይዋ፡ወይቀሥፍዋ፡በአስዋጥ፤እስመ፡ተአመነተከ፡ክርስቶስ፡በቅድመ፡ተኵላት፡መሠጥ፤ በአምሳለ፡ብእሲት፡ሠናይት፡ወበዓልተ፡ዕፍረት፡ፅዑጥ፤አዝዝ፡ዘልፈ፡እግዚአብሔር፡ሥሉጥ፤ለዓስበ፡ሚካኤል፡ይዝክርዋ፡በአፍአ፡ወውሥጥ።
43ወበዛቲ፡ዕለት፡ተዝካሮሙ፡ለሰማዕታት፡ኤጲስቆጶሳት። በረከቶሙ፡ትኩን፡ምስሌነ፡ለዓለመ፡ዓለም፡አሜን።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።