Sinaxario · Ginbot
14 de Ginbot
አመ፡፲ወ፬፡ለግንቦት1በስመ፡አብ፡ወወልድ፡ወመንፈስ፡ቅዱስ፡፩፡አምላክ፡አመ፡፲ወ፬፡ለግንቦት፡በዛቲ፡ዕለት፡አዕረፈ፡አብ፡ቅዱስ፡አባ፡ጳኵሚስ፡ሱታፌ፡መንፈሳውያን።
2ወዝንቱ፡ቅዱስ፡መንኮሰ፡እምንእሱ፡ኀበ፡አባ፡በላሞን፡ወነበረ፡እንዘ፡ይትኤዘዝ፡ሎቱ፡ብዙኀ፡ዓመታተ፡ወፈጸመ፡ኵሎ፡ምግባራተ፡ሠናይ፡ዘምንኵስና።
3ወእምድኅረዝ፡አስተርአዮ፡መልአከ፡እግዚአብሔር፡ወአዘዞ፡ከመ፡ያስተጋብእ፡መነኮሳተ፡ወይሥራዕ፡ማኅበረ፡ሱታፌ፡ከመ፡ሐዋርያት።
4ወአስተጋብአ፡ብዙኃነ፡ሰብአ፡ወሐነፀ፡ሎሙ፡ብዙኃተ፡አድባራተ፡ወሠርዐ፡ለኵሎሙ፡አሐተ፡ሱታፌ፡በግብረ፡እደዊሆሙ፡ወበሲሳዮሙ፡ወሠርዐ፡ቀኖና፡ለጊዜ፡ጸሎታቲሆሙ፡ወለጊዜ፡መብልፆሙ፡ወውእቱ፡ኮኖሙ፡አበ፡ምኔት።
5ወሤመ፡ለኵሉ፡ለለ፩፡እምነ፡አድባራት፡አበ፡ምኔት፡እምታሕቴሁ፡ወኮነ፡ውእቱ፡የዓውድ፡ወይሔውዖሙ፡ለኵሎሙ፡አድባራት፡እምወሰነ፡ሀገረ፡እስዋን፡እስከ፡ተፍጻሜተ፡ላዕላይ፡ግብፅ።
6ወኮነ፡ዝንቱ፡አብ፡ኢየኀድግ፡እምውሉዱ፡ይሠየም፡ክህነተ፡በእንተ፡ስብሐተ፡ከንቱ፡ዘዝዓለም፡ወከመ፡ኢይኩን፡ማእከሎሙ፡ጽልእ፡ኣላ፡ኮነ፡ለኵሉ፡ለለ፩፡እምነ፡አድባራት፡፩፡ቀሲስ፡እምዓለም፡ዘይቄድስ፡ሎሙ፡ቅዳሴ፡ቍርባን።
7ወሶበ፡ዓርገ፡አባ፡አትናቴዎስ፡ሐዋርያዊ፡ኀበ፡ላዕላይ፡ግብፅ፡ፈቀደ፡ይሢሞ፡ቀሲሰ፡ለዝንቱ፡አብ፡ወጐየ፡እምኔሁ፡ወይቤሎሙ፡አባ፡አትናቴዎስ፡ለውሉዱ፡በልዎ፡ለአቡክሙ፡ኦ፡ዘሐነፅከ፡ቤተ፡ዘኢያንቀለቅል፡ወጐየይከ፡እምስብሐተ፡ከንቱ፡ብፁዕ፡አንተ፡ወብፁዓን፡ደቂቅከ።
8ኵሎ፡ወፈተወ፡ዝንቱ፡አሐተ፡ጊዜ፡ከመ፡ይርአይ፡ሲኦለ፡ወመሠጦ፡መልአከ፡እግዚአብሔር፡ወአርአዮ፡ገነተ፡ማኅደረሆሙ፡ለጻድቃን፡ለለ፩፩፡እምኔሆሙ፡ወከማሁ፡አርአዮ፡መካነ፡መካነ፡ኵነኔ፡ዘውስተ፡ሲኦል።
9ወነበረ፡ዝንቱ፡አብ፡ላዕለ፡ሱታፌ፡አበ፡ምኔት፡፵፡ዓመተ፡ወአፅንዖሙ፡ወሤመ፡ሎሙ፡ቴዎድሮስሃ፡አበ፡ምኔት፡ዘኮነ፡ረድኦ፡ወሠርዐ፡ሎቱ፡ቀኖና፡ወእምዝ፡አዕረፈ፡በሰላም፣ በረከቱ፡ትኩን፡ምስሌነ፡ለዓለመ፡ዓለም፡አሜን።
ሰላም፡ለጳኵሚስ፡ለዘደቂቆ፡ባረከ፤ወረሰዮሙ፡ይኩኑ፡ከመ፡እምሰብእ፡አምላከ፤ለመልእክተ፡ተስፋ፡ይትቀነይ፡ዘኢኮነ፡በከ፤ኢገብረ፡አሳእነ፡ለእራኀ፡እግሩ፡ተውሳከ፤እንዘ፡በገዳም፡ይከይድ፡አሥዋከ።
10ወበዛቲ፡ዕለት፡ኮነ፡ሰማዕተ፡ቅዱስ፡ሲማኮስ፡ዘእምሀገረ፡ፈርማ፡በመዋዕሊሁ፡ለቡላሚስ፡መኰንን፡ዘምስር።
11ወዝንቱ፡ቅዱስ፡ኮነ፡አናሜ፡አልባስ፡ቀጠንት፡ወሰንዱናት፡ክቡራት፡ወኮኑ፡ሎቱ፡አዕርክተ፡ቴዎድሮስ፡ወሲሲኮስ።
12ወሶበ፡አእመረ፡ቡላማስ፡መኰን፡ምስር፡በጽሐ፡ይኰንኖሙ፡ለክርስቲያን፡ወአኀዘ፡ቅዱስ፡ሲማኮስ፡ይምሀሮሙ፡ለአብያፂሁ፡ወይገሥፆሙ፡እስከ፡መነኑ፡ክብረ፡ዝንቱ፡ዓለም፡ኀላፊ።
13ወእምዝ፡ተአምኆሙ፡ወወፅአ፡ኀበ፡ሀገረ፡በክሩዝ፡ዘቅሩብ፡እምሀገረ፡ድሜራ፡ወበጽሐ፡ኀበ፡ሀሎ፡መኰንን፡ወረከቦ፡እንዘ፡ይኴንና፡ለአሐቲ፡ብእሲት፡ወገደፋ፡ውስተ፡እቶነ፡እሳት፡ወኮነት፡ሰማዕተ፡ወኮነ፡እቶነ፡እሳት፡ቈሪረ።
14ወቅዱስ፡ሲማኮስ፡ይኔፅር፡ዘንተ፡ወቀርበ፡ኀበ፡መኰንን፡ወተአመነ፡በቅድሜሁ፡በእግዚእነ፡ኢየሱስ፡ክርስቶስ፡ሎቱ፡ስብሐት። ወኰነኖ፡ኵነኔ፡ዐቢየ፡ወኮነ፡መዋዕሊሁ፡፳፡ዓመተ።
15ወእምዝ፡ሰቀሎ፡ወወገሮ፡ውስተ፡መንኰራኵር፡ወአኬድዎ፡በምክያድ፡ወውኅዘ፡እምኔሁ፡ደም፡ብዙኅ፡ወበጽሐ፡እምደሙ፡ላዕለ፡ኣዕይንቲሃ፡ለአሐቲ፡ብእሲት፡ዕውርት፡ወርእየት፡ሶቤሃ።
16ወእምዝ፡ሰቀልዎ፡ዲበ፡ዕፅ፡ወኮነ፡ይስእሎ፡ለእግዚእነ፡ወያስተበቍዕ፡ኀቤሁ።
17ወአዘዘ፡መኰንን፡ይምትሩ፡ርእሶ፡በሰይፍ፡ወፅአ፡ሐራዊ፡ወመልሐ፡ሰይፎ፡ወፈቀደ፡ይምትር፡ርእሶ፡ወለስሐ፡ኀይሉ፡ወኢተክህሎ፡ይምትሮ፡ወከማሁ፡ዳግማይ፡ወሣልሳይ፡እስከ፡፲ወ፬፡ሰያፍያን፡ወለኵሎሙ፡ለስሐ፡ኀይሎሙ፡ወወድቁ፡ዲበ፡ምድር።
18ወእምድኅረዝ፡አሰሩ፡ሐብለ፡ውስተ፡ክሣዱ፡ወሰሐብዎ፡ውስተ፡ርእሰ፡ደብር፡ነዋኅ፡ወመጠወ፡ነፍሶ፡ውስተ፡እዴሁ፡ለእግዚአብሔር፡ወነሥአ፡አክሊለ፡ስምዕ፡በመንግሥተ፡ሰማያት።
19ወኮነ፡እምውስተ፡ሐራ፡፩፡ጽሙም፡ወበሃም፡ሶበ፡ነፀረ፡ሥጋሁ፡ለቅዱስ፡ሲማኮስ፡ሰምዐ፡በዕዘኒሁ፡ወተናገረ፡በልሳኑ።
20ወመጽኡ፡ሰብእ፡መሃይምናን፡እምሀገረ፡ኦድኩ፡ወነሥኡ፡ሥጋሁ፡ለቅዱስ፡ሲማኮስ፡ወአስተርአዩ፡እምኔሁ፡ተአምራት፡ወመንክራት፡ብዙኃት፡ወፈውስ፡ዓቢይ።
21ወመኰንንሰ፡ቢላሞን፡ሶበ፡ርእየ፡ፈርሀ፡ወጐየ፡ወተጋብኡ፡ሰብእ፡ዘ፪፡አህጉር፡ድርሜ፡ርታይን፡ወናዘዝዎሙ፡ለአዝማደ፡ቅዱስ፡ሲማኮስ።
22ወርእዮሙ፡አረማውያን፡ተአምራተ፡ወመንክራተ፡እለ፡ተከሥቱ፡እምኔሁ፡አምኑ፡ወተጠምቁ፡ጥምቀተ፡ክርስትና፡ወኮኑ፡ሰማዕተ፡ወኍልቆሙ፡፲ወ፯፻ወ፶፡ዕደው፡አንስት፡ወወራዙት።
23ወፆሩ፡ሥጋሁ፡አዝማዲሁ፡ኀበ፡ሀገረ፡በርሙን፡በክብር፡ዐቢይ፡ወገነዞ፡መኰንነ፡ሀገረ፡በርሙን፡በአልባሳት፡ሠናያት፡ዘእምኔሁ፡ወሐነፀ፡ሎቱ፡ቤተ፡ክርስቲያን፡ሠናይተ፡ወአንበረ፡ውስቴታ፡ሥጋሁ፡ወኮኑ፡ውስቴታ፡ተአምራት፡ወመንክራት፡ብዙኀት። በረከቱ፡ተሀሉ፡ምስሌነ፡ለዓለመ፡ዓለም፡አሜን።
ሰላም፡እብል፡ለሲማኮስ፡ሰማዕት፤አውቅዮተ፡ርእሱ፡ዘስእኑ፡ካዕበተ፡ሱባዔ፡ሰየፍት፤ወሰላም፡ካዕበ፡ለማኅበራኒሁ፡ዐበይት፤ዓሥሩ፡፻ወ፯፻ት፤ኃምሳ፡ዕደው፡ወዓዲ፡አንስት።
ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።
ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።
ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።