ግዕዝ
Home Formaciones Libros Biblioteca Ge'ez Contacto
Sinaxario · Ginbot

1 de Ginbot

አመ፡አሚሩ፡ለግንቦት

በስመ፡አብ፡ወወልድ፡ወመንፈስ፡ቅዱስ፡፩፡አምላክ፡ወርኀ፡ግንቦት፡ቡሩክ፡መዐልቱ፡፲ወ፬ቱ፡ሰዓቱ፡ወእምዝ፡ይትዌሰክ።

1አመ፡አሚሩ፡ለግንቦት፡በዛቲ፡ዕለት፡ተወልደት፡እግዝእትነ፡ማርያም፡ድንግል፡ወላዲተ፡አምላክ፡ዘባቲ፡ኮነ፡መድኀኒት፡ለኵሉ፡ዓለም፡ለዘመደ፡ዕጓለ፡እመሕያው።
2ወስሙ፡ለክቡር፡አቡሃ፡አረጋዊ፡ኢያቄም፡ወስመ፡ክብርት፡እማ፡ሐና፡ወየኀዝን፡ውእቱ፡በእንተ፡ዘኢወለደ፡ወልደ፡እስመ፡ውእቱ፡ኢክህለ፡ያብእ፡መሥዋዕተ፡ለእግዚአብሔር፡እስመ፡ኮነ፡ሕጎሙ፡ለካህናት፡ኢይትዌከፉ፡መሥዋዕቶሙ፡ለመካናት።
3ወዛቲኒ፡እማ፡ተኀዝን፡ፈድፋደ፡በእንተ፡ዝንቱ፡ወትስእል፡ኀበ፡እግዚአብሔር፡በኵሉ፡ጊዜ።
4ወነፀረ፡እግዚአብሔር፡ኀቤሆሙ፡ወሠምረ፡ቡሩክ፡ስሙ፡በኪነ፡ጥበቡ፡ከመ፡ይኩን፡መድኀኒተ፡እምዘርኦሙ።
5ወእንዘ፡ይቀውም፡ኢያቄም፡ውስተ፡ደብር፡ወይጼሊ፡እስከ፡ተፍጻሜተ፡፵፡መዓልት፡አስተርአዮ፡መልአከ፡እግዚአብሔር፡ወዜነዎ፡ከመ፡ይሁቦ፡እግዚእ፡ዘርአ፡ዘይከውን፡እምኔሃ፡መድኀኒተ፡ኵሉ፡ዓለም።
6ወወረደ፡እምደብር፡እንዘ፡የአምን፡በጥቡዕ፡ልብ፡ዘሰምዐ፡እምኀበ፡መልአከ፡እግዚአብሔር፡ነገራ፡ለብፅዕት፡ሐና፡ዛተ፡ራእየ፡ወይእቲኒ፡አምነት፡ከመ፡እሙን፡ውእቱ፡ወአእኰትዎ፡ለእግዚአብሔር።
7ወበፅዓት፡ብፅዓተ፡ለዘይትወለድ፡እምኔሃ፡ከመ፡ትረስዮ፡ለእግዚአብሔር፡ውስተ፡ቤቱ፡ለእግዚእ፡በኵሉ፡መዋዕለ፡ሕይወቱ።
8ወእምዝ፡ጸንሰት፡ወወለደት፡ዛተ፡ቅድስተ፡ወሰመየታ፡ስማ፡ማርያም፡ዘበትርጓሜሁ፡ጸጋ፡ወሀብት። ወዓዲ፡እግዝእት፡እስመ፡በአማን፡እግዝእተ፡ኵሉ፡ዓለም፡ወበአማን፡ረከብነ፡ጸጋ፡ወሀብተ፡ሰማያዊተ። ጸሎታ፡ወበ፡ረከታ፡ወምሕረተ፡ፍቁር፡ወልዳ፡የሀሉ፡ምስሌነ፡ለዓለመ፡ዓለም፡አሜን።
ሰላም፡ለልደትኪ፡እማኅፀነ፡ድክምት፡ሥጋ፤ድኅረ፡ኀለፋ፡ውርዙት፡ወድኅረ፡ትክቶ፡ኀደጋ፤ማርያም፡ሥመሪ፡ወጸሐቂ፡እንበለ፡ንትጋ፤ለማየ፡ንጽሕኪ፡ትረስይኒ፡ፈለጋ፤እስመ፡ንጽሕ፡ይሁብ፡ሞገሰ፡ወጸጋ።ሰላም፡ለልደትኪ፡እምልደተ፡አበው፡ዘዓብየ፤ለነፍሰ፡ፅዑራን፡ኵሉ፡እስመ፡ጸገወ፡ናኅየ፤ማርያም፡ድንግል፡እግዝእትየ፤እንዘ፡ረድኤትኪ፡ወአድኅኖትኪ፡ብየ፤ኢይፈርህ፡ሞተ፡ወዓዲ፡ሥቃየ።ሰላም፡እብል፡ለልደትኪ፡ማኅቶት፤ዘብሔረ፡ጽልመት፤አእሚሮሙ፡ብኪ፡ከመ፡ይከውን፡ሕይወት፤ሰመዩኪ፡ማርያም፡ዘወለዱኪ፡ነቢያት፤ዘበትርጓሜሁ፡ጸጋ፡ወዓዲ፡እግዝእት።ሰላም፡ለበርተሎሜዎስ፡ቀጸላ፡ሃይማኖት፡አክሊሉ፤ኬነውተ፡ዝንቱ፡ዓለም፡ዘኢፀፈሩ፡በአምሳሉ፤በጵጵስናሁ፡ወመሥመሬ፡ውሉድ፡እዘዘ፡ቃሉ፤ተሐደሱ፡እምብልየት፡አብያተ፡ክርስቲያናት፡ኵሉ፤ወበስመ፡ማርያም፡ሐነፀ፡፩ደ፡እምእሉ።

ዘአቅረብኩ፡ማኅሌተ፡ዘአቅረብኩ፡ማኅሌተ፡አዘኪርየ፡አእላፈ፤ እምእለ፡ተጸምዱከ፡ዘልፈ፤ ለለአነብብ፡ተወከፍ፡ዘንዴትየ፡መጽሐፈ፤ እንተ፡ረሰይከ፡እግዚኦ፡ጸሪቀ፡መበለት፡ውኩፈ፤ እምእለ፡ኣብኡ፡ብዑላን፡ዘተርፈ። ነቢያት፡ቅዱሳን፡ወሐዋርያት፡ሰባክያን፤ ሰማዕት፡ወጻድቃን፤ ደናግል፡ዓዲ፡ወመነኮሳት፡ኄራን፤ ባርኮ፡ባርኩ፡ጉባኤ፡ዛቲ፡መካን፤ እስከ፡አረጋዊ፡ልኂቅ፡ወእምንኡስ፡ሕፃን። ለዘጸሐፎ፡በክርታስ፤ ወለዘአጽሐፎ፡ለዘአንበቦ፡ወለዘተርጐሞ፡በልሳን፡ሐዲስ፤ ወለዘሰምዐ፡ቃሎ፡በዕዝነ፡መንፈስ፤ በጸሎተ፡እሙ፡ማርያም፡ዓራቂተ፡ኵሉ፡እምባእስ፤ ኅቡረ፡ይምሐረነ፡ኢየሱስ፡ክርስቶስ። አቡነ፡ዘበሰማያት፡በል።

ሰላም፡ለክሙ፡ጻድቃን፡ወሰማዕት፡እለ፡አዕረፍክሙ፡በዛቲ፡ዕለት፤ መዋዕያነ፡ዓለም፡አንትሙ፡በብዙኅ፡ትዕግሥት፤ ሰአሉ፡ቅድመ፡ፈጣሪ፡በኵሉ፡ሰዓት፤ እንበለ፡ንስሐ፡ኪያነ፡ኢይንሣእ፡ሞት።

ሰላም፡ለክሙ፡ጻድቃነ፡ዛቲ፡ዕለት፡ኵልክሙ፤ እድ፡ወአንስት፡በበአስማቲክሙ፤ ቅዱሳነ፡ሰማይ፡ወምድር፡ማኅበረ፡ሥላሴ፡አንትሙ፤ ትዝክሩነ፡በጸሎትክሙ፡በእንተ፡ማርያም፡እሙ፤ ተማኅፀነ፡ለክርስቶስ፡በሥጋሁ፡ወደሙ። እግዚኦ፡መዘክር፡ለለኵሉ፡ዕለት፡በተፍጻሜተ፡ምንባብ፡ዘአቅረብኩ፡ማኅሌተ፡በል።