Biblia Etíope · Biblia Etíope en Ge'ez

Salmos 95

መዝሙራት፡ዘዳዊት።

1ዘአመ፡ተሐንጸ፡ቤት፡ዘእምድኅረ፡ፂዋዌ፤ ማኅሌት፡ዘዳዊት። ሰብሕዎ፡ለእግዚአብሔር፡ስብሐተ፡ሐዲሰ፤ ሰብሕዎ፡ለእግዚአብሔር፡ኵላ፡ምድር።

2ሰብሕዎ፡ለእግዚአብሔር፡ወባርኩ፡ለስሙ፤ ወተዘያነዉ፡እምዕለት፡ዕለተ፡አድኅኖቶ።

3ወንግርዎሙ፡ለአሕዛብ፡ስብሐቲሁ፤ ወለኵሎሙ፡አሕዛብ፡ተኣምሪሁ።

4እስመ፡ዐቢይ፡እግዚአብሔር፡ወብዙኅ፡አኰቴቱ፤ ወግሩም፡ውእቱ፡ላዕለ፡ኵሉ፡አማልክት።

5እስመ፡አማልክተ፡አሕዛብ፡አጋንንት፤ ወእግዚአብሔርሰ፡ሰማያተ፡ገብረ።

6አሚን፡ወሠናይት፡ቅድሜሁ፤ ቅድሳት፡ወዕበየ፡ስብሐት፡ውስተ፡መቅደሱ።

7አምጽኡ፡ለእግዚአብሔር፡በሓውርተ፡አሕዛብ፤ አምጽኡ፡ለእግዚአብሔር፡ክብረ፡ወስብሓተ።

8አምጽኡ፡ለእግዚአብሔር፡ስብሐተ፡ለስሙ፤ ንሥኡ፡መሥዋዕተ፡ወባኡ፡ውስተ፡አዕጻዲሁ።

9ስግዱ፡ለእግዚአብሔር፡በዐጸደ፡መቅደሱ፤ ታድለቀልቅ፡እምቅድመ፡ገጹ፡ኵላ፡ምድር።

10በልዎሙ፡ለኣሕዛብ፡ከመ፡እግዚአብሔር፡ነግሠ፡ወአጽንዓ፡ለዓለም፡ከመ፡ኢታንቀልቅል፤ ወይኴንኖሙ፡ለአሕዛብ፡በርትዕ።

11ይትፌሥሓ፡ሰማያት፡ወትትሐሠይ፡ምድር፤ ወትትከወስ፡ባሕር፡በምልኣ።

12ትትሐሠይ፡ገዳም፡ወኵሉ፡ዘውስቴታ፤ ውእቱ፡አሚረ፡ይትፌሥሑ፡ኵሉ፡ዕፀወ፡ገዳም።

13እምቅድመ፡ገጹ፡ለእግዚአብሔር፡እስመ፡ይመጽእ፡ወይመጽእ፡ወይኴንና፡ለምድር፤ ወይኴንና፡ለዓለም፡በጽድቅ፡ወለአሕዛብኒ፡በርትዕ።