Biblia Etíope · Biblia Etíope en Ge'ez
Salmos 62
መዝሙራት፡ዘዳዊት።1መዝሙር፡ዘዳዊት፤ አመ፡ሀሎ፡ውስተ፡ገዳመ፡ኢዶምያስ።
2አምላኪየ፡አምላኪየ፡እገይስ፡ኀቤከ፤ ጸምአት፡ነፍስየ፡ለከ፤ እፎ፡እስፋሕ፡ለከ፡ሥጋየ፡በምደረ፡በድው፡ኀበ፡አልቦ፡ዕፀ፡ወማየ።
3ከመዝ፡በመቅደስከ፡አስተርአይኩከ፤ ከመ፡ኣእምር፡ኀይለከ፡ወስብሐቲከ።
4እስመ፡ይኄይስ፡እምሐይው፡ሣህልከ፤ ከናፍሪየ፡ይሴብሓከ።
5ከመዝ፡እባርከከ፡በሕይወትየ፤ ወበስመ፡ዚአከ፡ኣነሥእ፡እደውየ።
6ከመ፡ዘእምሥቡሕ፡ወእምአንጕዕ፡ጸግበት፡ነፍስይ፤ ከናፍርየ፡ፍሡሓት፡ይሴብሓ፡ለስምከ።
7ወበምስካብየኒ፡እዜክረከ፤ ወጽባሕ፡ኣነብብ፡ለከ።
8እስመ፡ኮንከኒ፡ረዳእየ፤ ወእትዌከል፡በጽላሎተ፡ክነፊከ።
9ተለወት፡ነፍስየ፡ድኅሬከ፤ ሊተሰ፡ተወክፈተኒ፡የማንከ።
10እሙንቱሰ፡ለከንተ፡ኀሠሥዌ፡ለነፍስየ፤ ለይባኡ፡ውስተ፡መዓምቅቲሃ፡ለምድር።
11ወይግብኡ፡ውስተ፡እደ፡ሰይፍ፤ ክፍለ፡ቈናጽል፡ለይኩኑ።
12ወንጉሥሰ፡ይትፌሣሕ፡በእግዚአብሔር፤ ወይከብር፡ኵሉ ዘይምሕል፡ኪያሁ። እስመ፡ይትፈፀም፡አፍ፡ዘይነብብ፡ዐመፃ።