Biblia Etíope · Biblia Etíope en Ge'ez
Salmos 44
መዝሙራት፡ዘዳዊት።1ፍጻሜ፡በእንተ፡እለ፡ተበዐዱ፡ዘውሉደ፡ቆሬ፤ መዝሙር፡ዘዳዊት፡ዘበኣእምሮ።
2ጐሥዐ፡ልብየ፡ቃለ፡ሠናየ፡አነ፡ኣየድዕ፡ግብርየ፡ለንጉሥ፤ ከመ፡ቀለመ፡ጸሓፊ፡ዘጠበጠበ፡ይጽሕፍ፡ልሳንየ።
3ይሤኒ፡ላሕዩ፡እምውሉደ፡እጓለ፡እመሕያው፡ተክዕወ፡ሞገስ፡እምከናፍሪከ፤ በእንተዝ፡ባረከከ፡እግዚአብሔር፡ለዓለም።
4ቅንት፡ሰይፈከ፡ኀይል፡ውስተ፡ሐቌከ፤ በሥንከ፡ወበላሕይከ።
5አርትዕ፡ተሠራሕ፡ወንገሥ፡በእንተ፡ጽድቅ፡ወርትዕ፡ወየዋሃት፤ ወይመርሐከ፡ስብሐተ፡የማንከ።
6አሕጻከ፡ስሑል፡ኀያል፡አሕዛብ፡ይወድቁ፡ታሕቴከ፤ ውስተ፡ልቦሙ፡ለጸላእተ፡ንጉሥ።
7ወንበርከ፡እግዚኦ፡ለዓለመ፡ዓለም፤ በትረ፡ጽድቅ፡በትረ፡መንግሥትከ።
8አፍቀርከ፡ጽድቀ፡ወዐመፃ፡ጸላእከ፡በእንተዝ፡ቀብአከ፡እግዚአብሔር፡አምላክከ፤ ቅብአ፡ትፍሥሕት፡እምእለ፡ከማከ።
9ከርቤ፡ወቀንአተ፡ወሰሊኆት፡እምነ፡አልባሲከ፤ እምክቡዳነ፡አቅርንት፡ዘእምኔሆሙ፡አስተፈሥሓከ፡አዋልደ፡ነገሥት፡ለክብርከ፤
10ወትቀውም፡ንግሥት፡በየማንከ፡በአልባሰ፡ወርቅ፡ዑጽፍት፡ወሑብርት።
11ስምዒ፡ወለትየ፡ወርእዪ፡ወአፅምዒ፡እዝነኪ፤ ወርስዒ፡ሕዝበኪ፡ወቤተ፡አቡኪ።
12እስመ፡ፈተወ፡ንጉሥ፡ሥነኪ፤ እስመ፡ውእቱ፡እግዚእኪ።
13ወይሰግዳ፡ሎቱ፡አዋልደ፡ጠሮስ፡በአምኃ፡ወለገጽኪ፡ይትመሀለሉ፡ኵሎሙ፡አሕዛብ፡ብዑላነ፡ምድር።
14ኵሉ፡ክብራ፡ለወለተ፡ንጉሥ፡ሐሴቦን፤ በዘአዝፋረ፡ወርቅ፡ዑጽፍት፡ወሑብርት።
15ወይወስዱ፡ለንጉሥ፡ደናግለ፡ድኅሬሃ፤ ወቢጻሂ፡ይወስዱ፡ለከ።
16ወይወስድዎን፡በትፍሥሕት፡ወበሐሤት፤ ወያበውእዎን፡ውስተ፡ጽርሕ፡ንጉሥ።
17ህየንተ፡አበዊኪ፡ተወልዱ፡ለኪ፡ደቂቅ፤ ወትሠይምዮሙ፡መላእክተ፡ለኵሉ፡ምድር።
18ወይዘከሩ፡ስመኪ፡በኵሉ፡ትውልደ፡ትውልድ፤ በእንተዝ፡ይገንዩ፡ለከ፡አሕዛብ፡እግዚኦ፡ለዓለም፡ወለዓለመ፡ዓለም።