Biblia Etíope · Biblia Etíope en Ge'ez
Salmos 27
መዝሙራት፡ዘዳዊት።1መዝሙር፡ዘዳዊት። ኀቤከ፡እግዚኦ፡ጸራኅኩ፡አምላኪየ፡ወኢተጸመመኒ፤ ወእመሰ፡ተጸመመከኒ፡እከውን፡ከመ፡እለ፡የወርዱ፡ውስተ፡ግብ።
2ስምዐኒ፡እግዚኦ፡ቃለ፡ስእለትየ፡ዘጸራኅኩ፡ኀቤከ፡ሶበ፡ኣንሥእ፡እደውየ፡በጽርሐ፡መቅደስከ።
3ኢትስሐባ፡ምስለ፡ኃጥኣን፡ለነፍስየ፡ወኢትግድፈኒ፡ምስለ፡ገበርተ፡ዐመፃ። እለ፡ይትናገሩ፡ሰላመ፡ምስለ፡ቢጾሙ፤ ወእኩይ፡ውስተ፡ልቦሙ።
4ሀቦሙ፡በከመ፡ምግባሮሙ፡ወበከመ፡እከየ፡ሕሊናሆሙ። ፍድዮሙ፡በከመ፡ግብረ፡እደዊሆሙ፤ ፍድዮሙ፡ፍዳሆሙ፡ላዕለ፡ርእሶሙ።
5እስመ፡ኢሐለዩ፡ውስተ፡ግብረ፡እግዚአብሔር፡ወኢውስተ፡ግብረ፡እደዊሁ፤ ንሥቶሙ፡ወኢትሕንጾሙ።
6ይትባረክ፡እግዚአብሔር፡እስመ፡ሰምዐኒ፡ቃለ፡ስእለትየ።
7እግዚአብሔር፡ረዳእየ፡ወምእመንየ፡ቦቱ፡ተወከለ፡ልብየ፡ወይረድአኒ። ወሠረጸ፡ሥጋየ፤ ወእምፈቃድየ፡አአምኖ።
8እግዚአብሔር፡ኀይሎሙ፡ውእቱ፡ለሕዝቡ፤ ወምእመነ፡መድኀኒተ፡መሲሑ፡ውእቱ።
9አድኅን፡ሕዝበከ፡ወባርክ፡ርስተከ፤ ረዐዮሙ፡ወአልዕሎሙ፡እስከ፡ለዓለም።