Biblia Etíope · Biblia Etíope en Ge'ez
Salmos 140
መዝሙራት፡ዘዳዊት።1መዝሙር፡ዘዳዊት። እግዚኦ፡ጸራኅኩ፡ኀቤከ፡ስምዐኒ፤ ወአፅምእ፡ቃለ፡ስእለትየ፡ዘጸራኅኩ፡ኀቤከ።
2ተወከፈኒ፡ጸሎትየ፡ከመ፡ዕጣን፡በቅድሜከ፤ አንሥኦ፡እደውየ፡መሥዋዕተ፡ሰርክ።
3ሢም፡እግዚኦ፡ዐቃቤ፡ለአፉየ፤ ወማዕጾ፡ዘዐቅም፡ለከናፍርየ።
4ኢትሚጦ፡ለልብየ፡ውስተ፡ነገር፡እኩይ፡ወአመክንዮ፡ምክንያት፡ለኃጢአት፡ምስለ፡ሰብእ፡ገበርተ፡ዐመፃ፤ ወኢይትኀበር፡ምስለ፡ኅሩያኒሆሙ።
5ገሥጸኒ፡በጽድቅ፡ወተዛለፈኒ፡በምሕረት፤ ወቅብአ፡ኃጥኣንሰ፡ኢይትቀባእ፡ርእስየ። እስመ፡ዓዲ፡ጸሎትየኒ፡ከመ፡ኢተሣሀሎሙ፤
6ተሰጥሙ፡በጥቃ፡ኰኵሕ፡ጽኑዓኒሆሙ። ሰምዑኒ፡ቃልየ፡እስመ፡ተክህለኒ።
7ከመ፡ግዝፈ፡ምድር፡ተሠጥቁ፡ዲበ፡ምድር፤ ወተዘርወ፡አዕጽምቲሆሙ፡በኀበ፡ሲኦል፡
8እስመ፡ኀቤከ፡እግዚኦ፡እግዚኦ፡አዕይንትየ፤ ብከ፡ተወከልኩ፡ኢታውፅኣ፡ለነፍስየ።
9ዕቀበኒ፡አመሥገርት፡እንተ፡ኀብኡ፡ሊተ፤ ወእማዕቀፎሙ፡ለገበርተ፡ዐመፃ።
10ለይደቁ፡ውስተ፡መሥገርቶሙ፡ኃጥኣን፤ እስመ፡አኀልፍ፡አነ፡ባሕቲትየ።