Biblia Etíope · Biblia Etíope en Ge'ez

Salmos 11

መዝሙራት፡ዘዳዊት።

1ፍጻሜ፡ስብሐት፡መዝሙር፡ዘዳዊት፡በእንተ ሳምንት።

2አድኅነኒ፡እግዚኦ፡እስመ፡ኀልቀ፡ኄር፤ ወውሕደ፡ሀይማኖት፡እምአጓለ፡እምሕያው።

3ከንቶ፡ይትናገሩ፡አሐዱ፡ምስለ፡ካልኡ፤ በከናፍረ፡ጕሕሉት፡በልብ፡ወበልብ፡ይትናገሩ።

4ይሤርዎን፡እግዚአብሔር፡ለከናፍረ፡ጕሕሉት፤ ወለልሳን፡እንተ፡ታዐቢ ነቢበ።

5እለ፡ይብሉ፡ናዐቢ፡ልሳናቲነ፡ወከናፍሪነኒ፡ኀቤነ፡እሙንቱ፤ መኑ፡ውእቱ፡እግዚእነ።

6በእንተ፡ሕማዎሙ፡ለነዳያን፡ወበእንተ፡ገዐሮሙ፡ለሙቁሓን፤ ይእዜ፡እትነሣእ፡ይቤ፡እግዚአብሔር፡እሬሲ፡መድኀኒተ፡ወእግህድ፡ቦቱ።

7ቃለ፡እግዚአብሔር፡ቃል፡ንጹሕ፤ ከመ ብሩር፡ጽሩይ፡ወንጡፍ፡ወፍቱን፡እምድር፡ዘአጽረይዎ፡ምስብዒተ።

8አንተ፡እግዚኦ፡ዕቀበነ፤ ወተማኅፀነነ፡እምዛቲ፡ትውልድ፡ወእስከ፡ለዓለም።

9ዐውደ፡የሐውሩ፡ረሲዓን፤ ወበከመ፡ልዕልናከ፡ሠራዕኮሙ፡ለደቂቀ፡እጓለ፡እመሕያው።