Biblia Etíope · Biblia Etíope en Ge'ez

Salmos 100

መዝሙራት፡ዘዳዊት።

1መዝሙር፡ዘዳዊት። ምሕረተ፡ወፍትሕ፡አኀሊ፡ለከ።

2እዜምር፡ወእሌቡ፡ፍኖተ፡ንጹሕ፤ ማእዜ፡ትመጽእ፡ኀቤየ። ወአሐውር፡በየዋሃተ፡ልብየ፡በማእከለ፡ቤትየ።

3ወኢረሰይኩ፡ቅድመ፡አዕይንትየ፡ግብረ፡እኩየ፤ ጸላእኩ፡ገበርተ፡ዐመፃ፡

4ወኢተለወኒ፡ልብ፡ጠዋይ። ሶበ፡ተግሕሠ፡እኩይ፡እምኔየ፡ኢያእመርኩ።

5ዘየሐሚ፡ቢጾ፡በጽሚት፡ኪያሁ፡ሰደድኩ፤ ዕቡየ፡ዐይን፡ወሥሡዐ፡ልብ፡ኢይትሀወል፡ምስሌየ።

6አዕይንትየሰ፡ኀበ፡መሀይምናነ፡ምድር፡ከመ፡ኣንብሮሙ፡ምስሌየ፤ ዘየሐውር፡በፍኖት፡ንጹሕ፡ውእቱ፡ይትለአከኒ።

7ወኢይነብር፡ማእከለ፡ቤትየ፡ዘይገብር፡ትዕቢተ፤ ወኢያረትዕ፡ቅድሜየ፡ዘይነብብ፡ዐመፃ።

8በጽባሕ፡እቀትሎሙ፡ለኵሎሙ፡ኃጥኣነ፡ምድር፤ ከመ፡እሠርዎሙ፡እምሀገረ፡እግዚአብሔር፡ለኵሎሙ፡ገበርተ፡ዐመፃ።