Biblia Etíope · Biblia Etíope en Ge'ez
Salmos 1
መዝሙራት፡ዘዳዊት።1ፍካሬ፡ዘጻድቃን፡ወዘኃጥኣን፤ መዝሙር፡ዘዳዊት፡ሀሌሉያ። ብፁዕ፡ብእሲ፡ዘኢሖረ፡በምክረ፡ረሲዓን፤ ወዘኢቆመ፡ውስተ፡ፍኖተ፡ኃጥኣን፤ ወዘኢነበረ፡ውስተ፡መንበረ፡መስተሳልቃን።
2ዘዳእሙ፡ሕገ፡እግዚአብሔር፡ሥምረቱ፤ ወዘሕጎ፡ያነብብ፡መዕልተ፡ወሌሊተ።
3ወይከውን፡ከመ፡ዕፅ፡እንተ፡ትክልት፡ኀበ፡ሙሓዘ፡ማይ፤ እንተ፡ትሁብ፡ፍሬሃ፡በበጊዜሃ። ወቈጽላኒ፡ኢይትነገፍ፤ ወኵሎ፡ዘገብረ፡ይፌጽም።
4አኮ፡ከመዝ፡ኃጥኣንሰ፡አኮ፡ከመዝ፤ ዳእሙ፡ከመ፡መሬት፡ዘይግሕፍ፡ነፍስ፡እምገጸ፡ምድር።
5ወበእንተዝ፡ኢይትነሥኡ፡ረሲዓን፡እምደይን፤ ወኢኃጥኣን፡ውስተ፡ምክረ፡ጻድቃን።
6እስመ፡ያአምር፡እግዚአብሔር፡ፍኖቶሙ፡ለጻድቃን፤ ወፍኖቶሙ፡ለኃጥኣን፡ትጠፍእ።