Biblia Etíope · Biblia Etíope en Ge'ez
Sabiduría de Salomón 9
ጥበበ፡ሰሎሞን።አምላከ፡አበው፡ወእግዚኣ፡ለምሕረት፤ ዘገበርከ፡ኲሎ፡በቃልከ፤ ወበጥበብከ፡ረሰይከ፡ሰብአ፤ ከመ፡ይኰንን፡ለዘ፡እምኀቤከ፡ተገብረ፡ፍጥረት፤ ወያንሶሱ፡ዲበ፡ምድር፡በኂሩት፡ወበጽድቅ፤ ወበርቱዕ፡መንፈስ፡ኲነኔ፡ይኰንን፤ ሀበኒ፡እንተ፡ኀበ፡መናብርቲከ፡ትነብር፡ጥበብ፤ ወኢትመንነኒ፡እምደቂቅከ። እስመ፡አነ፡ገብርከ፡ወልደ፡አመትከ፤ ብእሲ፡ድዉይ፡ወሕጹጸ፡መዋዕል፤ ወትሑት፡ለአእምሮ፡ወለኲነኔ፡ወለሕግ። ወለእመኒቦ፡ዘኮነ፡ፍጹመ፡እምውሉደ፡ሰብእ፤ እምከመ፡እንተ፡እምኀቤከ፡ጥበብ፡ኢትሄሉ፤ ወኢከመ፡ምንት፡ውእቱ። አንተ፡ኀረይከኒ፡ንጉሠ፡ለሕዝብከ፤ ወመኰንነ፡ለውሉድከ፡ወለአዋልዲከ። ትቤ፡ይትሐነጽ፡ቤተ፡መቅደስ፡በደብረ፡መቅደስከ፤ ወውስተ፡ህገረ፡ምዕራፊከ፡ምሥዋዕ፤ አምሳለ፡ማኅደረ፡ቅድሳቲከ፡እንተ፡አስተዳሎከ፡እምፍጥረት። ወምስሌከ፡ጥበብ፡እንተ፡ታአምር፡ግብረከ፤ ወሀለወት፡አመ፡ትገብር፡ዓለመ፤ ወትጤይቅ፡ምንተ፡ዘያሠምር፡በቅድመ፡አዕይንቲከ፤ ወበእንተ፡ዘርቱዕ፡ትእዛዛቲከ፡አውርዳ፡እምቅዱሳን፡ሰማያት፤ ወእመንበረ፡ስብሐቲከ፡ፈንዋ፤ ከመ፡ተህሉ፡ምስሌየ፡ወትጻሙ፤ ወኣእምር፡ምንት፡ውእቱ፡ዘያሠምረከ። እስመ፡ይእቲ፡ታአምር፡ኲሎ፡ወትጤይቅ፤ ወትምርሐኒ፡በምግባረትየ፡ንጹሐ፤ ወትዕቀበኒ፡በክብራ። ወይከውን፡ሥሙረ፡ምግባርየ፤ ወእኴንን፡ሕዝበከ፡በጽድቅ፤ ወእከውን፡ዘይደሉ፡ለመናብርተ፡አቡየ። መኑ፡ውእቱ፡ሰብእ፡ዘያአምር፡ምክረ፡እግዚአብሔር፤ ወመኑ፡ዘይኄሊ፡ዘከመ፡ይፈቅድ፡እግዚአብሔር። እስመ፡ኅሊናሆሙ፡ለመዋትያን፡ፈራሂ፤ ወእቡስ፡ኅሊናነ። እስመ፡ዘይማስን፡ሥጋ፡ያከብዳ፡ለነፍስ፤ ወያበዝኅ፡ቤት፡ዘእምድር፡ለልብ፡ብዙኀ፡ትካዘ። ወበዕጹብ፡እመ፡ዐየነ፡ዘበዲበ፡ምድር፤ ወዘበእዴነ፡ንረክብ፡ዘበጻማ፤ ወዘውስተ፡ሰማይሰ፡መኑ፡ፈተነ። ወምክርከ፡መኑ፡አእመሮ፤ ሶበ፡አኮ፡አንተ፡ወህብከ፡ጥበበ፤ ወፈነውከ፡ቅዱሰ፡መንፈሰከ፡እምአርያም፡ወበዝ፡ረትዐ፡ፍኖቶሙ፡ለእለ፡ውስተ፡ምድር፤ ወዘያሠምረከ፡ተምህሩ፡ሰብእ፤ ወባቲ፡ለጥበብ፡ድኅኑ።
Texto ge'ez digitalizado en 1995 por Michal Jerabek (Library of Ethiopic Texts), a partir de la edición crítica de Dillmann. Uso no comercial permitido conservando este aviso.