Biblia Etíope · Biblia Etíope en Ge'ez
Sabiduría de Salomón 3
ጥበበ፡ሰሎሞን።ነፍሶሙ፡ለጻድቃን፡ውስተ፡እደ፡እግዚአብሔር፤ ወኢይለክፎሙ፡ሥቃይ። ተመሰሉ፡በአዕይንቲሆሙ፡ለአብዳን፡ዘሞቱ፤ ወተኈለቈት፡ለእከይ፡ፀአቶሙ፤ ወኅልፈቶመ፡ተመሰለ፡ቅጥቃጤ፡ሎሙ፤ ወእሙንቱሰ፡በሰላም፡ህለዉ። እስመ፡ለገጸ፡ሰብእ፡እመሂ፡ተኰነኑ፤ ተስፋሆሙ፡ሕይወት፡ፍጽምት። ወኅዳጠ፡ተኰኒኖሙ፡ዐቢየ፡ይዴለዉ፤ እስመ፡እግዚእብሄር፡አመከሮሙ፤ ወረከቦሙ፡እለ፡ይዴለዉ፡ሎቱ። ከመ፡ወርቅ፡ዘበምንሃብ፡አመከሮሙ፤ ወከመ፡ጽንሓሐ፡መሥዋዕት፡ተወክፎሙ፡ወበመዋዕለ፡ውሓዬሆሙ፡ይበርሁ፤ ወከመ፡ቀለምጽጽ፡ውስተ፡ብርዕ፡ይረውጹ። ወይኴንኑ፡አሕዛበ፡ወይእኅዙ፤ ወይነግሥ፡ሎሙ፡እግዚአብሄር፡ለዓለም። እለ፡ይትዌከሉ፡ቦቱ፡ያአምሩ፡ርትዐ፤ ወመሃይምናን፡በአፍቅሮ፡ይሄልዉ፡ኀቤሁ፤ እስመ፡ጸጋ፡ወክብር፡ላዕለ፡ኅሩያኒሁ። ወረሲዓንሰ፡በከመ፡ኀለዩ፡ይረክቡ፡ተግሣጸ፤ እለ፡አስተትዎ፡ለጻድቅ፡ወእምእግዚአብሔር፡ርሕቁ። ጥበበ፡ወተግሣጸ፡ዘይሜንን፡ሕርቱም፤ ወከንቱ፡ተስፋሆሙ፡ወሕማሞሙ፡ዘእንበለ፡በቊዕ፤ ወከንቱ፡ምግባራቲሆሙ፤ ወአንስቲያሆሙኒ፡አብዳት፤ ወፀዋጋን፡ውሉዶሙ፤ ወርጉም፡ትውልዶሙ። እስመ፡ብፅዕት፡መካን፡እስመ፡ንጽሕት፤ እንተ፡ኢያእመረት፡ምስካበ፡ለአብሶ፤ ትረክብ፡ፍሬ፡በሕዋጼ፡ነፍሳት። ወኅጽው፡ዘኢገብረ፡በእዴሁ፡አበሳ፤ ወኢኀለየ፡ላዕለ፡እግዚአብሄር፡እኩየ፤ እስመ፡ይትወህቦ፡ለሃይማኖት፡ጸጋ፡ኅርየት፤ ወመክፈልት፡በቤተ፡እግዚአብሄር፡ዘይትፈቶ። እስመ፡ለኄር፡ጻማ፡ፍሬሁ፡ክብር፤ ወአልቦ፡ድቀተ፡ሥርወ፡አእምሮ። ወውሉደ፡ዘማውያንሰ፡ንትጋ፡ይከውኑ፤ ወዘበአበሳ፡ምስካብ፡ዘርእ፡ይማስን። ወእመኒ፡ኖኀ፡መንበርቶሙ፡ውስተ፡ምንትኒ፡ኢይትኈለቁ፤ ወኅሱር፡በአኃሪቶሙ፡ርሥኦሙ። ወእመኒ፡ፍጡነ፡ሞቱ፡አልቦሙ፡ተስፋ፤ ወአመ፡ዕለተ፡ሐተታ፡ኑዛዜ። ለትውልድ፡ፀዋግ፡እኩይ፡አኃሪታ።
Texto ge'ez digitalizado en 1995 por Michal Jerabek (Library of Ethiopic Texts), a partir de la edición crítica de Dillmann. Uso no comercial permitido conservando este aviso.