Biblia Etíope · Biblia Etíope en Ge'ez
Reyes IV 24
መጽሐፈ፡ነገሥት፡ራብዓዊ።1ወበመዋዕሊሁ፡ዐርገ፡ናቡክድናጾር፡ንጉሠ፡ባቢሎን፡ውስተ፡ውእቱ፡ብሔር፡ወተቀንየ፡ሎቱ፡ዮአቂም፡፫ዓመተ፡ወእምዝ፡አፅረረ፡ወዐለዎ።
2ወፈነዎሙ፡እግዚአብሔር፡ለጸባኢተ፡ሶርያ፡ወለጸባኢተ፡ሞአብ፡ወለጸባኢተ፡ደቂቀ፡ዐሞን፡ወፈነዎሙ፡ብሔረ፡ይሁዳ፡ከመ፡ይቅንይዎሙ፡በከመ፡ነበበ፡እግዚአብሔር፡በእዶ፡አግብርቲሁ፡ነቢያት።
3ወባሕቱ፡መዐቱ፡ለእግዚአብሔር፡ላዕለ፡ይሁዳ፡ወከመ፡ያውፅእ፡እምቅድመ፡ገጹ፡በኀጢአተ፡ምናሴ፡ወኵሉ፡ዘገብረ።
4ወቀተለ፡ነፍሰ፡ጻድቅ፡ወመልኣ፡ለኢየሩሳሌም፡ደመ፡ንጹሐ፡ወአበየ፡እግዚአብሔር፡ተሣህሎቶሙ።
5ወኵሉ፡ነገሩ፡ለዮአቄም፡ወኵሉ፡ዘገብረ፡ናሁ፡ዝውእቱ፡ዘጽሑፍ፡ውስተ፡መጽሐፈ፡ነቢያቲሆሙ፡ለነገሥተ፡ይሁዳ።
6ወሰከበ፡ኢዮአቄም፡ምስለ፡አበዊሁ፡ወቀበርዎ፡ውስተ፡ገራሀተ፡ዖዛ፡ወነግሠ፡ኢዮአቄም፡ወልዱ፡ህየንቴሁ።
7ወኢደገመ፡እንከ፡ንጉሠ፡ግብጽ፡ወፂአ፡እምነ፡ብሔሩ፡እስመ፡አስተጋብአ፡ንጉሠ፡ባቢሎን፡እምፈለገ፡ግብጽ፡እስከ፡ፈለገ፡አፍራጢስ፡ወኵሎ፡ዘንጉሠ፡ግብጽ።
8ወ፲ወ፰ክረምቱ፡ለኢዮአቂም፡አመ፡ይነግሥ፡ወ፫አውራኀ፡ነግሠ፡በኢየሩሳሌም፡ወስማ፡ለእሙ፡ኔስተ፡ወለተ፡ኤላናታን፡እንተ፡እምኢየሩሳሌም።
9ወገብረ፡እኩየ፡ቅድመ፡እግዚአብሔር፡ከመ፡ኵሉ፡ዘገብሩ፡አበዊሁ።
10ወውእተ፡አሚረ፡ዐርገ፡ናቡከደናጾር፡ንጉሠ፡ባቢሎን፡ውስተ፡ኢየሩሳሌም፡ወተጸወነት፡ሀገር፡ወተጸወኑ።
11ወናቡከደነጾር፡ንጉሠ፡ባቢሎን፡መጽአ፡ኀበ፡ሀገር፡ይትቃተሎሙ፡ምስለ፡አሕዛቢሁ።
12ወወፅአ፡ኢዮአቄም፡ንጉሠ፡ይሁዳ፡ኀበ፡ንጉሠ፡ባቢሎን፡ምስለ፡ደቂቁ፡ወመላእክቲሁ፡ወኅጽዋኒሁ፡ወአኀዞ፡ንጉሠ፡ባቢሎን፡ወአስተጋብአ፡አመ፡፰ዓመተ፡መንግሥቱ።
13ወአውፅአ፡ኵሎ፡መዛግብተ፡ቤተ፡እግዚአብሔር፡ወመዛግብተ፡ቤተ፡ንጉሥኒ፡ወሰበረ፡ኵሎ፡ንዋየ፡ወርቅ፡ዘገብረ፡ሰሎሞን፡ንጉሠ፡እስራኤል፡ለቤተ፡እግዚአብሔር፡በከመ፡ይቤ፡እግዚአብሔር።
14ወአፍለሳ፡ለኢየሩሳሌም፡ወለኵሉ፡መላእክቲሆሙ፡ወዐበይቶሙ፡ወጽኑዓኒሆሙ፡ኵሎ፡ፄዋሁ፡፼ወኵሎ፡ኬነቶሙ፡ወጸረብቶሙኒ፡ወአልቦ፡ዘአትረፈ፡ዘእንበለ፡ቢጸ፡ነዳያን።
15ወአፍለሶ፡ለኢዮአቄም፡ባቢሎን፡ወለእሙ፡ለንጉሥ፡ወአንስትያ፡ንጉሥ፡ወኅጽዋኒሁ፡ወዐበይተ፡ብሔር፡እፍለሶሙ፡ኵሎሙ፡ባቢሎን።
16ወኵሎ፡መላእክተ፡ሰራዊቶሙ፡፸፻ብእሴ፡ወኬነቶሙሰ፡ወጸረብቶሙ፡፲፻ኵሎ፡ጽኑዓነ፡እለ፡ይክሉ፡ተቃትሎ፡አፍለሶሙ፡ለኵሎሙ፡ንጉሥ፡ውስተ፡ባቢሎን።
17ወእንገሦ፡ንጉሠ፡ባቢሎን፡ለናታንያን፡እኁሁ፡ለአቡሁ፡ህየንቴሁ፡ወወለጠ፡ስሞ፡ሴዴቅያስ፡ሰመዮ።
18፳ወ፩ክረምቱ፡ለሴዴቄያን፡አመ፡ይነግሥ፡ወ፲ወ፩ክረምተ፡ነግሠ፡በኢየሩሳሌም፡ወስማ፡ለእሙ፡አሚጠል፡ወለተ፡ኤርምያስ።
19ወገብረ፡እኩየ፡ቅድመ፡እግዚአብሔር፡ከመ፡ኵሉ፡ዘገብረ፡ኢዮአቄም።
20እስመ፡ኮነ፡መዐተ፡እግዚአብሔር፡ላዕለ፡ኢየሩሳሌም፡ወላዕለ፡ይሁዳ፡እስከ፡አውፅኦሙ፡እምቅድመ፡ገጹ፡ወአፅረሮ፡ሴዴቅያን፡ለንጉሠ፡ባቢሎን።