Biblia Etíope · Biblia Etíope en Ge'ez

Reyes IV 20

መጽሐፈ፡ነገሥት፡ራብዓዊ።

1ወውእተ፡አሚረ፡ደወየ፡ሕዝቅያስ፡ወበጽሐ፡ለመዊት፡ወቦአ፡ኢሳይያስ፡ነቢይ፡ወልደ፡አሞጽ፡ኀቤሁ፡ወይቤሎ፡ከመዝ፡ይቤ፡እግዚአብሔር፡ሥራዕ፡ቤተከአ፡እስመ፡ትመውትአ፡ወኢተሐዩእ።

2ወሜጠ፡ገጾ፡ሕዝቅያስ፡ኀበ፡አረፍት፡ወጸለየ፡ኀበ፡እግዚአብሔር፡እንዘ፡ይሴብሕ፤

3እግዚኦ፡ተዘከር፡ከመ፡በጽድቅ፡ሖርኩ፡ቅድሜከ፡ወበፍጹም፡ልብ፡ገበርክዋ፡ለሠናይት፡ወበከየ፡ሕዝቅያስ፡ዐቢየ፡ብካየ።

4ወበጽሐ፡ኢሳይያስ፡ውስተ፡ማእከላዊ፡በጸድ፡ወነበቦ፡እግዚአብሔር፡ወይቤሎ፤

5ግባእ፡ወበሎ፡ለሕዝቅያስ፡ንጉሦሙ፡ለሕዝብየ፡ከመዝ፡ይቤ፡እግዚአብሔር፡አምላከ፡ዳዊት፡አቡከ፡ሰማዕኩአ፡ጸሎተከአ፡ወርኢኩከአ፡አንብዕከ፤ ናሁ፡እፌውሰከ፡አነ፤ እስከ፡ሠሉስ፡መዋዕል፡ተዐርግ፡ቤተ፡እግዚአብሔርአ።

6ወእዌስከከ፡ላዕለ፡ክራማቲከአ፡፲ወ፭ዓመተ፡ወአድኅነከ፡እምእዴሁ፡ለንጉሠ፡ፋርስ፡ወለዛኒ፡ሀገርአ፡ኣጸንዓ፡በእንቲአየ፡[ወበ]በይነ፡ዳዊት፡ገብርየአ።

7ወይቤሎ፡ንሣእ፡ዐጽቀ፡በለስ፡ወጢእ፡ቦቱ፡ኀበ፡ተሐምም፡ውተሐዩ።

8ወይቤሎ፡ሕዝቅያስ፡ለኢሳይያስ፡ምንት፡ትእምርቱ፡ከመ፡ያሕይወኒ፡እግዚአብሔር፡ወአዐርግ፡ቤተ፡እግዚአብሔር፡እስከ፡ሠሉስ።

9ወይቤሎ፡ኢሳይያስ፡ዝውእቱ፡ትእምርቱ፡ዘእምኀበ፡እግዚአብሔር፡ከመ፡ይግበር፡እግዚአብሔር፡ቃሎ፡ዘነበበ፤ ይወርድ፡ጽላሎት፡ውስተ፡፲መዓርጋት፡አመ፡ይገብእ፡፲መዓርጋተ።

10ወይቤሎ፡ሕዝቅያስ፡ይገብእ፡ጽላሎት፡ድኅሬሁ፡፲መዐርጋተ።

11ወጸርኀ፡ኢሳይያስ፡ነቢይ፡ኀበ፡እግዚአብሔር፡ወገብአ፡ጽላሎት፡ድኅሬሁ፡፲መዐርጋተ።

12ወይእተ፡አሚረ፡ለአከ፡መሮዳኅ፡ወልደ፡በለዓን፡ንጉሠ፡ባቢሎን፡መጻሕፍተ፡ወመሐና፡ኀበ፡ሕዝቅያስ፡እስመ፡ስምዐ፡ከመ፡ደወየ፡ሕዝቅያስ።

13ወተፈሥሐ፡ሕዝቅያስ፡በእንቲአሁ፡ወአርአዮሙ፡ኵሎ፡ቤተ፡ኒቆታሁ፡ወርቀ፡ወብሩረ፡ወአፈዋተኒ፡ወቅብአኒ፡ቡሩከ፡ወቤተ፡ንዋይኒ፡ወኵሎ፡ዘተረክበ፡ውስተ፡ቤተ፡መዝገቡ፡ወአልቦ፡ኀበ፡ኢያርአዮሙ፡ሕዝቅያስ፡ዘውስተ፡ቤቱ፡ወኵሉ፡ምኵናኑ።

14ወቦአ፡ኢሳይያስ፡ነቢይ፡ኀበ፡ሕዝቅያስ፡ንጉሥ፡ወይቤሎ፡ምንተኑ፡ተናገሩ፡እሉ፡ዕደው፡ወእምአይቴ፡መጽኡ፡ኀቤከ፡ወይቤሎ፡ሕዝቅያስ፡እምርሑቅ፡ብሔር፡መጽኡ፡ኀቤየ፡እምባቢሎን።

15ወይቤሎ፡ምንተ፡አርአይኮሙ፡ወይቤሎ፡ኵሎ፡ዘውስተ፡ቤትየ፡ርእዩ፡ወዓዲ፡ዘውስተ፡መዘግብትየኒ፡ርእዩ።

16ወይቤሎ፡ኢሳይያስ፡ለሕዝቅያስ፡ስማዕ፡ቃለ፡እግዚአብሔር።

17ናሁ፡ይበጽሕ፡መዋዕል፡ይቤ፡እግዚአብሔር፡ወይነሥኡ፡ኵሎ፡ዘውስተ፡ቤትከ፡ወኵሎ፡ዘዘገቡ፡አበዊከ፡እስከ፡ዮም፡ወይወስዱ፡ባቢሎን፡ወአልቦ፡ዘያተርፉ፡ይቤ፡እግዚአብሔር።

18ወይነሥእዎሙ፡ለውሉድከ፡ለእለ፡ወለድከ፡ወይሬስይዎሙ፡ኅጽዋነ፡ለቤተ፡ንጉሠ፡ባቢሎን።

19ወይቤሎ፡ሕዝቅያስ፡ሠናየ፡ነበበ፡እግዚአብሔር፡ወይኩን፡ሰላም፡በመዋዕልየ።

20ወኵሉ፡ነገሩ፡ለሕዝቅያስ፡ወኵሉ፡ኀይሉ፡ወኵሉ፡ዘገብረ፡በቄርኔ፡ወበሙሓዘ፡ማይ፡ወዘአብአ፡ማየ፡ውስተ፡ሀገር፡ዝንቱ፡ውእቱ፡ዘጽሑፍ፡ውስተ፡መጽሐፈ፡ነቢያቲሆሙ፡ለነገሥተ፡ይሁዳ።

21ወሰከበ፡ሕዝቅያስ፡ምስለ፡አበዊሁ፡ወቀበርዎ፡ውስተ፡ሀገረ፡ዳዊት፡ወነግሠ፡ምናሴ፡ወልዱ፡ህየንቴሁ።