Biblia Etíope · Biblia Etíope en Ge'ez

Reyes IV 11

መጽሐፈ፡ነገሥት፡ራብዓዊ።

1ወጎቶልያ፡እሙ፡ለአካዝያስ፡ሶበ፡ርእየት፡ከመ፡ሞተ፡ወልዳ፡ወጠፍአ፡ዘመደ፡መንግሥት፤

2ነሥአ[ቶ]፡ኢዮሰቡሔ፡ወለተ፡ንጉሥ፡[ኢዮራም፡እኅቱ፡ለአካዝያስ፡ለኢዮአስ፡ወልደ፡አካዝያስ፡] ሰረቀቶ፡እማእከለ፡ደቀቀ፡ንጉሥ፡እለ፡ቀተሉ፡ወለሐፃኒቱ፡ወኀብአቶ፡ውሳጢተ፡ጽርሕ፡እምጎቶልያ፡ወኢቀተለቶ።

3ወኀብአቶ፡፮ዓመተ፡ወጎቶልያ፡ለሊሃ፡ነግሠት፡ለብሔር፡፮ዓመተ።

4ወአመ፡ሳብዕ፡ዓም፡ለአከ፡ዮዳሔ፡ወአምጽኦሙ፡ለመሳፍንት፡ለኮሪ፡ወለራሲን፡ወአብኦሙ፡ኀቤሁ፡ውስተ፡ቤተ፡እግዚአብሔር፡ወተካየዶሙ፡ኪዳነ፡እግዚአብሔር፡ወአምሐሎሙ፡በቅድመ፡እግዚአብሔር፡ወአርአዮሙ፡ዮዳሔ፡ወልደ፡ንጉሥ።

5ወይቤሎሙ፡ከመዝ፡ግበሩ፤ ሣልስተ፡እዴክሙ፡ባኡ፡በዕለተ፡ሰንበት፡ወዕቀቡ፡ቤተ፡ንጉሥ፡ወንበሩ፡ውስተ፡አንቀጽ፤

6ወሣልስተ፡እዴክሙ፡ውስተ፡ስፍሐተ፡ፍናዌ፡ንበሩ፡መንገለ፡አንቀጽ፡ዘዐውደ፡ድኅሬሆሙ፡ለወዐልተ፡ንጉሥ፡ወዕቀቡ፡ወአጽንዑ፡ቤተ።

7ወ፪እድ፡እምውስቴትክሙ፡ለኵሉ፡ዘይወጽእ፡በዕለተ፡ሰንበት፡ወዕቀቡ፡ቤተ፡እግዚአብሔር፡ኀበ፡ንጉሥ፡ሀለወ።

8ወዕግትዎ፡ለንጉሥ፡ኵልክሙ፡እንዘ፡ትጸውሩ፡ንዋየ፡ሐቅልክሙ፡ወኵሉ፡ዘቦአ፡ውስተ፡አዴሮታ፡ቅትሉ፡ወእለኒ፡ምስለ፡ንጉሥ፡ይበውኡ፡ወይወፅኡ።

9ወገብሩ፡መሳፍንት፡ኵሎ፡ዘአዘዞሙ፡ዮዳሔ፡ጠቢብ፡ወነሥኡ፡ኵሎሙ፡ሰብኦሙ፡ወአስተጋብኡ፡ኵሎሙ፡እለ፡ቦኡ፡በዕለተ፡ሰንበት፡ወሖሩ፡ኀበ፡ዮዳሔ፡ካህን።

10ወወሀቦሙ፡ዮዳሔ፡ለመሳፍንት፡አርማሒሁ፡ለዳዊት፡ወንዋየ፡ሐቅሉ፡ዘሀሎ፡ውስተ፡ቤተ፡እግዚአብሔር።

11ወቆሙ፡ወዓሊሁ፡ምስለ፡ንዋየ፡ሐቅሎሙ፡መንገለ፡የማነ፡ቤት፡እስከ፡መንገለ፡ፀጋመ፡ቤት፡ዘምሥዋዕ፡ወዐገትዎ፡ለንጉሥ።

12ወአውፅእዎ፡ለወልደ፡ንጉሥ፡ወአልበሶ፡ልብሰ፡ኢያዜር፡ዘስምዕ፡ወአንገሦ፡ወቀብኦ፡ወጠፍሑ፡እደዊሆሙ፡ወይቤሉ፡ሕያው፡አበ፡ነጋሢ።

13ወሰምዐት፡ጎቶልያ፡ድምፀ፡ሕዝብ፡እንዘ፡ይረውጹ፡ወቦአት፡ኀበ፡ሕዝብ፡ቤተ፡እግዚአብሔር።

14ሪጋረከበቶ፡ለንጉሥ፡ይቀውም፡ወያሰምክ፡ውስተ፡ዐምድ፡በከመ፡ሕጎሙ፡ወቅድሜሁ፡ይነፍሑ፡ቀርነ፡ወመዝሙራተኒ፡ወኵሉ፡ሕዝበ፡ምድር፡ይትፌሥሑ፡ወይነፍሑ፡ቀርነ፡ወሠጠጠት፡አልባሲሃ፡ጎቶልያ፡ወዐውየወት፡ወትቤ፡ማዕሌት፡መዕሌት።

15ወአዘዞሙ፡ዮዳሔ፡ካህን፡ለመሳፍንት፡ወይቤሎሙ፡ለመላእክተ፡ሰራዊት፡አውፅእዋ፡እምውስተ፡አዴሮታ፡ወኵሉ፡ዘተለዋ፡ቅትልዎ፡በኀጺን፡እስመ፡ካህን፡አዘዘ፡ከመ፡ኢይቅትልዋ፡በቤተ፡እግዚአብሔር።

16ወአኀዝዋ፡ወወሰድዋ፡ፍኖተ፡አፍራስ፡ዘቤተ፡ንጉሥ፡ወቀተልዋ፡በህየ።

17ወአስተካየደ፡ዮዳሔ፡ኪዳነ፡ማእካለ፡ቤተ፡እግዚአብሔር፡ወማእከለ፡ቤተ፡ንጉሥ፡ወማእከለ፡ሕዝብ፡ከመ፡ይኩኑ፡ሕዝበ፡እግዚአብሔር።

18ወቦኡ፡ኵሉ፡ሕዝብ፡ዘብሔር፡ቤተ፡በዓል፡ወሰበርዎ፡ወነሰቱ፡ምሥዋዓቲሁ፡ወቀጥቀጡ፡አምሳሊሁ፡በሕቁ፡ወቀተልዎ፡ለማታን፡ለማሬ፡በዓል፡በቀድመ፡ምሥዋዕ፡ወሤመ፡ካህን፡መገብተ፡ለቤተ፡እግዚአብሔር።

19ወነሥኦሙ፡ለመሳፍንት፡ለኮሪ፡ወለራሲን፡ወለኵሉ፡ሕዝበ፡ምድር፡ወአውጽእዎ፡ለንጉሥ፡እምቤተ፡እግዚአብሔር፡ወወሰዶ፡እንተ፡አንቀጸ፡ፍኖቶሙ፡ለ[ወዐልተ]፡ቤተ፡ንጉሥ፡ወአንበሮ፡ውስተ፡መንበረ፡ነገሥት።

20ወተፈሥሑ፡ኵሉ፡ሕዝበ፡ምድር፡ወነበረት፡እንከ፡ሀገርኒ፡ዳኅና፡ወለጎቶልያሰ፡ቀተልዋ፡በኀጺን፡በቤተ፡ንጉሥ።

21ወ፯ክረምቱ፡ለኢዮአስ፡አመ፡ይነግሥ።