Biblia Etíope · Biblia Etíope en Ge'ez
Reyes III 6
መጽሐፈ፡ነገሥት፡ሣልሳዊ።1ወእምዝ፡አመ፡ኮነ፡፬፻፹ወ፬ዓመት፡እምአመ፡ወፅኡ፡ደቂቀ፡እስራኤል፡እምግብጽ፡አመ፡ራብዕ፡ዓም፡እምዘ፡ነግሠ፡ሰሎሞን፡ንጉሥ፡ላዕለ፡እስራኤል፡በካልእ፡ወርኅ፤
2አዘዘ፡ንጉሥ፡ያምጽኡ፡ዐበይተ፡እብነ፡ወሠናያተ፡ወወደዩ፡ውስተ፡ውእቱ፡ቤት፡ወእብነ፡ዘኢኮነ፡ውቁረ።
3ወወቀርዎን፡ደቀ፡ሰሎሞን፡ወደቀ፡ኪረም፡ወወደይዎን።
4ወበራብዕ፡ዓመት፡ሣረሮ፡ለቤተ፡እግዚአብሔር፡በወርኀ፡ኔሳን፡በካልእ፡ወርኅ።
5አመ፡፲ወ፩ዓመት፡ወወርኁ፡በዓድ፡ወውስተ፡ወርኅ፡ሳምን፡ኀልቀ፡ኵሉ፡ሥርዐቱ፡ወኵሉ፡ግብረቱ።
6ወውእቱ፡ቤት፡ዘሐነጸ፡ሰሎሞን፡ንጉሥ፡ለእግዚአብሔር፡፳በእመት፡ኑኁ፡ወ፳በእመት፡ርሕቡ፡ወ፳በእመት፡ላዕሉ።
7ወኤላም፡ቅድመ፡መቅደሱ፡፳በእመት፡ኑኁ፡ውስተ፡ርኅበ፡ቤቱ፡ወ፳በእመት፡ርኅቡ፡ቅድመ፡ቤቱ፡ወሐነጸ፡ቤቶ፡ወፈጸመ።
8ወገብረ፡ለውእቱ፡ቤት፡መሳክወ፡ኅቡኣተ፡ወኅቡኣነ።
9ወአስተቀጸለ፡አረፍቶ፡ለቤተ፡መቅደስ፡በሜልንታራ፡ወለዳቤርሂ፡ወገብረ፡ገበዋቲሁ፡ዘዐውዱ።
10ወአረፍተ፡ገቦሁ፡እምታሕቴሁ፡ኀምስ፡በእመት፡ርኅቡ፡ወለማእከላዊ፡ስድስ፡በእመት፡ወለሣልስኒ፡ስብዕ፡በእመት፡ርኅቡ፡እስመ፡አስተራሐቆ፡ለመኣዝነ፡ቤቱ፡ዘዐውዱ፡ከመ፡ኢይትቃረብ፡አረፍተ፡ቤቱ።
11ወተሐንጸ፡ቤቱ፡በእብን፡ዐበይት፡ዘኢተወቅረ፡ወመፍጽሐ፡ወድቍንድቈ፡ወኵሎ፡መብዕለ፡ኀፂን፡ኢተሰምዐ፡በህየ፡በውስተ፡ቤቱ፡እንዘ፡የሐንጽዎ።
12ወዴዴ፡ዘመንገለ፡ገቦ፡ቤት፡ዘየማን፡ዘእምነ፡ታሕቱ፡ወቦ፡መዓርገ፡ማእከለ፡ወእምነ፡ውእቱ፡መዓርግ፡ውስተ፡ተሥላስ።
13ወሐነጸ፡ቤቶ፡ወፈጸሞ፡ወጠፈሮ፡በዕፀወ፡ቄድሮስ።
14ወሐነጸ፡ኵሎ፡ቤቶ፡ወአሰሮ፡በወኣስርት፡ዘዘ፡ኀምስ፡በእመት፡ኑኁ፡ወአስተአሰሮ፡በመሠንይ፡ዘዕፀወ፡ቄድሮስ።
15ወሐነጸ፡አረፍተ፡ቤቱ፡በዕፀወ፡ቄድሮስ፡እምነ፡ምድረ፡አረፋቲሁ፡ለቤቱ፡እስከ፡ጠፈሩ፡ወእስከ፡ሠራዊቱ፡ወኵሎ፡አረፋቲሁ፡በዕፀው፡እንተ፡ውስጥ፡ገለዎ፡ወአስተአኀዞ፡እንተ፡ውስጥ፡ቤቶ፡በዕፀወ፡ጴውቂና፡በዘ፡ገበዋቲሁ።
16ወሐነጸ፡፳በእመት፡እምነ፡ጽንፈ፡አረፍት፡ዘገቦሁ፡ዘ፩እምነ፡ምድሩ፡እስከ፡ሠራዊቱ፡ወገብረ፡እምነ፡ዳቤር፡ውስተ፡ቅድስተ፡ቅዱሳን።
17ወ፵በእመት፡ውእቱ፡ጽርሑ፤
18እምቅድመ፡ዳቢር፡ማእከለ፡ቤቱ፡እንተ፡ውስጥ፡ከመ፡ይንበር፡ህየ፡ታቦተ፡ሕጉ፡ለእግዚአብሔር።
19ወ፳በእመት፡ኑኁ፡ወ፳በእመት፡ርኅቡ፡ወ፳በእመት፡ላዕሉ፡ወቀፈሎ፡በወርቅ፡ወአሰርገዎ፡ወገብረ፡ምሥዋዕ፡ቅድመ፡ዳቤር፡ወቀፈሎ፡በወርቅ።
20ወለኵሉ፡ቤቱ፡ቀፈሎ፡በወርቅ፡ንጹሕ፡ኵሎ፡ቤቶ።
21ወገብረ፡ውስተ፡ዳቤር፡፪ኪሩቤል፡ወ[ዕሥር፡] በእመት፡ቆሙ።
22ወኀምስ፡በእመት፡ክንፉ፡ለ፩ኪሩብ፡ወኀምስ፡በእመት፡ለካልእ፡ወኮነ፡ዐሥር፡በእመት፡ማእከሎሙ፡ኀበ፡ያስተራክቡ፡ክነፊሆሙ።
23ወከማሁ፡አምጣኒሆሙ፡ለክልኤሆሙ፡ዕሩይ፡ወ፩ግብረቶሙ፡ለክልኤሆሙ።
24ለኪሩብ፡ዐሥር፡በእመት፡ወከማሁ፡ካልኡኒ፡ኪሩብ።
25ወክልኤሆሙ፡ኪሩብ፡ማእከለ፡ቤት፡ውስጢ፡እሙንቱ፡ወስፋሕ፡ክነፊሆሙ፡ወ፩ክንፉ፡ይጐድእ፡እስከ፡አረፍተ፡ቤት፡ወዘካልኡኒ፡ኪሩብ፡ክንፉ፡ይጐድእ፡በካልእ፡አረፍት፡ወእልክቱ፡ካልኣን፡ክነፊሆሙ፡በማእከለ፡ቤት፡ደትኣኀዙ፡በበይናቲሆሙ፡ክንፋ፡ምስለ፡ክንፍ።
26ወቀፈሎሙ፡ለኪሩብ፡በወርቅ።
27ወለኵሉ፡አረፍተ፡ቤቱ፡ዘዐውዱ፡አግለፈ፡ወሠዐለ፡ሥዕለ፡ኪሩብ፡ወዘአፍአሰ፡ወዘውስጥኒ፡በቀልተ፡አሥዐለ።
28ወምድረ፡ቤቱ፡አቅፈለ፡በወርቅ፡በውስጥኒ፡ወለጸናፈኒ።
29ወለኆኅተ፡ዳቤር፡ገብረ፡መዓጹተ፡በዕፀ፡አርቄውቲኖን፡ወገብረ፡ሕዋራተ፡እንተ፡መርብዕት፤
30ለክልኤሆን፡ኆኅት፡በዕፀ፡ጴውቄና፡ወ፪መዓጹቲሃ፡ለአሐቲ፡ኆኅት፡ወድርኵኵቶን፡ወለካልኡኒ፡ኆኅት፡፪መዓጹቲሃ፡ወድርኵኵታቲሃ።
31ወግሉፍ፡ውስቴቶን፡ኪሩብ፡ወበቀልት፡ወመንጠዋልዒሆን፡ዘወርቅ፡ወቅፉላት፡በወርቅ፡ወውዱዳት፡እስከ፡መድረኮን።
32ወነደቀ፡ለዐጸድ፡ውሳጢ፡ሠላስ፡አረፍተ፡ዘኢኮነ፡በውቅሮ፡ወአሕቀፎን፡ኵሎ፡ዐውዶን፡በሰሊዳት፡ዘዕፀ፡ቂድሮኖን።
33ወገብረ፡መንጦላዕተ፡ለዐጸደ፡ኤላም፡ዘውስተ፡ቤት፡ዘቅድመ፡መቅደስ።