Biblia Etíope · Biblia Etíope en Ge'ez

Reyes I 4

መጽሐፈ፡ነገሥት፡ቀዳማዊ።

1ወእምዝ፡ኮነ፡በእማንቱ፡መዋዕል፡ተጋብኡ፡ኢሎፍሊ፡ላዕለ፡እስራኤል፡ከመ፡ይቅትልዎሙ፡ወወጽኡ፡እስራኤል፡ወተቀበልዎሙ፡ይትቃተልዎሙ፡ወተዐየኑ፡ውስተ፡አቤኔዜር፡ወኢሎፍሊ፡ተዐየኑ፡ውስተ፡አፌቅ።

2ወተአኀዝዎሙ፡ኢሎፍሊ፡ወተቃተልዎሙ፡ለእስራኤል፡ወነትዑ፡እስራኤል፡ወወደቁ፡ቅድመ፡ኢሎፍሊ፡ወሞቱ፡በውስተ፡ቀትል፡በገዳም፡አርብዓ፡ምእት፡ብእሲ።

3ወገብኡ፡ሕዝብ፡ውስተ፡ትዕይንት፡ወይቤሉ፡ሊቃውንተ፡እስራኤል፡በበይነ፡ምንት፡አውደቀነ፡እግዚአብሔር፡ዮም፡ቅድሜሆሙ፡ለኢሎፍሊ፤ ንንሣእ፡ታቦተ፡አምላክነ፡እምሴሎም፡ወትሖር፡ምስሌነ፡ወታድኅነነ፡እምነ፡እዴሆሙ፡ለፀርነ።

4ወለአኩ፡ሕዝብ፡ውስተ፡ሴሎም፡ወአምጽእዋ፡እምህየ፡ለታቦተ፡እግዚአብሔር፡ምስለ፡ኪሩብ፡ዘይነብር፡ላዕሌሃ፡ወክልኤሆሙ፡ደቂቀ፡ኤሊ፡ምስለ፡ታቦት፡ኦፍኒ፡ወፊንሐስ።

5ወሶበ፡በጽሐት፡ታቦተ፡እግዚአብሔር፡ውስተ፡ትዕይንት፡ወውዑ፡እስራኤል፡በዐቢይ፡ቃል፡ወደንገፀት፡ምድር።

6ወሰምዑ፡ኢሎፍሊ፡ዘንተ፡ውውዓ፡ወይቤሉ፡ኢሎፍሊ፡ምንት፡ውእቱ፡ዝንቱ፡ውውዓ፡ዐቢይ፡ዘውስተ፡ተዓይኒሆሙ፡ለዕብራውያን፤ ወአእመሩ፡ከመ፡ታቦተ፡እግዚአብሔር፡በጽሐት፡ውስተ፡ትዕይንት።

7ወይቤሉ፡ኢሎፍሊ፡ሶበ፡ፈርሁ፡አሌ፡ለነ፡እስመ፡አማልክት፡መጽኡ፡ኀቤሆሙ፡ለእሉ።

8አድኅነነ፡እግዚኦ፡ዮም፡እስመ፡ኢኮነ፡ከመዝ፡ትካት፤ አሌ፡ለነ፡መኑ፡ያድኅነነ፡አምእዴሆሙ፡ለእሉ፡አማልክት፡ጽኑዓን፤ አሉ፡እሙንቱ፡አማልክት፡እለ፡ቀተልዎሙ፡ለግብጽ፡በኵሉ፡መቅሠፍት፡ወበገዳምኒ።

9ጸንሁ፡ወኮኑ፡ዕደወ፡ወተቃተልዎሙ።

10ወእምዝ፡ሶበ፡ተቃተልዎሙ፡ወድቁ፡ሰብአ፡እስራኤል፡ቅድመ፡ኢሎፍሊ፡ወጐዩ፡ኵሎሙ፡ውስተ፡አብያቲሆሙ፡ወኮነ፡ቀትል፡ዐቢይ፡ጥቀ፡ወወድቁ፡እምነ፡እስራኤል፡ሠለስቱ፡አልፍ፡ብእሲ።

11ወነሥእዋ፡ለታቦተ፡እግዚአብሔር፡ወሞቱ፡ክልኤሆሙ፡ደቂቁ፡ለኤሊ፡ኦፍኒ፡ወፈንሐስ።

12ወሮጸ፡ብእሲ፡ኢያሜናይ፡እምኀበ፡ይትቃተሉ፡ወበጽሐ፡ውስተ፡ሴሎም፡በይእቲ፡ዕለት፡ወሥጡጥ፡አልባሲሁ፡ወመሬት፡ውስተ፡ርእሱ።

13ወበጽሐ፡[ወናሁ፡ኤሊ፡]ይነብር፡ውስተ፡መንበር፡ኀበ፡ኆኅተ፡አንቀጽ፡ወይኔጽር፡መንገለ፡ፍኖት፡እስመ፡ይትሐዘብ፡ልቡ፡በእንተ፡ታቦተ፡እግዚአብሔር፤ ወቦአ፡ውእቱ፡ብእሲ፡ውስተ፡ሀገር፡ወዜነወ፡ወጸርኀት፡ሀገር።

14ወሰምዐ፡ኤሊ፡ቃለ፡ጽራኀ፡ወይቤ፡ምንት፡ውእቱ፡ዝንቱ፡ጽራኀ፤ ወሮጸ፡ውእቱ፡ብእሲ፡ወቦአ፡ወዜነዎ፡ለኤሊ።

15ወኤሊሰ፡ወልደ፡ተስዓ፡ዓም፡ውእቱ፡ወአዕይንቲሁኒ፡ተሐምጋ፡ወኢይሬኢ።

16ወይቤሎሙ፡ኤሊ፡ስዕደው፡እለ፡ይቀውሙ፡ኀቤሁ፡ምንት፡ውእቱ፡ዝንቱ፡ድምፀ፡ቃል፡ወቦአ፡ፍጡነ፡ኀበ፡ኤሊ፡ዝኩ፡ብእሲ፡ወይቤሎ፡አነ፡ውእቱ፡ብእሲ፡ዘመጻእኩ፡እምነ፡ትዕይንት፡እምኀበ፡ቀትል፡ጐየይኩ፡አነ፡ዮም፡ወይቤሎ፡ኤሊ፡ምንትኑ፡ነገሩ፡ዘኮነ፡ወልድየ።

17ወአውሥአ፡ውእቱ፡ብእሲ፡ወይቤሎ፡ጐዩ፡ሰብአ፡እስራኤል፡እምቅድመ፡ገጾሙ፡ስኢሎፍሊ፡ወኮነ፡ዐቢይ፡ቀትል፡ላዕለ፡ሕዝብ፡ወሞቱ፡ክልኤሆሙ፡ደቂቅከ፡ወነሥእዋ፡ለታቦተ፡እግዚአብሔር።

18ወእምዝ፡ተዘከራ፡ለታቦተ፡እግዚአብሔር፡ወወድቀ፡እምውስተ፡መንበሩ፡ድኅሪተ፡ኀበ፡ኆኀት፡[ወተሰብረ፡ዘባኑ፡] ወሞተ፡እስመ፡ልሂቅ፡ብእሲሁ፡ወክቡድ፡ውእቱ፡ወኰነኖሙ፡ውእቱ፡ለእስራኤል፡፵ዓመተ።

19ወመርዓቱኒ፡ብእሲተ፡ፊንሐስ፡ሀስወት፡ትወልድ፡ወሶበ፡ሰምዐት፡ከመ፡ነሥእዋ፡ለታቦተ፡እግዚአብሔር፡ወከመ፡ሞተ፡ሐሙሃ፡በከየት፡ወእምዝ፡ወለደት፡ወተመይጠ፡ላዕሌሃ፡ሕማማ።

20ወሞተት፡በእማንቱ፡መዋዕል፡ወይቤላሃ፡አንስት፡እለ፡ይቀውማ፡ኀቤሃ፡ኢትፍርሂ፡እስመ፡ወልደ፡ወለድኪ፡ወኢያውሥአቶን፡ወኢያእመረ፡ልበ።

21ወሰመይዎ፡ለውእቱ፡ሕፃን፡ዌቦርኮኤቦት፡በእንተ፡ታቦተ፡እግዚአብሔር፡ወበእንተ፡ሐሙሃ፡ወበእንተ፡ምታ።

22ጠይቤሉ፡ፈለሰ፡ክብሮሙ፡ለእስራኤል፡እስመ፡ነሥእዋ፡ለታቦተ፡እግዚአብሔር።