Biblia Etíope · Biblia Etíope en Ge'ez
Reyes I 27
መጽሐፈ፡ነገሥት፡ቀዳማዊ።1ወይቤ፡ዳዊት፡በልቡ፡እንዘ፡ይብል፡እምይእዜሰ፡እንከሰ፡እመውት፡አሐተ፡ዕለተ፡በእዴሁ፡ለሳኦል፡ወአልቦ፡ዘይኄይሰኒ፡እንበለ፡አምስጦ፡ውስተ፡ብሔረ፡ኢሎፍሊ፡ወለእመ፡መጽአ፡ንጉሥ፡ወኀሠሠኒ፡ውስተ፡ኵሉ፡ደወለ፡እስራኤል፡ወኣመስጥ፡እምእዴሁ።
2ወተንሥአ፡ዳዊት፡ወ፬፻ዕደው፡እለ፡ምስሌሁ፡ወሖሩ፡ኀበ፡አንኩስ፡ወልደ፡አሜኅ፡ንጉሠ፡ጌት።
3ወነበረ፡ዳዊት፡ኀበ፡አንኩስ፡ውእቱ፡ወዕደው፡እለ፡ምስሌሁ፡ወኵሎሙ፡ምስለ፡ሰብኣ፡ቤቶሙ፡ወዳዊትኒ፡ምስለ፡ክልኤሆን፡አንስቲያሁ፡አኪናሖም፡[ኢይዝ]ራኤላዊት፡ወአቤግያ፡ብእሲተ፡ናባል፡ቀርሜላዊ።
4ወዜነውዎ፡ለሳኦል፡ከመ፡ተኀጥአ፡ዳዊት፡ውስተ፡ጌት፡ወኢደገመ፡እንከ፡ኀሢሦቶ።
5ወይቤሎ፡ዳዊት፡ለአንኩስ፡እመ፡ረከበ፡ሞገሰ፡ገብርከ፡ቅድመ፡አዕይንቲከ፡ሀበኒ፡መካነ፡በውስተ፡አሐቲ፡እምነ፡አህጉር፡እለ፡ውስተ፡ሐቅል፡ወእነብር፡ህየ፡ወለምንት፡ይነብር፡ገብርከ፡ውስተ፡ሀገረ፡መንግሥት፡ምስሌከ።
6ወወሀቦ፡ይእተ፡አሚረ፡ሴቄላቅሃ፡ወኮነት፡ሴቄላቅ፡ለንጉሠ፡ይሁዳ፡እስከ፡ዛቲ፡ዕለት።
7ወኮነ፡ኍልቄ፡መዋዕል፡ዘነበረ፡ዳዊት፡ውስተ፡ሐቅለ፡ኢሎፍሊ፡፬አውራኀ።
8ወዐርገ፡ዳዊት፡ወሰብእ፡እለ፡ምስሌሁ፡ወፀብኡ፡ኵሎ፡ብሔረ፡ጌሴሪ፡ወዐማሌቅ፡ወረከብዎሙ፡ንቡራነ፡ወእለ፡ውስተ፡ጌላምሱር፡ወእለ፡አኔቆንጦን፡ወአህጉረ፡ቅጽር፡ወእስከ፡ብሔረ፡ግብጽ።
9ወቀተልዎሙ፡ለውእቱ፡ብሔር፡ወኢያሕየዉ፡ወኢተባዕተ፡ወኢአንስተ፡ወነሥኡ፡መራዕየ፡ወአዕጻዳተ፡ወአእዱገ፡ወአግማለ፡ወአልባስ፡ወተመይጡ፡ወአተዉ፡ወበጽሑ፡ኀበ፡አንኩስ።
10ወይቤሎ፡ኦንኩስ፡ለዳዊት፡መነ፡ፀባእክሙ፡ዮም፡ወይቤሎ፡ዳዊት፡ለአንኩስ፡መንገለ፡አዜቦሙ፡ለይሁዳ፡ወመንገለ፡አዜቦሙ፡ለኢያሴሜጥ፡ወመንገለ፡ኦዜቦሙ፡ለቄኔዝ።
11ወኢያሕየውነ፡ኢዕዶሙ፡ወኢአንስቶሙ፡ዘናመጽእ፡ውስተ፡ጌት፡ከመ፡ኢይዜንዉ፡ላዕሌነ፡ወኢይበሉ፡ከመዝ፡ገብረ፡ዳዊት፡ወከመዝ፡ከፀነነ፡ዳዊት፡በኵሉ፡መዋዕል፡በነበረ፡ዳዊት፡ውስተ፡ሐቅለ፡ኢሎፍሊ።
12ወተአመነ፡ዳዊት፡በኀበ፡አንኩስ፡እንዘ፡ይብል፡ኀፍረተ፡የኀፍር፡እምሕዝቡ፡እስራኤል፡ወይከውነኒ፡እንክ፡ገብረ፡እስከ፡ለዓለም።