Biblia Etíope · Biblia Etíope en Ge'ez
Reyes I 20
መጽሐፈ፡ነገሥት፡ቀዳማዊ።1ወተኀጥአ፡ዳዊት፡እምአውቴ፡ዘራማ፡ወበጽሐ፡ኀበ፡ዮናታን፡ወይቤሎ፡ምንተ፡ገበርኩ፡ወምንተ፡አበስኩ፡ወምንት፡አበሳየ፡ቅድመ፡አቡከ፡ከመ፡ይኅሥሣ፡ለነፍስየ።
2ወይቤሎ፡ዮናታን፡ሐሰ፡ኢትመውት፡አንተሰ፡እስመ፡አልቦ፡ዘይገብር፡አቡየ፡ምንተኒ፡ነገረ፡ኢንኡሰ፡ወኢዐቢየ፡ዘኢያየድዐኒ፡ወእፎ፡የኅብእ፡እምኔየ፡አቡየ፡ዘንተ፤ ኢኮነ፡ከመዝ።
3ወአውሥኦ፡ዳዊት፡ለዮናታን፡ወይቤሎ፡አእምሮ፡አእመረ፡አቡከ፡ከመ፡ረከብኩ፡ሞገሰ፡በቅድሜከ፡ወይብል፡ኢያእመረ፡ዘንተ፡ዮናታን፡እስመ፡ኢይፈቅድ፡ወባሕቱ፡ሕያው፡እግዚአብሔር፡ወመንፈስከ፡ከመ፡በከመ፡እቤ፡ፈጸመ፡ለቀቲሎትየ።
4ወይቤሎ፡ዮናታን፡ለዳዊት፡ምንተ፡ትፈቱ፡ነፍስከ፡ወእግበር፡ለከ።
5ወይቤሎ፡ዳዊት፡ለዮናታን፡ናሁ፡ጌሠመ፡ሠርቀ፡ወርኅ፡ወአነኒ፡ኢይነብር፡ለበሊዕ፡ወትፌንወኒ፡ወእትኀባእ፡ውስተ፡ገዳም፡እስከ፡ፍና፡ሰርክ።
6ወለእመቦ፡ከመ፡ኀሠሠኒ፡አቡከ፡በሎ፡አስተበውሐኒ፡ከመ፡ይሑር፡ውስተ፡ቤተ፡ልሔም፡ሀገሮ፡እስመ፡መሥዋዕቶሙ፡ዘበበ፡መዋዕል፡በህየ፡ለኵሉ፡ሕዝብ።
7ለእመ፡ሠናይተ፡አውሥአ፡ሰላም፡ላዕለ፡ገብርከ፡ወለእመሰ፡እኪተ፡አውሥአ፡አእምር፡ከመ፡ኀልቀት፡እሊት፡በኀቤሁ።
8ወትገብር፡ምሕረተ፡ምስለ፡ገብርከ፡እስመ፡አባእካሁ፡ውስተ፡ሕገ፡እግዚአብሔር፡ለገብርከ፡ምስሌከ፡ወለእመሰቦ፡አበሳ፡ላዕለ፡ገብርከ፡ቅትለኒ፡ለሊከ፡ወኢታብጽሐኒ፡ኀበ፡አቡከ።
9ወይቤሎ፡ዮናታን፡ሐሰ፡ለከ፡ወእምከመሰ፡አእመርኩ፡ከመ፡ኀልቀት፡እኪት፡በኀበ፡አቡየ፡ከመ፡እመጽእ፡ላዕሌከ፡ወኣየድዐከ።
10ወይቤሎ፡ዳዊት፡ለዮናታን፡መኑ፡ያየድዐኒ፡ለእመ፡እኪተ፡አውሥአ፡አቡከ።
11ወይቤሎ፡ዮናታን፡ሑር፡ጽንሐኒ፡እስከ፡ጌሠም።
12ወይቤሎ፡ዮናታን፡ለዳዊት፡እግዚኡበሔር፡አምላከ፡እስራኤል፡ያአምር፡ከመ፡ኣፀምኦ፡ለአቡየ፡እስከ፡ሠለስቱ፡መዋዕል፡ወለእመ፡ሠናየ፡ተናገረ፡በእንቲአከ፡ኢይልእክ፡ኀቤከ፡ውስተ፡ሐቅል።
13ወባሕቱ፡ከመዝ፡ለይረስየኒ፡እግዚአብሔር፡ለእመ፡እኪተ፡ነበበ፡ላዕሌከ፡ለእመ፡ኢነገርኩከ፡ወእፌንወከ፡ወተሐውር፡በሰላም፡ወእግዚአብሔር፡የሀሉ፡ምስሌከ፡በከመ፡ሀለወ፡ምስለ፡አቡየ።
14ወለእመኒ፡እንዘ፡ሕያው፡አነ፡ወትገብር፡ምሕረቱ፡ምስሌየ፡ወለእመኒ፡ሞትኩ፤
15ኢትኅድግ፡ምሕረተከ፡እምነ፡ቤትየ፡እስከ፡ለዓለም፡ወእመ፡አኮ፡አመ፡ያሴስሎሙ፡እግዚአብሔር፡ለፀረ፡ዳዊት፡ለኵሎሙ፡እምነ፡ገጸ፡ምድር፡ወይትረከብ፡ስመ፡ዮናታን፡ውስተ፡ቤተ፡ዳዊት፡ወእግዚአብሔር፡ይትኀሠሦሙ፡ለፀረ፡ዳዊት።
17ወደገመ፡ዮናታን፡ምሒለ፡ለዳዊት፡ከመ፡ያፈቅሮ፡በኵሉ፡ነፍሱ።
18ወይቤሎ፡ዮናታን፡ጌሠም፡ሠርቀ፡ወርኅ፡ወየኀሥሠከ፡በውስተ፡ምንባሪከ።
19እስመ፡ሣልስ፡አንተ፤ ወሶበ፡ኀሠሠከ፡ትመጽእ፡ውስተ፡መካንከ፡ወትነብር፡ኀበ፡ዝንቱ፡ኤርገብ።
20ወአነ፡እሤልስ፡ህየንቴከ፡ወእረፍቅ፡ኀበ፡ሳኬዛ።
21ወእልእክ፡ወልደ፡ውስተ፡አርማጦር፡እንዘ፡እብል፡ነዓአ፡ርከበኒአ፡በኀበ፡ሳኬዛአ።
22ወእመሰ፡እቤሎ፡ለወልድ፡ዝየአ፡ነዓአ፡ውስተ፡ሳኬዛአ፡ንሣእ፡ምስሌከ፤ ወነዓ፡እስመ፡ሰላም፡ለከ፡ወአልቦቱ፡ቃለ፡እኪት፡ሕያው፡እግዚአብሔር፡ወእመሰ፡እቤሎ፡ለውእቱ፡ወልድ፡በዝየ፡ውእቱ፡ሳኬዛ፡እምኔከ፡ወህየ፡ተሐውር፡እስመ፡ፈነወከ፡እግዚአብሔር።
23ወቃለኒ፡ዘተናገርነ፡አነ፡ወአንተ፡ናሁ፡እግዚኡበሔር፡ስምዕ፡ማእከሌየ፡ወማእከሌከ፡እስከ፡ለዓለም።
24ወተኀብአ፡ዳዊት፡ውስተ፡ገዳም፡ወበጽሐ፡ሠርቀ፡ወርኅ፡ወቀርበ፡ንጉሥ፡ኀበ፡ማእድ፡ከመ፡ይብላዕ።
25ወነበረ፡ንጉሥ፡ውስተ፡መንበሩ፡ከመ፡ዘልፍ፡ውስተ፡ምስማክ፡ዘኀበ፡አረፍት፡ወበጽሐ፡ኀበ፡ዮናታን፡ወነበረ፡አቤኔር፡በገቦሁ፡ለሳኦል፡ወዳዊትሰ፡ኢሀሎ፡ውስተ፡መካኑ።
26ወአልቦ፡ዘይቤ፡ሳኦል፡ይእተ፡አሚረ፡እስመ፡ይቤ፡ዮጊ፡ተስሕቶ፡እው፡ዮጊ፡ኢኮነ፡ንጹሐ።
27ወእምዝ፡በሳኒታ፡ሠርቅ፡በካልእት፡ዕለት፡ኢሀለወ፡ዳዊት፡ውስተ፡መካኑ፡ወይቤሎ፡ሳኦል፡ለዮናታን፡ወልዱ፡እፎ፡ኢመጽአ፡ወልደ፡እሴይ፡ትማልም፡ወዮም፡ውስተ፡ማእድ።
28ወአውሥኦ፡ዮናታን፡ለሳኦል፡ወይቤሎ፡አስተበውሐኒ፡ዳዊት፡ከመ፡ይሖር፡ውስተ፡ቤተ፡ልሔም፡ሀገሮ።
29ወይቤለኒ፡ፈንወኒ፡እስመ፡መሥዋዕት፡ቦሙ፡ለሕዝብየ፡ውስተ፡ሀገር፡ወአዘዙኒ፡አኀውየ፡ወይእዜኒ፡እመ፡ረከብኩ፡ሞገሰ፡በቅድመ፡አዕይንቲከ፡እሖር፡ወእርአዮሙ፡ለአኀውየ፡ወበበይነ፡ዝንቱ፡ኢመጽአ፡ዳዊት፡ውስተ፡ማእዱ፡ለንጉሥ።
30ወተምዕዐ፡መዐተ፡ሳኦል፡ላዕለ፡ዮናታን፡ጥቀ፡ወይቤሎ፡ወልደ፡አዋልድ፡ርኩሳት፡ኢያእመርከኑ፡ከመ፡ከማሁ፡አንተ፡ለወልደ፡እሴይ፡ለኀሳርከ፡ወለተከሥቶ፡ኀፍረተ፡እምከ።
31እስመ፡በኵሉ፡መዋዕል፡ዘሕያው፡ወልደ፡እሴይ፡ኢትዴለው፡መንግሥትከ፡ወይእዜኒ፡ለአክ፡ያምጽእዎ፡ለውእቱ፡ወልድ፡እስመ፡ወልዶ፡ሞት፡ውእቱ።
32ወይቤሎ፡ዮናታን፡ለሳኦል፡በበይነ፡ምንት፡ይመውት፡ወምንተ፡ገብረ።
33ወአንሥአ፡ሳኦል፡ኵናቶ፡ላዕለ፡ዮናታን፡ከመ፡ይቅትሎ፡ወአእመረ፡ዮናታን፡ከመ፡ኀልቀት፡ዛቲ፡እኪት፡እምኀበ፡አቡሁ፡ከመ፡ይቅትሎ፡ለዳዊት።
34ወተንሥአ፡ዮናታን፡እምኀበ፡ማእድ፡በመዐት፡ወኢበልዐ፡እክለ፡አመ፡ሰኑዩ፡ለሠርቅ፡እስመ፡ተከዘ፡በእንተ፡ዳዊት፡እስመ፡ፈጸመ፡አቡሁ፡በእንቲአሁ።
35ወእምዝ፡ሶበ፡ጸብሐ፡ወፅአ፡ዮናታን፡ውስተ፡ገዳም፡በከመ፡ተአምረ፡ምስለ፡ዳዊት፡ለስምዕ፡ወወልድ፡ንኡስ፡ምስሌሁ።
36ወይቤሎ፡ለውእቱ፡ወልድ፡ሩጽ፡ወብጻሕ፡ሊተ፡ኀበ፡ሳኬዛ፡ኀበ፡ኣዐርፍ፡አነ፡ወሮጸ፡ውእቱ፡ወልድ፡ወእምዝ፡አዕረፈ፡ውስተ፡ሳኬዛ፡ወኀለፈ፡እምኔሃ።
37ሶበ፡በጽሐ፡ውእቱ፡ወልድ፡ውስተ፡ሳኬዛ፡ውስተ፡ዝንቱ፡መካን፡ኀበ፡አዕረፈ፡ዮናታን፡ወጸርሐ፡ሎቱ፡ዮናታን፡ለውእቱ፡ወልድ፡እምድኅሬሁ፡ወይቤሎ፡በጻሕከ፡ሳኬዛ፡ወኀለፍካሃ።
38ወጸርኀ፡ሎቱ፡ዮናታን፡እምድኅሬሁ፡ወይቤሎ፡አፍጥን፡ሩጽ፡ወኢትቁም፡ወኀሊፎ፡ውእቱ፡ወልድ፡ኵሎ፡ሳኬዛ፡ገብአ፡ኀበ፡እግዚኡ።
39ወኢያአምር፡ውእቱ፡ወልድ፡ነገሮ፡ዘእንበለ፡ዮናታን፡ወዳዊት፡ባሕቲቶሙ።
40ወአጾሮ፡ዮናታን፡ለወልዱ፡ንዋየ፡ሐቅሉ፡ወይቤሎ፡ለወልዱ፡ሖር፡ወባእ፡ውስተ፡ሀገር።
41ወሶበ፡ቦአ፡ውእቱ፡ወልድ፡ተንሥአ፡ዳዊት፡እምነ፡ኤርገብ፡ወወድቀ፡በገጹ፡ወሰገደ፡ሎቱ፡ሥልሰ፡ወተሓቀፉ፡በበይናቲሆሙ፡ወበከዩ፡ክልኤሆሙ፡ዐቢየ፡ሰዓተ።
42ወይቤሎ፡ዮናታን፡ሖር፡በሰላም፡ወበከመ፡ተማሐልነ፡ክልኤነ፡በስመ፡እግዚአብሔር፡ወንቤ፡እግዚአብሔር፡ስምዕ፡ማእከሌየ፡ወማእከሌከ፡ወማእከለ፡ዘርእከ፡እስከ፡ለዓለም።
43ወተንሥአ፡ዳዊት፡ወሖረ፡ወዮናታንኒ፡ቦአ፡ውስተ፡ሀገር።