Oraciones Diarias

አአትብ፡ገጽየ፡ወኵለንታየ፡በትእምርተ፡መስቀል።

በስመ፡አብ፡ወወልድ፡ወመንፈስ፡ቅዱስ፡አሐዱ፡አምላክ። (x3)

በቅድስት፡ሥላሴ፣እንዘ፡አአምን፡ወእትመሐፀን፣

እክሕደከ፡ሰይጣን፣በቅድመ፡ዛቲ፡እምየ፡ቅድስት፡ቤተ፡ክርስቲያን፣

እንተ፡ይእቲ፡ስምዕየ፡ማርያም፡ጽዮን፣ለዓለመ፡ዓለም፣

ነአኵተከ፡እግዚኦ፡ወንሴብሐከ፣ንባርከከ፡እግዚኦ፡ወንትአመነከ፣

ንገኒ፡ለከ፡እግዚኦ፣ወንትቀነይ፡ለስምከ፡ቅዱስ።ንሰግድ፡ለከ፣ኦ፡ዘለከ፣

ይሰግድ፡ኵሉ፡ብርክ፣ወለከ፡ይትቀነይ፡ኵሉ፡ልሳን።

አንተ፡ውእቱ፡አምላከ፡አማልክት፣ወእግዚአ፡አጋእዝት፣

ወንጉሠ፡ነገሥት፣አምላክ፡አንተ፡ለኵሉ፡ዘሥጋ፣

ወለኵላ፡ዘነፍስ፣ወንጼውዐከ፡በከመ፡መሐረነ፡ቅዱስ፡ወልድከ፣

እንዘ፡ይብል:አንትሙሰ፡ሶበ፡ትጼልዩ፡ከመዝ፡በሉ።

አቡነ፡ዘበሰማያት፡ይትቀደስ፡ስምከ፡ትምጻእ፡መንግሥትከ፡

ወይኩን፡ፈቃድከ፡በከመ፡በሰማይ፡ከማሁ፡በምድር፡

ሲሳየነ፡ዘለለ፡ዕለትነ፡ሀበነ፡ዮም፡

ኅድግ፡ለነ፡አበሳነ፡ወጌጋየነ፡ከመ፡ንሕነኒ፡

ንኅድግ፡ለዘአበሰ፡ለነ፡ኢታብአነ፡እግዚኦ፡ውስተ፡መንሱት

አላ፡አድኅነነ፡ወባልሐነ፡እምኵሉ፡እኩይ

እስመ፡ዚአከ፡ይእቲ፡መንግሥት፡ኀይል፡ወስብሐት፡ለዓለመ፡ዓለም።

ኦእግዝእትየ፡ማርያም፡ሰላም፡ለኪ።

ድንግል፡በኅሊናኪ፡ወድንግል፡በሥጋኪ፡

እመ፡እግዚአብሔር፡ጸባዖት፡ሰላም፡ለኪ፡

ቡርክት፡አንቲ፡እምአንስት፡ወቡሩክ፡ፍሬ፡ከርሥኪ፡

ተፈሥሒ፡ፍሥሕት፡ኦ፡ምልእተ፡ጸጋ፡

እግዚአብሔር፡ምስሌኪ፡

ሰአሊ፡ወጸልዪ፡ምሕረተ፡

ኀበ፡ፍቁር፡ወልድኪ፡ኢየሱስ፡ከርስቶስ፡

ከመ፡ይስረይ፡ለነ፡ኀጣውኢነ።።።

ጸሎተ፡ሃይማኖት።

ነአምን፡በአሐዱ፡አምላክ፡እግዚአብሔር፣

አብ፡አኃዜ፡ኩሉ፡ገባሬ፡ሰማያት፡ወምድር፣

ዘያስተርኢ፡ወዘኢያስተርኢ።

ወነአምን፡በአሐዱ፡እግዚእ፡ኢየሱስ፡ክርስቶስ፣

ወልደ፡አብ፡ዋሕድ፡ዘህልው፡ምስሌሁ፣እምቅድመ፡ይትፈጠር፡ዓለም።

ብርሃን፡ዘእምብርሃን፡አምላክ፡ዘእምአምላክ፡ዘበአማን፡

ዘተወልደ፡ወአኮ፡ዘተገብረ፡ዘዕሩይ፡ምስለ፡አብ፡በመለኮቱ።

ዘቦቱ፡ኵሉ፡ኮነ፡ወዘእንበሌሁሰ፡አልቦ፡ዘኮነ፡

ወኢምንትኒ፡ዘበሰማይኒ፡ወዘበምድርኒ።

ዘበእንቲአነ፡ለሰብእ፡ወበእንተ፡መድኃኒትነ፡ወረደ፡እምሰማያት፡

ተሰብአ፡ወተሰገወ፡እመንፈስ፡ቅዱስ፡ወእማርያም፡እምቅድስት፡ድንግል፡

ኮነ፡ብእሴ፡ወተሰቅለ፡በእንቲአነ፡በመዋዕለ፡ጲላጦስ፡ጰንጤናዊ።

ሐመ፡ወሞተ፡ወተቀበረ፡ወተንሥአ፡እሙታን፡አመ፡ሣልስት፡ዕለት፡

በከመ፡ጽሑፍ፡ውስተ፡ቅዱሳት፡መጻሕፍት፡ዐርገ፡በስብሐት፡ውስተ፡ሰማያት፡

ወነበረ፡በየማነ፡አቡሁ፡ዳግመ፡ይመጽእ፡በስብሐት፡ይኰንን፡ሕያዋነ፡ወሙታነ፡

ወአልቦ፡ማኅለቅት፡ለመንግሥቱ።

ወነአምን፡በመንፈስ፡ቅዱስ፡እግዚእ፡ማሕየዊ፡ዘሠረጸ፡እምአብ፡

ንስግድ፡ሎቱ፡ወንሰብሖ፡ምስለ፡አብ፡ወወልድ፡ዘነበበ፡በነቢያት።

ወነአምን፡በአሐቲ፡ቅድስት፡ቤተ፡ክርስቲያን፡እንተ፡ላዕለ፡ኵሉ፡ጉባኤ፡ዘሐዋርያት።

ወነአምን፡በአሐቲ፡ጥምቀት፡ለስርየተ፡ኀጢአት፡

ወንሴፎ፡ትንሣኤ፡ሙታን፡ወሕይወተ፡ዘይመጽእ፡ለዓለመ፡ዓለም።አሜን።።።

ቅዱስ፡ቅዱስ፡ቅዱስ፡እግዚአብሔር፡ጸባዖት፡

ፍጹም፡ምሉዕ፡ሰማያተ፡ወምድረ፡ቅድሳተ፡ስብሐቲከ።

ንሰግድ፡ለከ፡ክርስቶስ፡ምስለ፡አቡከ፡ኄር፡ሰማያዊ፡

ወመንፈስከ፡ቅዱስ፡ማሕየዊ፡እስመ፡መጻእከ፡ወአድኀንከነ።።።

እሰግድ፡ለአብ፡ወወልድ፡ወመንፈስ፡ቅደስ፡አሐተ፡ስግደተ። (x 3)

እንዘ፡አሐዱ፡ሠለስቱ፡ወእንዘ፡ሠለስቱ፡አሐዱ፡ይሤለሱ፡በአካላት፡ወይትዋሐዱ፡በመለኮት።

እሰግድ፡ለእግዝእትነ፡ማርያም፡ድንግል፡ወላዲተ፡አምላክ።

እሰግድ፡ለመስቀለ፡እግዚእነ፡ኢየሱስ፡ክርስቶስ፡ዘተቀደሰ፡በደሙ፡ክቡር።

መስቀል፡ኀይልነ፡መስቀል፡ጽንዕነ፡መስቀል፡ቤዛነ፡መስቀል፡መድኃኒተ፡ነፍስነ።

አይሁድ፡ክሕዱ፡ንሕነሰ፡አመነ፡ወእለ፡አመነ፡በኀይለ፡መስቀሉ፡ድኅነ።

ስብሐት፡ለአብ፡ስብሐት፡ለወልድ፡ስብሐት፡ለመንፈስ፡ቅዱስ፡ (x 3)

ስብሐት፡ለእግዚእትነ፡ማርያም፡ድንግል፡ወላዲተ፡አምላክ፡

ስብሐት፡ለመስቀለ፡እግዚእነ፡ኢየሱስ፡ክርስቶስ፡ክርስቶስ፡በምሕረቱ፡ይዘከረነ።

አመ፡ዳግም፡ምጽአቱ፡ኢያስተኀፍረነ።ለሰብሖተ፡ስሙ፡ያንቅሀነ።

ወበአምልኮቱ፡ያጽንዐነ፡እግዝእትነ፡ማርያም፡አዕርጊ፡ጸሎተነ፣

ወአስተስርዪ፡ኵሎ፡ኀጢአተነ።ቅድመ፡መንበሩ፡ለእግዚእነ።

ለዘአብልዐነ፡ዘንተ፡ኅብስተ።ወለዘአስተየነ፡ዘንተ፡ጽዋዐ፡

ወለዘሠርዐ፡ለነ፡ሲሳየነ፡ወዐራዘነ፡ወለዘተዐገሠ፡ለነ፡ኵሎ፡ኀጢአተነ፡

ወለዘወሀበነ፡ሥጋሁ፡ቅዱሰ፡ወደሞ፡ክቡረ፡ወለዘአብጽሐነ፡እስከ፡ዛቲ፡ሰዓት።

ነሀብ፡ሎቱ፡ስብሐተ፡ወአኰቴተ፡ለእግዚአብሔር፡ልዑል፡

ወለወላዲቱ፡ድንግል።ወለመስቀሉ፡ክቡር፡ይትአኰት፡ወይሰባሕ፡ስሙ፡ለእግዚአብሔር፡

ወትረ፡በኵሉ፡ጊዜ፡ወበኵሉ፡ሰዓት።።።

ሰላም፡ለኪ፡እንዘ፡ንሰግድ፡ንብለኪ።

ማርያም፡እምነ፡ናስተበቍዐኪ።እምአርዌ፡ነዓዊ፡ተማሕፀነ፡ብኪ።

በእንተ፡ሐና፡እምኪ፡ወኢያቄም፡አቡኪ።ማኅበረነ፡ዮም፡ድንግል፡ባርኪ።።።

ጸሎተ፡እግዝእትነ፡ማርያም፡ድንግል፡ወላዲተ፡አምላክ።

ታዐብዮ፡ነፍስየ፡ለእግዚአብሔር።

ወትትሐሠይ፡መንፈስየ፡በአምላኪየ፡ወመድኀኒየ፤

እስመ፡ርእየ፡ሕማማ፡ለአመቱ።

ናሁ፡እምይእዜሰ፡ያስተበፅዑኒ፡ኵሉ፡ትውልድ።

እስመ፡ገብረ፡ሊተ፡ኀይለ፡ዐቢያተ፡ወቅዱስ፡ስሙ።

ወሣህሉኒ፡ለትውልደ፡ትውልድ፡ለእለ፡ይፈርህዎ።

ወገብረ፡ኀይለ፡በመዝራዕቱ፡ወዘረዎሙ፡ለእለ፡የዐብዩ፡ኅሊና፡ልቦሙ፡

ወነሠቶሙ፡ለኀያላን፣እመናብርቲሆሙ።

አዕበዮሙ፡ለትሑታን፡ወአጽገቦሙ፡እምበረከቱ፡ለርኁባን፡ወፈነዎሙ፡ዕራቆሙ፡ለብዑላን።

ወተወክፎ፡እስራኤል፡ቍልዔሁ፡ወተዘከረ፡ሣህሎ፡ዘይቤሎሙ፡ለአበዊነ፡

ለአብርሃም፡ወለዘርኡ፡እስከ፡ለዓለም።።።

ስብሐት፡ለአብ፡ስብሐት፡ለወልድ፡ስብሐት፡ለመንፈስ፡ቅዱስ፡

ይእዜኒ፡ወዘልፈኒ፡ለዓለመ፡ዓለም፡አሜን።።።