Biblia Etíope · Biblia Etíope en Ge'ez

Números 6

ኦሪት፡ዘኍልቍ።

1ወነበቦ፡እግዚአብሔር፡ለሙሴ፡ወይቤሎ፤

2ንግሮሙ፡ለደቂቀ፡እስራኤል፡ወበሎሙ፡ብእሲ፡አው፡ብእሲት፡ዘአዕበየ፡በፂዐ፡ብፅዓተ፡ከመ፡ያንጽሕ፡ርእሶ፡ለእግዚአብሔር፤

3እምነ፡ወይን፡ወእምነ፡ሜስ፡ያንጽሕ፡ርእሶ፡ወእምነ፡ብሒእ፡ወይን፡ወእምነ፡ብሒእ፡ሜስ፡ኢይስተይ፡ወእምነ፡ኵሉ፡ዘይትገበር፡እምአስካል፡ኢይስተይ፡ወአስካለ፡ወዘቢበ፡ኢይብላዕ፡በኵሉ፡መዋዕለ፡ብፅዓቲሁ።

4እምነ፡ኵሉ፡ዘይትገበር፡እምውስተ፡አስካል፡ወይነኒ፡ዘእምውስተ፡ዘቢበ፡ሕጕር፡ወአሥከሮኒ፡ኢይብላዕ፡በኵሉ፡መዋዕለ፡ብፅዓቲሁ፡በዘ፡ያነጽሕ፡ርእሶ።

5ወመላጼ፡ኢያቅርብ፡ውስተ፡ርእሱ፡እስከ፡ይትፌጸማ፡ኵሎን፡መዋዕል፡እለ፡በፅዐ፡ለእግዚአብሔር፡[ቅዱሰ፡ይከውን፡ወያነውኅ፡ሥዕርተ፡ርእሱ፡በኵሉ፡መዋዕለ፡ብፅዓቲሁ፡ለእግዚአብሔር።]

6ወላዕለ፡ኵሉ፡ነፍስ፡እንተ፡ሞተት፡ኢይባእ፤

7ወኢላዕለ፡አቡሁ፡ወኢላዕለ፡እሙ፡ወኢላዕለ፡እኁሁ፡ወኢላዕለ፡እኅቱ፡ከመ፡ኢይርኰስ፡ቦሙ፡እምከመ፡ሞቱ፡እስመ፡ብፅዓተ፡አምላኩ፡ሀለወ፡ላዕሌሁ፡ዲበ፡ርእሱ።

8በኵሉ፡መዋዕል፡ዘብፅዓቲሁ፡ይትቄደስ፡ለእግዚአብሔር።

9ወእመሰ፡ቦቱ፡ዘሞተ፡ግብተ፡በኀበ፡ሀለወ፡ውእቱ፡ወሞተ፡በጊዜሃ፡ይረኵስ፡ብፅዓተ፡ርእሱ፤ ወይላጺ፡ርእሶ፡በዕለተ፡ይነጽሕ፡በሳብዕት፡ዕለት፡ይትላጸይ።

10ወበሳምንት፡ዕለት፡ያመጽእ፡ክልኤተ፡ማዕነቀ፡አው፡ክልኤተ፡እጕለ፡ርግብ፡ኀበ፡ካህን፡ኀበ፡ኆኅተ፡ደብተራ፡ዘመርጡል።

11ወይገብር፡ካህን፡አሐ[ተ]፡በእንተ፡ኀጢአት፡ወአሐ[ተ]፡ለመሥዋዕት፡ወያስተሰሪ፡በእንቲአሁ፡ካህን፡በበይነ፡ዘአበሰ፡በእንተ፡ነፍስ፡[ወ]ይቄድሶ፡ለርእሱ፡በይእቲ፡ዕለት።

12ወይቄድሶ፡ለእግዚአብሔር፡በኵሉ፡መዋዕለ፡ብፅዓቲሁ፡ወያመጽእ፡በግዐ፡ዘዓመት፡ዘንስሓ፡ወመዋዕለ፡ቀዲሙሰ፡ኢይትኌለቁ፡ሎቱ፡እስመ፡ረኵሰ፡ብፅዓተ፡ርእሱ።

13ወዝንቱ፡ሕጉ፡ለዘ፡በፅዐ፡አመ፡ዕለተ፡ይፌጽም፡መዋዕለ፡ብፅዓቲሁ፡ይመጽእ፡[ለሊሁ፡] ኀበ፡ኆኅተ፡ደብተራ፡ዘመርጡል።

14ወያመጽእ፡ቍርባኖ፡ለእግዚአብሔር፡በግዐ፡ዘዓመት፡አሐደ፡ንጹሐ፡ለመሥዋዕት፡ወበግዕተ፡እንተ፡ዓመት፡ንጽሕተ፡አሐተ፡በእንተ፡ኀጢአት፡ወሐርጌ፡አሐደ፡ንጹሐ፡ለመድኀኒት፤

15ወከፈረ፡ኅብስተ፡ስንዳሌ፡ዘናእት፡ዘግቡር፡በቅብእ፡ወጸራይቀ፡ናእተ፡ዘቅቡእ፡በቅብእ፡ወመሥዋዕቶሙ፡ወሞጻሕቶሙ።

16ወያበውእ፡ካህን፡ቅድመ፡እግዚአብሔር፡ወይገብር፡ዘበእንተ፡ኀጢአቱ፡ወመሥዋዕተ።

17ወይገብር፡ጠሌኒ፡ዘመሥዋዕተ፡መድኀኒቱ፡ለእግዚአብሔር፡ምስለ፡ዝክቱ፡ከፈር፡ዘናእት፡ወይገብር፡ካህን፡መሥዋዕቶ፡ወሞጻሕቶ።

18ወይላጺ፡ርእሶ፡ውእቱ፡ዘበፅዐ፡በኀበ፡ኆኅተ፡ደብተራ፡ዘመርጡል፡ርእሰ፡ብፅዓቲሁ፡ወይወዲ፡ሥዕርቶ፡ውስተ፡እሳት፡ዘመሥዋዕተ፡መድኀኒት።

19ወይነሥእ፡ካህን፡መዝራዕተ፡በአነዳሁ፡እምውስተ፡ሐርጌ፡ወኅብስተ፡ናእት፡አሐተ፡እምውስተ፡ከፈር፡ወአሐተ፡ጸራይቀ፡ናእት፡ወያነብር፡ውስተ፡እደዊሁ፡ለዘበፅዐ፡እምድኅረ፡ተላጸየ፡ርእሶ።

20ወያበውኦ፡ካህን፡ቍርባነ፡ቅድመ፡እግዚአብሔር፡ወቅዱሰ፡ይከውን፡ለካህን፡ተላዕ፡ዘቍርባን፡ወመዝራዕት፡ዘመባእ፡ወእምድኅረ፡ዝንቱ፡ይሰቲ፡ወይነ፡ውእቱ፡ዘበፅዐ።

21ወዝንቱ፡ሕጉ፡ለዘ፡በፅአ፡እምከመ፡በፅአ፡ለእግዚአብሔር፡ዘያመጽእ፡ቍርባኖ፡ለእግዚአብሔር፡በእንታ፡ብፅዓቲሁ፡ዘእንበለ፡ለእመቦ፡ዘረከበ፡ውስተ፡እዴሁ፡በአምጣነ፡ይትከሀሎ፡ለብፅዓቲሁ፡ዘበፅዐ፡በሕገ፡አንጽሖ።

22ወነበቦ፡እግዚአብሔር፡ለሙሴ፡ወይቤሎ፤

23ንግሮሙ፡ለአሮን፡ወለደቂቁ፡ወበሎሙ፡ከመዝ፡ትባርክዎሙ፡ለደቂቀ፡እስራኤል፡ወትብልዎሙ።

24ወይሠይሙ፡ስምየ፡ላዕለ፡ደቂቀ፡እስራኤል፡ወአነ፡እግዚአብሔር፡ዘእባርኮሙ።

25ለይባርከ፡እግዚአብሔር፡ወይዕቀብከ፤

26ወለያርኢ፡እግዚአብሔር፡ገጾ፡ላዕሌከ፡ወለይምሐርከ፤

27ወለይሢም፡እግዚአብሔር፡ገጾ፡ኀቤከ፡ወለየሀብከ፡ሰላመ።