Biblia Etíope · Biblia Etíope en Ge'ez
Nahum 3
ዘናሖም፡ነቢይ።1አሌላ፡ለሀገረ፡ደም፡እንተ፡መልአት፡ሐሰተ፡ወጸግበት፡ዐመፃ፡ኢትግስስ፡ማዕገተ።
2ድምፀ፡መቅሠፍት፡ወቃለ፡መንኰራኵረ፡ድልቅልቅ፡ወአፍራስ፡ዘይረውድ፡ወሰረገላት፡ዘይረውጽ።
3ወመስተጽዕናን፡ይጼዐኑ፡ወኲናተ፡ይመልሱ፡ወወላትው፡ይበርቅ፡ወብዙኀ፡አብድንት፡ወክቡድ፡ድቀት፤ወአልቦሙ፡ጽንፈ፡ለአሕዛቢሃ፡ወይደውዩ፡ሥጋሆሙ፡እምብዝኀ፡ዝሙቶሙ።
4ዘማ፡ሠናይት፡ወፍሥሕት፡ለድቀቶሙ፡ለሰብአ፡ሥራይ፡እንተ፡ትሣየጥ፡አሕዛበ፡በዝሙታ፡ወሕዝበ፡ በሥራያቲሃ።
5ናሁ፡አነ፡ላዕሌኪ፤ይቤ፡እግዚአብሔር፡ዘኵሎ፡ይመልክ፤ወእቀፍጸኪ፡ድኅሬኪ፤ውስተ፡ገጽኪ፡ወኣርእዮሙ፡ለአሕዛብ፡ኅፍረተኪ፡ወለነገሥት፡ኀሳረኪ።
6ወእገድፍ፡ላዕሌኪ፡ርኵሰ፡ዘከመ፡ርኵስኪ፡ወኣረስሐኪ፡ወእሰጥሐኪ፡ወእሬስየኪ፡ኅስርተ።
7ወኵሉ፡ዘርእየኪ፡ይወርቅ፡እምኔኪ፡ወይብል፤ደንገፀት፡ነኔዌ፡ምንተ፡ይግፅር፡ላዕሌኪ፡እምአይቴ፡ነኀሥሥ፡ዘይናዝዛ።
8ታስተዳሉ፡መክፈልታ፡ወትቃኒ፡አውታሪሃ፡ወታስተዳሉ፡መክፈልታ፡አሞን፡እንተ፡ትነብር፡ውስተ፡አፍላገ፡ማይ፡ሕጹራ፡ወጽንፋ፡ውስተ፡ባሕር፡ወማይ፡አረፋቲሃ።
9ወኢትዮጵያ፡ኀይላ፡ወግብጽ፡ወአልቦ፡ጽንፈ፡ለምጕያይኪ፡ወሊቢዩስ፡ረድእዋ።
10ወይእቲኒ፡እምነ፡ምንባሪሃ፡ወይፄውውዋ፡ወይወስድዋ፡ወይነጽኅዎሙ፡ለሕፃናቲሃ፡ውስተ፡ኵሉ፡ፍናዊሃ፡ወይትዓፀዉ፡ኵሎ፡ክብራ፡ወይሞቅሕዎሙ፡ለመላእክቲሃ፡ለኵሎሙ።
11ወአንቲኒ፡ትሰክሪ፡ወትከውኒ፡እቡደ፡ወተኀሥሢ፡ለኪ፡ዘይባልሐኪ፡እምፀርኪ።
12ወኢያድኅነኪ፡አጽዋኒኪ፡ወይሜምዑ፡መዓቅቢኪ፡ወይወድቁ፡ውስተ፡አፈ፡በላዒ።
13ናሁ፡አሕዛብኪ፡ከመ፡አንስት፡በውስቴትኪ፡ወይትረኀው፡ለፀርኪ፡አናቅጸ፡ብሔርኪ፤ይበልዖሙ፡እሳት፡ለመናስግቲኪ።
14ናሁ፡ማይ፡ዐገተኪ፤ፃኢ፡ወአጽንዒ፡አጽዋነኪ፡ዕረጊ፡ውስተ፡ፅቡር፡ወአጽብሪ፡በሐሠር፡ወአይብስዮ፡እምግንፋል።
15ናሁ፡ማይ፡ዐገተኪ፤ፃኢ፡ወአጽንዒ፡አጽዋነኪ፡ዕረጊ፡ውስተ፡ፅቡር፡ወአጽብሪ፡በሐሠር፡ወአይብስዮ፡እምግንፋል።
16ወአብዛኅኪ፡ተግባረኪ፡እምኮከበ፡ሰማይ፤ደገብያ፡ነበረሂ፡ወሰረረ።
17ወአምሠጡ፡ድሙራንኪ፡ከመ፡አንበጣ፡ዘይነብር፡ዲበ፡ጥቅም፡በዕለት፡ጊሜ፡ወእምከመ፡ሠረቀ፡ፀሐይ፡ይትገሐሥ፡ወኢያእመረት፡ብሔራ፤አሌሎሙ።
18እስመ፡ደቀሱ፡ኖሎትኪ፤ንጉሠ፡ፋርስ፡አነሞሙ፡ለኀያላንኪ፡ወግዕዙ፡አሕዛቢኪ፡ውስተ፡አድባር፡ወአልቦ፡ዘይሬኢ፡ወዘይጸንሕ።
19ወአልቦ፡ፈውሰ፡ለቍስልኪ፤ኵሕሠ፡ጽልፅኪ፡ወኵሎሙ፡እለ፡ይሰምዑ፡ዜናኪ፡ ወይጠፍሑ፡እደዊሆሙ፡ላዕሌኪ፡እስመ፡ላዕለ፡ኵሉ፡በጽሐት፡እከይኪ፡በኵሉ፡ጊዜ። ። ።