Biblia Etíope · Biblia Etíope en Ge'ez
Mateo 9
ወንጌል፡ዘማቴዎስ።በእንተ፡መፃጕዕ
1ወዐሪጎ፡ውስተ፡ሐመር፡ዐደወ፡ወበጽሐ፡ሀገሮ።
2ወአምጽኡ፡ኀቤሁ፡ድዉየ፡መፃጕዐ፡እንዘ፡ይጸውርዎ፡በዐራት፡ወርእዮ፡እግዚእ፡ኢየሱስ፡ሃይማኖቶሙ፡ይቤሎ፡ለውእቱ፡መፃጕዕ፡ተአመን፡ወልድየ፡ተኀድገ፡ለከ፡ኀጢአትከ።
3ወሰሚዖሙ፡ጸሐፍት፡ወፈሪሳውያን፡ይቤሉ፡በበይናቲሆሙ፡ዝንቱሰ፡ይፀርፍ።
4ወአእሚሮ፡እግዚእ፡ኢየሱስ፡ኅሊናሆሙ፡ይቤሎሙ፡ለምንት፡ትኄልዩ፡እኩየ፡በአልባቢክሙ።
5ምንት፡ይቀልል፡እምብሂለ፡ተኀድገ፡ለከ፡ኀጢአትከ፡ወእምብሂለ፡ተንሥእ፡ወንሣእ፡ዐራተከ፡ወሑር፡ቤተከ።
6ከመ፡ታእምሩ፡ከመ፡ብዉሕ፡ሎቱ፡ለወልደ፡ዕጓለ፡እመሕያው፡ይኅድግ፡ኀጢአተ፡በዲበ፡ምድር፡ወእምዝ፡ይቤሎ፡ለውእቱ፡መፃጕዕ፡ተንሥእ፡ወንሣእ፡ዐራተከ፡ወእቱ፡ቤተከ።
7ወተንሢኦ፡ነሥአ፡ዐራቶ፡ወሖረ፡ቤቶ።
8ወርእዮሙ፡ሕዝብ፡አንከሩ፡ወአእኰትዎ፡ለእግዚአብሔር፡ዘወሀበ፡ዘከመዝ፡ሥልጣነ፡ለሰብእ።
ዘከመ፡ተጸውዐ፡ማቴዎስ
9ወኀሊፎ፡እግዚእ፡ኢየሱስ፡እምህየ፡ረከበ፡ብእሴ፡ዘስሙ፡ማቴዎስ፡እንዘ፡ይነብር፡ውስተ፡ምጽባሕ፡ወይቤሎ፡ትልወኒ፡ወተንሢኦ፡ተለዎ።
10ወእንዘ፡ይረፍቅ፡ውስተ፡ቤት፡ናሁ፡መጽኡ፡ብዙኃን፡መጸብሓን፡ወኃጥኣን፡ወረፈቁ፡ምስለ፡እግዚእ፡ኢየሱስ፡ወአርዳኢሁ።
11ወርእዮሙ፡ፈሪሳውያን፡ይቤልዎሙ፡ለአርዳኢሁ፡ለምንት፡ይበልዕ፡ሊቅክሙ፡ምስለ፡መጸብሓን፡ወኃጥኣን።
12ወሰሚዖ፡እግዚእ፡ኢየሱስ፡ይቤሎሙ፡ሕሙማን፡ይፈቅድዎ፡ለዐቃቤ፡ሥራይ፡ወአኮ፡ጥዑያን።
13ሑሩ፡ወአእምሩ፡ምንት፡ውእቱ፡ዘይቤ፡«ምጽዋተ፡አበድር፡እመሥዋዕት»፡እስመ፡ኢመጻእኩ፡እጸውዕ፡ጻድቃነ፡አላ፡ኃጥኣነ፡ለንስሓ።
በእንተ፡ጾም
14ወእምዝ፡መጽኡ፡ኀቤሁ፡አርዳኢሁ፡ለዮሐንስ፡ወይቤልዎ፡ንሕነ፡ወፈሪሳውያን፡ንጸውም፡ብዙኀ፡ወአርዳኢከሰ፡በእፎ፡ኢይጸውሙ።
15ወይቤሎሙ፡እግዚእ፡ኢየሱስ፡ኢይክሉ፡ደቂቁ፡ለመርዓዊ፡ጸዊመ፡ወላሕዎ፡አምጣነ፡ሀሎ፡መርዓዊ፡ምስሌሆሙ፡ወባሕቱ፡ይመጽእ፡መዋዕል፡አመ፡ይነሥእዎ፡ለመርዓዊ፡እምኔሆሙ፡አሜሃ፡ይጸውሙ።
16ወአልቦ፡ዘይጠቅብ፡ግምደ፡ድርግሐ፡ልብስ፡ውስተ፡ስጠተ፡ልብስ፡ብሉይ፡እስመ፡ይትማላእ፡ሕያዎ፡ለልብስ፥ ወያዐብዮ፡ለስጠቱ።
17ወኢይወድዩ፡ወይነ፡ሐዲሰ፡ውስተ፡ዝቅ፡ብሉይ፡ወእመአኮሰ፡ዝቁሂ፡ይነቅዕ፡ወወይኑሂ፡ይትከዐው፡ወዝቁሂ፡ይትኀጐል፡ወባሕቱ፡ለወይንሰ፡ሐዲስ፡ውስተ፡ዝቅ፡ሐዲስ፡ይወድይዎ፡ወይትዓቀቡ፡ክልኤሆሙ፡በበይናቲሆሙ።
በእንተ፡ወለተ፡መጋቤ፡ምኵራብ
18ወእንዘ፡ዘንተ፡ይነግሮሙ፡ናሁ፡መጽአ፡አሐዱ፡መኰንን፡ወሰገደ፡ሎቱ፡እንዘ፡ይብል፡ወለትየ፡ይእዜ፡ሞተት፡ወባሕቱ፡ነዓ፡አንብር፡እዴከ፡ላዕሌሃ፡ወተሐዩ።
19ወተንሥአ፡እግዚእ፡ኢየሱስ፡ወተለዎ፡ወአርዳኢሁኒ።
በእንተ፡እንተ፡ደም፡ይውኅዛ
20ወናሁ፡ብእሲት፡እንተ፡ደም፡ይውኅዛ፡እም፡ዐሠርቱ፡ወክልኤቱ፡ክረምት፡መጽአት፡ወቆመት፡እንተ፡ድኅሬሁ፡ወገሠሠት፡ጽንፈ፡ልብሱ።
21እንዘ፡ትብል፡በልባ፡እምከመ፡ገሠሥኩ፡ጽንፈ፡ልብሱ፡አሐዩ።
22ወተመይጠ፡እግዚእ፡ኢየሱስ፡ወርእያ፡ወይቤላ፡ተአመኒ፡ወለትየ፡ሃይማኖትኪ፡አሕየወተኪ፡ወሐይወት፡ይእቲ፡ብእሲት፡በይእቲ፡ሰዓት።
23ወበዊኦ፡እግዚእ፡ኢየሱስ፡ቤቶ፡ለውእቱ፡መኰንን፡ርእየ፡መብክያነ፡ወሰብአ፡እንዘ፡ይትሀወኩ፡ወያስቈቅዉ።
24ወይቤሎሙ፡ተገኀሡ፡እስመ፡አኮ፡ዘሞተት፡ሕፃን፡አላ፡ትነውም፡ወሰሐቅዎ።
25ወእምዘወፅኡ፡ሰብእ፡ቦአ፡ወአኀዛ፡እዴሃ፡ወተንሥአት፡ሕፃን።
26ወወፅአ፡ስሙዓተ፡ነገሩ፡ውስተ፡ኵላ፡ምድር።
በእንተ፡ክልኤቱ፡ዕዉራን
27ወኀሊፎ፡እግዚእ፡ኢየሱስ፡እምህየ፡ተለውዎ፡ክልኤቱ፡ዕዉራን፡እንዘ፡ይጸርሑ፡ወይብሉ፡ተሣሀለነ፡ወልደ፡ዳዊት።
28ወበዊኦ፡ቤተ፡መጽኡ፡ኀቤሁ፡እሙንቱ፡ዕዉራን፡ወይቤሎሙ፡እግዚእ፡ኢየሱስ፡ተአምኑሁ፡ከመ፡እክል፡ዘንተ፡ገቢረ፡ወይቤልዎ፡እወ፡እግዚኦ።
29ወገሠሦሙ፡አዕይንቲሆሙ፡እንዘ፡ይብል፡በከመ፡ሃይማኖትክሙ፡ይኩንክሙ።
30ወሶቤሃ፡ተከሥታ፡አዕይንቲሆሙ፡ወገሠጾሙ፡እግዚእ፡ኢየሱስ፡ወይቤሎሙ፡ዑቁ፡ኢትንግሩ፡ወኢ፡ለመኑሂ።
31ወወፂኦሙ፡ነገሩ፡ለኵሉ፡በሓውርት።
በእንተ፡ዘጋኔን፡ጽሙም
32ወእምዘወፅኡ፡እሙንቱ፡አምጽኡ፡ኀቤሁ፡ብእሴ፡ዘጋኔን፡ጽሙመ፡ወበሃመ።
33ወወፂኦ፡ጋኔኑ፡ነበበ፡ውእቱ፡በሃም፡ወሰምዐ፡ውእቱ፡ጽሙም፡ወአንከሩ፡ሰብእ፡እንዘ፡ይብሉ፡ግሙራ፡ኢያስተርአየ፡ዘከመ፡ዝ፡በውስተ፡እስራኤል።
34ወፈሪሳውያንሰ፡ይቤሉ፡በመልአኮሙ፡ለአጋንንት፡ያወፅኦሙ፡ለአጋንንት።
ዘከመ፡አንሶሰወ፡ውስተ፡ገሊላ
35ወአንሶሰወ፡እግዚእ፡ኢየሱስ፡ውስተ፡ኵሉ፡አህጉር፡ወበሓውርት፡እንዘ፡ይሜህር፡በምኵራባቲሆሙ፡ወይሰብክ፡ወንጌለ፡መንግሥት፡ወይፌውስ፡ኵሎ፡ድዉያነ፡ወኵሎ፡ሕሙማነ፡ዘውስተ፡ሕዝብ።
36ወርእዮ፡ብዙኃነ፡ሰብአ፡አምሐርዎ፡ወተሣሀሎሙ፡እስመ፡ስሩሓን፡እሙንቱ፡ወግዱፋን፡ከመ፡አባግዕ፡ዘአልቦ፡ኖላዊ።
37ወይቤሎሙ፡ለአርዳኢሁ፡ማእረሩሰ፡ብዙኅ፡ወገባሩ፡ኅዳጥ።
38ሰአልዎ፡እንከ፡ለበዓለ፡ማእረር፡ከመ፡ይወስክ፡ገባረ፡ለማእረሩ።