ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Mateo 26

ወንጌል፡ዘማቴዎስ።
1ወኮነ፡እምዘ፡ፈጸመ፡እግዚእ፡ኢየሱስ፡ዘንተ፡ኵሎ፡ነገረ፡ይቤሎሙ፡ለአርዳኢሁ።
2ተአምሩሁ፡ከመ፡እምድኅረ፡ክልኤ፡መዋዕል፡ይከውን፡ፋሲካ፡ወይእኅዝዎ፡ለወልደ፡ዕጓለ፡እመሕያው፡ወይሰቅልዎ።
3ወእምዝ፡ተጋብኡ፡ሊቃነ፡ካህናት፡ወጸሐፍት፡ወሊቃናተ፡ሕዝብ፡ውስተ፡ዐጸደ፡ሊቀ፡ካህናት፡ዘስሙ፡ቀያፋ።
4ወተማከሩ፡ከመ፡በሕብል፡የአኀዝዎ፡ለእግዚእ፡ኢየሱስ፡ወይቅትልዎ።
5ወይቤሉ፡ባሕቱ፡አኮኬ፡በበዓል፡ከመ፡ኢይኩን፡ሀከክ፡በውስተ፡ሕዝብ።

በእንተ፡ብእሲት፡እንተ፡ቀብዐቶ፡ለእግዚእነ፡ዕፍረተ

6ወበጺሖ፡እግዚእ፡ኢየሱስ፡ቢታንያ፡ቦአ፡ቤተ፡ስምዖን፡ዘለምጽ።
7ወመጽአት፡ኀቤሁ፡ብእሲት፡እንተ፡ባቲ፡ቢረሌ፡ዘምሉእ፡ዕፍረተ፡ዘአልባስጥሮስ፡ዘብዙኅ፡ሤጡ፡ወሶጠት፡ዲበ፡ርእሱ፡ለእግዚእ፡ኢየሱስ፡እንዘ፡ይረፍቅ።
8ወርእዮሙ፡ዘንተ፡አርዳኢሁ፡ተምዑ፡ወአንጐርጐሩ፡ወይቤሉ፡ለምንት፡ዘመጠነዝ፡ዕፍረተ፡አኅጐለት፡ዛቲ፡ብእሲት።
9እምኢተሠይጠኑ፡ለብዙኅ፡ንዋይ፡ወይትወሀብ፡ምጽዋተ፡ለነዳያን።
10ወአእመሮሙ፡እግዚእ፡ኢየሱስ፡ወይቤሎሙ፡ለምንት፡ታሰርሕዋ፡ለዛቲ፡ብእሲት፡ሠናየ፡ግብረ፡ገብረት፡ላዕሌየ።
11ወለነዳያንሰ፡ዘልፈ፡ትረክብዎሙ፡ወጊዜ፡ፈቀድክሙ፡ታሤንዩ፡ሎሙ፡ወኪያየሰ፡አኮ፡ዘልፈ፡ዘትረክቡኒ።
12ወዘንተሰ፡ዕፍረተ፡ዘሶጠት፡ዲበ፡ርእስየ፡ለቀበርየ፡ገብረት።
13አማን፡እብለክሙ፡በኀበ፡ተሰብከ፡ዝ፡ወንጌል፡በውስተ፡ኵሉ፡ዓለም፡ያንብቡ፡ላቲ፡ዘገብረት፡ዛቲ፡ብእሲት፡ወይዝክርዋ።

በእንተ፡ይሁዳ፡አስቆሮታዊ

14ወእምዝ፡ሖረ፡አሐዱ፡እምዐሠርቱ፡ወክልኤቱ፡አርዳኢሁ፡ዘስሙ፡ይሁዳ፡አስቆሮታዊ፡ኀበ፡ሊቃነ፡ካህናት።
15ወይቤሎሙ፡ሚ፡መጠነ፡ትሁቡኒ፡እመ፡አገብኦ፡ለክሙ፡ወተናገሩ፡ምስሌሁ፡ወተሰናአዉ፡የሀብዎ፡ሠላሳ፡ብሩረ።
16ወእምይእቲ፡ዕለት፡ኮነ፡የኀሥሥ፡ሣኅተ፡ከመ፡ያግብኦ፡ሎሙ።

በእንተ፡በዓለ፡ፍሥሕ

17ወበቀዳሚት፡ዕለተ፡ፍሥሕ፡ቀርቡ፡አርዳኢሁ፡ለእግዚእ፡ኢየሱስ፡ወይቤልዎ፡በአይቴ፡ትፈቅድ፡ናስተዳሉ፡ለከ፡ትብላዕ፡ፍሥሐ።
18ወይቤሎሙ፡እግዚእ፡ኢየሱስ፡ሑሩ፡ውስተ፡ሀገር፡ኀበ፡እገሌ፡ወበልዎ፡ለበዓለ፡ውእቱ፡ቤት፡ይቤለከ፡ሊቅ፡ጊዜየ፡ቀርበ፡ወበኀቤከ፡እገብር፡ፋሲካ፡ምስለ፡አርዳእየ።
19ወገብሩ፡አርዳኢሁ፡በከመ፡አዘዞሙ፡እግዚእ፡ኢየሱስ፡ወአስተዳለዉ፡ፍሥሐ።
20ወምሴተ፡ከዊኖ፡ረፈቀ፡ምስለ፡ዐሠርቱ፡ወክልኤቱ፡አርዳኢሁ።
21ወእንዘ፡ይበልዑ፡ይቤ፡አማን፡እብለክሙ፡ከመ፡አሐዱ፡እምኔክሙ፡ያገብአኒ።
22ወተከዙ፡ጥቀ፡ወአኀዙ፡ይበልዎ፡በበ፡አሐዱ፡አነሁ፡እንጋ፡እግዚኦ።
23ወአውሥአ፡ወይቤሎሙ፡ዘያወርድ፡እዴሁ፡ምስሌየ፡ውስተ፡መጽብሕየ፡ውእቱ፡ያገብአኒ።
24ወወልደ፡ዕጓለ፡እመሕያውሰ፡የሐውር፡በከመ፡ተሠርዐ፡በእንቲኣሁ፥ ወባሕቱ፡አሌ፡ሎቱ፡ለውእቱ፡ብእሲ፡ዘያገብኦ፡ለወልደ፡ዕጓለ፡እመሕያው፡እምኀየሶ፡ለውእቱ፡ብእሲ፡ሶበ፡ኢተወልደ።
25ወአውሥአ፡ይሁዳ፡ዘያገብኦ፡ወይቤ፡አነሁ፡እንጋ፡ረቢ፡ወይቤሎ፡ለሊከ፡ትቤ።

በእንተ፡ሥርዐተ፡ምሥጢር፡ዘቍርባን

26ወእንዘ፡ይበልዑ፡ነሥአ፡ኅብስተ፡እግዚእ፡ኢየሱስ፡ወባረከ፡ወፈተተ፡ወወሀቦሙ፡ለአርዳኢሁ፡ወይቤሎሙ፡ሕንክሙ፡ብልዑ፡ዝ፡ውእቱ፡ሥጋየ።
27ወነሥአ፡ጽዋዐኒ፡ወአእኰተ፡ወወሀቦሙ፡እንዘ፡ይብል፡ስትዩ፡እምኔሁ፡ኵልክሙ።
28ዝ፡ውእቱ፡ደምየ፡ዘሐዲስ፡ሥርዐት፡ዘይትከዐው፡ለቤዛ፡ብዙኃን፡ወለኅድገተ፡ኀጢአት።
29ወናሁ፡እብለክሙ፡ኢይሰቲ፡እንከ፡እምዝንቱ፡አፂረ፡ፍሬ፡ወይን፡እስከ፡እንታክቲ፡ዕለት፡አመ፡አስትዮ፡ሐዲሰ፡ምስሌክሙ፡በመንግሥተ፡አቡየ።
30ወሰቢሖሙ፡ወፅኡ፡ውስተ፡ደብረ፡ዘይት።
31ወእምዝ፡ይቤሎሙ፡እግዚእ፡ኢየሱስ፡ኵልክሙ፡ተዐልዉኒ፡በዛቲ፡ሌሊት፡እስመ፡ይቤ፡መጽሐፍ፡እቀትሎ፡ለኖላዊ፡ወይዘረዉ፡አባግዐ፡መርዔቱ።
32ወእምከመ፡ተንሣእኩ፡እቀድመክሙ፡ገሊላ።
33ወአውሥአ፡ጴጥሮስ፡ወይቤሎ፡እመሂ፡ኵሎሙ፡ዐለዉከ፡አንሰ፡ኢየዐልወከ፡ግሙራ።
34ወይቤሎ፡እግዚእ፡ኢየሱስ፡አማን፡እብለከ፡ከመ፡በዛቲ፡ሌሊት፡ሥልሰ፡ትክሕደኒ፡ዘእንበለ፡ይንቁ፡ዶርሆ።
35ወይቤሎ፡ጴጥሮስ፡እመውትሂ፡ምስሌከ፡ወኢይክሕደከ፡ወከማሁ፡ይቤሉ፡ኵሎሙ፡አርዳኢሁ።

ዘከመ፡ጸለየ፡እግዚእ፡ኢየሱስ፡በጌቴሴማን

36ወእምዝ፡ሖረ፡ምስሌሆሙ፡ውስተ፡ዐጸደ፡ወይን፡ዘስሙ፡ጌቴሴማን፡ወይቤሎሙ፡ለአርዳኢሁ፡ንበሩ፡ዝየ፡እስከ፡ሶበ፡አሐውር፡ከሃ፡ወእጼሊ።
37ወነሥኦሙ፡ለጴጥሮስ፡ወለክልኤቱ፡ደቂቀ፡ዘብዴዎስ፡ወአኀዘ፡ይተክዝ፡ወይኅዝን።
38ወእምዝ፡ይቤሎሙ፡ተከዘት፡ነፍስየ፡እስከ፡ለሞት፡ንበሩ፡ዝየ፡ወትግሁ፡ምስሌየ፤
39ወተአተተ፡ሕቀ፡እምኔሆሙ፡ወሰገደ፡በገጹ፡ወጸለየ፡ወይቤ፡አቡየ፡እመሰ፡ይትከሀል፡ይኅልፍ፡እምኔየ፡ዝንቱ፡ጽዋዕ፡ወባሕቱ፡ፈቃደ፡ዚኣከ፡ይኩን፡ወአኮ፡ፈቃደ፡ዚአየ።
40ወሖረ፡ኀበ፡አርዳኢሁ፡ወረከቦሙ፡እንዘ፡ይነውሙ፡ወይቤሎ፡ለጴጥሮስ፡ከመዝኑ፡ስእንክሙ፡ተጊሀ፡አሐተ፡ሰዓተ፡ምስሌየ።
41ትግሁ፥ ወጸልዩ፥ ከመ፡ኢትባኡ፡ውስተ፡መንሱት፡እስመ፡መንፈስ፡ይፈቱ፥ ወሥጋ፡ይደክም።
42ወካዕበ፡ሖረ፡ወጸለየ፡ወይቤ፡ኦ፡አቡየ፡እመ፡ይትከሀል፡ዝንቱ፡ጽዋዕ፡ይኅልፍ፡ዘእንበለ፡እስተዮ፡ወባሕቱ፡ይኩን፡ፈቃድከ።
43ወገብአ፡ካዕበ፡ኀበ፡አርዳኢሁ፡ወረከቦሙ፡እንዘ፡ይነውሙ፡እስመ፡ከብዳ፡አዕይንቲሆሙ፡በድቃስ።
44ወኀደጎሙ፡ወሖረ፡ካዕበ፡በሣልስ፡ወጸለየ፡ኪያሁ፡ክመ፡ቃለ፡እንዘ፡ይብል።
45ወገብአ፡ካዕበ፡ኀበ፡አርዳኢሁ፡ወይቤሎሙ፡ኑሙ፡እንከሰ፡ወአዕርፉ፡ናሁ፡በጽሐ፡ጊዜሁ፡ወያገብእዎ፡ለወልደ፡ዕጓለ፡እመሕያው፡ውስተ፡እደ፡ኃጥኣን።
46ተንሥኡ፥ ንሑር፡ናሁ፡ቀርበ፡ዘያገብአኒ።

ዘከመ፡ተእኅዘ፡እግዚእ፡ኢየሱስ

47ወእንዘ፡ዘንተ፡ይትናገር፡ናሁ፡በጽሐ፡ይሁዳ፡እምዐሠርቱ፡ወክልኤቱ፡አርዳኢሁ፡ወምስሌሁ፡መጽኡ፡ብዙኃን፡ሰብእ፡ምስለ፡መጣብሕ፡ወዕፀው፡እምኀቤሆሙ፡ለሊቃነ፡ካህናት፡ወሊቃናተ፡ሕዝብ።
48ወዘያገብኦ፡ወሀቦሙ፡ትእምርተ፡እንዘ፡ይብል፡ዘእስዕሞ፡ውእቱ፡ኪያሁ፡አኀዙ።
49ወቀርበ፡ይእተ፡ጊዜ፡ይሁዳ፡ኀበ፡እግዚእ፡ኢየሱስ፡ወሰዐሞ፡ወይቤሎ፡በሓ፡ረቢ።
50ወይቤሎ፡እግዚእ፡ኢየሱስ፡በእንተዝኑ፡መጻእከ፡ካልእየ፡ወእምዝ፡ቀርቡ፡ወአንሥኡ፡እደዊሆሙ፡ወአኀዝዎ፡ለእግዚእ፡ኢየሱስ።
51ወናሁ፡አሐዱ፡እምእለ፡ምስሌሁ፡ለእግዚእ፡ኢየሱስ፡ሰፍሐ፡እዴሁ፡ወመልሐ፡መጥባሕቶ፡ወዘበጦ፡ለገብረ፡ሊቀ፡ካህናት፡ወመተሮ፡እዝኖ፡ዘየማን።
52ወይቤሎ፡እግዚእ፡ኢየሱስ፡አግብኣ፡ለመጥባሕትከ፡ውስተ፡ቤታ፡እስመ፡ኵሎሙ፡እለ፡መጥባሕተ፡ያነሥኡ፡በመጥባሕት፡ይመውቱ።
53ይመስለከኑ፡ዘኢይክል፡አስተብቍዖቶ፡ለአቡየ፡ይፈኑ፡ሊተ፡ዘይበዝኁ፡እምዐሠርቱ፡ወክልኤቱ፡ሠራዊተ፡መላእክት።
54ወእፎ፡እንከ፡ይትፌጸም፡ቃለ፡መጽሐፍ፡ዘይቤ፡እስመ፡ከመ፡ዝ፡ሀለዎ፡ይኩን።
55ወይቤሎሙ፡እግዚእ፡ኢየሱስ፡ለሕዝብ፡ሶቤሃ፡ከመ፡ሰራቂኑ፡መጻእክሙ፡ትዴግኑኒ፡ወተአኀዙኒ፡በዕፀው፡ወበመጣብሕ፡ወዘልፈ፡እነብር፡ምስሌክሙ፡በምኵራብ፡ወእሜህር፡ወኢአኀዝክሙኒ።
56ወዝ፡ኵሉ፡ዘኮነ፡ከመ፡ይብጻሕ፡ቃለ፡ነቢያት፡ወእምዝ፡ኵሎሙ፡አርዳኢሁ፡ኀደግዎ፡ወጐዩ።
57ወእለሰ፡አኀዝዎ፡ለእግዚእ፡ኢየሱስ፡ወሰድዎ፡ኀበ፡ቀያፋ፡ሊቀ፡ካህናት፡ወኀበ፡ተጋብኡ፡ጸሐፍት፡ወሊቃናት።
58ወተለዎ፡ጴጥሮስ፡እምርኁቅ፡እስከ፡ዐጸደ፡ሊቀ፡ካህናት፡ወቦአ፡ውስጠ፡ወነበረ፡ምስለ፡ወዐልት፡ይርአይ፡ማኅለቅቶ፡ለነገር።
59ወየኀሥሡ፡ሊቃነ፡ካህናት፡ወጸሐፍት፡ወሊቃናት፡ወኵሉ፡ዐውድ፡ሰማዕተ፡ሐሰት፡በዘይቀትልዎ፡ለእግዚእ፡ኢየሱስ፡ወኢረከቡ፡ሎቱ፡ጌጋየ።
60ወመጽኡ፡ብዙኃን፡ሰማዕተ፡ሐሰት፡ወስእኑ፡ወድኅረ፡መጽኡ፡ክልኤቱ።
61ወይቤሉ፡ይቤ፡ዝንቱ፡እክል፡ነሢቶቶ፡ለቤተ፡እግዚአብሔር፡ወበሣልስት፡ዕለት፡አሐንጾ።
62ወተንሥአ፡ሊቀ፡ካህናት፡ወይቤሎ፡ኢትሰምዕኑ፥ እንዘ፡መጠነዝ፡ያስተዋድዩከ።
63ወኢያውሥኦ፡እግዚእ፡ኢየሱስ፡ወይቤሎ፡ሊቀ፡ካህናት፡አምሐልኩከ፡በእግዚአብሔር፡ሕያው፡ከመ፡ትንግረኒ፡እመ፡አንተሁ፡ክርስቶስ፡ወልዱ፡ለእግዚአብሔር።
64ወይቤሎ፡እግዚእ፡ኢየሱስ፡አንተ፡ትቤ፡ወባሕቱ፡እብለክሙ፡እምይእዜሰ፡ትሬእይዎ፡ለወልደ፡ዕጓለ፡እመሕያው፡እንዘ፡ይነብር፡በየማነ፡ኀይል፡ወእንዘ፡ይመጽእ፡በደመና፡ሰማይ።
65ወሶቤሃ፡ሠጠጠ፡አልባሲሁ፡ሊቀ፡ክህናት፡እንዘ፡ይብል፡ምንተ፡እንከ፡ትፈቅዱ፡ሎቱ፡ሰማዕተ፡ናሁ፡ፀረፈ፡ወሰማዕክሙ፡ጽርፈቶ፡ምንተ፡እንከ፡ትብሉ፤
66ወአውሥኡ፡ወይቤሉ፡ዝንቱ፡ድልው፡ለሞት።
67ወእምዝ፡ወረቁ፡ውስተ፡ገጹ፡ወኰርዕዎ፡ርእሶ፡በኅለት፡ወጸፍዕዎ፡እንዘ፡ይብሉ።
68ተነበይ፡ለነ፡ክርስቶስ፡መኑ፡ውእቱ፡ዘጸፍዐከ።

በእንተ፡ክሕደተ፡ጴጥሮስ፥ ወንስሓሁ

69ወጴጥሮስሰ፡ይነብር፡አፍኣ፡ውስተ፡ዐጸድ፡ወመጽአት፡አሐቲ፡ወለት፡ወትቤሎ፡አንተሂ፡ምስለ፡ኢየሱስ፡ገሊላዊ፡ሀለውከ።
70ወክሕደ፡በቅድመ፡ኵሉ፡እንዘ፡ይብል፡ኢየአምሮ፡ለዘትብሊ።
71ወወፂኦ፡ኆኅተ፡ርእየቶ፡ካልእት፡ወትቤሎሙ፡ለእለ፡ይቀውሙ፡ህየ፡ዝኒ፡ሀሎ፡ምስለ፡ኢየሱስ፡ናዝራዊ።
72ወክሕደ፡ካዕበ፡ወመሐለ፡ከመ፡ኢየአምሮ፡ለውእቱ፡ብእሲ።
73ወጐንድዮ፡ሕቀ፡መጽኡ፡እለ፡ይቀውሙ፡ወይቤልዎ፡ለጴጥሮስ፡አማን፡አንተሂ፡እምኔሆሙ፡አንተ፡ወነገርከ፡ያዐውቀከ።
74ወሶቤሃ፡መሐለ፡ወተረግመ፡ከመ፡ኢየአምሮ፡ለውእቱ፡ብእሲ፡ወበጊዜሃ፡ነቀወ፡ዶርሆ።
75ወተዘከረ፡ጴጥሮስ፡ቃሎ፡ለእግዚእ፡ኢየሱስ፡ዘይቤሎ፡ሥልሰ፡ትክሕደኒ፡ዘእንበለ፡ይንቁ፡ዶርሆ፡ወወፅአ፡አፍኣ፡ወበከየ፡ብካየ፡መሪረ።