ግዕዝ
Home Formaciones Libros Biblioteca Ge'ez Contacto
Biblia Etíope · Biblia Etíope en Ge'ez

Mateo 16

ወንጌል፡ዘማቴዎስ።

ዘከመ፡ኀሠሡ፡ሰብእ፡ትእምርተ፡እምሰማይ

1ወመጽኡ፡ፈሪሳውያን፡ወሰዱቃውያን፡እንዘ፡ያሜክርዎ፡ወሰአልዎ፡ትእምርተ፡እምሰማይ፡ያርእዮሙ።
2ወአውሥአ፡እግዚእ፡ኢየሱስ፡ወይቤሎሙ፡እምከመ፡መስየ፡ወኮነ፡ሕዋየ፡ትብሉ፡ጽሕወ፡ብሔር፡እስመ፡ያቅየሐይሕ፡ሰማይ።
3ወእምከመ፡ጸብሐ፡ትብሉ፡ዮምሰኬ፡ይዘንም፡እስመ፡ያቅሐይሕ፡ሰማይ፡ድሙነ፡ኦ!፡መደልዋን፡ለገጸ፡ሰማይኑ፡ተአምሩ፡ፈክሮቶ፡ወተአምረ፡መዋዕልሰ፡እፎ፡ኢተአምሩ።
4ወይቤሎሙ፡ትውልድ፡ዕሉት፡ወዘማ፡ትእምርተ፡ተኀሥሥ፡ወትእምርትሰ፡ኢይትወሀባ፡ዘእንበለ፡ትእምርተ፡ዮናስ፡ነቢይ፡ወእምዝ፡ኀደጎሙ፡ወሖረ።

በእንተ፡ተዐቅቦ፡እምትምህርቶሙ፡ለፈሪሳውያን

5ወበጺሖሙ፡አርዳኢሁ፡ማዕዶተ፡ረስዑ፡ነሢአ፡ኅብስት።
6ወይቤሎሙ፡እግዚእ፡ኢየሱስ፡ዑቁ፡ወተዐቀቡ፡እምብኁኦሙ፡ለፈሪሳውያን፡ወሰዱቃውያን።
7ወኀለዩ፡በበይናቲሆሙ፡እንዘ፡ይብሉ፡እስመሁ፡እንጋ፡ኅብስተ፡ኢነሣእነ፡ይብለነ።
8ወአእመሮሙ፡እግዚእ፡ኢየሱስ፡ወይቤሎሙ፡ምንተ፡ትኄልዩ፡በበይናቲክሙ፡ኦ፡ሕጹጻነ፡ሃይማኖት፡እስመሁ፡ኅብስት፡አልብክሙ።
9ዓዲሁ፡ኢትሌብዉኑ፡ወኢትዜከሩ፡ዘአመ፡ኀምስ፡ኅብስት፡እለ፡ለኀምሳ፡ምእት፡ብእሲ፡ሚመጠነ፡መዛርዐ፡አግኀሥክሙ፡ወይቤልዎ፡ዐሠርተ፡ወክልኤተ።
10ወአመ፡ሰብዑ፡ኅብስት፡እለ፡ለአርብዓ፡ምእት፡ብእሲ፡ሚመጠነ፡አስፈሬዳተ፡አግኀሥክሙ፡ወይቤልዎ፡ሰብዑ።
11እፎ፡ዘኢትሌብዉ፡ከመ፡አኮ፡በእንተ፡ኅብስት፡ዘእቤለክሙ፡ዑቁ፡ወተዐቀቡ፡እምነ፡ብኁኦሙ፡ለፈሪሳውያን፡ወሰዱቃውያን።
12ወእምዝ፡ለበዉ፡አርዳኢሁ፡ከመ፡አኮ፡ዘይቤሎሙ፡በእንተ፡ብኅአተ፡ኅብስት፡ይትዐቀቡ፡አላ፡እምነ፡ትምህርቶሙ፡ለፈሪሳውያን፡ወሰዱቃውያን።

ዘከመ፡ተስእሎሙ፡እግዚእ፡ኢየሱስ፡በቂሳርያ

13ወበጺሖ፡እግዚእ፡ኢየሱስ፡ብሔረ፡ቂሳርያ፡ዘፊልጶስ፡ተስእሎሙ፡ለአርዳኢሁ፡እንዘ፡ይብል፡መነ፡ይብልዎ፡ሰብእ፡ለወልደ፡ዕጓለ፡እመሕያው።
14ወይቤልዎ፡ቦ፡እለ፡ይብሉከ፡ዮሐንስሃ፡መጥምቀ፡ወካልኣን፡ይብሉከ፡ኤልያስሃ፡ወመንፈቆሙ፡ኤርምያስሃ፡ወእመአኮ፡አሐዱ፡እምነቢያት፡ቀደምት።
15ወይቤሎሙ፡አንትሙሰኬ፡መነ፡ትብሉኒ።
16ወአውሥአ፡ስምዖን፡ጴጥሮስ፡ወይቤ፡አንተ፡ውእቱ፡ክርስቶስ፡ወልደ፡እግዚአብሔር፡ሕያው።
17ወአውሥአ፡እግዚእ፡ኢየሱስ፡ወይቤሎ፡ብፁዕ፡አንተ፡ስምዖን፡ወልደ፡ዮና፡እስመ፡ኢከሠተ፡ለከ፡ዘሥጋ፡ወደም፡አላ፡አቡየ፡ዘበሰማያት።
18ወአንሰ፡እብለከ፡ከመ፡አንተ፡ኰኵሕ፡ወዲበ፡ዛቲ፡ኰኵሕ፡አሐንጻ፡ለቤተ፡ክርስቲያንየ፡ወአናቅጸ፡ሲኦል፡ኢይኄይልዋ።
19ወእሁበከ፡መራኁተ፡መንግሥተ፡ሰማያት፡ወዘአሰርከ፡በምድር፡ይከውን፡እሱረ፡በሰማያት፡ወዘፈታሕከ፡በምድር፡ይከውን፡ፍቱሐ፡በሰማያት።
20ወእምዝ፡ገሠጾሙ፡ለአርዳኢሁ፡ከመ፡ኢይንግሩ፡ወኢለመኑሂ፡ከመ፡ውእቱ፡ኢየሱስ፡ክርስቶስ።

በእንተ፡ሕማሙ፡ወሞቱ

21ወእምአሜሃ፡እግዚእ፡ኢየሱስ፡አኀዘ፡ይንግሮሙ፡ለአርዳኢሁ፡ከመ፡ሀለዎ፡ይሑር፡ኢየሩሳሌም፡ወብዙኀ፡ያሐምምዎ፡ረበናት፡ወሊቃነ፡ካህናት፡ወጸሐፍት፡ወይትቀተል፡ወበሣልስት፡ዕለት፡ይትነሣእ።
22ወተሰጥዎ፡ጴጥሮስ፡ወአኀዘ፡ይክልኦ፡እንዘ፡ይብል፡ሐሰ፡ለከ፡እግዚኦ፡ይኩን፡ላዕሌከ፡ዝንቱ።
23ወተመዪጦ፡ይቤሎ፡ለጴጥሮስ፡ሑር፡እምድኅሬየ፡ሰይጣን፡እስመ፡ኮንከ፡ማዕቅፍየ፡ሊተ፡እስመ፡ኢትኄሊ፡ዘእግዚአብሔር፡ዘእንበለ፡ዘሰብእ።
24ወእምዝ፡ይቤሎሙ፡እግዚእ፡ኢየሱስ፡ለአርዳኢሁ፡ዘይፈቅድ፡ይትልወኒ፡ይጽልኣ፡ለነፍሱ፡ወያጥብዕ፡ወይንሣእ፡መስቀለ፡ሞቱ፡ወይትልወኒ።
25ወዘይፈቅድ፡ያድኅና፡ለነፍሱ፡ለይግድፋ፡ወዘሰ፡ገደፋ፡ለነፍሱ፡በእንቲኣየ፡ይረክባ።
26ወምንት፡ይበቍዖ፡ለሰብእ፡ለእመ፡ኵሎ፡ዓለመ፡ረብኀ፡ወነፍሶ፡ኀጕለ፡ወምንተ፡እምወሀበ፡ሰብእ፡ቤዛሃ፡ለነፍሱ።
27እስመ፡ሀለዎ፡ለወልደ፡ዕጓለ፡እመሕያው፡ይምጻእ፡በስብሐተ፡አቡሁ፡ምስለ፡መላእክቲሁ፡ወአሜሃ፡የዐስዮ፡ለኵሉ፡በከመ፡ምግባሩ።
28አማን፡እብለክሙ፡ቦ፡እምእለ፡ሀለዉ፡ይቀውሙ፡ዝየ፡እለ፡ኢይጥዕምዎ፡ለሞት፡እስከ፡አመ፡ይሬእይዎ፡ለወልደ፡ዕጓለ፡እመሕያው፡እንዘ፡ይመጽእ፡በስብሐተ፡አቡሁ።