Biblia Etíope · Biblia Etíope en Ge'ez
Mateo 13
ወንጌል፡ዘማቴዎስ።በእንተ፡ምሳሌ፡ዘርዕ፡ወዘራዒ
1ወበይእቲ፡ዕለት፡ወፂኦ፡እግዚእ፡ኢየሱስ፡እምቤት፡ነበረ፡መንገለ፡ሐይቀ፡ባሕር።
2ወተጋብኡ፡ኀቤሁ፡ሰብእ፡ብዙኃን፡እስከ፡ሶበ፡የዐርግ፡ውስተ፡ሐመር፡ወይነብር፡ወኵሉ፡ሰብእ፡ውስተ፡ሐይቅ፡ይቀውሙ።
3ወነገሮሙ፡ብዙኀ፡በምሳሌ፡እንዘ፡ይብል፡ናሁ፡ወፅአ፡ዘራዒ፡ከመ፡ይዝራዕ።
4ወእንዘ፡ይዘርዕ፡ቦ፡ዘወድቀ፡ውስተ፡ፍኖት፡ወመጽኡ፡አዕዋፈ፡ሰማይ፡ወበልዕዎ።
5ወቦ፡ዘወድቀ፡ዲበ፡ኰኵሕ፡ኀበ፡አልቦ፡መሬት፡ብዙኅ፡ወውእተ፡ጊዜ፡ሠረጸ፡እስመ፡አልቦ፡ዕመቅ፡ለመሬቱ።
6ወሶበ፡ሠረቀ፡ፀሐይ፡መጽለወ፡ወየብሰ፡እስመ፡አልቦ፡ሥርው።
7ወቦ፡ዘወድቀ፡ውስተ፡ሦክ፡ወበቍሎ፡ጠበቆ፡ሦክ፡ወኀነቆ።
8ወቦ፡ዘወድቀ፡ውስተ፡ምድር፡ሠናይት፡ወወሀበ፡ፍሬ፡ቦ፡ዘምእት፡ወቦ፡ዘስሳ፡ወቦ፡ዘሠላሳ።
9ዘቦ፡እዝን፡ሰሚዐ፡ለይስማዕ።
10ወቀሪቦሙ፡አርዳኢሁ፡ይቤልዎ፡በእንተ፡ምንት፡በአምሳል፡ትትናገሮሙ።
11ወአውሥአ፡እግዚእ፡ኢየሱስ፡ወይቤሎሙ፡እስመ፡ለክሙ፡ተውህበ፡አእምሮ፡ምሥጢራቲሃ፡ለመንግሥተ፡ሰማያት፡ወሎሙሰ፡ኢተውህቦሙ።
12እስመ፡ለዘቦ፡ይሁብዎ፡ወይዌስክዎ፡ወለዘሰ፡አልቦ፡እለሂ፡ቦ፡የሀይድዎ።
13ወበእንተ፡ዝንቱ፡በአምሳል፡እትናገሮሙ፡እስመ፡እንዘ፡ይሬእዩ፡ኢይሬእዩ፡ወእንዘ፡ይሰምዑ፡ኢይሰምዑ፡ወኢይሌብዉ።
14ከመ፡ይትፈጸም፡ላዕሌሆሙ፡ትንቢተ፡ኢሳይያስ፡ዘይቤ፡«ሰሚዐ፡ትሰምዑ፡ወኢትሌብዉ፡ወነጽሮ፡ትኔጽሩ፡ወኢትሬእዩ።
15እስመ፡ገዝፈ፡ልቡ፡ለዝ፡ሕዝብ፡ወእዘኒሆሙ፡ደንቀወ፡እምሰሚዕ፡ወከደኑ፡አዕይንቲሆሙ፡ከመ፡ኢይርአዩ፡በአዕይንቲሆሙ፡ወበእዘኒሆሙ፡ኢይስምዑ፡ወበልቦሙ፡ኢይለብዉ፡ወኢይትመየጡ፡ኀቤየ፡ወኢይሣሀሎሙ።»
16ወለክሙሰ፡ብፁዓት፡አዕይንቲክሙ፡እስመ፡ይሬእያ፡ወእዘኒክሙ፡እስመ፡ይሰምዓ።
17አማን፡እብለክሙ፡ከመ፡ብዙኃን፡ነቢያት፡ወጻድቃን፡ፈተዉ፡ይርአዩ፡አንትሙ፡ዘትሬእዩ፡ወኢርእዩ፡ወፈተዉ፡ይስምዑ፡አንትሙ፡ዘትሰምዑ፡ወኢሰምዑ።
18አንትሙኬ፡ስምዑ፡ምሳሌሁ፡ለዘይዘርዕ።
19ኵሉ፡ዘይሰምዕ፡ነገረ፡መንግሥተ፡ሰማያት፡ወኢይሌቡ፡ይመጽእ፡እኩይ፡ወይመሥጥ፡ቃለ፡ዘተዘርዐ፡ውስተ፡ልቡ፡ውእቱኬ፡ዘተዘርዐ፡ውስተ፡ፍኖት።
20ወዘሰ፡ውስተ፡ኰኵሕ፡ተዘርዐ፡ውእቱ፡ዝ፡ዘነገረ፡ይሰምዕ፡ወሶቤሃ፡በፍሥሓ፡ይትዌከፎ።
21ወባሕቱ፡አልቦ፡ሥርው፡ላዕሌሁ፡ለጊዜሃ፡ዳእሙ፡ውእቱ፡ወከዊኖሰ፡ምንዳቤ፡ወስደት፡በእንተዝ፡ነገር፡በጊዜሃ፡የዐሉ።
22ወዘሰ፡ውስተ፡ሦክ፡ተዘርዐ፡ዝ፡ውእቱ፡ዘነገረ፡ይሰምዕ፡ወትካዘ፡ዝ፡ዓለም፡ወስፍጠተ፡ብዕል፡ተኀንቆ፡ለነገር፡ወዘእንበለ፡ፍሬ፡ይከውን።
23ወዘሰ፡ተዘርዐ፡ውስተ፡ምድር፡ሠናይት፡ዝ፡ውእቱ፡ዘነገረ፡ይሰምዕ፡ወይሌቡ፡ወይፈሪ፡ወይገብር፡ቦ፡ዘምእት፡ወቦ፡ዘስሳ፡ወቦ፡ዘሠላሳ።
በእንተ፡ምሳሌ፡ሥርናይ፡ወክርዳድ
24ካልእተ፡ምሳሌ፡አምጽአ፡ሎሙ፡እንዘ፡ይብል፡ትመስል፡መንግሥተ፡ሰማያት፡ብእሴ፡ዘዘርዐ፡ሠናየ፡ዘርዐ፡ውስተ፡ገራህቱ።
25ወእንዘ፡ይነውሙ፡ሰብኡ፡መጽአ፡ጸላኢሁ፡ወዘርዐ፡ክርዳደ፡ማእከለ፡ሥርናይ፡ወኀለፈ።
26ወሶበ፡በቈለ፡ሥርናይ፡ወፈረየ፡ፍሬ፡አሜሃ፡አስተርአየ፡ክርዳድኒ።
27ወመጺኦሙ፡አግብርቲሁ፡ለበዐለ፡ገራህት፡ይቤልዎ፡እግዚኦ፡አኮሁ፡ሠናየ፡ዘርዐ፡ዘራዕከ፡ውስተ፡ገራህትከ፡እምአይቴ፡እንከ፡ሎቱ፡ክርዳድ።
28ወይቤሎሙ፡ብእሲ፡ፀራዊ፡ገብረ፡ዘንተ፡ወአግብርቲሁሰ፡ይቤልዎ፡ትፈቅድኑ፡እንከ፡ንሑር፡ወንጻሕይዮ።
29ወይቤሎሙ፡አልቦ፡ከመ፡እንዘ፡ትጸሐይዩ፡ክርዳደ፡ኢትምሐዉ፡ምስሌሁ፡ሥርናየኒ።
30ኅድግዎሙ፡ይልሀቁ፡ኅቡረ፡እስከ፡ጊዜ፡ማእረር፡ወበጊዜ፡ማእረር፡እብሎሙ፡ለእለ፡የዐጽዱ፡እርዩ፡ቅድመ፡ክርዳደ፡ወእስርዎ፡በበከላስስቲሁ፡ወአውዕይዎ፡በእሳት፡ወሥርናዮሰ፡አስተጋብኡ፡ውስተ፡መዛግብትየ።
በእንተ፡ምሳሌ፡ኅጠተ፡ሰናፔ
31ካልእተ፡ምሳሌ፡አምጽአ፡ሎሙ፡እንዘ፡ይብል፡ትመስል፡መንግሥተ፡ሰማያት፡ኅጠተ፡ሰናፔ፡እንተ፡ነሥኣ፡ብእሲ፡ወዘርዓ፡ውስተ፡ገራህቱ።
32ወይእቲ፡ትንእስ፡እምኵሉ፡አዝርዕት፡ወሶበ፡ልህቀት፡ተዐቢ፡እምኵሎን፡አሕማላት፡ወትከውን፡ዕፀ፡ዐባየ፡እስከ፡ይመጽኡ፡አዕዋፈ፡ሰማይ፡ወያጸልሉ፡ታሕተ፡አዕፁቂሃ።
በእንተ፡ምሳሌ፡ዘብኁእ
33ካልእተ፡ምሳሌ፡አምጽአ፡ሎሙ፡ወይቤሎሙ፡ትመስል፡መንግሥተ፡ሰማያት፡ብኁአ፡ዘነሥአት፡ብእሲት፡ወአብኅአቶ፡ውስተ፡ሠለስቱ፡መስፈርተ፡ሐሪጽ፡ወአብኅአ፡ኵሎ።
34ዘንተ፡ኵሎ፡ተናገረ፡እግዚእ፡ኢየሱስ፡በምሳሌ፡ለአሕዛብ፡ወዘእንበለ፡ምሳሌሰ፡ኢተናገሮሙ።
35ከመ፡ይትፈጸም፡ዘተብህለ፡በነቢይ፡እንዘ፡ይብል፡«እከሥት፡በምሳሌ፡አፉየ፡ወእነግር፡አምሳለ፡ዘእምትካት።»
በእንተ፡ፍካሬ፡ክርዳድ፡ወሥርናይ፡ወገራህት
36ወእምዝ፡ኀደጎሙ፡ለአሕዛብ፡ወቦአ፡ውስተ፡ቤት፡ወቀርቡ፡ኀቤሁ፡አርዳኢሁ፡ወይቤልዎ፡ፈክር፡ለነ፡ምሳሌ፡ዘክርዳድ፡ወዘሥርናይ፡ወዘገራህት።
37ወአውሥአ፡ወይቤሎሙ፡ዘይዘርዕሰ፡ሠናየ፡ዘርዐ፡ወልደ፡ዕጓለ፡እመሕያው፡ውእቱ።
38ወገራህቱኒ፡ዓለም፡ውእቱ፡ወሠናይኒ፡ዘርዕ፡ውሉደ፡መንግሥት፡እሙንቱ፡ወክርዳድኒ፡ውሉዱ፡ለእኩይ።
39ወፀራዊኒ፡ዘዘርዖ፡ዲያብሎስ፡ውእቱ፡ወማእረሩኒ፡ኅልቀተ፡ዓለም፡ውእቱ፡ወዐጸዱኒ፡መላእክት፡እሙንቱ።
40ከመኬ፡የአርይዎ፡ለክርዳድ፡ቅድመ፡ወበእሳት፡ያውዕይዎ፡ከማሁ፡ይከውን፡በኅልቀተ፡ዝንቱ፡ዓለም።
41ወይፌንዎሙ፡ወልደ፡ዕጓለ፡እመሕያው፡ለመላእክቲሁ፡ወየአርዩ፡እመንግሥቱ፡ኵሎ፡ዐላውያነ፡ወእለ፡ይገብሩ፡አበሳ።
42ወይወድይዎሙ፡ውስተ፡እቶነ፡እሳት፡ወበህየ፡ይከውን፡ብካይ፡ወሐቅየ፡ስነን።
43አሜሃ፡ይበርሁ፡ጻድቃን፡ምስብዒተ፡እደ፡እምብርሃነ፡ፀሐይ፡በመንግሥተ፡አቡሆሙ፡ዘበሰማያት፡ዘቦ፡እዝን፡ሰሚዐ፡ለይስማዕ።
በእንተ፡ምሳሌ፡መድፍን፡ወባሕርይ፡ወገሪፍ
44ካዕበ፡ትመስል፡መንግሥተ፡ሰማያት፡መድፍነ፡ዘኅቡእ፡ውስተ፡ገራህት፡ወረኪቦ፡ብእሲ፡ኀብኣ፡ወእምፍሥሓሁ፡ሖረ፡ወሤጠ፡ኵሎ፡ዘቦ፡ወተሣየጣ፡ለይእቲ፡ገራህት።
45ካዕበ፡ትመስል፡መንግሥተ፡ሰማያት፡ብእሴ፡ሠያጤ፡ዘየኀሥሥ፡ባሕርየ፡ሠናየ።
46ወረኪቦ፡አሐተ፡ባሕርየ፡እንተ፡ብዙኅ፡ሤጣ፡ሖረ፡ወሤጠ፡ኵሎ፡ዘቦ፡ወተሣየጣ።
47ካዕበ፡ትመስል፡መንግሥተ፡ሰማያት፡ገሪፈ፡እንተ፡ተወድየት፡ውስተ፡ባሕር፡ወአስተጋብአት፡ኵሎ፡ዘመደ፡ዓሣት።
48ወሶበ፡መልአት፡አዕረግዋ፡ውስተ፡ሐይቅ፡ወነቢሮሙ፡አረዩ፡ሠናዮ፡ውስተ፡ሙዳዮሙ፡ወእኩዮሰ፡ገደፍዎ፡አፍኣ።
49ከማሁ፡ይከውን፡በኅልቀተ፡ዓለም፡ይመጽኡ፡መላእክት፡ወይፈልጡ፡እኩያነ፡እማእከሎሙ፡ለጻድቃን።
50ወይወድይዎሙ፡ውስተ፡እቶነ፡እሳት፡ኀበ፡ሀሎ፡ብካይ፡ወሐቅየ፡ስነን።
51ወይቤሎሙ፡እግዚእ፡ኢየሱስ፡ለበውክሙኑ፡እንከ፡ዘንተ፡ኵሎ፡ወይቤልዎ፡እወ፡እግዚኦ።
52ወይቤሎሙ፡በእንተ፡ዝንቱ፡ኵሉ፡ጸሓፊ፡ዘይጸመድ፡ለመንግሥተ፡ሰማያት፡ይመስል፡ብእሴ፡በዓለ፡ቤት፡ዘያወፅእ፡እመዝገቡ፡ሐዲሰ፡ወብሉየ።
53ወፈጺሞ፡እግዚእ፡ኢየሱስ፡እሎንተ፡ምሳሌያተ፡ተንሥአ፡እምህየ።
54ወሖረ፡ሀገሮ፡ወመሀሮሙ፡በምኵራቦሙ፡እስከ፡ሶበ፡ይዴመሙ፡ወይብሉ፡እምአይቴ፡እንከ፡ሎቱ፡ዝንቱ፡ኵሉ፡ጥበብ፡ወኀይል።
55አኮኑ፡ዝንቱ፡ውእቱ፡ወልዱ፡ለጸራቢ፡ወስማ፡ለእሙ፡ማርያም፡ወአኀዊሁ፡ያዕቆብ፡ወዮሳ፡ወስምዖን፡ወይሁዳ።
56ወአኃቲሁ፡ኵሎን፡ኀቤነ፡ሀለዋ፡እምአይቴ፡እንከ፡ሎቱ፡ዝንቱ፡ኵሉ፡ጥበብ፡ወኀይል፡ወአኀዙ፡ያንጐርጕሩ፡በእንቲኣሁ።
57ወይቤሎሙ፡እግዚእ፡ኢየሱስ፡አልቦ፡በኀበ፡ኢይከብር፡ነቢይ፡ዘእንበለ፡በሀገሩ፡ወበቤቱ።
58ወኢገብረ፡በህየ፡ኀይለ፡ብዙኀ፡በእንተ፡ኢአሚኖቶሙ።