Biblia Etíope · Biblia Etíope en Ge'ez
Marcos 13
ወንጌል፡ዘማርቆስ።በእንተ፡ንሥተተ፡ቤተ፡መቅደስ
1ወወፂኦ፡እምኵራብ፡ይቤሎ፡አሐዱ፡እምአርዳኢሁ፡ሊቅ፡ርኢ፡ምንተ፡ይመስል፡ንድቁ፡ወእበኒሁ።
2ወአውሥአ፡እግዚእ፡ኢየሱስ፡ወይቤሎ፡ትሬኢኑ፡ዘንተ፡ኵሎ፡ንድቀ፡ዐቢየ፡ኢይትኀደግ፡ዝየ፡እብን፡ዲበ፡እብን፡ዘኢይትነሠት።
በእንተ፡ኅልቀተ፡ዓለም
3ወእንዘ፡ይነብር፡ውስተ፡ደብረ፡ዘይት፡አንጻረ፡ምኵራብ፡ተስእልዎ፡በባሕቲቶሙ፡ጴጥሮስ፡ወያዕቆብ፡ወዮሐንስ፡ወእንድርያስ።
4ወይቤልዎ፡ንግረነ፡ማእዜ፡ይከውን፡ዝንቱ፡ወምንት፡ትእምርቱ፡አመ፡ይከውን፡ዝንቱ፡ኵሉ።
5ወአውሥአ፡እግዚእ፡ኢየሱስ፡ወአኀዘ፡ይበሎሙ፡ዑቁ፡ኢያስሕቱክሙ።
6እስመ፡ብዙኃን፡ይመጽኡ፡በስምየ፡እንዘ፡ይብሉ፡አነ፡ውእቱ፡ክርስቶስ፡ወያስሕትዎሙ፡ለብዙኃን።
7ወአመ፡ሰማዕክሙ፡አጽባእተ፡ወድምፀ፡ጸባኢት፡ኢትደንግፁ፡እስመ፡ሀለዎ፡ይኩን፡ዝንቱ፡ወባሕቱ፡አኮ፡ሶቤሃ፡ዘየኀልቅ።
8ወይትነሣእ፡ሕዝብ፡ዲበ፡ሕዝብ፡ወነገሥት፡ላዕለ፡ነገሥት፡ወይከውን፡ድልቅልቅ፡በበ፡ብሔሩ፡ወይመጽእ፡ረኃብ፡ወዝንቱ፡ቀዳሚሁ፡ለፃዕር።
9ወአንትሙሰ፡ዑቁ፡ርእሰክሙ፡ወይወስዱክሙ፡አዕዋዳተ፡ወይቀሥፉክሙ፡በመኳርብት፡ወይትባጽሑክሙ፡ኀበ፡መላእክት፡ወነገሥት፡በእንቲኣየ፡ከመ፡ይኩን፡ስምዐ፡ላዕሌሆሙ።
10ወለኵሎሙ፡አሕዛብ፡ይደሉ፡ይቅድሙ፡ወይስብክዎ፡ለወንጌል።
11ወሶበሂ፡ያበጽሑክሙ፡ወይሜጥዉክሙ፡ኢትቅድሙ፡ተኀልዩ፡ዘትብሉ፡ወዘትነብቡ፡ዘአንበበክሙ፡ሶቤሃ፡ንቡ፡እስመ፡ኢኮንክሙ፡አንትሙ፡ዘትነብቡ፡ዘእንበለ፡መንፈስ፡ቅዱስ።
12ወያገብእ፡እኅው፡እኅዋሁ፡ለሞት፡ወአብ፡ውሉዶ፡ወውሉድ፡ይትነሥኡ፡ዲበ፡አዝማዲሆሙ፡ወይቀትልዎሙ።
13ወትከውኑ፡ጽሉኣነ፡በኀበ፡ኵሉ፡ሰብእ፡በእንተ፡ስምየ፡ወዘሰ፡አዝለፈ፡ትዕግሥቶ፡ውእቱ፡ይድኅን።
14ወሶበ፡ርኢክሙ፡ኀሳሮ፡ለሙስና፡ዘይቤ፡ዳንኤል፡ነቢይ፡ዘይቀውም፡ውስተ፡መካን፡ቅዱስ፡ኀበ፡ኢይደሉ፡ዘያነብብ፡ለይለቡወይእተ፡አሚረ፡እለ፡ውስተ፡ይሁዳ፡ይጐዩ፡ውስተ፡አድባር።
15ወዘኒ፡ውስተ፡ናሕስ፡ሀሎ፡ኢይረድ፡ውስተ፡ቤት፡ወኢይባእ፡ይንሣእ፡ዘኮነ፡እምቤት።
16ወዘኒ፡ገዳመ፡ሀሎ፡ኢይትመየጥ፡ድኅሬሁ፡ይንሣእ፡ልብሶ።
17ወባሕቱ፡አሌ፡ሎን፡ለፅኑሳት፡ወለእለ፡የሐፅና፡ውእተ፡አሚረ።
18ወጸልዩ፡ከመ፡ኢይኩን፡ጕያክሙ፡በክረምት።
19እስመ፡ይከውን፡ውእተ፡አሚረ፡ዐቢይ፡ሕማም፡ዘእምአመ፡ኮነ፡ዓለም፡ኢኮነ፡ከማሁ፡ወእምአመ፡ፈጠረ፡እግዚአብሔር፡ዓለመ፡ኢኮነ፡ወኢይከውንሂ።
20ወሶበ፡አኮ፡ዘአኅጸሮን፡እግዚአብሔር፡ለእማንቱ፡መዋዕል፡እምኢድኅነ፡ኵሉ፡ዘሥጋ፡ወባሕቱ፡በእንተ፡ኅሩያኒሁ፡እለ፡ኀረየ፡እግዚአብሔር፡የኀጽራ፡እማንቱ፡መዋዕል።
21ወይእተ፡አሚረ፡እመቦ፡ዘይቤለክሙ፡ነዋ፡ዝየ፡ሀሎ፡ክርስቶስ፡ወነዋ፡ከሃከ፡ኢትእመኑ።
22እስመ፡ይመጽኡ፡ሐሳውያነ፡መሲሕ፡ወሐሳውያነ፡ነቢያት፡ወይገብሩ፡ተአምረ፡ወመንክረ፡ከመ፡ያስሕቱ፡ወሶበሰ፡ይትከሀሎሙ፡እምአስሐትዎሙ፡ለኅሩያንሂ።
23ወአንትሙሰ፡ዑቁ፡ናሁ፡አቅደምኩ፡ነጊሮተክሙ፡ኵሎ።
በእንተ፡ምጽአቱ፡ለወልደ፡ዕጓለ፡እመሕያው
24ወባሕቱ፡ይእተ፡አሚረ፡ምስለ፡ዝ፡ኵሉ፡ሕማም፡ፀሓይኒ፡ይጸልም፡ወወርኅኒ፡ኢይሁብ፡ብርሃኖ።
25ወከዋክብትኒ፡ይወድቁ፡እምሰማይ፡ወይትከወስ፡ኀይለ፡ሰማያት።
26ወአሜሃ፡ይሬእይዎ፡ለወልደ፡ዕጓለ፡እመሕያው፡እንዘ፡ይመጽእ፡በደመና፡ምስለ፡ኀይል፡ወብዙኅ፡ስብሐት።
27ወይእተ፡አሚረ፡ይፌንዎሙ፡ለመላእክቲሁ፡ወያስተጋብእዎሙ፡ለኅሩያኒሁ፡እምአርባዕቱ፡ነፋሳት፡ወእምአጽናፈ፡ምድር፡እስከ፡አጽናፈ፡ሰማይ።
28ወእምበለስ፡አእምሩ፡አምሳሊሁ፡እምከመ፡ኮነ፡አጽቃ፡ድኩመ፡ወሠረጸ፡ቈጽላ፡ይትዐወቅ፡ከመ፡አልጸቀ፡ማእረር።
29ከማሁኬ፡አንትሙኒ፡እምከመ፡ርኢክሙ፡ዘንተ፡ኵሎ፡ከመ፡ኮነ፡አእምሩ፡ከመ፡በጽሐ፡ኀበ፡ኆኅት።
30አማን፡እብለክሙ፡ከመ፡ኢተኀልፍ፡ዛቲ፡ትውልድ፡ዘእንበለ፡ይኩን፡ዝንቱ፡ኵሉ።
31ሰማይ፡ወምድር፡የኀልፍ፡ወቃልየሰ፡ኢኀልፍ።
በእንተ፡ሰዓት፡ወዕለት
32ወበእንተሰ፡ይእቲ፡ዕለት፡ወይእቲ፡ሰዓት፡አልቦ፡ዘየአምራ፡ኢመላእክተ፡ሰማይ፡ወኢወልድ፡ዘእንበለ፡አብ፡ባሕቲቱ።
33ዑቁ፡ትግሁ፡ወጸልዩ፡እስመ፡ኢተአምሩ፡ማእዜ፡መዋዕለ፡ጊዜሁ።
34እስመ፡ከመ፡ብእሲ፡ዘይነግድ፡ወየኀድግ፡ቤቶ፡ወይሁቦሙ፡ግብሮሙ፡ለአግብርቲሁ፡ለለ፡አሐዱ፡እምኔሆሙ፡ወይኤዝዞ፡ለዐጻዊኒ፡ከመ፡ይትጋህ።
35ትግሁ፡እንከ፡እስመ፡ኢተአምሩ፡ማእዜ፡ይመጽእ፡በዓለ፡ቤት፡እመሂ፡ሠርከ፡ወእመሂ፡መንፈቀ፡ሌሊት፡ወእመሂ፡ጊዜ፡ይነቁ፡ዶርሆ፡ወእመሂ፡ጸቢሖ።
36ኢይምጻእክሙ፡ግብተ፡ወኢይርከብክሙ፡እንዘ፡ትነውሙ።
37ወናሁ፡እብለክሙ፡ለኵልክሙ፡ትግሁ።