Biblia Etíope · Biblia Etíope en Ge'ez
Malaquías 3
ዘምልክያስ፡ነቢይ።31ናሁ፡አነ፡እፌኑ፡መልእክየ፡ወይሬኢ፡ፍኖተ፡ቅድመ፡ገጽከ፡ወይመጽእ፡ግብተ፡ውስተ፡ጽርሑ፡እግዚአብሔር፡ዘአንትሙ፡ተኀሥሡ፡ወመልአከ፡ሥርዓትየ፡ዘአንትሙ፡ትፈቅዱ።ናሁ፡ይመጽእ፡ይቤ፡እግዚአብሔር፡ዘኵሎ፡ይመልክ።
2ወመኑ፡ይትዔገሣ፡ለመዐተ፡መጽአቱ፡ወመኑ፡ይትቃወማ፡ለእሳት፡ርእየቱ፡እስመ፡ለሊሁ፡የሐውር፡ከመ፡እሳተ፡ምንሃብ፡ወከመ፡እለ፡የኀፅቡ።
3ወይነብር፡ወይሰብክ፡ወያጸሪ፡ከመ፡ብሩር፡ወከመ፡ወርቅ፡ወይነጥፎሙ፡ለደቂቀ፡ሌዊ፡ወይሰጠዎሙ፡ከመ፡ወርቅ፡ወከመ፡ብሩር፡ወይከውንዎ፡ለእግዚአብሔር፡እለ፡ያበውኡ፡መሥዋዕተ፡በጽድቅ።
4ወታሥመሮ፡ለእግዚአብሔር፡መሥዋዕተ፡ይሁዳ፡ወኢየሩሳሌም፡በአምጣነ፡መዋዕለ፡ዓለም፡ወበከመ፡ዓመተ፡ቀዲሙ።
5ወኣመጽኦሙ፡ኀቤክሙ፡በፍሥሓ፡ወእከውኖሙ፡ለሰብአ፡ሥራይ፡ወለዘማዊያን፡ሰማዕተ፡ሐሰት፡ወለእለ፡ይምሕሉ፡በስምየ፡በሐሰት፡ወለእለ፡የሀይድዎሙ፡ዐስቦሙ፡ለዐሳብ፡ወለእለ፡ይኴርዕዎሙ፡ለእቤራት፡ወለእጓለ፡ማውታ፡ወለእለ፡ይመይጡ፡ፍትሐ፡ፈላሲ፡ወለእለ፡ ኢይፈርሁ፡ስምየ፡ይቤ፡እግዚአብሔር፡ዘኵሎ፡ይመልክ።
6በከመ፡አነ፡እግዚአብሔር፡አምላክክሙ፡ኢይትዌለጥ፡ከመሁ፡አንትሙሂ፡ደቂቀ፡ያዕቆብ።
7ኢተኀድጉ፡ዐመፃ፡ዘአበዊክሙ፡እለ፡ዐለዉ፡ሕግየ፡ወኢዐቀብዎ።ተመየጡ፡ኀቤየ፡ወእትመየጥ፡ኀቤክሙ፡ይቤ፡እግዚአብሔር፡ዘኵሎ፡ይመልክ፡ወአንትሙሰ፡ትብሉ፡በምንትኑ፡ንትመየጥ።
8ወያዐቅጾኑ፡ሰብእ፡ለእግዚአብሔር፤ናሁኬ፡አንትሙ፡እግዚአብሔር፡ወናሁ፡ትብሉ፡በምንትኑ፡አዕቀጽናከ።ዓሥራቲክሙኒ፡ወቀዳሚያቲክሙኒ፡ኀቤክሙ፡ውእቱ።
9ወተዐውሮ፡ተዐወርሙ፡ወአንትሙ፡አዕቀጽክሙ፡ኪያየ።
10ወዓመቲሁኒ፡ኀልቀ፡ወአባእክሙ፡ኵሎ፡ማእረረክሙ፡ውስተ፡መዛግብት፡ወይከውን፡በርበረ፡ውስተ፡ቤተ።ኀልይዎኬ፡በዝንቱ፡ይቤ፡እግዚአብሔር፡ዘኵሎ፡ይመልክ።ለእመ፡ኢያርኀውኩ፡ለክሙ፡አስራበ፡ሰማይ፡ወእሱጥ፡ለክሙ፡በረከትየ፡እስከ፡የአክለክሙ።
11ወእሁበክሙ፡ለሲሳይክሙ፡ወኢያማስን፡ለክሙ፡ፍሬ፡ምድርክሙ፡ወኢየዐብር፡ወይንክሙ፡ዘውስተ፡ገዳም፡ይቤ፡እግዚአብሔር፡ዘኵሎ፡ይመልክ።
12ወያስተበጽዐክሙ፡ኵሉ፡አሕዛብ፡እስመ፡ምድር፡ሥምርት፡እንተ፡እምርት፡አንትሙ፡ይቤ፡እግዚአብሔር፡ዘኵሎ፡ይመልክ።
13ወአክበድክሙ፡ላዕሌየ፡ነገረክሙ፡ይቤ፡እግዚአብሔር፡ወትቤሉ፡በምንት፡ሐመይናከ።
14እስመ፡ትቤሉ፡ከንቶ፡ዘተቀነይነ፡ለእግዚአብሔር፡ወምንተ፡ረባሕነ፡ዘዐቀብነ፡ትእዛዘ።ወናሁ፡ተቀነይነሂ፡እስመ፡ተቀነይነ፡ቅድሜሁ፡ለእግዚአብሔር።
15ወናሁ፡ዮም፡ናስተበፅዕ፡ባዕድ፡ወየሐንጹ፡ወይገብሩ፡ስመ፡ሎሙ፡ወተቃወምዎ፡ለእግዚአብሔር፡ወድኅኑ።
16ከመዝ፡ሐመይዎ፡እለ፡ይፈርህዎ፡ለእግዚአብሔር፡አሐዱ፡አሐዱ፡ምስለ፡ካልኡ፡ወርእየ፡እግዚአብሔር፡ወሰምዐ፡ወጸሐፈ፡መጽሐፈ፡ተዝካር፡ቅድሜሁ፡ለእለ፡ይፈርህዎ፡ለእግዚአብሔር፡ወለእለ፡ኢይፈርሁ፡ስሞ።
17ወይከውኑኒ፡ይቤ፡እግዚአብሔር፡ዘኵሎ፡ይመልክ፡ለእመ፡እገብር፡አነ፡ሕይወተ፡ወአኀርዮሙ፡በከመ፡ያበድር፡ብእሲ፡ወልዶ፡ዘይትቀነይ፡ሎቱ።
18ወትትመየጡ፡ወትሬኢዩ፡ማእከለ፡ጽድቅ፡ወማእከለ፡ኀጢአት፡ወማእከለ፡ዘይትቀነይ፡ለእግዚአብሔር፡ወማእከለ፡ዘኢይትቀነይ።